1 ఇదిగో డేవిడ్, నీవు మనుష్యునికి భయపడితివి, బలము కొరకు నాపై ఆధారపడవలసియుండగా నీవు ఆవిధముగా చేయలేదని నేను నీతో చెప్పుచున్నాను.

2 కానీ నీ మనసు, నీ రూపకర్తనైన నా సంగతులపై, నీవు పిలువబడియున్న పరిచర్యపై కంటే ఎక్కువగా భూలోక సంగతులపైనున్నది; నా ఆత్మను, నీపై నియమించబడియున్న వారిని నీవు ఆలకించలేదు, కానీ నేనాజ్ఞాపించని వారిచేత చెప్పబడిన వాటిని నీవు నమ్ముచున్నావు.

3 కాబట్టి, నీకు నీవుగా నా నుండి విచారించుటకు, నీవు పొందిన సంగతులను ధ్యానించుటకు విడువబడితివి.

4 నేను నీకు అదనపు ఆజ్ఞలు ఇచ్చేంతవరకు నీ నివాసము నీ తండ్రి ఇంటనే ఉండవలెను. నీవు సంఘములో, లోకము యెదుట, చుట్టూ ఉన్న ప్రాంతములలో పరిచర్యకు హాజరుకావలెను. ఆమేన్.

5 ఇదిగో పీటర్, నేను నీకు సెలవిచ్చునదేమనగా, నీ సహోదరుడు ఆలీవర్‌తో నీవు ప్రయాణము చేయవలెను; ఏలయనగా సమయము ఆసన్నమైనది గనుక, నా సువార్తను ప్రకటించుటకు నీవు నీ నోటిని విప్పుట నా యందు యుక్తమైయున్నది; కాబట్టి భయపడకుము, కానీ నీ సహోదరుడు నీకిచ్చు సలహాను, మాటలను ఆలకించుము.

6 అతని మరియు నీ యొక్క విడుదలకు ఎల్లప్పుడు ప్రార్థనతోను, విశ్వాసముతోను నా యెదుట నీ హృదయమునెత్తుకొనుచు, అతని యావద్బాధలో పాలుపొందుము; ఏలయనగా లేమనీయుల మధ్య నా సంఘమును కట్టుటకు అతనికి నేను శక్తినిచ్చియున్నాను;

7 సంఘ విషయాలను గూర్చి సంఘములో అతనిపై సలహాదారునిగా ఉండుటకు అతని సహోదరుడు జోసెఫ్ స్మిత్ జూ. ను తప్ప ఇంకెవరిని నేను నియమించలేదు.

8 కాబట్టి, ఈ సంగతులను ఆలకించుము, నా ఆజ్ఞలు పాటించుటలో శ్రద్ధ వహించుము, నీవు నిత్యజీవమును పొందునట్లు దీవించబడుదువు. ఆమేన్.

9 ఇదిగో, నా సేవకుడవైన జాన్, ఈ సమయము నుండి బూర ధ్వనివలే నా సువార్తను ప్రకటించుట నీవు మొదలుపెట్టవలెనని నేను నీతో చెప్పుచున్నాను.

10 అక్కడ నుండి వెళ్ళమని నేను నిన్ను ఆజ్ఞాపించు వరకు నీవు చేయవలసిన పని నీ సహోదరుడైన ఫిలిప్ బర్రోస్ ఇంటియొద్ద మరియు ఆ చుట్టూ గల ప్రదేశములో, అనగా నీవు చెప్పునది ఎక్కడ వినబడునో అక్కడ ఉండును.

11 ఇకమీదట నీ పూర్ణాత్మతో నీవు చేయవలసిన పని అంతయు సీయోనులో నుండును; నేను నీకు తోడుగా ఉన్నాను గనుక, మనుష్యుడు ఏమి చేయునో అని భయపడకుండా నా కార్యములో నీవు ఎల్లప్పుడు నీ నోటిని విప్పవలెను. ఆమేన్.