“Ko e Faletapu ʻo e ʻOtuá ʻa Kimoutolu”

Taumuʻá

Ke ueʻi fakalaumālie e kalasí ke nau fekumi ki he ngaahi tāpuaki ʻe maʻu mei he uouangataha ʻia Kalaisí, muimui ʻi he Laumālié pea mo e moʻui maʻá.

Teuteú

Lau, fakalaulauloto mo ke lotua ʻa e ngaahi potu folofola ko ʻení:
1. 1 Kolinitō 1:10–13; 3:1–11. Ko e ekinaki ʻa Paula ki he kāingalotú ke nau fakaʻehiʻehi mei he fakakikihí pea nau taha pē ʻi he fakakaukau mo e fakamaau.
2. 1 Kolinitō 1:17–31; 2:1–16. Ko e naʻinaʻi ʻa Paula ki he kāingalotú ke nau fakafalala ki he Laumālié, kae ʻikai ki he poto mo e fakapoto ʻo e māmaní.
3. 1 Kolinitō 3:16–17; 5; 6:9–20. Ko e ekinaki ʻa Paula ki he kāingalotú ke nau moʻui maʻa.
Fakalahi ki he laukongá 1 Kolinitō 7–10.
Fokotuʻu ki hono akoʻí: Naʻe naʻinaʻi mai ʻa ʻEletā Poiti K. Peeka: “ ʻOku mahuʻinga ke mahino ki ha faiakó ʻoku lelei ʻa e kakai kotoa pē. ʻOku ʻaonga ke ʻiloʻi ko ʻenau holí ia ke fai ʻa e meʻa ʻoku totonú. ʻOku hanga ʻe he faʻahinga fakakaukau fakahīkihiki peheé, ʻo fakatupulekina ʻa e tuí. ʻOkú ne ʻomi ha faikehekehe lahi moʻoni ʻi he taimi ʻoku tau tuʻu ai ʻi muʻa ʻi heʻetau fānaú pe tuʻu ʻi muʻa ʻi ha kalasi ʻa e toʻu tupú, ke akoʻi kinautolu” (Teach Ye Diligently [1975], 73).

Fokotuʻu Ki he Founga Fai ʻo e Lēsoní

ʻEkitivitī ke Takiakiʻi e Tokangá

Fakaʻaongaʻi ʻa e ʻekitivitī ko ʻení pe ko haʻo ʻekitivitī pē ʻaʻau ʻe feʻungá ke kamata- ʻaki ʻa e lēsoní.

Tā ha kiʻi hala he palakipoé, peá ke tā ha kā pe ko ha meʻalele ʻe taha he halá. Hili iá, pea ke fakamatalaʻi ange, ʻa e meʻa ko ʻeni ne hokó, ʻi hano fakamatalaʻi ʻe ʻEletā Siosefa B. Uefilini:

“ ʻI ha efiafi ʻe taha, lolotonga haʻaku fononga atu ʻi ha hala he ʻotu moʻungá, lolotonga ia ha ʻuha lōvai, ʻo kanoni ʻaki e ʻuʻulu ʻa e maná mo e tapa ʻa e fatulisí, pea ne ʻikai ke u mei toe lava mo Sisitā Uefilini ʻo sio ki he halá, ʻo tatau pē ʻi muʻa, faʻahi toʻomataʻú pe ko e toʻohemá. Naʻá ku fuʻu mātuʻaki tokanga ʻaupito ki he laine hinehina ko ia ʻi he halá, ʻo laka ange ʻi ha toe taimi ʻi muʻa. Naʻe hanga ʻe heʻema nofo ko ia he loto lainé ʻo taʻofi kimaua mei haʻama hē mei he halá ʻo tō ki he lilifa ʻi he faʻahi ʻe tahá, peá ne maluʻi foki kimaua mei haʻama fepaki mo ha meʻalele ʻe taha. Ne mei fakatuʻutāmaki kapau naʻá ma hē atu ʻi ha taha ʻo e ongo lainé. Ne u fakakaukau leva, ‘ʻE fakahehema nai ha fakaʻuli fakakaukau lelei ki he faʻahi toʻohemá pe ko e toʻomataʻú kapau naʻá ne ʻiloʻi ʻe fakatuʻutāmaki hono olá? Kapau ʻokú ne mahuʻingaʻia ʻi heʻene moʻui fakamatelié, kuo pau ke ne nofo ʻi loto he ongo lainé ni.’

