Lēsoni 12

Ko e Meʻa-foaki ʻo e Laumālie Māʻoniʻoní

Taumuʻá

Ke tokoniʻi e fānaú ke nau fakahoungaʻi ʻa ʻenau maʻu ʻa e meʻa-foaki ʻo e Laumālie Māʻoniʻoní ʻi he taimi ʻoku fakamaʻu ai kinautolu ke nau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Teuteú

1. Lau mo akoʻi ʻa e Sione 14:16–17, 26.

2. Teuteu mai ʻa e saati mei he lēsoni 7, “Ko ʻete Hoko ko e Mēmipa ʻo e Siasi ʻo Sīsū Kalaisí”. Hanga ʻo fokotuʻu ʻa e ngaahi kaati foʻi lea ko e “Tui kia Sīsū Kalaisí”, “Fakatomalá”, pea mo e “Papitaisó” ʻi he ngaahi sitepu ʻoku totonu ke nau tuʻu aí ki muʻa pea toki kamata ʻa e kalasí. Teuteu mai mo e kaati foʻi lea ko e “Meʻa-foaki ʻo e Laumālie Māʻoniʻoní” ke toki fakaʻaongaʻi he lolotonga hono fakahoko ʻo e lēsoní.

3. Tuku ʻa e fakatātā 3–14, Ko ha Taʻahine ʻoku Hilifakinima ki he Foaki ʻo e Laumālie Māʻoniʻoní (62020) ki ha loto puha. Kapau ʻe lava pea kofukofuʻi ʻa e puhá ke hangē pē ha meʻaʻofá.

4. Teuteu ke ke tokoni ki he fānaú ʻi hono hivaʻi pe lau ʻa e lea ki he foʻi hiva ko ia ko e “Ko e Laumālie Māʻoniʻoní” (Children’s Songbook, p. 105); ʻoku ʻoatu ʻa hono leá ʻi he tafaʻaki ki mui ʻo e tohi lēsoni ko ʻení.

5. Ngaahi nāunau ʻoku fie maʻú:

   1. Tohi Tapu.

   2. Fakatātā 3–14, Ko ha Taʻahine ʻoku Hilifakinima ki he Foaki ʻo e Laumālie Māʻoniʻoní (62020); fakatātā 3–22, Ko e ʻOhomohe Fakaʻosí (62174 900; Ngaahi Fakatātā ʻo e Ongoongoleleí 225); pea mo e fakatātā 3–10, Ko e Fuofua Meʻa Hā Maí (62470 900; Ngaahi Fakatātā ʻo e Ongoongoleleí 403).

6. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoni

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

ʻE Lava ke tau Maʻu ʻa e Meʻa-foaki ʻo e Laumālie Māʻoniʻoní

ʻEkitivitī ke takiakiʻi ʻaki e tokangá

Fakaʻaliʻali ʻa e puha “meʻaʻofá” pea fai ʻa e ongo fehuʻi ko ʻení:

ʻEkitivitī ke takiakiʻi ʻaki e tokangá

• Ko e hā nai hono ʻuhinga ʻoku tau fefoakiʻaki meʻaʻofa aí?

• Ko e hā hoʻo ongo ʻi he taimi ʻoku foaki atu ai ʻe ha taha haʻo meʻaʻofa?

Fakamatala ʻa e faiakó

Fakamatalaʻi ange ki he fānaú ko e taha ʻo e ngaahi ʻaho mahuʻinga taha ʻo ʻetau moʻuí ʻa e ʻaho ko ia ʻoku tau hoko ai ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe foaki mai ʻe he Tamai Hēvaní pea mo Sīsū Kalaisi ha meʻaʻofa mahuʻinga maʻatautolu ʻi he ʻaho fakaʻofoʻofa ko iá.

Ngaahi tokoní

Tala ange ki he fānaú te ke ʻoange ha ngaahi tokoni kiate kinautolu ke tokoni ki hono ʻiloʻi ʻa e meʻaʻofa ko ʻení. Fakaafeʻi kinautolu ke nau fakafanongo fakalongolongo pē kae ʻoua kuó ke fakahā kotoa ange kiate kinautolu ʻa e ngaahi tokoní kotoa.

Ngaahi tokoní

1. ʻE ʻikai lava ke fakatauʻaki ha paʻanga ʻa e meʻa-foaki ko ia ʻoku foaki mai ʻe he Tamai Hēvaní pea mo Sīsū Kalaisi maʻatautolú.

