ដែនដីបរិសុទ្ធនៅសម័យព្រះគម្ពីរសញ្ញាថ្មី

ទីរ៉ុស និងស៊ីដូន ព្រះយេស៊ូវទ្រង់បានប្រៀបធៀបក្រុងខូរ៉ាស៊ីន និងក្រុងបេតសៃដា ទៅនឹងក្រុងទីរ៉ុស និងក្រុងស៊ីដូន (ម៉ាថាយ ១១:២០–២២)។ ទ្រង់បានប្រោសកូនស្រីរបស់ស្ត្រីពីសាសន៍ដទៃម្នាក់ (ម៉ាថាយ ១៥:២១–២៨)។
ភ្នំនៃការប្រែរូប ព្រះយេស៊ូវទ្រង់បានប្រែរូបនៅចំពោះពេត្រុស, យ៉ាកុប, និង យ៉ូហាន ហើយពួកគេបានទទួលកូនសោទាំងឡាយនៃនគរ (ម៉ាថាយ ១៧:១–១៣)។ (មនុស្សខ្លះជឿជាក់ថា ភ្នំនៃការប្រែរូប គឺជាភ្នំហ៊ើម៉ូន មនុស្សខ្លះទៀតជឿជាក់ថាជាភ្នំតាបោរវិញ)។
សេសារា ភីលីព ពេត្រុសបានធ្វើបន្ទាល់ថា ព្រះយេស៊ូវគឺជាព្រះគ្រីស្ទ ហើយជាកូនសោទាំងឡាយនៃនគរដែលបានសន្យាទុក (ម៉ាថាយ ១៦:១៣–២០)។ ព្រះយេស៊ូវទ្រង់បានប្រាប់ទុកជាមុន អំពីការសុគត និងដំណើររស់ឡើងវិញរបស់ទ្រង់ផ្ទាល់ (ម៉ាថាយ ១៦:២១–២៨)។
ភូមិភាគកាលីឡេ ព្រះយេស៊ូវទ្រង់បានចំណាយព្រះជន្មាយុ និងការងារបម្រើរបស់ទ្រង់នៅស្រុកកាលីឡេ (ម៉ាថាយ ៤:២៣–២៥)។ នៅទីនេះហើយដែលទ្រង់បានប្រទានការបង្រៀននៅលើភ្នំ (ម៉ាថាយ ៥–៧); បានប្រោសមនុស្សឃ្លង់ (ម៉ាថាយ ៨:១–៤); ហើយបាន រើស, តែងតាំង, និងចាត់ពួកសាវក ១២ នាក់ឲ្យទៅបង្រៀនមានតែយូដាស-អ៊ីស្ការីយ៉ុតទេដែលមិនមែនមកពីស្រុកកាលីឡេ (ម៉ាកុស ៣:១៣–១៩)។ នៅស្រុកកាលីឡេនេះហើយដែលព្រះគ្រីស្ទ កាលមានព្រះជន្មរស់ឡើងវិញ នោះទ្រង់បានលេចមកឲ្យពួកសាវកឃើញ (ម៉ាថាយ ២៨:១៦–២០)។
សមុទ្រកាលីឡេ ក្រោយមកហៅថា សមុទ្រទីបេរាស ព្រះយេស៊ូវទ្រង់បានបង្រៀនចេញពីទូករបស់ពេត្រុស (លូកា ៥:១–៣) ហើយបានហៅពេត្រុស អនទ្រេ យ៉ាកុប និងយ៉ូហានឲ្យធ្វើជាពួកអ្នកនេសាទមនុស្ស (ម៉ាថាយ ៤:១៨–២២; លូកា ៥:១–១១)។ ទ្រង់ក៏បានសម្ងប់ព្យុះ (លូកា ៨:២២–២៥), បានបង្រៀននូវពាក្យប្រៀបប្រដូចចេញពីទូក (ម៉ាថាយ ១៣), ហើយបានយាងលើទឹកសមុទ្រ (ម៉ាថាយ ១៤:២២–៣២), ហើយលេចមកឲ្យពួកសិស្សរបស់ទ្រង់ឃើញ បន្ទាប់ពីទ្រង់មានព្រះជន្មរស់ឡើងវិញ (យ៉ូហាន ២១)។