’ “ ʻOku tatau tofu pē ʻa e fononga ʻi he hala he ʻotu moʻunga ko ʻení pea mo ʻetau moʻuí. Kapau te tau nofo ʻi loto he ngaahi laine kuo fakaʻilongaʻi mai ʻe he ʻOtuá, te ne maluʻi kitautolu pea te tau lava ʻo aʻu lelei ki he feituʻu ʻoku tau ʻalu ki aí? (ʻi he Tūhulu, Sānuali. 1991, palakalafi 1–2).

Fakamatalaʻi ange, ʻi he taimi ko ia ne hiki ai ʻe Paula ʻene fuofua ʻipiseli ki he kāingalotu ʻi Kolinitoó, kuo kamata ke hē hanau niʻihi mei he ngaahi laine ʻo e ongoongoleleí. ʻE aleaʻi ʻi he lēsoni ko ʻení ʻa e ngaahi ekinaki ʻa Paula ki he kāingalotú ke nau fakatomala mei he hala ʻe tolu kuo nau kamata hē atu aí. Tā ha foʻi laine ʻe tolu ʻi he palakipoé ke ne fakahaaʻi ha afe ʻa e meʻalelé mei he halá. ʻI he ngataʻanga ʻo e ʻuluaki lainé, tohiʻi ai e Fakakikihí mo e taʻe uouangatahá. ʻI he ngataʻanga ʻo e laine hono uá, tohiʻi ai ʻa e Fakafalala ki he poto ʻo e māmaní. ʻI he ngataʻanga ʻo e laine hono tolú, tohiʻi ai ʻa e moʻui taʻe maʻá.

Aleaʻi ʻo e Folofolá mo Hono Fakahokó

ʻI hoʻo akoʻi ko ia ʻa e ngaahi potu folofola ko ʻení, mou aleaʻi foki ai mo ha founga ʻoku hoko ai e ngaahi ekinaki ʻa Paulá ʻi hotau kuongá ni pea mo e founga te tau lava ʻo fakahoko ai ʻene ngaahi akonakí ʻi heʻetau moʻuí.

1. Fakaʻehiʻehi mei he fakakikihí ka mou uouangataha.

Lau pea mou aleaʻi ʻa e 1 Kolinitō 1:10–13; 3:1–11.

Ko e hā ha palōpalema ne lave ki ai ʻa Paula ʻi he 1 Kolinitō 1:10–13? Ko e hā e ʻuhinga ne tala ai ʻe ha niʻihi ʻo e kāingalotú “ ʻoku ʻo Paula” kinautolu, pea niʻihi “ ʻoku ʻo ʻApolosi,” pea niʻihi “ ʻoku ʻo Kīfasi [Pita],” pea niʻihi “ ʻoku ʻo Kalaisí”? (Naʻe vahevahe e kāingalotú ia ʻo fakakulupu ʻi he Siasí kae ʻikai ke nau uouangataha ʻo hoko ko ha kau muimui kotoa ʻo Sīsū Kalaisi.) ʻOku tau faʻa fakahoko fēfē mo e fehalaaki tatau? Ko e hā ha ngaahi nunuʻa ʻo e faʻahinga fakakulupu ko ʻení? ʻOku uesia fēfē ʻe he mavahevahé mo e fakakikihí ʻetau fakafeohí, ʻi heʻetau hoko ko ia ko ha kau ākonga ʻa Kalaisí? (Vakai, Mōsaia 18:21–22; 3 Nīfai 11:29–30; T&F 38:27.)
Ko e hā ʻa e naʻinaʻi ʻa Paula ki he kāingalotú ke nau fai ke nau toe uouanga-taha ange aí? (Vakai, 1 Kolinitō:10. Lolotonga hano lau ʻe ha mēmipa ʻa e vēsí ni, hiki fakakongokonga e naʻinaʻi taki taha ʻa Paulá ʻi he palakipoé, ʻo hangē ko ʻene hā ʻi laló.) Te tau lava fēfē ʻo fakahoko ʻa e naʻinaʻi ko ʻení ʻi ʻapi pea mo e Siasí?
1. “Lea taha pē ʻa kimoutolu.”
2. ʻOua “naʻa ʻiate kimoutolu ha ngaahi māvahevahe.”
3. “Mou [uouangataha], ʻo loto taha pē, pea fakakaukau taha pē.”
Ko e hā ne maʻu ai pē ʻe he kāingalotu ia ʻi Kolinitoó, ʻa e “huʻa huhu” ʻo eongoongoleleí? (Vakai, 1 Kolinitō 3:1–4.) Ko e hā ha ʻuhinga ʻoku taʻofi ai kitautolu ʻe he fakakikihí, mei haʻatau maʻu e “kakano” ʻo e ongoongoleleí? Te tau teuteuʻi fēfē kitautolu ke maʻu e “kakano” ʻo e ongoongoleleí?
Naʻe ako ʻa Paula ʻoku lahi e kau tamaioʻeikí ʻo e ongoongoleleí, ka ko Sīsū Kalaisi pē taha ʻa e makatuʻunga paú (1 Kolinitō 3:5–11). Ko e hā ha ʻuhinga ʻoku mahuʻinga ai ke tau maʻu e Fakamoʻuí ke hoko ko e makatuʻunga ʻo ʻetau tuí? (Vakai, Hilamani 5:12.)