2. ʻE ʻikai ke tau lava ʻo pukepuke ʻa e meʻa-foaki ko ʻení ʻi hotau nimá pea mamata ki ai ʻo hangē ko ia te tau fai ki ha tohi pe meʻa-vaʻinga.

3. ʻOku mahuʻinga ange ʻa e meʻa-foaki ia ko ʻení ʻi ha toe meʻaʻofa ʻe lava ke maʻu ʻe ha taha.

4. ʻOkú ne tokoniʻi mo fakafiemālieʻi ʻa e kāingalotu moʻui anga-tonu ʻi he Siasí ʻi hono kotoa ʻo ʻenau moʻuí.

5. ʻOku tau maʻu ʻa e meʻa-foaki ko ʻení ʻi he taimi ʻoku hili ai ʻe he kau tangata ʻoku nau maʻu ʻa e Lakanga Taulaʻeiki faka-Melekisētekí ʻa honau nimá ʻi hotau ʻulú pea fakamaʻu kitautolu ke tau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Kole ange kiate kinautolu kotoa pē ʻoku nau ʻiloʻi ʻa e meʻa-foaki ko ʻení ke hiki hake honau nimá.

Ngaahi tokoní

• Ko e hā ʻa e meʻa-foaki ko ʻení? (Ko e meʻa-foaki ʻo e Laumālie Māʻoniʻoní.)

Fakatātaá mo e fealēleaʻakí

Fekau ha taha ʻo e fānaú ke ne fakaava hake ʻa e meʻaʻofá ke ʻiloʻi ai ʻa e fakatātaá. ʻOsi ko iá, pea fakaʻaliʻali leva ʻa e fakatātā ʻo e taʻahine ʻoku hilifakinimá. Fakamatalaʻi ange ʻa e founga hono foaki ʻo e meʻa-foaki ʻo e Laumālie Māʻoniʻoní. Ko ʻene ʻosi pē hono papitaiso ʻo ha taha, ʻoku hili leva ʻe he kau tangata ʻoku nau maʻu ʻa e Lakanga Taulaʻeiki faka-Melekisētekí ʻa honau nimá ki hono ʻulú, ʻo hangē ko ia ʻoku hā ʻi he fakatātaá. ʻOku fai ʻa e lotú ʻe ha taha ʻo e kau tangatá ni (meimei ke fai ia ʻe he tamaí, pīsopé, ha faifekau, pe ko ha kaumeʻa pē ʻo e toko taha ʻoku hilifakinimá). Lolotonga ʻa e lotú, ʻoku fakamaʻu ai ʻa e toko tahá ni ke hoko ko e mēmipa ʻo e Siasí peá ne maʻu ʻa e meʻa-foaki ʻo e Laumālie Māʻoniʻoní.

Fakatātaá mo e fealēleaʻakí

• Ko e hā ʻa e meʻa ʻoku mou ʻilo ʻo kau ki he Laumālie Māʻoniʻoní?

Tuku ke fakamatala taimi nounou pē ʻa e fānaú fekauʻaki mo ʻenau ʻilo ki he Laumālie Māʻoniʻoní. Toʻo mei heʻenau ngaahi talí ʻa e ngaahi meʻa ko ʻení:

Fakatātaá mo e fealēleaʻakí

1. ʻOku ʻikai ke maʻu ʻa e Laumālie Māʻoniʻoní ha sino kakano mo e hui ʻo hangē ko ia ʻoku tau maʻú. ʻOkú ne maʻu ha sino fakalaumālie ʻi he tatau pē ʻo e tangatá.

2. ʻOku akoʻi kitautolu ʻe he Laumālie Māʻoniʻoní fekauʻaki mo e Tamai Hēvaní pea mo Sīsū Kalaisi pea ʻokú ne fakamoʻoniʻi ʻa e ngaahi meʻa ko ia ʻoku akoʻi mai kiate kitautolu fekauʻaki mo kinauá.

3. ʻOku fakamoʻoniʻi mai ʻe he Laumālie Māʻoniʻoní ʻi he taimi ʻoku akoʻi ai kiate kitautolu ʻa e moʻoní, ʻoku moʻoni ʻa e ngaahi meʻa ʻoku tau fanongo ki aí.

4. ʻOku fekauʻi mai ʻa e Laumālie Māʻoniʻoní mei he Tamai Hēvaní pea mo Sīsū Kalaisi ke tokoni kiate kitautolu ke tau fili ʻa e totonú.

