« នរណាបើកឡានបុកកូនប្រុសខ្ញុំ ? »
ខ្ញុំបានប្រមើលមើលខ្លួនឯងស្រែកគំហកដាក់មនុស្សដែលបានបើកឡានបុកកូនខ្ញុំ ក្រោយមកខ្ញុំបានជួបដោយផ្ទាល់មុខនឹងអ្នកបើកឡាន ។
រចនារូបភាពដោយ អែលលើរី អារណុលដ៍
ខ្ញុំទើបនឹងទម្លាក់កូនស្រីខ្ញុំនៅផ្ទះមិត្តភក្ដិ ពេលដែលខ្ញុំបានទទួលទូរសព្ទពីស្វាមីខ្ញុំ ចនណាថាន ។ គាត់បានប្រាប់ខ្ញុំថាកូនប្រុសអាយុដប់មួយឆ្នាំរបស់យើង អៃដិន ត្រូវបានឡានមួយបុកពេលគាត់ និងចនណាថាន កំពុងដើរឆ្លងផ្លូវ ។
អ្នកបើកឡាននោះបានបត់ឆ្វេងនៅមុខចនណាថាន ហើយមិនបានឃើញអេដិនកំពុងជិះកង់គាត់ទេ ។ អ្នកបើកឡាននោះបានបុកពីមុខកង់របស់អេដិន ។ គាត់ហោះទៅលើអាកាស នៅតែកាន់កង់គាត់ជាប់ ហើយបានបោកក្បាលគាត់ទៅនឹងចំហៀងឡានពេលគាត់ធ្លាក់មកក្រោម ។ បន្ទាប់មកគាត់ធ្លាក់នៅលើផ្លូវដោយមានកង់គាត់សង្កត់លើគាត់ ។ អរគុណណាស់ដែលគាត់ពាក់មួកការពារ ។ អ្នកបើកឡាន និងមនុស្សផ្សេងទៀតបានឈប់ដើម្បីជួយពេលដែលចនណាថានបានទូរសព្ទហៅរថយន្តសង្គ្រោះបន្ទាន់ ។
មួយរំពេចនោះ គំនិត និងអារម្មណ៍ខ្ញុំវក់វីខ្លាំងណាស់ ។ ខ្ញុំបានបើកឡានយ៉ាងលឿងទៅផ្លូវប្រសព្វដែលគ្រោះថ្នាក់បានកើតឡើងនោះ ដោយសង្ឃឹមថាអាចទៅទាន់រថយន្តសង្គ្រោះបន្ទាន់ដើម្បីខ្ញុំអាចនៅជាមួយនឹងអៃដិន ។
ខ្ញុំបានគិតថានឹងតទល់នឹងអ្នកបើកឡាននោះដោយកំហឹង ។ « តើអ្នកបើកឡាននោះកំពុងគិតអ្វី ? » ខ្ញុំបានគិត ។ « តើគេស្រវឹងមែនទេ ? តើគេកំពុងប្រើទូរសព្ទឬ ? » ខ្ញុំខឹងខ្លាំងណាស់ ហើយហួសពីព្រួយបារម្ភទៀត ។ ខ្ញុំមិនដឹងទេថាអៃដិនឈឺប៉ុណ្ណានោះ ។
ពេលខ្ញុំមកដល់កន្លែងកើតហេតុ រថយន្តសង្គ្រោះបន្ទាន់បានចេញបាត់ទៅហើយ ។ មានតែឡានប៉ូលីសពីរ និងឡានមួយទៀតបានចតនៅខាងផ្លូវដែលនៅនឹងកន្លែងកើតហេតុ ។ ស្ត្រីម្នាក់ដែលមើលទៅពោរពេញដោយទុក្ខព្រួយបានឈរនៅក្បែរឡាននោះ ។
ខ្ញុំបានដើរទៅកាន់គាត់ ហើយបានសួរថា « តើអ្នកបានឃើញនរណាបុកកូនប្រុសខ្ញុំទេ ? »
គាត់បាននិយាយស្ងាត់ស្ងៀមថា « ខ្ញុំបានធ្វើ » ។
ខ្ញុំបានប្រមើលមើលខ្លួនឯងស្រែកគំហកដាក់មនុស្សដែលមិនខ្វល់ខ្វាយដែលបានបើកឡានបុកកូនខ្ញុំ ប៉ុន្តែពេលខ្ញុំបានជួបដោយផ្ទាល់មុខនឹងអ្នកបើកឡាននោះ ភាពអវិជ្ជមានបានរសាត់បាត់ទៅ ។ ខ្ញុំបានយំ ហើយឱបគាត់ ។ គាត់បានសូមទោស ហើយខ្ញុំបានប្រាប់គាត់ថាអ្វីៗនឹងមិនអីទេ ។ ក្រោយមកខ្ញុំបានដឹងថា នោះជាពាក្យដូចគ្នាដែលអៃដិនបាននិយាយទៅកាន់គាត់ពីមុនប៉ូលីសមកដល់ ។ នៅចុងបញ្ចប់ អៃដិនបានឆ្លងផុតដោយគ្រាន់តែមានស្នាម និងជាំមួយចំនួនប៉ុណ្ណោះ ។
ខ្ញុំមានអំណរគុណដែលនៅគ្រាដ៏សំខាន់ក្រៃលែងនោះ ព្រះវរបិតាសួគ៌ជាទីស្រឡាញ់របស់យើងបានប្រទានពរខ្ញុំឲ្យមានកម្លាំងដើម្បីផ្ដល់ការអត់ទោសជំនួសឲ្យការស្អប់ សូម្បីតែពេលដែលខ្ញុំមិនបានទូលសូមដល់ទ្រង់ ។ ខ្ញុំដឹងថា ទ្រង់ត្រាសដឹងពីយើង ហើយតែងតែប្រទានជំនួយរបស់ទ្រង់ដល់យើង ។