បេតសៃដា ពេត្រុស, អនទ្រេ, និងភីលីពបានកើតនៅក្រុងបេតសៃដា (យ៉ូហាន ១:៤៤)។ ព្រះយេស៊ូវទ្រង់បានចេញទៅជាមួយ នឹងពួកសាវកដោយឡែក នៅជិតក្រុងបេតសៃដា។ ហ្វូងមនុស្សបានដើរតាមទ្រង់ ហើយទ្រង់បានប្រទានអាហារដល់មនុស្ស ៥ ពាន់នាក់ (លូកា ៩:១០–១៧; យ៉ូហាន ៦:១–១៤)។ នៅទីនេះហើយដែលព្រះយេស៊ូវទ្រង់បានប្រោសមនុស្សខ្វាក់ម្នាក់ (ម៉ាកុស ៨:២២–២៦)។
កាពើណិម នេះជាស្រុករបស់ពេត្រុស (ម៉ាថាយ ៨:៥, ១៤)។ នៅកាពើណិមនេះហើយដែលម៉ាថាយបានហៅថាជា « ក្រុងផ្ទាល់ » របស់ព្រះយេស៊ូវ នោះព្រះយេស៊ូវទ្រង់បានប្រោសមនុស្សស្លាប់ដៃស្លាប់ជើង (ម៉ាថាយ ៩:១–៧; ម៉ាកុស ២:១–១២), បានប្រោសបាវបម្រើរបស់មេទ័ពម្នាក់ បានប្រោសម្ដាយក្មេករបស់ពេត្រុស (ម៉ាថាយ ៨:៥–១៥), បានហៅម៉ាថាយឲ្យធ្វើជាសាវកម្នាក់ របស់ទ្រង់ (ម៉ាថាយ ៩:៩), បានបើកភ្នែកមនុស្សខ្វាក់ឲ្យមើលឃើញបានបណ្ដេញអារក្សចេញ (ម៉ាថាយ ៩:២៧–៣៣), បានប្រោសមនុស្សម្នាក់ ដែលមានដៃស្វិតនៅថ្ងៃឈប់សំរាក (ម៉ាថាយ ១២:៩–១៣), បានប្រទានបទបង្រៀនអំពីនំប៉័ងជីវិត (យ៉ូហាន ៦:២២–៦៥), ហើយបានយល់ព្រមបង់ពន្ធ ដោយប្រាប់ពេត្រុសឲ្យទៅយកប្រាក់ពីមាត់ត្រី (ម៉ាថាយ ១៧:២៤–២៧)។
ម៉ាក់ដាឡា នេះជាស្រុករបស់នាងម៉ារាពីស្រុកម៉ាក់ដាឡា (ម៉ាកុស ១៦:៩)។ ព្រះយេស៊ូវទ្រង់បានមកទីនេះ ក្រោយពីបានប្រទានអាហារដល់មនុស្ស ៤ ពាន់នាក់ (ម៉ាថាយ ១៥:៣២–៣៩), ហើយពួកផារីស៊ី និងពួកសាឌូស៊ីបានសូមឲ្យទ្រង់បង្ហាញទីសំគាល់ពីស្ថានសួគ៌ (ម៉ាថាយ ១៦:១–៤)។
កាណា ព្រះយេស៊ូវទ្រង់បានធ្វើឲ្យទឹកក្លាយទៅជាស្រាទំពាំងបាយជូរ (យ៉ូហាន ២:១–១១) ហើយបានប្រោសកូនប្រុសរបស់នាម៉ឺនម្នាក់នៅកាពើណិម (យ៉ូហាន ៤:៤៦–៥៤)។ កាណាគឺជាស្រុករបស់ណាថាណែល (យ៉ូហាន ២១:២)។
ណាសារ៉ែត ទេវតាបានមកជួប ហើយប្រាប់នាងម៉ារា និងយ៉ូសែបនៅភូមិណាសារ៉ែត (ម៉ាថាយ ១:១៨–២៥; លូកា ១:២៦–៣៨; ២:៤–៥)។ កាលបានវិលមកពីស្រុកអេស៊ីព្ទវិញ នោះព្រះយេស៊ូវបានចំណាយកុមារវ័យ និងយុវវ័យនៅទីនេះ (ម៉ាថាយ ២:១៩–២៣; លូកា ២:៥១–៥២), បានប្រកាសប្រាប់ថា ទ្រង់ជាព្រះមែស៊ី ហើយរាស្ត្ររបស់ទ្រង់បានបដិសេធថាមិនស្គាល់ទ្រង់ (លូកា ៤:១៤–៣២)។
