1 ఇశ్రాయేలు యొక్క శక్తిమంతుడు, దేవుడైన ప్రభువు ఈ విధముగా సెలవిచ్చుచున్నాడు: ఇదిగో, నా సేవకుడైన ఎడ్వర్డ్, నేను నీతో చెప్పునదేమనగా, నీవు ధన్యుడవు, నీ పాపములు క్షమించబడియున్నవి మరియు బూరధ్వనితో నా సువార్తను ప్రకటించుటకు నీవు పిలువబడియున్నావు;

2 నా సేవకుడైన సిడ్నీ రిగ్డన్ చేతి ద్వారా నా హస్తమును నీపైనుంచెదను మరియు నీవు నా ఆత్మయైన పరిశుద్ధాత్మను అనగా ఆదరణకర్తను పొందెదవు, అతడు పరలోకరాజ్యమును గూర్చిన శాంతికరమైన విషయాలను నీకు తెలియజేయును;

3 హోసన్నా, సర్వోన్నతుడైన దేవుని నామము దీవించబడును గాక అని చెప్పుచూ గొప్ప స్వరముతో దీనిని నీవు ప్రకటించవలెను.

4 ఇప్పుడు మనుష్యులందరిని గూర్చి ఈ పిలుపును మరియు ఆజ్ఞను నేను నీకిచ్చుచున్నాను—

5 ఈ పిలుపును మరియు ఆజ్ఞను అంగీకరించుచు నా సేవకులైన సిడ్నీ రిగ్డన్, జోసెఫ్ స్మిత్ జూ., యెదుటకు వచ్చు వారందరు జనముల మధ్య నా నిత్యసువార్తను ప్రకటించుటకు నియమించబడి, ముందుకు పంపబడెదరు—

6 అగ్ని నుండి బయటకు వచ్చి, శరీరముతో మలినమైన వస్త్రములను అసహ్యించుకొనుచూ, మూర్ఖులైన ఈ తరమువారి నుండి మిమ్ములను మీరు రక్షించుకొనుడని చెప్పుచూ పశ్చాత్తాపమును ప్రకటించుము.

7 ఈ ఆజ్ఞ నా సంఘ పెద్దలకు ఇవ్వబడును, తద్వారా నేను చెప్పిన విధముగా ఏకమనస్కులై దీనిని హత్తుకొను ప్రతి మనుష్యుడు నియమించబడి, ముందుకు పంపబడును.

8 దేవుని కుమారుడైన యేసు క్రీస్తును నేనే; కాబట్టి, మీ నడుములకు దట్టీ కట్టుకొనుము మరియు నేను నా దేవాలయమునకు అకస్మాత్తుగా వచ్చెదను. అలాగే జరుగును గాక. ఆమేన్.