“Ko e Hā ʻa e Fakaʻilonga ʻo Hoʻo Haʻú?”

Siosefa Sāmita 1 (Mātiu 24)

Ko e hā e fakaʻilonga ʻo e Hāʻele ʻAnga Ua mai ʻa e Fakamoʻuí ʻoku fakamatalaʻi ʻi he Siosefa Sāmita 1:22? Ko e hā ha fakamoʻoni kuó ke mamata kuo fakakakato ai ʻa e kikite ko ʻení? Te tau lava fēfē ʻo fakaʻehiʻehi mei hano takihalaʻi kitautolu ʻe he kau palōfita loí? (Vakai, Mātiu 7:15–20; T&F 45:57; 46:7–8).
Naʻe akonaki ʻa e ʻEikí ʻoku totonu ke ʻoua naʻa tau “puputuʻu” ʻi he fanongo ki he taú mo e ongoongo ʻo e taú. (Siosefa Sāmita 1:23). Te tau lava fēfē ʻo maʻu ha nonga he lolotonga e ngaahi taimi puputuʻu ko iá? (Vakai, 1 Sione 4:16–18, T&F 6:34–36; 45:34–35; 59:23).
Naʻe folofola ʻa e ʻEikí ki hono kau muimui ʻi Selūsalemá ke nau “tuʻu leva ʻi he potu māʻoniʻoní” (Siosefa Sāmita 1:12), pea kuó ne ʻomi mo e ekinaki tatau ʻi hotau kuongá (T&F 87:8; 101:22). Ko e hā ha ngaahi potu māʻoniʻoni ʻoku totonu ke tau tuʻu ai?

Fokotuʻu ki hono Aleaʻi ʻe he Fāmilí

Aleaʻi ha ngaahi fakaʻilonga ʻe hoko ki muʻa ʻi he Hāʻele ʻAnga Uá ʻo hangē ko ia ʻoku hiki ʻi he Folofola Fekauʻaki Mo Iá, ʻi he vahe ko ʻení. Tufaki atu ha ngaahi nusipepa pe makasini ki muí ni ʻa e Siasí. Fekau e mēmipa takitaha ʻo e fāmilí ke nau ngāue taautaha pe tautau toko ua ʻo kumi ʻi he nusipepa pe makasini ʻa e Siasí, ha ngaahi f akaʻilonga ʻo e Hāʻele ʻAnga Ua mai ʻa e ʻEikí. ʻI heʻenau fevahevaheʻaki ʻa e ngaahi meʻa kuo nau ʻiló, mou aleaʻi leva pe ʻe anga fēfē haʻanau teuteu ki he Hāʻele Anga Uá Maí.