2. Fakafalala ki he Laumālié kae ʻikai ʻi he poto ʻo e māmaní.

Mou aleaʻi ʻa e 1 Kolinitō 1:17–31; 2:1–16. Fakaafeʻi e kalasí ke nau lau e ngaahi potu folofola kuo filifilí.

Naʻe ako ʻa Paula ʻe hanga ʻe he poto ʻo e ʻOtuá ʻo “fakangalivaleʻi” ʻa e poto ʻo e māmaní (1 Kolinitō 1:18–21). ʻOku kehe fēfē e poto ʻo e ʻOtuá mei he poto ʻo e māmaní? (Vakai, ʻĪsaia 55:8–9; T&F 38:1–2.) Ko e hā ha ngaahi sīpinga ʻo hano fakangalivaleʻi ʻe he poto ʻo e ʻOtuá ʻa e poto ʻo e māmaní?
Ko e hā ha ngaahi founga ʻe hoko ai e ako fakaemāmaní ko ha tāpuaki kiate kitautolu? (Kapau ʻe fie maʻu, fakamatalaʻi ange, ko e ʻuhinga ʻo e fakaemāmaní ki he ngaahi meʻa taʻe fakalotú.) Ko e hā ha ngaahi founga ʻe hoko ai ia ko ha fakatūkiaʻanga kiate kitautolu? Te tau lava fēfē ʻo ʻai ke potupotutatau e ako fakaemāmaní mo e fakalaumālié? (Vakai, 2 Nīfai 9:28–29.)

Naʻe ako mai ʻa Palesiteni Sipenisā W. Kimipolo ʻo pehē: ʻOku ʻi ai ha faingamālie ke maʻu fakatouʻosi [ʻa e ako fakaemāmaní mo fakalaumālié]… . Kapau te tau fakamoleki hotau ngaahi ʻaho fakamatelié ʻi hono tānaki ʻo e ʻilo fakaemāmaní taʻe kau ai ʻa e fakalaumālié, ʻoku tau ʻi ha hala kuo ngata, he ko e taimi pē ʻeni ki he tangatá ke ne teuteu ai ke feʻiloaki mo e ʻOtuá; ko e taimi pē ʻeni ke langa ai e tuí, ke fakahoko ai ʻa e papitaisó, ke maʻu ai ʻa e Laumālie Māʻoniʻoní pea mo fakahoko ai ʻa e ngaahi ouaú. ʻE lava ke kau fakataha mai ki he polokalamá ni ʻa e ʻilo fakaemāmaní, he ʻe tatau ai pē koeʻuhí ʻe kei hokohoko atu ai pē e ako ʻa e ngaahi laumālié ʻi he maama tataliʻanga ʻo e ngaahi laumālié, he hili ʻa e maté,” (The Teachings of Spencer W. Kimball, ed. Edward L. Kimball [1982], 390).
Ko e hā e ʻuhinga ʻa Paula ʻi he taimi naʻá ne pehē ai kuo fili ʻe he ʻOtuá “ ʻa e ngaahi meʻa vale ʻo e māmaní ke [fakangalivaleʻi ʻaki] ʻa e potó” pea mo e “ngaahi meʻa vaivai ʻo e māmaní ke [fakangalivaleʻi ʻaki] ʻa e mālohí”? (1 Kolinitō 1:27). Ko e hā hono ʻuhinga ʻoku faʻa fili ai ʻe he ʻOtuá e ngaahi “meʻa vaivai ʻo e māmaní” ke fakakakato ʻaki ʻene ngaahi taumuʻá?
Ko e hā ha ngaahi vaivai ne fekuki mo Paula ʻi heʻene akoʻi ʻa e ongoongoleleí? (Vakai, 1 Kolinitō 2:1–3.) Ne liliu fēfē hono ngaahi vaivaí ke hoko ko ha ngaahi mālohingá? (Vakai, 1 Kolinitō 2:2, 4–5.) Kuo tokoniʻi fēfē koe ʻe he ʻEikí ʻi ha taimi naʻá ke ongoʻi taʻe feʻunga pe manavahē ai ke fai ʻene ngāué?
Fakatatau mo e lau ʻa Paulá, te tau lava fēfē ʻo ʻilo e “ngaahi meʻa ʻa e ʻOtuá”? (Vakai, 1 Kolinitō 2:10–13.) Ko e hā nai ʻoku tau faʻa fakafalala ai he taimi ʻe niʻihi ki hotau potó mo hotau ʻatamaí, kae ʻikai ke tau fakafalala ki he fakahā ʻoku ʻomi ʻe he Laumālié? Ko e hā ha faikehekehe kuó ke vakai ki ai, ʻi he ako ʻoku fakafou mai ʻi he Laumālié pea mo e ako ʻoku fakafou mai ʻi he potó ʻata- ʻatā pē?

