1 ఇదిగో ఆలీవర్, నేను నీతో కొద్ది మాటలను మాట్లాడుచున్నాను. ఇదిగో, నీవు ధన్యుడవు మరియు నిందారహితుడవైయున్నావు. కానీ, నీవు శోధనలో ప్రవేశించకుండునట్లు గర్వమును గూర్చి జాగ్రత్తపడుము.

2 సంఘమునకు, లోకము యెదుట నీ పిలుపును తెలియపరచుము, ఇకనుండి నిరంతరము సత్యమును ప్రకటించుటకు నీ హృదయము తెరువబడును. ఆమేన్.

3 ఇదిగో హైరం, నేను నీతో కొద్ది మాటలు మాట్లాడుచున్నాను, ఏలయనగా నీవు కూడా నిందారహితుడవైయున్నావు, నీ హృదయము తెరువబడి, నీ నాలుక సడలించబడినది; నీ పిలుపు యేదనగా, ఉద్భోధించుట మరియు ఎడతెగక సంఘమును బలపరచుట. కాబట్టి నీవు చేయవలసినది ఎన్నటికీ సంఘమునకే చేయవలెను, ఇది నీ కుటుంబము వలన కలిగినది. ఆమేన్.

4 ఇదిగో శామ్యుల్, నేను నీతో కొద్ది మాటలు మాట్లాడుచున్నాను; ఏలయనగా నీవు కూడా నిందారహితుడవైయున్నావు, నీ బాధ్యత యేమనగా ఉద్భోధించుట మరియు సంఘమును బలపరచుట; లోకము యెదుట ప్రకటించుటకు నీవింకను పిలువబడలేదు. ఆమేన్.

5 ఇదిగో జోసెఫ్, నేను నీతో కొద్ది మాటలు మాట్లాడుచున్నాను; ఏలయనగా నీవు కూడా నిందారహితుడవైయున్నావు, నీ బాధ్యత యేమనగా ఉద్భోధించుట మరియు సంఘమును బలపరచుట; ఇకనుండి ఎన్నటికీ ఇది నీ బాధ్యతయైయున్నది. ఆమేన్.

6 ఇదిగో జోసెఫ్ నైట్, ఈ మాటల చేత నేను నీకు ప్రత్యక్షపరచునదేమనగా, నీవు నీ సిలువ నెత్తికొనవలెను, ఎట్లనగా బయటకు వినిపించునట్లుగాను, రహస్యముగాను, లోకము యెదుట, నీ కుటుంబములో, నీ స్నేహితుల మధ్య మరియు అన్ని ప్రదేశములలో నీవు ప్రార్థించవలెను.

7 సత్య సంఘముతో ఐక్యమగుట నీ బాధ్యతయైయున్నది, నీ భాషను నిరంతరము ఉద్భోధించుటకు వినియోగించుము, తద్వారా నీవు పనివాని ప్రతిఫలమును పొందగలవు. ఆమేన్.