Lēsoni 34

ʻOku Tau Lava ʻo Lotu ki he Tamai Hēvaní

Taumuʻá

Ke fakamālohia ʻa e loto holi ʻa e tamasiʻi mo e taʻahine taki taha ke ne lotu ki he Tamai Hēvaní ʻo hangē ko ia naʻe fai ʻe Sīsū Kalaisí.

Teuteú

1. Lau mo ako ʻi he faʻa lotu ʻa e 3 Nīfai 17 ʻo aʻu ki he vahe 19.

2. Teuteu ke hivaʻi pe lau ʻa e lea ʻo e “Fakafetaʻi ʻe Tamai” (Children’s Songbook, p. 7).

3. Teuteuʻi mai ha laʻi pepa hangē ko ʻení ke taki taha ʻa e fānaú:

   ʻOku ou Fakamālō Kiate koe

   ʻOku ou Kole Kiate Koe

4. Ngaahi nāunau ʻoku fie maʻú:

   1. Tohi ʻa Molomona.

   2. Peni vahevahe pe kala ke taki taha ʻa e fānaú.

   3. Fakatātā 3–60, Ko ha Taʻahine ʻoku Lotu (622310); mo e fakatātā 3–61, Ko e Lotu ʻa Sīsū mo e kakai Nīfaí (62542 900).

5. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

ʻOku Lava ke Tau Talanoa mo ʻEtau Tamai ʻi Hēvaní

ʻEkitivitī ke takiakiʻi ʻaki e tokangá

Fakaʻaliʻali ʻa e fakatātā 3–60, Ko ha Taʻahine ʻoku Lotu.

ʻEkitivitī ke takiakiʻi ʻaki e tokangá

• Te tau lava fēfē ke talanoa mo ʻetau Tamai Hēvaní?

• Ko e hā hono ʻuhinga ʻoku tau lotu ai ki heʻetau Tamai Hēvaní?

• Ko e fē ʻa e taimi ʻe lava ke tau lotu ai ki heʻetau Tamai Hēvaní?

Koeʻuhí ko e fuʻu ʻofa lahi ʻa e Tamai Hēvaní ʻiate kitautolú, kuó ne fakahoko ai ke tau lava ʻo talanoa mo ia. Ko hono finangaló ke tau fakamālō ange ʻi he ngaahi tāpuaki ʻoku tau maʻú. ʻOkú ne toe finangalo foki ke tau kole ha tokoni meiate ia ʻi ha faʻahinga taimi pē ʻoku tau fie maʻu aí.

ʻOku Tau Lava ke Fakamālō ki Heʻetau Tamai Hēvaní

Fealēleaʻaki

Tala ange ko e taimi ʻoku tau lotu aí, ʻoku totonu ke tau fakamālō ki he Tamai Hēvaní koeʻuhí ko e ngaahi tāpuaki ʻoku tau maʻú.

Fealēleaʻaki

• Ko e hā ha niʻihi ʻo e ngaahi tāpuaki kuo foaki mai ʻe he Tamai Hēvaní pea ʻoku lava ke tau fakamālō ai kiate ia? (ʻE lava pē ke kau mai ʻi he ngaahi talí ʻa hotau ʻapí, fāmilí, māmani fakaʻofoʻofa ko ʻení, meʻakaí, pea mo e valá.)

Ko e taimi ʻoku tau talanoa ai ki he Tamai Hēvaní ʻoku tau fakaʻaongaʻi ʻa e ngaahi lea makehe. Ko e taimi ʻoku tau fakamālō ai kiate iá, ʻoku tau pehē, “ʻOku mau fakafetaʻi ki he ʻAfiona.”

Tuku ke fakahā ʻe he fānaú ki he kalasí ʻa e founga ke nau fakamālō ai ki he Tamai Hēvaní koeʻuhí ko ha tāpuaki makehe kuo nau maʻu. Kole ki he tamasiʻi pe taʻahine taki taha ke ne fakakaukau angé ki ha faʻahinga meʻa ke ne fakamālō ai ki he Tamai Hēvaní ʻo ne ngāueʻaki ʻa e ʻOku ou fakafetaʻi ki he ʻAfioná.

Talanoá

Fekau e fānaú ke nau fanongo ka ke fai ange ʻi hoʻo lea pē ʻaʻau ʻa e talanoa ko ʻeni kau kia Sini pea mo ʻene manatuʻi ke ne fakamālō ki he Tamai Hēvaní.