Naʻe ako ʻa Pulusi R. Makongikī ʻo pehē: “Ko e lotu haohaoá ko ha meʻa ia ʻa e Laumālie kae ʻikai ʻo e ʻatamaí ʻataʻatā pē, pea kuo pau ke ʻave hono ngaahi moʻoní ki he loto ʻo e kau fanongó, ʻe he mālohi ʻo e Laumālié, ka ʻikai, he ʻikai ha liliu ʻi he laumālie ʻo e tangatá … pea he ʻikai ke moʻui ʻia Kalaisi ʻa e toko taha ʻoku fekumi ki he fakamoʻuí” (Doctrinal New Testament Commentary, 3 vols. [1966–73], 2:318).
Naʻe ako ʻa Paula ʻoku faingataʻa ki he “tangata fakakakanó” ke ne maʻu e ngaahi meʻa ʻa e ʻOtuá (1 Kolinitō 2:14). Ko e hā ha ʻuhinga ʻoku moʻoni aiʻení? Ko e hā kuo pau ke tau fai ke ikunaʻi ʻaki e tangata fakakakanó? (Vakai, Mōsaia 3:19.)

3. Ke mou moʻui maʻa.

Lau pea mou aleaʻi ʻa e ngaahi potu folofola kuo filifili mei he 1 Kolinitō 3:16–17; 5; 6:9–20.

Ko e hā ne fakatatau ki ai ʻe Paula hotau sinó? (Vakai, 1 Kolinitō 3:16–17; 6:19–20.) ʻOkú ke fakakaukau ko e hā hono ʻuhinga ʻoku moʻoni ai e fakafehoanaki ko ʻení? Ko e hā ha ngaahi meʻa te ne lava ʻo ʻuliʻi hotau sinó? Ko e hā ʻoku totonu ke tau fai ke tauhi ai hotau sinó ke hangē ha temipalé?
ʻI haʻane fakatokanga fekauʻaki mo e ngaahi angahala fulikivanu ʻi hono kuongá, naʻe fakakau ai ʻe Paula mo ha ngaahi faiangahala fekauʻaki mo e anga-maʻá? (1 Kolinitō 6:9). Ko e hā e fono ʻa e ʻOtuá fekauʻaki mo e fetuʻutaki fakasekisualé? (Vakai, T&F 42:23; 59:6.)

Naʻe pehē ʻe ʻEletā Lisiate G. Sikoti: “Ko e fetuʻutaki fakasino fakasekisuale kotoa pē ʻi tuʻa ʻi he malí—ʻa ia ko ʻeku ʻuhingá ki ha faʻahinga fetuʻutaki pē mo e ngaahi kupu toputapu fakafoʻituitui ʻo ha toko taha kehe, ʻo tatau ai pē ʻi he vala pe taʻe vala—ko ha angahala ia pea ʻoku tapui ia ʻe he ʻOtuá. Ko e maumau-fono foki haʻate fakatupu ʻiate kita pē ʻa e faʻahinga ongo ko iá ʻi hoto sinó” (ʻi he Tūhulu, Sānuali 1995, 46).
Ko e hā ʻoku fuʻu fakalilifu ai e ngaahi angahala fakasekisualé? (Vakai ki he ngaahi lea ko ʻeni ʻi laló.) Ko e hā ha ngaahi tāpuaki ʻo e moʻui maʻá?

Naʻe ako ʻa ʻEletā Siosefa B. Uefilini ʻo pehē: “Ko e taha ʻo e ngaahi kākā ʻiloa taha ʻi he ngaahi taʻu ki muí ni maí, ʻa e pehē ko ia ʻoku lelei pē ʻa e anga ʻulí ia ʻo hangē ha anga- mahení pea ʻoku ʻikai foki hano nunuʻa koví. Ko hono moʻoní, ko e angaʻulí ko e tefitoʻi tupuʻanga ia ʻo ha ngaahi mamahi lahi mo ha ngaahi palōpalema kehe ʻoku mafola ʻi he ngaahi ʻahó ni, ʻa ia ʻoku kau ai ʻa e mahaki pipihí, fakatōtamá, ngaahi fāmili kuo moveté, ngaahi fāmili ʻoku hala he tamaí, pea mo e ngaahi faʻē ʻoku kei tamaiki [iiki] peé” (Conference Report, Oct. 1994, 100–101; pe Tūhulu, Sānuali. 1995, 88)

Naʻe ako ʻa ʻEletā Poiti K. Peeka ʻo pehē: “ ʻOku ʻiloʻi ʻe [Sētane] ʻoku ʻikai ko ha konga siʻisiʻi pē ʻa e mālohi ko ʻeni ʻo e fakatupú ki he palaní, ka ko e kī ia ki aí. ʻOkú ne ʻiloʻi kapau te ne fakataueleʻi koe ke ke fakaʻaongaʻi hala ʻa e mālohi ko ʻení, mo ke fakaʻaongaʻi taimi hala ia, pe te ke ngāuehala ʻaki ia ʻi ha faʻahinga founga, ʻe lava ke mole meiate koe ho ngaahi faingamālie ki he fakalakalaka taʻengatá” (Vakai, Tūhulu, Sānuali 1973, palak. 28–29).
Naʻe naʻinaʻi ʻa Paula ki he kāingalotú ke ʻoua naʻa nau feohi “fakataha mo e kau feʻauakí” (1 Kolinitō 5:9). ʻE fēfē hano fakatatau mai ʻa e naʻinaʻi ko ʻení kiate kitautolu? (Mou aleaʻi ha ngaahi founga ʻoku hanga ai ʻe he ngaahi kaungāmeʻa mo e founga fakafiefia ʻoku tau filí, ʻo uesia ʻetau holi mo hotau mālohi ke moʻui maʻá.) Te tau lava fēfē ʻo fakaʻehiʻehi mei he ngaahi mālohi angaʻuli ko ʻení?
Ko e hā ha ngaahi founga ʻoku fakaʻaongaʻi ʻe Sētane ke ne fakalotoʻi ʻaki kitau-tolu ʻoku i ai pē ha ngaahi fakangofua ʻi he ngaahi fono ʻa e ʻOtuá fekauʻaki mo e angamaʻá? (Vakai ki he lea ʻoku hā ʻi laló.) Te tau lava fēfē ʻo matuʻuaki ʻa e ngaahi ʻahiʻahi ko ʻení? Ko e hā ha fakalotolahi ʻoku ʻomi ʻe he 1 Kolinitō 10:13 ʻi heʻetau fāifeinga ko ia ke matuʻuaki ʻa e ʻahiʻahi ke fakahoko ha angahalafakasekisualé? Kuo tāpuekina fēfē koe ʻi hoʻo fekumi ke ke maʻu e tokoni ʻa e ʻEikí ke matuʻuaki ʻaki ʻa e ʻahiʻahí?

