Ke tokoniʻi e kalasí ke mahino kiate kinautolu ko e taimi ko ia ʻoku tau toʻo ai e haʻamonga ʻa e Fakamoʻuí kiate kitautolú mo fai hono finangaló, te tau maʻu e melino mo e fiefia kuó ne talaʻofa ʻakí.
Teuteú
Lau, fakalaulauloto mo ke lotua ʻa e ngaahi potu folofola ko ʻení:
Mātiu 11:28–30. Ko hono fakaafeʻi ʻe Sīsū ʻa kinautolu kotoa ʻoku faingataʻa- ʻia mo mafasiá ke haʻu kiate Ia, ʻo toʻo kiate kinautolu ʻene haʻamongá, mo ako ʻiate ia.
Mātiu 12:1–13; Luke 13:10–17. Ko hono fakahā ʻe Sīsū ko e ʻEiki Ia ʻo e ʻaho Sāpaté pea fakaangaʻi ai Ia.
Luke 7:36–50. Ko hano fufulu ʻe ha fefine, ne fekumi ke fakamolemoleʻi ʻene ngaahi angahalá, ʻa e toʻukupu kelekele ʻo e ʻEikí ʻaki hono loʻimatá; ko hono fakaangaʻi ʻe Saimone ko e Fālesí ʻa Sīsū ʻi heʻene tuku ke ala ange kiate Ia ʻa e fefine angahalá. Ko hono akoʻi ʻe Sīsū kia Saimone ʻa e talanoa fakatā- tā ʻo e ongo tangata ne ʻi ai hona moʻuá mo ne fakamolemoleʻi ʻa e fefiné.
Kapau ʻe maʻu ʻa e ngaahi nāunau ko ʻení, peá ke fakaʻaongaʻi kinautolu ʻi he lēsoní:
“Haʻu Kiate Au,” ko ha faiva ʻoku miniti ʻe fitu, mei he filimi Ngaahi Fakamatala Fakavitiō ʻo e Fuakava Foʻoú (53914 900).
Fakatātā Ko e Fononga Mai ʻa Mele Filitingi mo Siosefa F. Sāmita ʻi he Toafá (62608 900; Ngaahi Fakatātā ʻo e Ongoongoleleí 412), ʻa ia ʻoku hā ai ha ongo pulu ʻokú na lolotonga toho ha haʻamonga.
Fokotuʻu ki hono akoʻí: Lolotonga hoʻo teuteu ʻa e lēsoní, fakakaukauʻi ʻi he faʻa lotu ha founga te ke lava ʻo fakalotolahiʻi ʻaki e kalasí ke nau kau ki hono aleaʻi ʻo e lēsoní. ʻE lava ke tokoni ki hono fakakau ʻo e kalasí ki he lēsoní hano fakatātaaʻi, aleaʻi fakakulupu, fakafaivaʻi pea mo ha ngaahi ʻekitivitī kehe pē ʻe ʻaongá. (Vakai, ʻOku ʻIkai ha Ui ʻe Mahuʻinga ange ʻi he Faiako, [36123 900], peesi 61–72, 159–84.)
Fokotuʻu Ki he Founga Fai ʻo e Lēsoní
Ngaahi Fakakaukau ke Fakalahi ki Hono Akoʻi ʻo e Lēsoní
ʻOku hoko ʻa e nāunau ko ʻení ko ha fakalahi ki he lēsoni ʻoku fokotuʻu atú. Te ke lava ʻo fakaʻaongaʻi ha fakakaukau ʻe taha pe lahi ange mei heni ke hoko ko ha konga ʻo e lēsoní.
ʻOku tau faʻa māvahevahe fēfē ʻi hotau ngaahi fāmilí, ngaahi ʻapí pe uōtí? Ko e hā te tau lava ʻo fai ke tau toe uouangataha ange aí?
Naʻe folofola ʻa Sīsū ki he Kau Fālesí, “Ko ia ʻoku ʻikai kau mo aú, ʻoku angatuʻu ia kiate au” (Mātiu 12:30). Ko e hā hono ʻuhinga ʻoku moʻoni ai ʻení?
Ko e hā ha meʻa ʻoku fakahā ʻe heʻetau ngaahi leá ʻo kau kiate kitautolú? Ko e hā ne fakamamafaʻi ai ʻe Sīsū ʻa hono mahuʻinga ʻo e ngaahi lea ʻoku tau lea ʻakí? Ko e hā ha ngaahi fakatātā ʻo e “lea koví”? (ʻE lava ke kau he ngaahi talí ʻa e manukí, laú, loí, lea taʻe tāú mo e anga-koví? Te tau fakamālohia fēfē ʻetau tukupā ke tau lea leleí?
3. ʻEkitivitī ʻa e toʻu tupú
Teuteuʻi maʻá e tokotaha kotoa pē he kalasí ha laʻi pepa ʻoku hā ai ʻa e pāsolo ko ʻení. Ka hili haʻamou lau mo aleaʻi ʻa e laukonga ne vaheʻí, peá ke tufa ha tatau ʻo e pāsoló. Kole ki he kalasí ke nau kumi ha ngaahi lea ʻoku felāveʻi mo e lēsoní ʻa ia ʻoku fufuuʻi ʻi he pāsoló. ʻE hā fakahihifi, fakahangatonu ki ʻolunga, lalo pe ongo tafaʻakí ʻa e ngaahi foʻi leá. Kapau ʻe fie maʻu tokoni ʻa e kalasí ʻi ha hili ha ngaahi miniti siʻi, peá ke fekau ke nau toe lau ʻa e ngaahi potu folofola ʻoku hā ai ʻa e ngaahi foʻi lea ʻoku fufuuʻí (Mātiu 11:28–30: kavenga, mafasia, haʻamonga; Mātiu 12:1–13: Sāpate, fakamoʻui; Luke 7:36–50: talanoa fakatātā, moʻua, fakamolemoleʻi).