Ko e lolotonga ʻeni ʻo e taimi taú ʻi ʻIngilani. Naʻe fakapoʻuli pea naʻe fuʻu manavahē ʻaupito ʻa Sini. Naʻe nofo ʻa e kui fefine ʻa Siní ʻi ha kiʻi kolo ofi atu ia ki Lonitoni, pea ko e ʻalu ʻeni ʻa Sini ke ʻaʻahi ki ai. Naʻá ne ʻaka mai ʻi heʻene pasikalá he maile ʻe ua ke aʻu ki he hala lahí. Naʻe lotuʻaki ʻe Sini ʻa hono lotó kotoa ke ʻoua naʻa hoko ha meʻa kiate ia.

ʻI heʻene ʻaka mai ʻene pasikalá mo lotú, naʻe puhiʻi mai ha tuʻoni matangi mālohi mo momoko ʻo mei ʻosi ai pē ʻene manavá ʻaʻana ia. Naʻe toe lotu pē ʻa Sīni ke maluʻi ia pea ke ne lava foki ke ʻilo ʻa hono halá.

Fakafokifā pē kuo ʻasi mai ha maama mei he foʻi haké. Naʻe ʻaka atu ʻa Sini ki he feituʻu naʻe hā mei ai ʻa e māmá. Naʻe ʻi muʻa pē ʻa e māmá ʻia Sini ʻi he toenga ʻo ʻene fonongá.

Naʻe fakamālō lahi ʻa Sini ʻi he meʻá ni. Naʻá ne ʻiloʻi kuo tali ʻe he Tamai Hēvaní ʻa ʻene lotú. Ko e taimi kotoa pē naʻá ne manatuʻi ai ʻa e meʻá ni, naʻá ne toe fakamālō pē ki he Tamai Hēvaní (Vakai, Lucile C. Reading, “The Light,” Children’s Friend, ʻAokosi, 1965, p. 45).

Hanga ʻo fakamamafaʻi ange ʻoku totonu ke tau manatuʻi taki taha ke tau fakamālō ki he Tamai Hēvaní koeʻuhí ko e meʻa kotoa pē kuó ne foaki maʻatautolú pea mo e tokoni ʻoku tau maʻú.

Hivá mo e fealēleaʻakí

Hivaʻi pe lau fakataha mo e fānaú ʻa e lea ʻo e veesi ʻuluaki ʻo e “Fakafetaʻi ʻe Tamai.”

Fakafetaʻi ʻe Tamai ʻi Hēvani,

ʻI hoʻo angalelei mo ʻaloʻofá.

Fakamālō he ʻapí, kaumeʻá mo e mātuʻá,

Mo e tāpuaki ʻoku ou tōfanga aí.

Kole ki he fānaú ke nau fakahā mai mo ha toe ngaahi tāpuaki kehe kuo nau fakamālō ai ki he Tamai Hēvaní.

ʻOku Lava ke Tau Kole Tokoni ki he Tamai Hēvaní

Fakatātaá mo e fakamoʻoní

Tuhu ki he fakatātā 3–60, Ko ha Taʻahine ʻoku Lotu.

Fai hoʻo fakamoʻoní te tau lava ke kole ha tokoni mei he Tamai Hēvaní ʻi ha faʻahinga taimi pē ʻoku tau fie maʻu aí, ʻo tatau ai pē pe ko e hā ʻa ʻetau palōpalemá.

Fakatātaá mo e fakamoʻoní

• Ko e hā ha niʻihi ʻo e ngaahi meʻa te tau lava ʻo kole ke tokoni mai ai ʻa e Tamai Hēvaní? (ʻOange ha taimi feʻunga ke fakakaukau ai ʻa e fānaú. ʻE lava pē ke kau ʻi heʻenau talí ʻa e tokoni ki haʻate malanga pe ko ʻete ngāue fakaakó, ha tokoni ke mahino ʻa e ngaahi fekaú pea ako ke talangofua ki ai, ki ha maluʻi makehe pea mo ha tokoni ke te sai mei haʻate puke.)

Tuku ange ke fakamatala ʻa e fānaú ki ha taimi naʻa nau lotua ai ha taha kehe, hangē ko ha taha ʻi honau fāmilí, ngaahi kaungā-meʻá pe kaungāʻapí.

Ko e ngaahi lea makehe ʻeni ʻoku tau fakaʻaongaʻi ʻi he taimi ʻoku tau kole tokoni ai ki he Tamai Hēvaní, ko e ʻOku ou kole ki he ʻafioná. Fekau ke toe leaʻaki ʻe he fānaú ʻa e ngaahi lea ko ʻení.

