Миний суурь зарчим: Наманчил мөн дуулгавартай бай

Дээд талын хугацаа: 20 минут

Тунгаан бод:

Наманчлал, дуулгавартай байдал хоёр бие даах чадвартай хэрхэн холбогддог вэ?

Үз:

“Дуулгавартай байдал адислалуудыг авчирдаг” видео бичлэг srs.lds.org/videos дээр байгаа. (Видео бичлэг байхгүй бол энэ бүлгийн төгсгөл дэх бичвэрийг уншина уу.)

Ярилц:

Та Бурханы хуулиудад дуулгавартай байснаар ямар адислал хүлээн авсан бэ? Наманчлал бидэнд өсөж хөгжихөд хэрхэн тусалдаг вэ?

Унш:

Сургаал ба Гэрээ 130:20–21 ба бошиглогч Иосеф Смитийн хэлсэн үгээс авсан эшлэл.

Сургаал ба Гэрээ 130:20–21

“… Бүх адислал тулгуурлагдсан—хууль бий. Мөн бид ямар ч адислалыг Бурханаас авлаа гэхэд, энэ нь тулгуурлагдсан тэрхүү хуульд дуулгавартай байснаар буюу.”

Иосеф Смит

“Их Эзэн зарлигласан л бол биелүүл гэдэг дүрмийг би өөртөө бий болгосон юм.”

Сүмийн ерөнхийлөгчдийн сургаалаас: Иосеф Смит (2007), 183

Үйл ажиллагаа (5 минут)

Тодорхой хуульд дуулгавартай байх нь тодорхой адислалыг хүртэхэд чиглүүлдэг.

1-р алхам: Зүүн доод талын баганад хүсэж байгаа адислалуудаа бич.

2-р алхам: Баруун доод баганад хүсэж буй адислалаа авахын тулд дуулгавартай байх ёстой хууль эсвэл зарчмаа тодорхойл.

Адислалуудын хүснэгт

Ярилц:

Иошуа 3:5-ыг болон ахлагч Жэффри Р.Холланд, ерөнхийлөгч Спэнсэр В.Кимбалл нарын хэлсэн үгээс авсан эшлэлийг унш. Бид яагаад бие даахын тулд хичээхдээ наманчилж, өөрсдийгөө ариусгаж, сайныг үйлдэх хэрэгтэй байдаг вэ?

Иошуа 3:5

“Өөрсдийгөө ариусгацгаа. Учир нь маргааш Эзэн та нарын дунд гайхамшигт зүйлсийг хийх болно.”

Ахлагч Жэффри Р.Холланд

“Их Эзэн сайжрахыг хүсдэг мөн зарлигуудын хэрэгцээг хүлээн авч, тэдгээрийг дагахыг хичээдэг … хүмүүсийг адисалдаг. Тэр наманчилж, засаж, өөрчлөх хэрэгтэй бүхнийг өөрчлөөд, үргэлжлүүлэн урагшлахад тань туслах болно. Тун удалгүй та нар өөрсдийн хайж байгаа амжилтад хүрэх болно.”

“Маргааш Эзэн та нарын дунд гайхамшигт зүйлсийг хийх болно,” Ensign, May 2016, 126 эсвэл 2016 оны 4-р сарын Ерөнхий чуулган, 115

Ерөнхийлөгч Спэнсэр В.Кимбалл

“Хэрэв бид дуулгавартай байдлаас илүүтэй тансаг байдал, хэрэгцээнээсээ хэтэрсэн зүйлд анхаарлаа хандуулбал [Бурханы] бидэнд өгөхийг хүсдэг адислалуудыг алдах болно.”

Teachings of Spencer W. Kimball, ed. Edward L. Kimball (1982), 212

Амлалт өг:

Долоо хоногийн турш дараах үйлдлүүдийг хийхээр амла.

• Дээрх үйл ажиллагаагаар, сонгосон хууль эсвэл зарчмаа дуулгавартай дага.

• Өнөөдөр дуулгавартай байдлын талаар сурсан мэдсэн зүйлээ гэр бүлийнхэн, найз нөхөдтэйгөө хуваалц.

Дуулгавартай байдал адислалуудыг авчирдаг

Хэрэв видео бичлэгийг үзэх боломжгүй бол бүлгийн нэг гишүүнийг сонгож, дараах бичвэрийг уншуулна уу.

