1 ఓ నా సంఘ పెద్దలారా, ఆలకించుడని దేవుడైన మీ ప్రభువు సెలవిచ్చుచున్నాడు, నా ఆజ్ఞలను బట్టి ఈ ప్రదేశములో అనగా పరిశుద్ధులు కూడివచ్చుటకు నేను నియమించి, ప్రతిష్ఠించిన మిస్సోరిలో మీయంతట మీరు సమావేశమైరి.

2 కాబట్టి ఇదే వాగ్దాన ప్రదేశము మరియు సీయోను పట్టణము కొరకు స్థలము.

3 మీ దేవుడైన ప్రభువు ఈలాగు సెలవిచ్చుచున్నాడు, మీరు జ్ఞానమును పొందగోరినట్లైతే, ఇందులో జ్ఞానము కలదు. ఇదిగో, ఇండిపెండెన్స్‌గా ఇప్పుడు పిలువబడుచున్న ప్రదేశమే కేంద్ర ప్రదేశము; దేవాలయము కొరకు ఒక స్థలము పశ్చిమ ముఖముగా, న్యాయస్థాన భవనమునకు కొంచెము దూరములో ఒక భూభాగముపైనున్నది.

4 కాబట్టి, పరిశుద్ధుల చేత ఆ స్థలము కొనుగోలు చేయబడుట జ్ఞానమైయున్నది మరియు పశ్చిమముగానున్న ప్రతి విశాలప్రదేశము, సరాసరి యూదులు మరియు అన్యజనుల మధ్య వెళ్ళుచున్న గీతవరకు కూడా కొనుగోలు చేయబడవలెను;

5 నా శిష్యులు స్థలములను కొనగలిగినంత వరకు పచ్చికబయళ్ళకు అవతలనున్న ప్రతి విశాల ప్రదేశము కొనుగోలు చేయబడవలెను. ఇదిగో, వారు దీనిని శాశ్వత స్వాస్థ్యముగా పొందుట జ్ఞానమైయున్నది.

6 నా సేవకుడైన సిడ్నీ గిల్బర్ట్ ధనమును స్వీకరించుటకు, సంఘమునకు ప్రతినిధిగా ఉండుటకు, నీతిగా చేయగలిగినంత వరకు తెలివిగా చుట్టుప్రక్కలనున్న అన్ని ప్రదేశములలో స్థలము కొనుగోలు చేయుటకు నేనతడిని నియమించిన స్థానములో నిలబడవలెను.

7 నా సేవకుడైన ఎడ్వర్డ్ పాట్రిడ్జ్‌, నేనతడిని నియమించిన స్థానములో నిలబడవలెను మరియు నేనాజ్ఞాపించిన విధముగా పరిశుద్ధులకు వారి స్వాస్థ్యమును విభజించవలెను; అతని చేత నియమించబడిన వారు అతనికి సహాయము చేయవలెను.

8 మరలా నేను మీతో నిశ్చయముగా చెప్పుచున్నాను, నా సేవకుడైన సిడ్నీ గిల్బర్ట్ ఈ ప్రదేశములో స్థిరపడి ఒక అంగడిని స్థాపించవలెను, తద్వారా అతడు మోసము లేకుండా సరుకులను అమ్మవచ్చును, పరిశుద్ధుల మేలు కొరకు స్థలములను కొనుగోలు చేయవచ్చును, తమ స్వాస్థ్యములో తమను స్థిరపరచుకొనుటకు శిష్యులకు కావలసినవన్నీ అతడు సంపాదించవచ్చును.

9 మరియు నా సేవకుడైన సిడ్నీ గిల్బర్ట్ ఒక అనుమతి పత్రమును పొందవలెను, ఆవిధముగా అతడు తన క్రింద గుమాస్తాలుగా నియమించబడిన వారిచేత ఈ జనులకు సరుకులను పంపవచ్చును—ఇదిగో, ఇందులో జ్ఞానము కలదు మరియు చదువు వానిని గ్రహించనిమ్ము;

10 ఆ విధముగా నా పరిశుద్ధులకు సమకూర్చవచ్చును, తద్వారా నా సువార్త అంధకారములోను, ఈ ప్రాంతములోను, మరణచ్ఛాయలోను కూర్చొనియున్న వారికి ప్రకటించబడును.

11 మరలా, నేను మీతో నిశ్చయముగా చెప్పుచున్నాను, నా సేవకుడైన విలియం డబ్ల్యు. ఫెల్ప్స్ ఈ స్థలములో స్థిరపరచబడవలెను, ఈ సంఘమునకు ముద్రణకర్తగా నియమించబడవలెను.

12 లోకము అతని వ్రాతలను స్వీకరించిన యెడల, పరిశుద్ధుల మేలు కొరకు నీతియందు అతడు దేనిని సంపాదించగలడో దానిని సంపాదించవలెను—ఇదిగో, ఇందులో జ్ఞానము కలదు.

13 నా సేవకుడైన ఆలీవర్ కౌడరీ నేను ఆజ్ఞాపించినట్లుగా, నేను నియమించు ఏ స్థానములోనైనను నకలు చేయుటకు, సరిదిద్దుటకు మరియు ఎంపిక చేయుటకు అతనికి సహాయము చేయవలెను, తద్వారా అన్ని సంగతులు నా యెదుట సరిగ్గా ఉండునట్లు, ఆత్మ దానిని అతని ద్వారా నిరూపించును.

14 ఆ విధముగా, నేను ఎవరిని గూర్చి చెప్పియుంటినో వారు నేను చెప్పినట్లుగా ఆ సంగతులను చేయుటకు వీలైనంత వేగముగా వారి కుటుంబములతో సీయోనులో స్థిరపరచబడవలెను.

15 ఇప్పుడు సమకూడుటను గూర్చి—బిషప్పు మరియు ప్రతినిధి ఈ ప్రదేశమునకు వచ్చుటకు ఆజ్ఞాపించబడిన కుటుంబముల కొరకు వీలైనంత త్వరగా సిద్ధపాటులను చేసి, తమ స్వాస్థ్యములో వారిని స్థిరపరచవలెను.

16 మిగిలిన పెద్దలు, సభ్యులిరువురికి మరిన్ని నిర్దేశములు ఇకముందు ఇవ్వబడును. అలాగే జరుగును గాక. ఆమేన్.