17-р хичээлийн бэлтгэх материал

Их Эзэний Сүмийн нэгэн хэсэг байх

Нифайчууд, леменчүүдийн дунд тохинуулсан Есүс Христийн тохинууллын чухал хэсэг бол Өөрийн Сүмийг зохион байгуулах явдал байсан. Сүмийг Аврагчийн нэрээр нэрлэж, Түүний сайн мэдээн дээр үндэслэсэн байх ёстой хэмээн Тэр айлдсан (3 Нифай 27:7–9-ийг үзнэ үү). Хичээлд бэлдэж байхдаа Их Эзэний Сүмд очдог хүмүүст өгдөг адислалуудын талаар тунгаан бодно уу. Тэдгээр адислалын талаар бодож байхдаа Сүмийг Бурханы бүх хүүхдийг халуун дотно хүлээн авдаг газар болгоход туслахын тулд юу хийж болохоо эргэцүүлэн бодоорой.

1-р хэсэг

Би зөвхөн Их Эзэний Сүмээр дамжуулан ямар ямар адислал авч болох вэ?

Аврагч Өгөөмөр нутаг дахь ариун сүмд нифайчууд дээр очихдоо арван хоёр шавьдаа санваарын эрх мэдлийг өгч; баптисм хүртээх, Ариун Сүнсний бэлэг өгөх, Сүмээ удирдан чиглүүлэх эрхийг олгосон (3 Нифай 11:18–22; 12:1; 18:5, 37-г үзнэ үү). Аврагч нифайчуудад Бурханы хаант улсад орохын тулд биднийг наманчилж, Түүнд итгэж, зөвхөн Түүний Сүмд баптисм хүртэх, гишүүнээр батлуулах зэрэг аврал, өргөмжлөлийн ёслолуудыг хүлээн авах ёстой хэмээн заасан (3 Нифай 11:32–41-ийг үзнэ үү).

Арван хоёр Төлөөлөгчийн Чуулгын ахлагч Д.Тодд Кристоффэрсон Есүс Христийн Сүмийн эртний болон орчин үеийн бошиглогчдын зорилгын талаар ийн хэлсэн байдаг.

Есүс Христийн сайн мэдээг номлох, авралын ёслолуудыг гүйцэтгэх, өөрөөр хэлбэл, хүмүүсийг Христэд авчрах гэсэн эртний зорилго нь хэвээр үлдсэн юм. (“Сүм яагаад хэрэгтэй вэ?,” 2015 оны 10-р сарын Ерөнхий чуулган, 101)

Хичээлд бэлтгэхээр тунгаан бодох

Сүмд явах нь Есүс Христэд ирэхэд танд хэрхэн тусалсан бэ?

2-р хэсэг

Ариун ёслолоос хүртэх нь Есүс Христтэй илүү адилхан болохын тулд хүчин чармайлт гаргахад бидэнд хэрхэн тусалдаг вэ?

Аврагч Өгөөмөр нутагт тохинуулах эхний өдрөө дуусгаад, арван хоёр шавьдаа болон хүмүүст ариун ёслол түгээсэн. Тэрээр маргааш нь гайхамшигтай байдлаар талх, дарс түгээснийхээ дараа энэ ёслолыг дахин үйлджээ. (3 Нифай 18:1–9; 20:3–8-ыг үзнэ үү.)

Хичээлд бэлтгэхээр судлах

3 Нифай 18:3–12, 3 Нифай 20:8–9-ийг судлаад, ариун ёслолын эрхэм зорилгын талаар Есүс надад юу заасныг эргэцүүлэн бод.

Арван хоёр Төлөөлөгчийн Чуулгын ахлагч Дэвид А.Бэднар энэхүү ёслол нь Ариун Сүнсийг байнгын хамтрагчаа болгох боломжийг хэрхэн олгодог болохыг ийн тайлбарлажээ.

Ариун ёслол бол чин сэтгэлээсээ наманчилж, сүнсээрээ шинэчлэгдэхэд урьсан ариун нандин бөгөөд олон дахин давтагддаг урилга юм. … Харин биднийг харууссан зүрх, гэмшсэн сэтгэлээр энэхүү ариун нандин ёслолд анхааралтай бэлтгэж, оролцох үед Их Эзэний Сүнсийг өөрсөдтэйгөө үргэлж хамт байлгах амлалт ирдэг. Мөн байнгын хамтрагч болох Ариун Сүнсний ариусгагч хүчээр бид нүглүүдийнхээ ангижралыг үргэлж хадгалж чадна. (“Нүглүүдийнхээ ангижралыг үргэлж хадгал,” 2016 оны 4-р сар, 47)

Мөн ахлагч Кристоффэрсон ариун ёслолоос хүртэх нь Аврагчтай илүү адилхан болоход анхаарлаа төвлөрүүлэхэд тусална гэж заасан.

