Lēsoni 22
“Maʻu ʻa e Puleʻanga Kuo Teu Moʻomoutolú”
-
ʻOku fakafofongaʻi ʻe he talanoa fakatātā ʻo e kau taupoʻou ʻe toko hongofulú (Mātiu 25:11–13), ʻa e Hāʻele ʻAnga Ua Maí. Ko e tangata taʻané ʻokú ne fakafofongaʻi ʻe ia ʻa e Fakamoʻuí, pea ko e kau taupoʻou ʻe hongofulú ʻokú ne fakafofongaʻi ʻe ia ʻa e kāingalotu ʻo e Siasí, pea ko e lolo ko ia ʻi he māmá ʻokú ne fakafofongaʻi ʻe ia ʻa e teuteu ki he Hāʻele ʻAnga Ua Maí. Ko e hā ha ngaahi founga te tau lava ʻo tānaki ai ha “lolo” ki heʻetau ngaahi “māmá”?
-
ʻI he Mātiu 25:14–30, ʻoku fakafofongaʻi ai ʻe he ngaahi talēnití ʻa e meʻafoaki mei he ʻOtuá. Kuo foaki ki he tokotaha kotoa pē ha meʻafoaki mei he ʻOtuá (T&F 46:11–12), pea ʻoku faingofua hono ʻiloʻi ʻo ha ngaahi meʻafoaki ia ʻe niʻihi ʻi he toenga. Ko e hā ha ngaahi meʻafoaki ʻe faingataʻa ke ʻiloʻi ka ʻe lava ʻo fakaʻaongaʻi ke tokoniʻi ʻaki e niʻihi kehé mo fakalāngilangiʻi ʻaki ʻa e ʻOtuá?
-
ʻOkú ke fakakaukau ko e hā e ʻuhinga ʻa e Fakamoʻuí ʻi he taimi naʻá ne folofola ai, “Ko e meʻa ʻi hoʻo fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú”? (Mātiu 25:40; vakai foki Mōsaia 2:17).
Fokotuʻu ki hono Aleaʻi ʻe he Fāmilí
Lau e talanoa fakatātā ko ia ʻo e ngaahi talēnití (Mātiu 25:14–30), peá ke fakamatalaʻi ange ʻoku fakafofongaʻi ʻe he ngaahi talēnití ʻa e ngaahi meʻafoaki mei he ʻOtuá. Kole ki he mēmipa takitaha ʻo e fāmilí ke nau fakahā mai ha talēniti pe meʻafoaki ʻe taha pe ua kuo tāpuekina ʻaki kinautolu. Mou aleaʻi ha ngaahi founga ʻe lava ai ʻe he kau mēmipa ʻo e fāmilí ʻo fakaʻaongaʻi ʻa e ngaahi meʻafoaki ko ʻení ke tokoni ki hono langa ʻo e puleʻanga ʻo e ʻOtuá ʻi he māmaní.