ការបង្ហាញអំពីសេចក្តីជំនឿ
អ៊ិកណាធើស និង អាដែលលេដ ប៊ៃឌូ
រដ្ឋធានីអាក្រា ប្រទេសហ្កាណា
អ៊ិកណាធើស និងអាដែលលេដ បានឃើញពីរបៀបដែលកម្មវិធីអក្ខរកម្មរបស់សាសនាចក្រ និងការសង្កត់ធ្ងន់លើការរៀនសូត្រដំណឹងល្អដែលផ្តោតក្នុងគេហដ្ឋានបានផ្ដល់ពរដល់សមាជិកនៃស្តេក និងគ្រួសាររបស់ពួកគាត់ ។
គ្រីស្ទីណា ស្ម៊ីធ ជាងថតរូប
អ៊ិកណាធើស ៖
ខ្ញុំបានចូលរួមក្នុងកម្មវិធីអក្ខរកម្មដំណឹងល្អក្នុងនាមជាសមាជិកម្នាក់នៃគណៈប្រធានស្ដេក ។ ខ្ញុំបានទៅមើលថ្នាក់មួយ ហើយបានដឹងថា វាមិនត្រឹមតែសម្រាប់ពួកអ្នកដែលមិនចេះអាន និងសរសេរនោះទេ ។ វាគឺសម្រាប់យើងទាំងអស់គ្នា ដើម្បីយល់ពីដំណឹងល្អរបស់ព្រះយេស៊ូវគ្រីស្ទឲ្យកាន់តែប្រសើរឡើង ។
អាដែលលេដ ៖
ខ្ញុំស្គាល់បងប្អូនស្ត្រីជាច្រើននៅក្នុងវួដយើងដែលថ្នាក់អក្ខរកម្មដំណឹងល្អបានជួយ ។ បងស្រីម្នាក់ពុំមានអារម្មណ៍ល្អចំពោះខ្លួនឯងដោយសារគាត់ពុំអាចអាន សរសេរ ឬជួយកូនៗគាត់ជាមួយនឹងកិច្ចការសាលារបស់ពួកគេ ។ គាត់បានចូលរៀន ហើយឥឡូវនេះអាចអាន និងជួយបាន ។ គាត់រីករាយណាស់ ។ ពេលណាដែលខ្ញុំជួបគាត់ ខ្ញុំតែងតែនិយាយថា « ដំណឹងល្អនេះគឺពិតមែន ។ វាផ្លាស់ប្ដូរ និងផ្ដល់ពរជ័យដល់ជីវិតមនុស្ស » ។
អ៊ិកណាធើស ៖
ចូរមកតាមខ្ញុំ និងការរៀនសូត្រដំណឹងល្អដែលផ្ដោតក្នុងគេហដ្ឋាននឹងជួយក្រុមគ្រួសារទាំងឡាយឲ្យអានព្រះគម្ពីរជាមួយគ្នា ហើយរៀនពីគ្នាទៅវិញទៅមក ។
មូលដ្ឋាននៃសាសនារបស់យើងគឺព្រះគម្ពីរមរមននេះឯង ។ នៅទ្វីបអាហ្វ្រិកនេះ យើងទាំងអស់គ្នាត្រូវបានចិញ្ចឹមបីបាច់ឲ្យស្គាល់ព្រះគម្ពីរប៊ីប ។ ទោះជាយ៉ាងណា មនុស្សជាច្រើនពុំដឹងថាព្រះគម្ពីរមរមនមាននូវសេចក្ដីពិតដ៏សាមញ្ញ និងមានតម្លៃទាំងឡាយនោះទេ ។ កាលដែលយើងប្រើប្រាស់ ចូរមកតាមខ្ញុំ ដើម្បីសិក្សាព្រះគម្ពីរមរមននៅក្នុងកម្មវិធីអក្ខរកម្មដំណឹងល្អ និងនៅក្នុងការរៀនសូត្រដំណឹងល្អដែលផ្តោតក្នុងគេហដ្ឋាន នោះយើងរៀន ហើយយល់នូវព័ត៌មានទាំងអស់ដែលយើងត្រូវការដើម្បីជួយយើងរីកចម្រើននៅក្នុងជីវិតនេះ ។