Naʻe pehē ʻe ʻEletā Lisiate G. Sikoti: “ ʻOku hanga ʻe Sētane ʻo fakataueleʻi ha taha ke ne tui ʻoku ʻi ai ha faʻahinga tuʻunga ʻe fakaʻatā ke fakahoko ai ha fetuʻutaki fakaesino ʻi he vahaʻa ʻo ha ongo meʻa ʻokú na felotoi, ʻa ia ʻokú na fekumi ke fakatōliʻa e faʻahinga ongo mālohi ko ia ʻokú na maʻú, pea kapau te na kei nofo pē ʻi loto he ngaahi ngataʻanga kuo fokotuʻú, he ʻikai hoko ha fakatamaki. ʻI heʻeku hoko ko ia ko ha fakamoʻoni kia Sīsū Kalaisí, ʻoku ou fakamoʻoniʻi heni ʻoku ʻikai ʻaupito[ke] moʻoni ia… . Fakapapauʻi ʻa e meʻa te ke faí mo ia he ʻikai te ke faí. ʻI he taimi ʻoku hoko mai ai e ʻahiʻahí, ʻoua naʻá ke liliu ho ngaahi tuʻunga ʻulungāanga mahuʻingá” (ʻi he Tūhulu, Sānuali 1995, palakalafi 25).
Ko e hā ha talaʻofa ʻoku ʻomi ʻe he Fakalelei ʻa Sīsū Kalaisí kiate kinautolu ʻoku fakatomala mei he angahala fakasekisualé? (Vakai, 1 Kolinitō 6:11; ʻĪsaia 1:18; T&F 58:42.)

Fakaʻosí

Fakamoʻoni ange, ʻo hangē ko ia ne fai ʻe Paula, ʻoku kei hokohoko atu pē hono akoʻi kiate kitautolu ʻe he kau ʻaposetolo mo e kau palōfita he ngaahi ʻaho ní, ʻa e ngaahi meʻa ʻoku totonu ke tau fai ke tau nofo ai ʻi loto ʻi he ngaahi fakangatangata kuo tuku mai ʻe he ʻEikí. Te ke lava ke mou aleaʻi nounou ha lea ne toki fai ʻi ha konifelenisi ʻa ia ne lea ai ʻa e palōfitá pe ko ha taha ʻo e kau ʻaposetoló, ʻi ha taumuʻa ne lave ki ai ʻa Paula ʻi heʻene tohi ki he kakai Kolinitoó, hangē ko e fakaʻehiʻehi mei he fakakikihí, fakafalala ki he Laumālié pe ko e moʻui maʻá. Kapau ʻe feʻunga, fakamatala ki ha founga kuo tāpuekina ai koe koeʻuhí ko haʻo fakahoko ʻa e naʻinaʻi ʻa Paulá pe ko ha taha ʻo e kau palōfita pe kau ʻaposetolo ʻi he ngaahi ʻaho kimui ní.

Ngaahi Fakakaukau ke Fakalahi ki Hono Akoʻi ʻo e Lēsoní

ʻOku hoko ʻa e nāunau ko ʻení ko ha fakalahi ki he lēsoni ʻoku fokotuʻu atú. Te ke lava ʻo fakaʻaongaʻi ʻa e fakakaukau ko ʻení ke hoko ko ha konga ʻo e lēsoní.

1. “ ʻA e ngaahi meʻa ʻoku teuteu ʻe he ʻOtuá maʻanautolu ʻoku ʻofa ʻiate iá” (1 Kolinitō 2:9)

Ko e hā e meʻa fakaofo pe fakaʻofoʻofa taha kuó ke mamata ki ai pe kuo hoko kiate koé?

Kole ki ha taha he kalasí ke ne lau ʻa e 1 Kolinitō 2:9. Fai haʻo fakamoʻoni, ʻoku fakaofo ange e ngaahi tāpuaki kuo teuteu ʻe he ʻEikí maʻatautolú, ʻi ha faʻahinga meʻa te tau fakakaukau ki ai, ʻo kapau te tau ʻofa ʻiate ia mo tauhi ʻene ngaahi fekaú.

2. “Ka ʻoku fefakamāuʻaki ʻa e kāinga mo e kāinga” (1 Kolinitō 6:6)

Lau pea mou aleaʻi ʻa e 1 Kolinitō 6:1–8.

Ko e hā e founga ne fakaleleiʻi ʻaki ʻe he kāingalotu ʻi Kolinitoó ʻenau ngaahi fetaʻemahinoʻakí? (Vakai, 1 Kolinitō 6:1–8.) Naʻe fakatupu fēfē ʻe he meʻá ni ha māvahevahe ʻoku lahi angé? Ko e hā ha founga ʻoku hā mahino ai he ʻahó ni ʻa e palōpalemá ni? Ko e hā te tau lava ʻo ako mei he naʻinaʻi ʻa Paulá?