យេរីខូរ ព្រះយេស៊ូវទ្រង់បានប្រទានពន្លឺដល់មនុស្សខ្វាក់ (លូកា ១៨:៣៥–៤៣)។ ទ្រង់ក៏បានសោយជាមួយនឹងសាខេ « ជាមេលើពួកអ្នកយកពន្ធ » (លូកា ១៩:១–១០)។
បេថាបារ៉ា យ៉ូហាន-បាទីស្ទបានធ្វើបន្ទាល់ថាលោកគឺជា « សំឡេងដែលបន្លឺឡើងនៅទីរហោស្ថាន » (យ៉ូហាន ១:១៩–២៨)។ យ៉ូហានបានធ្វើបុណ្យជ្រមុជទឹកថ្វាយព្រះយេស៊ូវ នៅក្នុងទន្លេយ័រដាន់ ហើយបានធ្វើបន្ទាល់ថា ព្រះយេស៊ូវគឺជាកូនចៀមនៃព្រះ (យ៉ូហាន ១:២៨–៣៤)។
ទីរហោស្ថាននៅយូដា យ៉ូហាន-បាទីស្ទបានផ្សាយសាសនានៅឯទីរហោស្ថាននេះ (ម៉ាថាយ ៣:១–៤) ជាទីដែលព្រះយេស៊ូវបានតមអាហារអស់ ៤០ ថ្ងៃ ហើយត្រូវបានល្បួង (ម៉ាថាយ ៤:១–១១)។
អេម៉ោស ព្រះគ្រីស្ទដែលមានព្រះជន្មរស់ឡើងវិញ ទ្រង់បានយាងតាមផ្លូវទៅភូមិអេម៉ោស ជាមួយនឹងសិស្សរបស់ទ្រង់ពីរនាក់ (លូកា ២៤:១៣–៣២)។
បេតផាសេ ពួកសិស្សពីរនាក់បានបញ្ជិះព្រះយេស៊ូវលើកូនលា ក្នុងកាលទ្រង់យាងចូលក្រុងយេរូសាឡិមដោយជោគជ័យ (ម៉ាថាយ ២១:១–១១)។
បេថានី នេះហើយជាស្រុករបស់នាងម៉ារា, នាងម៉ាថា និងឡាសារ (យ៉ូហាន ១១:១)។ នាងម៉ារាបានស្ដាប់ព្រះបន្ទូលរបស់ព្រះយេស៊ូវ ហើយព្រះយេស៊ូវបានមានព្រះបន្ទូលទៅនាងម៉ាថាឲ្យរើស « ចំណែកយ៉ាងល្អ » (លូកា ១០:៣៨–៤២); ព្រះយេស៊ូវបាន ប្រោសឡាសារឲ្យរស់ពីស្លាប់ឡើងវិញ (យ៉ូហាន ១១:១–៤៤) ហើយនាងម៉ារាបានលាបព្រះបាទារបស់ព្រះយេស៊ូវនឹងប្រេង (ម៉ាថាយ ២៦:៦–១៣; យ៉ូហាន ១២:១–៨)។
បេថ្លេហិម ព្រះយេស៊ូវបានប្រសូតមក ហើយបានផ្ដេកនៅលើស្នូក (លូកា ២:១–៧) ពួកទេវតាបានទៅប្រាប់ពួកអ្នកគង្វាលសត្វ ចៀមអំពីកំណើតរបស់ព្រះយេស៊ូវ (លូកា ២:៨–២០) ពួកអ្នកប្រាជ្ញត្រូវបាននាំផ្លូវដោយផ្កាយមួយទៅរកព្រះយេស៊ូវ (ម៉ាថាយ ២:១–១២) ហើយស្ដេចហេរ៉ូឌបានសម្លាប់កូនក្មេងចោល (ម៉ាថាយ ២:១៦–១៨)។