Талх, ус нь Амийн талх, Амьд ус болох Түүний мах хийгээд цусыг төлөөлдөг [Иохан 4:10-ыг үзнэ үү] бөгөөд биднийг гэтэлгэхийн тулд төлсөн төлөөсийг нь тод томруун сануулдаг. …

… Түүний махыг идэж, цусыг уух гэдэг зүйрлэл илүү гүн утга учиртай бөгөөд энэ нь Христийн онцлог шинж, зан чанарыг өөрийн болгон, эгэл хүнээ орхиж, “Их Эзэн Христийн цагаатгалаар” [Мозая 3:19] гэгээнтэн болох гэсэн утгатай. Ариун ёслолын талх, уснаас долоо хоног бүр хүртэж байхдаа Түүний зан чанар, нүгэлгүй амьдралын загварыг өөрсдийн амьдрал, мөн чанарт бүрэн дүүрэн нэгтгэх талаар бодох нь бидэнд тустай. …

Аврагчийн махнаас идэж, цуснаас ууна гэдэг нь Христийн зан чанарыг өөрийн болгож, уг зан чанартай таарахгүй аливаа зүйлсийг өөрсдийн амьдралаас зайлуулахыг хэлнэ. (“Тэнгэрээс бууж ирсэн амьд талх,” 2017 оны 10-р сарын Ерөнхий чуулган, 23, 26)

Төрсөн сэтгэгдлээ бичиж тэмдэглэ

Арван хоёр Төлөөлөгчийн Чуулгын ахлагч Даллин Х.Өүкс “ариун ёслолын ёслол нь ариун ёслолын цуглааныг Сүм дэх хамгийн ариун дагшин, хамгийн чухал цуглаан болгодог” хэмээн заасан (“Ариун ёслолын цуглаан ба ариун ёслол,” 2008 оны 10-р сарын Ерөнхий чуулган, 21). Ариун ёслол ба ариун ёслолын цуглааныг Хүндэтгэлийн өдрийн хамгийн ариун нандин хэсэг болгохын тулд хийж болох хэдэн үйлдлээ жагсаан бичих талаар бодож үзээрэй.

3-р хэсэг

Есүс Христийн Сүмд хүн бүрд зориулсан орон зай байгааг мэдрүүлэхийн тулд би юу хийж чадах вэ?

Нифайчууд, леменчүүдийн дунд ариун ёслолыг түгээснийхээ дараа Есүс сүмийн цуглааныг найрсаг, бүгдэд хүртээмжтэй болгохын ач холбогдлын талаар заасан.

Хичээлд бэлтгэхээр судлах

3 Нифай 18:22–25-ыг судлаад, бид Их Эзэний Сүмд хэнийг оруулах ёстой талаарх Түүний сургаалыг агуулсан үгс эсвэл хэллэгийг тэмдэглэх талаар бодож үзээрэй.

“Lifting Others” (2:49) видеог үзнэ үү эсвэл дараах бичвэрийг уншина уу. Видеонд Залуу эмэгтэйчүүдийн ерөнхий ерөнхийлөгчийн зөвлөлийн зөвлөх асан Кэрол Ф.Макконки эгч Их Эзэний Сүмд бүх хүнийг халуун дотно угтан авдгийг мэдрүүлэхийн тулд юу хийж болох талаар хуваалцжээ.

Залуу эмэгтэйчүүдийн ерөнхий ерөнхийлөгчийн зөвлөлийн зөвлөх асан Кэрол Ф.Макконки эгч Их Эзэний Сүмд бүх хүнийг халуун дотно угтан авдгийг мэдрүүлэхийн тулд юу хийж болох талаар ийн хуваалцсан.

Ням гараг бүр урам зориг авч, өөдрөг байхын тулд сүмд ирдэг бас бусдаар шүүгдэж, хайр халамж, хэрэгтэй хүн гэдгээ мэдрэлгүй гарч явдаг хүмүүсийг би мэднэ. …

Ням гарагт хүмүүс сүмд ямар зорилгоор ирдгийг гүн гүнзгий ухамсарлаж, ирсэн хүн бүрийг хайрлаж, хэрэгтэй хүн гэдгийг нь мэдрүүлэн, хүлээн авч, өргөн дэмждэг байхад анхаарах хэрэгтэй.

