1 Сега според законот на Мосија секој човек што беше судија на законот, или оние кои беа назначени да бидат судии, треба да примаат плати според времето кое го потрошија да ги судат оние кои беа донесени пред нив за да им се суди.

2 Сега ако еден човек му должи на некој друг, и не би го платил тоа кое го должи, ќе беше обвинет кај судијата; а судијата ја извршува власта, и би испратил службеници да го донесат човекот пред него; и би го судел човекот според законот и доказите кои се изнесени против него, и така тој човек би бил приморан да го плати тоа што го должи, или би бил лишен, односно би бил исфрлен од народот како крадец и ограбувач.

3 А судијата примаше своја плата според своето време—сенин злато на ден, или сенум сребро, што е еднакво на сенин злато; и тоа е според законот кој беше донесен.

4 Сега ова се имињата на различните парчиња на нивното злато, и на нивното сребро, според нивната вредност. А имињата се дадени од Нефитите, бидејќи тие не сметаа според обичаите на Евреите кои беа во Ерусалим; ниту пак мереа по обичајот на Евреите; туку ги променија нивното сметање и нивното мерење, во согласност со мислите и околностите на народот, во секое поколение, до владеењето на судиите, кога беа воспоставувани од царот Мосија.

5 Сега сметањето е вака—сенин злато, сеон злато, шум злато, и лимна злато.

6 Сенум сребро, амнор сребро, езром сребро, и онти сребро.

7 Сенум сребро беше еднаков на сенин злато, и едното и другото за мерка на јачмен, и исто така за мерка на секаков вид жито.

8 Сега вредноста на еден сеон злато беше двојно поголема од вредноста на сенинот.

9 А шум злато беше двојно поголем од вредноста на сеон.

10 А лимна злато беше вредноста на сите нив заедно.

11 А амнор сребро беше вреден колку два сенума.

12 А езром сребро беше вреден колку четири сенума.

13 А онти вредеше колку сите нив.

14 Сега ова е вредноста на помалиот износ во нивното сметање—

15 Шиблон е половина од сенум; затоа, еден шиблон за половина мерка јачмен.

16 А шиблум е половина од шиблон.

17 А леа е половина од шиблум.

18 Сега ова се нивните мерки, според нивното сметање.

19 Сега антион злато е еднаков на три шиблона.

20 Сега, тоа беше единствено со цел да се стекне добивка, бидејќи тие ги примаа платите според нивната работа, затоа, тие го побунија народот на немири, и на сите видови вознемирувања и пакости, за да можат да имаат повеќе работа, за да добиваат пари за тужбите кои беа изнесувани пред нив; затоа тие го побунија народот против Алма и Амулек.

21 И овој Зезром започна да го испитува Амулек, велејќи: Дали ќе ми одговориш на неколку прашања кои ќе ти ги поставам? Сега Зезром беше човек кој беше стручен за ѓаволските измами, за да може да го уништи тоа што е добро; затоа, тој му кажа на Амулек: Дали ќе ми одговориш на прашањата кои ќе ти ги поставам?

22 А Амулек му кажа на него: Да, ако е во согласност со Духот Господов кој е во мене, бидејќи јас нема да кажам ништо што е во спротивност со Духот Господов. А Зезром му кажа: Сега, овде има шест онтија сребро, и ќе ти ги дадам сите овие ако го негираш постоењето на Врховно Битие.

23 Сега, Амулек кажа: О ти дете на пеколот, зошто ме искушуваш? Зарем не знаеш дека праведните не попуштаат на такви искушенија?

24 Дали веруваш дека Бог не постои? Ти кажувам, Не, ти знаеш дека постои Бог, но повеќе ја сакаш добивката отколку Него.

25 И сега ти ме излажа пред Бог. Ти ми кажа—Ете ги овие шест онтии, кои се од голема вредност, ќе ти ги дадам—додека ти во срцето сакаше да ми ги скратиш; а твојата желба беше да го негирам вистинскиот и жив Бог, за да имаш причина да ме уништиш. И сега ете, за тоа големо зло ќе ја примиш твојата награда.

26 А Зезром му кажа: Ти велиш дека постои вистински и жив Бог?