Saati

Fakaʻaliʻali ʻa e saati “Ko ʻete Hoko ko e Mēmipa ʻo e Siasi ʻo Sīsū Kalaisí”.

Fokotuʻu ʻa e kaati foʻi lea ko ia ko e “Meʻa-foaki ʻo e Laumālie Māʻoniʻoní” ʻi he sitepu hono fā ʻo e sātí. Fekau ha taha ʻoku lahi ʻi he fānaú ke ne lau leʻo-lahi ʻa e ngaahi foʻi leá pe ko haʻo lau pē ia; ʻosi ko iá pea toki angimui kotoa mo e fānaú ki ai.

Fakamatalaʻi ange ʻoku ʻikai ke maʻu ʻe he kakai kotoa pē ʻi he māmaní ʻa e monū ko ʻeni ke maʻu ʻa e meʻa-foaki ʻo e Laumālie Māʻoniʻoní. Ko kinautolu pē kuo nau papitaiso pea fakamaʻu ke hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku nau maʻu ʻa e tāpuaki ko iá. Hanga ʻo fakamamafaʻi ange ko e taimi ko ē ʻoku tau maʻu ai ʻa e meʻa-foaki ʻo e Laumālie Māʻoniʻoní ʻi hono hilifakinima kitautolú, ʻoku tau hoko moʻoni ai ko e kau mēmipa ʻo e Siasí. Mou toe fakamanatu mo e fānaú ʻa e ngaahi sitepu ʻi he sātí ʻo mou kamata pē mei he tui kia Sīsū Kalaisí.

Fakamanatu ʻo e tefito ʻo e tuí

Hiki ʻi he palakipoé ʻa e lea ʻo e tefito ʻo e tui hono faá. Mou lau leʻo lahi fakataha ia mo e fānaú. ʻOsi ko iá pea tāmateʻi ha ngaahi foʻi lea ʻe niʻihi mei ai pea mou toe lau leʻo-lahi fakataha pē mo e fānaú. Hokohoko atu pē hono tāmateʻi tahataha ʻo e ngaahi foʻi leá ʻi he taimi kotoa pē ʻoku mou lau ai iá, pea hokohoko pehē ai pē ki he fuoloa ʻe kei ʻaonga ai ki he fānaú.

Naʻe Talaʻofa ʻa Sīsū Kalaisi te ne Fekauʻi Mai ʻa e Laumālie Māʻoniʻoní

Fakatātaá

Fakaʻaliʻali ʻa e fakatātā 3–22, Ko e ʻOhomohe Fakaʻosí. Fakamatalaʻi ange naʻe kai efiafi fakaʻosi ʻa Sīsū Kalaisi mo ʻene Kau ʻAposetolo ʻe toko Hongofulu Mā Uá he efiafi ko ia ki muʻa pea tutuki iá. Naʻá ne toe akoʻi foki kiate kitautolu ʻi he taimi ko ʻení ha meʻa mahuʻinga ʻaupito. Naʻá ne ʻilo ʻe mamahi ʻa e kau ʻaposetoló ʻi he taimi te ne ʻalu aí. Naʻá ne ʻiloʻi te nau fie maʻu ʻa ʻene tokoní. Naʻe talaʻofa ʻa Sīsū ki he kau ʻAposetoló he ʻikai ke ne taki kinautolu ka te ne fekauʻi mai ha toko taha ke tokoniʻi mo fakafiemālieʻi kinautolu.

Folofolá

Kole ki ha tamasiʻi pe taʻahine ʻoku lahí ke ne lau ʻa e meʻa naʻe fakahā ʻe Sīsū ki heʻene kau ʻAposetoló mei he tohi Sione 14:16 pe ko haʻo lau pē ia.

Folofolá

• Ko e hā ʻa e hingoa ʻe taha ʻo e Fakafiemālie naʻe talaʻofa mai ʻe Sīsū te ne fekauʻi mai ki he kau ʻAposetoló? (Ko e Laumālie Māʻoniʻoní.)

Lau ki he fānaú ʻa e Sione 14:26.

