Lēsoni 39
“Ko Hono Fakahaohaoa ʻo e kakai Māʻoniʻoní”
ʻEfesō
-
Ko e hā ne akoʻi ʻe Paula ʻi he ʻEfesō 2:20 mo e ʻEfesō 4:11–14 fekauʻaki mo e mahuʻinga ʻo e kau ʻAposetoló mo e kau palōfitá? Ko e hā hono ʻuhinga ʻoku mahuʻinga ai ʻa e kau ʻaposetolo mo e kau palōfita moʻui ki he siasi moʻoní. Ko e hā ha ngaahi akonaki mei he kau ʻaposetoló mo e kau palōfita ʻi he ngaahi ʻaho kimui ní, ʻoku tokoni ki heʻetau fakalakalaka ki he haohaoá mo e uouangatahá?
-
ʻE fakamālohia fēfē ʻe he naʻinaʻi ʻa Paula ʻi he ʻEfesō 6:1–4, ʻa e ngaahi vā fakafāmilí mo pukepuke ʻa e uouangataha ʻi he ʻapí? Ko e hā ha akonaki kuo foaki mai ʻe he kau ʻaposetolo mo e kau palōfita ʻo e ngaahi ʻaho kimui ní fekauʻaki mo e ngaahi fāmilí?
-
Ko e hā ha ngaahi konga kehekehe ʻo e teunga tau ʻo e ʻOtuá, ʻi hono ui ʻe Paulá? Ko e hā ʻoku fakafofongaʻi ʻe he kongá takitaha? (Vakai ʻEfesō 6:13–18; T&F 27:15–18.) ʻE lava fēfē ʻe he ngaahi konga takitaha ʻo e teunga taú ʻo maluʻi kitautolu mei he ngaahi tohoaki ʻa Sētané? Ko e hā te tau lava ʻo fai ke tui ai ʻa e teunga tau ko ʻení ʻi he ʻaho kotoa pē?
Fokotuʻu ki hono Aleaʻi ʻe he Fāmilí
Tufa ke takitāuhi ʻa e mēmipá takitaha ʻo e fāmilí he laʻi pepa. Kole ange ki he mēmipa takitaha ke nau haehae ʻene lauʻi pepá. Hili iá, peá ke ʻoange ki ha mēmipa ʻo e fāmilí ha tohi matolu peá ke kole ange ke ne feinga ke ne haeʻi kotoa ʻa e ʻū lauʻi pēsí ʻi he taimi pē ʻe taha. Fakamatalaʻi ange ʻoku hangē pē mālohi ʻo e tohi ko ʻení, ko hotau mālohí, ʻi he taimi ʻoku tau uouangataha ai ʻi hotau ngaahi fāmilí pea mo e Siasí. Mou aleaʻi ha meʻa te mou lava ʻo fai fakafāmili ke fakalakalaka ai hoʻomou maʻumaʻuluta ʻi ʻapi, uōtí pe koló.