“Kuó u Lavaʻi ʻa e Fakapuepuée”

1 Tīmote mo e 2 Tīmote; Taitusi

Ko e hā hono ʻuhinga ʻoku “ako maʻu ai pē, ka ʻoku ʻikai siʻi te nau lavaʻi ʻa e ʻilo ʻo e moʻoní” ʻe ha kakai ʻe niʻihi? Te tau lava fēfē ʻo fakapapauʻi ʻoku ʻomi kiate kitautolu ʻe heʻetau akó ha ʻilo ki he moʻoní? Kuo tāpuekina fēfē hoʻo moʻuí ʻe hoʻo ʻilo ko ia ʻa e ngaahi tokāteline moʻoni ʻo e ongoongoleleí?
ʻOkú ke pehē ʻoku ʻuhinga ki he hā ʻa e “ʻi he kakai tuí ko e fakaʻilongá”? (1 Tīmote 4:12). Te ke hoko fēfē ko ha faʻifaʻitakiʻanga “ʻi he kakai tuí”? 1 Tīmote 4:12? Kuo tākiekina fēfē koe ʻe ha taha naʻá ne hoko ko ha faʻifaʻitakiʻanga “ʻi he kakai tuí”?
Ko e hā ha ʻuhinga ʻoku hoko ai ʻa e ʻofa ʻi he paʻangá “ko e tefito ia ʻo e kovi kotoa peé?” (Vakai, 1 Tīmote 6:7–10). Te tau lava fēfē ʻo fakapapauʻi ʻoku ʻikai ke tukutaha ʻetau tokangá ʻi he paʻangá mo e ngaahi koloa fakaemāmani kehé? (Vakai, 1 Tīmote 6:17–19, Sēkope 2:18–19).

Fokotuʻu ki hono Aleaʻi ʻe he Fāmilí

Fakaʻaliʻali ha ngaahi fakatātā, hangē ko ha ngaahi fakatātā mei he Ngaahi Fakatātā ʻo e Ongoongoleleí pe ko e ngaahi makasini ʻa e Siasí, ʻa ia ʻoku nau fakamatalaʻi ha ngaahi talanoa fakafolofola ʻokú ke maheni mo ia. Hili iá pea mou hivaʻi ha ngaahi himi pe ngaahi hiva Palaimeli. Hili haʻamou vakai ki he fakatātaá takitaha mo hivaʻi ʻa e himí pe hivá takitaha, kole ki he fāmilí ke nau fokotuʻu atu ha ngaahi tokāteline, pe ngaahi akonaki ʻe lava ke fakahoko ʻi hano fakaʻaongaʻi ʻa e fakatātaá, himí pe hivá.