Hanga ʻo fakamamafaʻi ange naʻe fekauʻi mai ʻe Sīsū Kalaisi ʻa e Laumālié ke ne tokoniʻi mo fakafiemālieʻi ʻa ʻene kau ʻAposetoló. Pea neongo naʻe ʻikai ke lava ʻa e kau ʻAposetoló ke mamata ki he Laumālie Māʻoniʻoní, ka naʻa nau ongoʻi ʻa ʻene tokoní mo fakafiemālieʻi kinautolu. Ko hono ʻuhinga ia ʻoku ui ai ko e Fakafiemālié.

Hiva

Hivaʻi pe lau ʻa e lea ʻo e “Ko e Laumālie Māʻoniʻoní”.

ʻE Lava ʻe he Laumālie Māʻoniʻoní ʻo Tokoniʻi Kitautolu

Fakamatala ʻa e faiakó

Fakamatalaʻi ange ʻoku tau maʻu ʻa e faingamālie tatau mo ia naʻe maʻu ʻe he kau ʻAposetoló ʻi heʻetau kau ki he Siasi ʻo Sīsū Kalaisí, ke maʻu ʻa e Laumālie Māʻoniʻoní ke ne tokoniʻi mo fakafiemālieʻi kitautolu. Fakamamafaʻi ange ko e feohi ʻo e Laumālie Māʻoniʻoní ko e taha ia ʻo e ngaahi meʻa-foaki mahuʻinga taha te tau lava ke fiefia ai ʻi he moʻuí ni. Te tau maʻu maʻu pē ʻa e feohi ʻo e Laumālie Māʻoniʻoní ʻo kapau te tau moʻui taau mo moʻui anga-tonu.

Tala ange ki he fānaú ʻe lava ʻe he Laumālie Māʻoniʻoní ʻo tokoniʻi kitautolu ke tau ʻiloʻi ʻa e meʻa ke fai ʻi he taimi ʻoku tau fehangahangai ai mo e ngaahi fili ʻoku faingataʻá. Fakalotolahiʻi e fānaú ke nau muimui ki he ngaahi ongo ko ia ʻoku nau maʻu mei he Laumālie Māʻoniʻoní ʻi he taimi ʻoku nau manavahē ai pe loto mamahí. Te ne tokoniʻi kinautolu ke nau ʻiloʻi ʻa e meʻa ʻoku totonu ke nau faí, hangē ko haʻane ueʻi kinautolu ke nau ʻalu ki ha toko taha ʻe lava ke tokoni kiate kinautolu.

Talanoá

Fai ʻa e talanoa ko ʻení ʻi hoʻo lea pe ʻaʻau. Kole ki he fānaú ke nau fanongo ke nau ʻiloʻi pe naʻe tokoniʻi mo fakafiemālieʻi fēfeeʻi ʻe he Laumālie Māʻoniʻoní ʻa e taʻahine ko ʻeni naʻe hingoa ko Saní:

Ko e konga lahi ʻo e moʻui ʻa Saní naʻá ne nofo ʻi ha kiʻi kolo faama siʻisiʻi. Naʻá ne ʻofa ʻi he kolo ko ʻení pea mo e kakai naʻe nofo aí. Naʻe faʻa fakakaukau maʻu pē ʻa Sani ki hono fakalata ʻo ʻene nofo ʻi ha kolo peheni ʻoku fonu ʻi he kakai anga fakakaumeʻá.

ʻI ha ʻaho ʻe taha, naʻe foki mai ai ʻa e tangataʻeiki ʻa Saní mei he ngāué ʻo fakahā ki honau fāmilí ʻe fetongi ʻene ngāué pea te nau hiki leva ki ha kolo lahi ange.

Talanoá

• ʻOku mou pehē ko e hā e ongo naʻe maʻu ʻe Saní?

Naʻe loto mamahi ʻa Sani ʻi he taimi kotoa pē naʻá ne fakakaukau atu ai ki haʻanau hiki. Naʻe faingataʻa kiate ia ke ne fakakaukau atu ko e taimi nounou pē mei heni kuó ne ʻalu kae tuku hono ngaahi kaumeʻá, ʻapí, ʻapi akó, pea mo hono uōtí.

Naʻe hohaʻa e loto ʻo Saní. Naʻá ne fifili pē ʻe faingataʻa nai ke toe maʻu hano ngaahi kaumeʻa foʻou. ʻE anga fēfē nai ʻa e ʻapi mo e uooti foʻou ʻe hiki ki aí? ʻE faingataʻa nai ʻa e ngāue fakaakó kiate ia?