27 А Амулек кажа: Да, постои вистински и жив Бог.

28 Сега Зезром кажа: Дали постои повеќе од еден Бог?

29 А тој одговори: Не.

30 Сега Зезром повторно му кажа: Како ти ги знаеш овие нешта?

31 А тој кажа: Ангелот ми ги покажа.

32 А Зезром повторно кажа: Кој е Тој што ќе дојде? Дали е тоа Божјиот Син?

33 А тој му кажа: Да.

34 А Зезром повторно кажа: Ќе го спаси Тој ли Неговиот народ во нивните гревови? А Амулек му одговори и му кажа: Ти кажувам Тој нема, бидејќи е невозможно за Него да го негира Неговиот збор.

35 Сега Зезром му кажа на народот: Гледајте да ги запамтите овие нешта; бидејќи тој кажа дека постои само еден Бог; сепак Тој кажа дека Божјиот Син ќе дојде, но Тој нема да го спаси Неговиот народ—како тој да има власт да му заповеда на Бог.

36 Сега Амулек повторно му кажа: Ете ти лажеше, бидејќи велиш дека зборувам како да имам власт да му заповедам на Бог бидејќи реков дека Тој нема да го спаси Неговиот народ во нивните гревови.

37 И повторно ви кажувам дека Тој не може да ги спаси во нивните гревови; бидејќи јас не можам да го негирам Неговиот збор, и Тој кажа дека ништо нечисто не може да го наследи небесното царство; затоа, како можете да бидете спасени, ако не го наследите небесното царство? Затоа, не можете да бидете спасени во вашите гревови.

38 Сега Зезром повторно му кажа: Дали Божјиот Син е самиот Вечен Отец?

39 А Амулек му кажа: Да, Тој е самиот Вечен Отец на небото и на земјата, и на сите нешта кои се во нив; Тој е почетокот и крајот, првиот и последниот;

40 И Тој ќе дојде во светот да го искупи Неговиот народ; и Тој ќе ги преземе врз Него престапите на оние кои веруваат во Неговото име; а тоа се оние кои ќе имаат вечен живот, и спасението не доаѓа кај никој друг.

41 Затоа пакосните остануваат како да не беше направено никакво искупување, освен ослободување од оковите на смртта; зашто ете, доаѓа денот кога сите ќе се кренат од мртвите и ќе стојат пред Бог, и ќе бидат судени според нивните дела.

42 Сега, постои смрт која е наречена привремена смрт, а Христовата смрт ќе ги прекине оковите на оваа привремена смрт, така што сите ќе бидат воскреснати од оваа привремена смрт.

43 Духот и телото повторно ќе бидат соединети во својата совршена форма; и екстремитетот и зглобот ќе бидат обновени во својата соодветна рамка, токму како што сме ние сега во овој момент; и ќе бидеме доведени да застанеме пред Бог, знаејќи дури како што знаеме сега, и ќе имаме јасно сеќавање на целата наша вина.

44 Сега, ова обновување ќе дојде кај сите, и кај старите и кај младите, и кај поробените и кај слободните, и кај машките и кај женските, и кај пакосните и кај праведните; и нема ниту влакно од нивните глави да биде изгубено; туку сѐ ќе биде обновено во својата совршена рамка, како што е сега, односно во телото, и ќе бидат доведени и изнесени пред судот на Христос Синот, и Бог Отецот, и Светиот Дух, Кои се еден Вечен Бог, да бидат судени според нивните дела, било да се добри или било да се лоши.

45 Сега, ете, ви говорев во врска со смртта на смртното тело, и исто така во врска со воскреснувањето на смртното тело. Ви кажувам дека ова смртно тело е воскреснато во бесмртно тело, односно од смртта, дури и од првата смрт во животот, за повеќе да не умираат, нивните духови се соединуваат со нивните тела, за никогаш да не се одвојат; така што целината станува духовна и бесмртна, и повеќе не можат да видат распадливост.

46 Сега, кога Амулек беше завршил со овие зборови народот повторно започна да биде запрепастен, а исто така Зезром започна да трепери. И така завршија зборовите на Амулек, односно ова е сѐ што напишав.