12వ ప్రకరణము
1829 మే, పెన్సిల్వేనియాలోని హార్మొనిలో ప్రవక్తయైన జోసెఫ్ స్మిత్ ద్వారా జోసెఫ్ నైట్ సీనియర్‌కివ్వబడిన బయల్పాటు. మోర్మన్ గ్రంథ పలకలు తన ఆధీనములో ఉండుటను గూర్చి జోసెఫ్ స్మిత్ బహిరంగ ప్రకటనలను మరియు ఆ సమయములో అనువాద కార్య పురోగతిని జోసెఫ్ నైట్ నమ్మెను, అనేకమార్లు జోసెఫ్ స్మిత్, అతని లేఖకునికి వస్తురూపములో సహకారమును అందించెను, అది అనువాదమును కొనసాగించుటకు వారికి సహాయపడెను. జోసెఫ్ నైట్ విన్నపము మేరకు, ప్రవక్త ప్రభువును విచారించి, ఈ బయల్పాటును పొందెను.
1–6, ద్రాక్షతోటలో పనిచేయువారు రక్షణ పొందెదరు; 7–9, ఎవరైతే కోరిక కలిగియుండి, అర్హులగుదురో వారందరు ప్రభువు కార్యములో సహాయపడవచ్చును.
1 ఒక గొప్ప ఆశ్చర్యకార్యము నరుల సంతానము మధ్యకు రాబోవుచున్నది.
2 ఇదిగో, నేను దేవుడను; నా మాటకు చెవియొగ్గుము, అది జీవముగలది, శక్తివంతమైనది, కీళ్ళను మూలుగును విడదీయు రెండంచులు గల ఖడ్గము కన్నా పదునైనది; కాబట్టి, నా మాటకు చెవియొగ్గుము.
3 ఇదిగో, పొలము ఇప్పుడే తెల్లబారి కోతకు వచ్చియున్నది; కాబట్టి, ఎవడైతే కోయుటకు ఇష్టపడునో, అతడు తన బలముతో తన కొడవలిని వాడి, దేవుని రాజ్యములో తన ప్రాణమునకు నిత్య రక్షణను దాచిపెట్టుకొనునట్లు దినము గడవక ముందే కోత కోయనిమ్ము.
4 అవును ఎవడైతే తన కొడవలితో కోతకోయునో, అట్టివాడు దేవుని చేత పిలువబడెను.
5 కాబట్టి, నీవు నన్ను అడిగిన యెడల నీవు పొందెదవు; నీవు తట్టిన యెడల అది నీకు తెరువబడును.
6 ఇప్పుడు నీవు నన్ను అడిగితివి గనుక ఇదిగో, నేను నీకు సెలవిచ్చుచున్నాను, నా ఆజ్ఞలను పాటించుము, సీయోను హేతువును ముందుకు తెచ్చి, స్థాపించుటకు ప్రయత్నించుము.
7 ఇదిగో, నేను నీతోను, ఈ కార్యమును ముందుకు తీసుకొనివచ్చి, స్థాపించుటకు కోరికలుగల వారందరితో మాట్లాడుచున్నాను;
8 అతని సంరక్షణలో ఉంచబడిన ఏ విషయమందైనను వినయము కలిగి, ప్రేమాపూర్ణుడై, విశ్వాసము, నిరీక్షణ, దాతృత్వము కలిగియుండి, అన్ని విషయములందు నిగ్రహము కలిగియుంటే తప్ప ఎవడునూ ఈ కార్యమునందు సహకరించలేడు.
9 ఇదిగో, ఈ మాటలను పలుకుచున్నది లోకమునకు వెలుగును, జీవమునైయున్న నేనే, కనుక నీ శక్తితో ఆలకించుము, అప్పుడు నీవు పిలువబడుదవు. ఆమేన్.