Naʻe ʻikai ke ʻi ai ha taha ia ʻe lava ʻo tokoni kia Sani ke toʻo atu ʻa e ongoʻi loto hohaʻa ko ʻení. Naʻe fakakaukau leva ʻa Sani ke ne lotu ʻo kole ha tokoni mei he Tamai Hēvaní.

Ne lotu ʻa Sani ki he Tamai Hēvaní ʻaki ʻa e kotoa ʻo hono lotó. ʻI he lolotonga ʻene lotú, naʻe kamata ke hoko ha meʻa fakaʻofoʻofa. Naʻe kamata ke mole atu kotoa ʻa e ongoʻi hohaʻá mo e manavaheé.

Naʻe ongoʻi ʻe Sani naʻe ʻi ai ha toko taha ʻokú ne fakafiemālieʻi ia.

Talanoá

• ʻOku mou pehē ko e hā e meʻa naʻá ne fakafiemālieʻi ʻa Saní? (Ko e Laumālie Māʻoniʻoní.)

Naʻe hiki ʻa e fāmili ʻo Saní, pea naʻe iku lelei ʻa e meʻa kotoa pē. Naʻá ne manatuʻi maʻu pē ʻa e tokoni ʻofa naʻá ne maʻu mei he Tamai Hēvaní ʻo fakafou mai ʻi he Laumālie Māʻoniʻoní.

Meʻa naʻe aʻusia ʻe he faiakó mo ʻene fakamoʻoní

ʻE lava pē ke ke fakamatala ki ha taimi naʻe fakafiemālieʻi ai koe ʻe he Laumālie Māʻoniʻoní, hangē ko ha taimi naʻá ke manavahē ai pe mālōlō ha taha naʻá ke ʻofa ai. Fai hoʻo fakamoʻoní, ʻoku lava ʻe he Laumālie Māʻoniʻoní ʻo fakafiemālieʻi mo tataki kitautolu. Ko e meʻa-foaki ʻo e Laumālie Māʻoniʻoní, ʻa ē ʻoku tau maʻu ʻi he hili hotau papitaisó, ko e taha ia ʻo e ngaahi meʻa-foaki mahuʻinga taha kuo foaki mai ʻe he Tamai Hēvaní ke tokoniʻi kitautolu ke tau fili ki he totonú ʻi hono kotoa ʻo ʻetau moʻuí.

Fakamatala Fakanounoú

Fakamamafaʻi ange ʻoku tau tui ki he Laumālie Māʻoniʻoní ʻi heʻetau hoko ko e kau mēmipa ʻo e Siasí. ʻOku tau ʻiloʻi te ne ʻomai ʻa e tokoni mo e fakafiemālie ʻoku tau fie maʻú ʻo kapau te tau talangofua ki he ngaahi fekaú.

Tefito ʻo e Tuí

Fakamatalaʻi ange ʻoku felāveʻi ʻa e tefito ʻo e tui ʻuluakí mo e Laumālie Māʻoniʻoní. Mou lau fakataha mo e fānaú ʻa e tefito ʻo e tui ʻuluakí. Fakaʻaliʻali ʻa e fakatātā 3–1, Ko e Fuofua Meʻa Hā Maí, pea mo e fakatātā 3–14, Ko ha Taʻahine ʻoku Hilifakinima ki he Foaki ʻo e Laumālie Māʻoniʻoní, ʻi he taimi ʻe feʻunga ke fakaʻaliʻali aí ʻi he lolotonga hoʻomou lau ʻa e tefito ʻo e tuí.

Fakaafeʻi ha taha ʻo e fānaú ke ne fai ʻa e lotu tukú; fakamanatuʻi ange ki ai ke ne fakamālō ki he Tamai Hēvaní ʻi heʻene fakafaingofuaʻi ke tau lava ʻo maʻu ʻa e meʻa-foaki ʻo e Laumālie Māʻoniʻoní.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he lotoʻi lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Fakaafeʻi mai ki hoʻo kalasí ha toko taha ʻaʻahi makehe. Kole kiate ia ke ne fakamatala ki ha taimi naʻe fakafiemālieʻi ai ia ʻe he Laumālie Māʻoniʻoní. (Maʻu ha ngofua mei he pīsopé pe palesiteni fakakoló kapau ʻoku ʻikai ko ha toko taha pē ʻeni ʻi homou uōtí pe koló.)