Дуулгавартай байдал адислалуудыг авчирдаг

Ерөнхийлөгч Томас С.Монсон: Энэ ямар гайхалтай амлалт вэ! “[Бурханы] зарлигуудыг сахидаг тэрээр, үнэнд алдаршиж мөн бүх зүйлийг мэдэх хүртлээ үнэн ба гэрлийг хүлээж авдаг болой” [С ба Г 93:28]…”

Ах, эгч нар аа, дуулгавартай байдал нь энэ амьдралын хамгийн агуу шалгуур юм шүү. “Мөн Их Эзэн, тэдний Бурхан тэдэнд зарлиглах бүх зүйл юуг ч гэсэн тэд хийх нь үү гэдгийг харахын тулд үүгээр бид тэднийг нотлох болно” [Абрахам 3:25] хэмээн Их Эзэн хэлсэн байдаг.

Аврагч “Учир нь миний гараас адислалыг хүлээн авахыг хүсэх тэд бүгд тэрхүү адислалын тулд өгөгдсөн хуулийг, мөн үүний нөхцөлүүдийг, дэлхийн сууринаас өмнө үндэслэгдэн бий болсноор нь баримтлах ёстой” [С ба Г 132:5] хэмээн тунхагласан.

Аврагчийн үзүүлсэн дуулгавартай байдлын жишээнээс давж гарах өөр жишээ байхгүй. Түүний талаар Паул:

“Тэрээр Хүү нь байсан хэр нь зовсон зүйлсээсээ дуулгаварт суралцсан.

Тэр төгс болгогдсоноороо Өөрт нь дуулгавартай байдаг бүхэнд мөнх авралын эх үндэс нь болсон” [Еврей 5:8–9] гэж хэлсэн байдаг.

Аврагч төгс амьдралаар амьдарч, Өөрийн ариун үүрэг зорилгод хүндэтгэлтэй ханддаг байснаар Бурханы жинхэнэ хайрыг харуулсан юм. Тэр ямар ч үед их зан гаргаагүй. Тэр хэзээ ч бардамнан онгирч байгаагүй. Тэр хэзээ ч урваагүй. Тэр ямагт төлөв даруу байсан. Тэр аливаад чин сэтгэлээсээ ханддаг байсан. Тэр байнга дуулгавартай байсан билээ.…

Тэрээр Гетсеманид амь тэмцэн зовж, “хөлс нь цусны дусал мэт газарт дусалж” [Лук 22:44], шаналж байх үедээ “Эцэг минь, хэрэв Та хүсэж байгаа бол энэ аягыг Надаас алгасуулаач. Гэвч Миний хүслээр бус, харин Таныхаар болог” [Лук 22:42] хэмээн хэлж, дуулгавартай Хүүгийн үлгэр жишээг харуулсан юм.

Тэрээр эртний төлөөлөгчдөдөө хэлж байсан “Чи Намайг дага” [Иохан 21:22] хэмээх үгсээ надад мөн танд ч хэлж байна. Дуулгавартай дагах хүсэл бидэнд байдаг уу?

Бид хайж буй мэдлэг, хүлээж буй хариултуудаа болон энэхүү төвөгтэй, хувирамтгай дэлхийн бэрхшээлүүдийг даван туулахад туслах хүч чадлыг Их Эзэний зарлигуудыг дуулгавартай дагаснаар л олж авч чадна. Их Эзэний үгсийг би дахин нэг эш татъя. Тэрээр: “[Бурханы] зарлигуудыг сахидаг тэрээр, үнэнд тэрээр алдаршиж мөн бүх зүйлийг мэдэх хүртлээ үнэн ба гэрлийг хүлээж авдаг болой” [С ба Г 93:28] хэмээн хэлсэн.

Бид дуулгавартай хүмүүст гарцаагүй ирэх баялаг адислалуудыг аваасай хэмээн би даруухнаар залбирч байна. Бидний Аврагч мөн Гэтэлгэгч Есүс Христийн нэрээр, амен.

(“Дуулгавартай байдал адислалуудыг авчирдаг,” Ensign, May 2013, 89, 92 эсвэл 2013 оны 4-р сарын Ерөнхий чуулган, 103, 105)