1 ఇదిగో, మీ మధ్య ఒక గ్రంథము ఉంచబడవలెను; తండ్రియైన దేవుని చిత్తము, నీ ప్రభువైన యేసు క్రీస్తు కృప ద్వారా దానిలో నీవు ఒక దీర్ఘదర్శిగా, ఒక అనువాదకునిగా, ఒక ప్రవక్తగా, యేసు క్రీస్తు యొక్క ఒక అపొస్తలునిగా, సంఘము యొక్క ఒక పెద్దగా పిలువబడెదవు,

2 దాని పునాదిని వేయుటకు, అతిపరిశుద్ధమైన విశ్వాసము మీద దానిని కట్టుటకు పరిశుద్ధాత్మ చేత ప్రేరేపించబడెదవు.

3 ఆ సంఘము మీ ప్రభువు యొక్క పదునెనిమిది వందల ముప్పది సంవత్సరములో, ఏప్రిల్ గా పిలువబడు నాలుగవ నెలలో, ఆరవ తేదీన ఏర్పాటు చేయబడి, స్థాపించబడెను.

4 కాబట్టి సంఘము అనగా మీరు, నా యెదుట పూర్తి పరిశుద్ధతతో నడుచుకొనుచూ అతని మాటలన్నింటికి, అతడు వాటిని పొందినప్పుడు మీకిచ్చు ఆజ్ఞలకు చెవియొగ్గవలెను;

5 ఏలయనగా మీరు అతని మాటను పూర్తి సహనముతోను, విశ్వాసముతోను నా నోటినుండి పలికినట్లుగానే స్వీకరించవలెను.

6 ఈ సంగతులను చేయుట ద్వారా నరకపు ద్వారములు మీ యెదుట నిలువజాలవు; అవును, ప్రభువైన దేవుడు అంధకార శక్తులను మీ యెదుట నుండి తరిమివేయును, మీ మేలు కొరకు, ఆయన నామ ఘనత కొరకు పరలోకములు కంపించునట్లు చేయును.

7 కాబట్టి దేవుడైన ప్రభువు ఈలాగు సెలవిచ్చుచున్నాడు: మంచి ఉద్దేశ్యము కొరకు సీయోను హేతువును అత్యంత శక్తితో నడిపించుటకు నేనతనిని ప్రేరేపించియున్నాను, అతనికి గల శ్రద్ధ నాకు తెలియును మరియు అతని ప్రార్థనలను నేను ఆలకించియున్నాను.

8 అవును, సీయోను కొరకు అతడు విలపించుట నేను చూచియున్నాను, ఆమె కొరకు అతడు ఇక ఎంతమాత్రము దుఃఖపడకుండునట్లు నేను చేయుదును; అతని పాపక్షమాపణ వలన కలుగు అతని సంతోషకరదినములు, అతని కార్యములపై నా దీవెనల ప్రత్యక్షత వచ్చియున్నది.

9 ఏలయనగా ఇదిగో, నా ద్రాక్షతోటలో పనిచేయు వారందరిని ఒక గొప్ప దీవెనతో నేను దీవించెదను, ఆదరణకర్త చేత నా ద్వారా అతనికి ఇవ్వబడిన అతని మాటలపై వారు నమ్మకముంచెదరు; లోక పాపముల కొరకు, అనగా నలిగిన హృదయము గలవారికి పాపక్షమాపణ కలుగుటకై పాపాత్ములైన మనుష్యుల చేత యేసు క్రీస్తు సిలువ వేయబడెనని ఆ ఆదరణ కర్త ప్రత్యక్షపరచును.

10 కాబట్టి నా అపొస్తలుడైన ఆలీవర్ కౌడరీ, నీ చేత అతడు నియమించబడుట నా చిత్తమైయున్నది;

11 అతని చేతిక్రింద నీవు పెద్దవు గనుక, నీకతడు మొదటివానిగా ఉండగా, నా నామమును కలిగియున్న ఈ క్రీస్తు సంఘమునకు నీవు ఒక పెద్దగానుండునట్లు—

12 సంఘమునకు, లోకము యెదుటను, అన్యజనుల యెదుటను, యూదులకు కూడా ఈ సంఘము యొక్క మొదటి ప్రసంగీకుడవైయుండునట్లు ఇది నీకొక విధియైయున్నది; ఇదిగో, ప్రభువైన దేవుడు ఈలాగు సెలవిచ్చుచున్నాడు. ఆమేన్.