2. Fehuʻi ange pe ʻoku ʻi ai ha toko taha ʻokú ne ʻai kinautolu ke nau ongoʻi loto māfana, fiefia, mo malu foki, kae tautautefito ki he taimi ʻoku nau ongoʻi loto mamahi aí. Fakamamafaʻi ange ʻoku faʻa lava ʻe he kakai pehení ʻo fakafiemālieʻi kitautolu ʻi he taimi ʻe niʻihi ʻoku tau loto mamahi ai mo ongoʻi taʻe latá. Tala ange ʻoku faʻa ui ʻa e Laumālie Māʻoniʻoní ʻi he taimi ʻe niʻihi ko e Fakafiemālié. Te ne lava ke ʻomi ha fakafiemālie lahi kiate kitautolu he lolotonga ʻetau moʻuí. Naʻe fekau mai ia ʻe Sīsū Kalaisi ke tau feʻao ʻi he taimi ʻoku tau ongoʻi loto mamahi mo taʻe fiemālie aí.

3. Hivaʻi pe lau fakataha ʻa e ongo laine fakaʻosi ʻo e “The Still Small Voice” (Children’s Songbook, p. 106):

   Listen, listen. (ʻai e nimá ke hangē ha ipú he tuʻa telingá)

   The Holy Ghost will whisper. (ʻAi ʻa e foʻi tuhu siʻisiʻí ki he ngutú)

   Listen, listen (ʻAi e nimá ke hangē ha ipú he tuʻa telingá)

   To the still small voice. (ʻAi e nimá ki he funga fatafatá)

4. Mou fai ʻa e foʻi vaʻinga fakalongolongo ko ʻení ke fakaʻaliʻali kiate kinautolu ʻe lava pē ke tataki kinautolu ʻe ha kihiʻi leʻo siʻi.

   Fakaʻaliʻali ki he fānaú ha faʻahinga meʻa siʻisiʻi te ke fufuuʻi ʻi he foʻi vaʻinga ko ʻení. Fekau ha tamasiʻi pe taʻahine ke mavahe mei he toenga ʻo e fānaú ʻi ha kiʻi taimi siʻi pē, ka ke fufuuʻi ʻa e meʻa ko iá. Fekau ʻa e toko taha naʻe ʻalú ke foki mai pea tala ange ki ai kuo pau ke ne fakafanongo fakalelei ke ne lava ʻo ʻilo ʻa e hala ki he meʻa ʻoku fufuuʻí. Ngāueʻaki pē ha kiʻi ongo leʻo siʻi hangē ko hano kiʻi tātaaʻi leʻo siʻi ha peni vahevahe, kiʻi pasipasi leʻo-siʻi ho nimá, pe ko haʻo ngūngū ha foʻi hiva ke fakahā ki he tamasiʻí pe taʻahiné ʻa e feituʻu ke ne tafoki ki ai ke kumi ʻa e meʻa naʻe fufūʻí. Fakapapauʻi ʻoku leʻo siʻi pea ʻikai ke hohaʻa ʻa e faʻahinga ongo ʻokú ke ʻaí. Ko ʻene sio pē ʻa e tamasiʻí pe taʻahiné ki he feituʻu totonú peá ke kiʻi tātā māmālie. Ko ʻene ofi ange ko ia ki he meʻa ʻoku fufūʻí pea ke tā ke vavevave ange kae ʻoua leva pē kuó ne maʻu ʻa e meʻá.

   Fakamamafaʻi ange ki he fānaú ʻe lava pē ke tataki kinautolu ʻo kapau te nau moʻui mo fakafanongo ki he kihiʻi leʻo siʻi ʻo e Laumālie Māʻoniʻoní.

5. Fanafana ki he fānaú peá ke leaʻaki ha meʻa hangē ko ʻení, “Kapau ʻokú ke ongoʻi ʻeku leá, ʻai ho tuhú ki ho kouʻahé. Kapau ʻokú ke ongoʻi ʻeku leá, ʻai ho tuhú ki ho kumukumú.” ʻOsi ko iá, peá ke fakamatalaʻi leva ki he fānaú ʻoku ʻi ai foki mo e toko taha kehe ʻokú ne leaʻaki ha kihiʻi leʻo siʻi, pea kuo pau ke nau fakafanongo fakalelei ke nau ongoʻi ʻa e meʻa ʻoku fakahā ange ʻe he leʻo ko iá kiate kinautolú. ʻOku haʻu ʻa e leʻo ko iá mei he Laumālie Māʻoniʻoní.