Хүн бүрд бидний мэдэхгүй асуудал байдаг бөгөөд эргэн тойронд байгаа бүх хүнийг Бурхан хайрладаг гэдгийг ухаарч, Христийн нүдээр тэднийг харах хэрэгтэй гэдгийг мэдэх нь маш чухал. Бид шүүмжилсэн байдлаар хүмүүстэй харьцах ёсгүй. …

Есүс Христийн сайн мэдээ хүмүүсийг гадуурхдаггүй. Хүмүүс хүмүүсээ гадуурхдаг, харин бид үүнийг засах ёстой. Бид мэдрэмжтэй байж, тэднийг хайрлаж мөн өсөж, дэлбээлэх хамгийн сайн хүн болох боломжийг олгох ёстой. Тэдэнд Бурханы хаант улсад хэрэгтэй авьяас, ур чадвар, зан чанар бий. Хэрэв бид дэлхий дээр Бурханы хаант улсыг байгуулах гэж байгаа бол бүгдийг нь ирүүлэх ёстой. (“Lifting Others” [video], ChurchofJesusChrist.org)

Хичээлд бэлтгэхээр тунгаан бодох

Их Эзэний Сүмд Бурханы хүүхдүүдэд зориулсан орон зай бий гэдгийг тэдэнд мэдрүүлэхийн тулд илүү найрсаг байж, нэгэн хэсэг гэдгийг нь мэдрүүлэх юуг би хийж чадах вэ?

Илүү ихийг мэдэхийг хүсэж байна уу? (Сонголтоор)

Ариун ёслолоос хүртэхдээ илүү сүнслэг туршлага авахын тулд би юу хийж чадах вэ?

“Always Remember Him” видеонд (5:27) Арван хоёр Төлөөлөгчийн Чуулгын ахлагч Жэффри Р.Холланд ариун ёслолыг илүү ариун бөгөөд хувь хүн рүү чиглэсэн болгохын тулд бид юу хийж болох талаар ярьсан (“This Do in Remembrance of Me,” Ensign, Nov. 1995, 67–69, 67–69). Ахлагч Холланд мөн “Бурханы Хургыг харагтун” (2019 оны 4-р сарын Ерөнхий чуулган, 51–53) хэлсэн үгэндээ ариун ёслолын ариун нандин ач холбогдлын талаар заасан.

Арван хоёр Төлөөлөгчийн Чуулгын ахлагч Жэффри Р.Холландын “Бурханы Хургыг харагтун” хэлсэн үгэнд (2019 оны 4-р сарын Ерөнхий чуулган, 51–53) ариун ёслолыг долоо хоногийн шүтлэг бишрэлийнхээ төвд байлгахын тулд юу хийж болох талаар авч үзсэн юм.

Хэрэв би сүмд халуун дулаан мэдрэмж мэдрэхгүй эсвэл ийм мэдрэмж авахгүй байгаа хэн нэгнийг мэддэг бол юу хийж болох вэ?

“To Love Them All” (3:22) видеонд Далын ерөнхийлөгчийн зөвлөлийн ахлагч Патрик Кийрон сүмд хэнд ч хэрэггүй мэт санагдах үед бид юу хийж болох талаар зөвлөсөн.

“We Can Do Better: Welcoming Others into the Fold” (Ensign,Sept. 2017, 38–43) нийтлэлд сүм дээр өөрсдийг нь тэдний нэгэн хэсэг гэдгийг хүмүүст мэдрүүлэхэд туслах хэд хэдэн арга замыг санал болгожээ.

Мормоны Номд арьс өнгө, үндэс угсааны талаар юу заадаг вэ?

Мормоны Ном дээрх арьс өнгө, үндэс угсааны тухай ерөнхий захиасын талаар илүү их мэдээлэл авахыг хүсвэл 2 Нифай 26:23–28, 33; Алма 5:33–34; Алма 19:36; 4 Нифай 1:2, 15–17-г уншина уу. Та мөн Залуу эрэгтэйчүүдийн ерөнхий ерөнхийлөгчийн зөвлөлийн нэгдүгээр зөвлөх, ахлагч Ахмад С.Корбитт ахын “He Denieth None That Come unto Him” (Oct. 13, 2014, history.ChurchofJesusChrist.org) нийтлэлийг уншиж эсвэл “ill We All Come in the Unity of the Faith” (2:22) видеог үзэж болно.

Яагаад Их Эзэний Сүмийн зөв нэрийг ашиглах нь чухал вэ?

Их Эзэний Сүмийн зөв нэрийг ашиглахын ач холбогдлын талаар илүү ихийг мэдэхийн тулд 3 Нифай 27:1–10-ыг судалж, ерөнхийлөгч Рассэлл М.Нэлсоны “Сүмийн зөв нэр” (2018 оны 10-р сарын Ерөнхий чуулган, х. 84–87) хэлсэн үгийг уншина уу.