អាដែលលេដ ៖
ពេលដែលការរៀនសូត្រដំណឹងល្អក្នុងគេហដ្ឋានត្រូវបានប្រកាសនៅក្នុងសន្និសីទទូទៅ ខ្ញុំបានគិតអំពីសមាជិកវួដរបស់យើងមួយចំនួន ហើយខ្ញុំបានមានការបារម្ភបន្តិច ។ តើពួកគេនឹងធ្វើយ៉ាងណាទៅ ? ខ្ញុំបានគិត ។ ខ្ញុំបានអធិស្ឋានថា សមាជិកនឹងប្រកាន់ខ្ជាប់នឹងវិវរណៈនេះ ។ ខ្ញុំដឹងថា ប្រសិនបើពួកគេនឹងធ្វើតាមអ្វីដែលព្យាការីបានមានប្រសាសន៍ នោះវានឹងជួយពួកគេនៅក្នុងគេហដ្ឋានរបស់ពួកគេ ។
នៅក្នុងគ្រួសាររបស់យើង យើងព្យាយាម ហើយធ្វើអ្វីៗទាំងអស់ដែលយើងអាចធ្វើបាន ។ គ្រប់គ្នាចូលរួម ។ ខ្ញុំសប្បាយចិត្តណាស់ចំពោះរបៀបដែលកូនៗរបស់ខ្ញុំជួយគ្នាទៅវិញទៅមក កាលដែលយើងអានព្រះគម្ពីរមរមនជាមួយគ្នា ។ ពួកគេស្រឡាញ់ព្រះគម្ពីរមរមន ។ យើងមានពេលវេលាដ៏ល្អអាន និងចែកចាយទីបន្ទាល់របស់យើងជាមួយគ្នា ។
អ៊ិកណាធើស ៖
ប្រធាន រ័សុល អិម ណិលសុន បានមានប្រសាសន៍ថា « ការលើកតម្កើងគឺជាបញ្ហាមួយរបស់គ្រួសារ » ។១ ខ្ញុំស្រឡាញ់ភរិយា និងកូនៗខ្ញុំ ។ ខ្ញុំចង់នៅជាមួយនឹងពួកគេ និងព្រះវរបិតាសួគ៌របស់យើងជារៀងរហូត ដូច្នេះយើងត្រូវជួយគ្នាទៅវិញទៅមក ។
អាដែលលេដ ៖
បងប្អូនស្ត្រីនៅក្នុងសមាគមន៍សង្គ្រោះក៏កំពុងជួយគ្នាទៅវិញទៅមកផងដែរ ។ ពេលយើងជួបគ្នា យើងគិតថា « បងស្រីនេះត្រូវការខ្ញុំ » ឬ « ខ្ញុំត្រូវការគាត់ » ។ យើងអង្គុយជិតគ្នា ហើយជួយគ្នាអាន យល់ និងចែកចាយអ្វីដែលយើងកំពុងរៀន ។ យើងកំពុងធ្វើអស់ពីសមត្ថភាពរបស់យើងដើម្បីគិតថា « ប្រសិនបើព្រះអង្គសង្គ្រោះគង់នៅទីនេះ តើទ្រង់នឹងធ្វើអ្វី ? »
អ៊ិកណាធើស ៖
មានគំនិតមួយនៅក្នុងកម្មវិធីអក្ខរកម្មដំណឹងល្អ ដែលសូមដល់សិស្សឲ្យគូររូបមួយអំពីអ្វីដែលពួកគេនឹងធ្វើ ដើម្បីធ្វើឲ្យការរៀនសូត្រដំណឹងល្អ និងការសិក្សាព្រះគម្ពីររបស់ពួកគេបានប្រសើរឡើង ។ រូបភាពមួយដែលមនុស្សម្នាក់បានគូរពិពណ៌នាពីគ្រួសារមួយនៅជុំវិញតុមួយជាមួយនឹងព្រះគម្ពីររបស់ពួកគេនៅខាងមុខពួកគេ ហើយពិភាក្សាពីដំណឹងល្អ ។ ខ្ញុំរំជួលចិត្តណាស់ដោយសាររូបភាពនោះ ។ អក្ខរកម្មដំណឹងល្អពុំមែនគ្រាន់តែអំពីការអាន និងការសរសេរនោះទេ ។ ជំនួយចក្ខុក៏អាចជួយយើងរៀនផងដែរ ។ សូម្បីតែយើងគិតថា យើងដឹងអ្វីៗគ្រប់យ៉ាងហើយ ក៏យើងតែងតែអាចរៀនបន្ថែមទៀតអំពីដំណឹងល្អ ហើយពង្រីកទីបន្ទាល់របស់យើងអំពីព្រះអម្ចាស់ព្រះយេស៊ូវគ្រីស្ទ ។
ព្រះគម្ពីរប្រាប់ថា អ្នកណាដែលខ្លាំង ចូរឲ្យយកអ្នកណាដែលខ្សោយ ប្រយោជន៍ឲ្យអ្នកនោះបានខ្លាំងឡើងដែរ ( សូមមើល គោលលទ្ធិ និង សេចក្ដីសញ្ញា ៨៤:១០៦ ) ។ ប្រសិនបើមានមនុស្សមួយចំនួនដែលមានអារម្មណ៍ថាពួកគេខ្សោយនៅក្នុងដំណឹងល្អ នោះយើងអាចផ្ដល់ការងារបម្រើដល់ពួកគេ ម្ដងម្នាក់ៗ ហើយជួយពួកគេឡើង ។ ការងារបម្រើនឹងបន្តទៅជាយូរអង្វែងដើម្បីជួយលើកស្ទួយសមាជិកឡើង ។
ការរៀនសូត្រដំណឹងល្អក្នុងគេហដ្ឋានបានពង្រឹងទីបន្ទាល់របស់កូនប្រុសរបស់គ្រួសារប៊ៃឌូ គឺ ជេដិន និង ហ៊ូបើត ។ ជាញឹកញាប់ពួកគេដឹកនាំការពិភាក្សាដំណឹងល្អក្នុងគ្រួសារ ។
ការច្រៀងទំនុកតម្កើងជាគ្រួសារជួយនាំព្រះវិញ្ញាណបរិសុទ្ធមកក្នុងរាត្រីជួបជុំក្រុមគ្រួសារ ។
ការអធិស្ឋានជាគ្រួសារជាទៀងទាត់បានធ្វើឲ្យគេហដ្ឋានរបស់គ្រួសារប៊ៃឌូជាកន្លែងមួយនៃសេចក្ដីជំនឿ និងសេចក្ដីស្រឡាញ់ ។
អ៊ិកណាធៀបានរៀនអំពីសារសំខាន់នៃការអធិស្ឋានពីឪពុកម្ដាយ និងបងប្រុសនាង ។
ការជួយកិច្ចការក្នុងផ្ទះ រួមជាមួយនឹងការរៀនសូត្រដំណឹងល្អ ផ្ដល់ពរជ័យដល់ចំណងទាក់ទងរវាងបងប្អូននៅក្នុងគ្រួសារប៊ៃឌូ ។
ការរៀនសូត្រដំណឹងល្អ និងការបម្រើនៅក្នុងគ្រួសារបានពង្រឹងសេចក្ដីស្រឡាញ់ដែលគ្រួសារប៊ៃឌូមានចំពោះគ្នាទៅវិញទៅមក ហើយបានផ្ដល់ពរជ័យដល់ពួកគេក្នុងរបៀបជាច្រើន ។
ការអធិស្ឋានរវាងស្វាមី និងភរិយាបានជួយអ៊ិកណាធើស និងអាដែលលេដដឹកនាំកូនៗរបស់ពួកគាត់នៅក្នុងរបៀបទាំងឡាយដែលព្យាការី និងពួកសាវកបានបង្រៀន ។