“Ko e Kau Fakamoʻoni ʻA Kimautolu”

ʻOku tokoniʻi fēfē ʻe he meʻaʻofa ʻo e Laumālie Māʻoniʻoní ʻa e kau ʻAposetoló ʻi honau fatongia ko e kau fakamoʻoni ʻo Sīsū Kalaisí? (Vakai, Sione 15:26–27, 1 Kolinitō 12:3). Ko e hā e fatongia ʻo e Laumālie Māʻoniʻoní ʻi heʻetau feinga ke akoʻi ʻa e ongoongoleleí? (Vakai, 2 Nīfai 33:1, T&F 42:14).
Ko e hā e tali ʻa Pita kiate kinautolu naʻa nau manukiʻi e kau ʻAposetoló ʻi heʻenau lea ʻaki ʻa e lea kehekehé? (Vakai, Ngāue 2:14–24, 36). Ko e hā ʻokú ke leleiʻia ai ʻi he tali ʻa Pitá? Ko e hā hono ʻuhinga ʻoku mahuʻinga ai ke tau maʻu ha fakamoʻoni kia Sīsū Kalaisi mo hono misiona fakalangí? ʻE tokoniʻi fēfē nai kitautolu ʻe he Laumālie Māʻoniʻoní ke tau vahevahe ʻetau ngaahi fakamoʻoní?
Naʻe fakaʻaongaʻi ʻe Pita ha mana ko ha faingamālie ke ne fakamoʻoniʻi ai ʻa Sīsū Kalaisi (Ngāue 3:12–26; 4:5–12). Ko e hā ha ngaahi faingamālie ʻokú ke maʻu ke fakamoʻoniʻi ai ʻa Kalaisi? Kuo fēfē hano tāpuekina koe ʻi haʻo hoko ko ha fakamoʻoni (pe ko haʻo fanongo kuo hoko ha niʻihi ko ha kau fakamoʻoni) ʻo Sīsū Kalaisi?

Fokotuʻu ki hono Aleaʻi ʻe he Fāmilí

Lau ʻa e Mōsaia 18:8–9, peá ke tokanga makehe ki he fakahinohino ko ia ke tau “tuʻu ko ha kau fakamoʻoni ʻo e ʻOtuá ʻi he taimi kotoa pē, pea ʻi he meʻa kotoa pē, pea ʻi he feituʻu kotoa peé.” Fehuʻi ki he kau mēmipa ʻo e fāmilí pe ʻe anga fēfē haʻanau muimui ki he fakahinohino ko ʻení. Kole ki ha mēmipa ʻo e fāmilí ke ne fakamatala mai ha meʻa ne hoko ki ai peá ne hoko ai ko ha fakamoʻoni ʻo Sīsū Kalaisi mo ʻene ongoongoleleí. Fakalotolahiʻi e fāmilí ke nau hoko ko ha kau fakamoʻoni ʻo e Fakamoʻuí ʻi he ngaahi meʻa te nau fakahoko mo leaʻaki ʻi he uike ka hoko maí.