Hiva

Hivaʻi pe lau ʻa e lea ʻo e veesi hono ua ʻo e “Fakafetaʻi ʻe Tamai.” Kole ki he fānaú ke nau fakafanongo ange ki he leá pea nau tala atu ʻa e meʻa te nau kole ki he Tamai Hēvaní.

ʻOku ou fie failelei he ʻahó ni,

Pea talangofua ki heʻeku faʻeé.

ʻI he huafa ʻo Sīsū Kalaisí,

ʻOku ou kole ke tāpuaki au.

ʻOku Totonu ke Tau Faʻa Lotu ʻo Hangē ko Ia Naʻe Fai ʻe Sīsū Kalaisí

Fakamatala ʻa e faiakó

Fakamahino ange naʻe tuʻo lahi ʻa e lotu ʻa Sīsū Kalaisi ki he Tamai Hēvaní ʻi heʻene kei ʻi he māmaní. Hili ʻene toetuʻú, naʻá ne toe lotu foki ki he Tamai Hēvaní. ʻI he ʻaʻahi ʻa Sīsū ki he kakai Nīfaí, naʻá ne akonakiʻi mo tāpuakiʻi kinautolu. Naʻá ne toe lotua foki ʻa e kakaí peá ne akoʻi kinautolu ke nau lotu foki.

Fakatātaá

Fakaʻaliʻali ʻa e fakatātā 3–61, Ko e Lotu ʻa Sīsū mo e Kakai Nīfaí.

Fakamatalaʻi ange ʻoku tala mai ʻe he Tohi ʻa Molomoná naʻe fekau ʻe Sīsū ʻa e kakaí ke nau haʻohaʻo takai ʻiate ia pea nau tūʻulutui hifo. ʻI heʻenau tūʻulutui hifó, naʻá ne toe tūʻulutui hifo foki mo ia ʻo lotu ki he Tamai Hēvaní. Naʻá ne fai ha lotu fakaʻofoʻofa moʻoni pea naʻe fuʻu fiefia lahi ʻa e kakaí ʻi heʻenau fanongo ki he ngaahi lea ʻo ʻene lotú.

ʻI he ʻosi hono akoʻi kiate kinautolu ʻe Sīsū Kalaisi ha ngaahi meʻa fakaofo lahi, naʻá ne akoʻi kiate kinautolu ʻoku totonu ke nau lotu ʻo hangē ko ʻene lotú.

Fealēleaʻaki ʻi he folofolá

Lau ʻa e 3 Nīfai 18:16.

Fealēleaʻaki ʻi he folofolá

• Ko e hā e meʻa ʻoku fakahā mai ʻe he potu folofola ko ʻení naʻe akoʻi ʻe Sīsū Kalaisi ki he kakai Nīfaí? (Naʻá ne akoʻi kinautolu ke nau lotu.)

Fakamatalaʻi ange naʻe ʻalu ʻa Sīsū Kalaisi mei he kakai Nīfaí, ka naʻá ne toe foki kiate kinautolu, ko hono tuʻo ua. ʻI heʻene foki ko ʻení, naʻá ne toe lotu ki he Tamai Hēvaní ke fakamālō kiate ia koeʻuhí ko ʻene tokoniʻi ʻa ʻene kau akonga Nīfaí. Naʻá ne kole foki ki he Tamai Hēvaní ke ne tāpuakiʻi ʻa e kakaí. Naʻe lotu tuʻo lahi ʻa Sīsū Kalaisi he lolotonga ʻene nofo mo e kakai Nīfaí. ʻOku hiki ʻi he Tohi ʻa Molomoná naʻe fuʻu fakaʻofoʻofa ʻa e ngaahi lotu naʻá ne faí ʻo ʻikai lava ke hiki kinautolu.

Fakamatalaʻi ange ʻoku totonu ke tau taki taha fai ʻa e meʻa naʻe akonakiʻaki ʻe Sīsū Kalaisi ki he kakai Nīfaí pea tau faʻa lotu maʻu pē ki he Tamai Hēvaní.

Fealēleaʻaki ʻi he folofolá

• Ko e fē ʻa e taimi ʻe lava ke tau lotu ai ki he Tamai Hēvaní? (Tuku ke nau fai atu ha tali, kau ai ʻa e pongipongi mo e efiafi kotoa pē, ʻi he taimi maʻu meʻa tokoní, fakataha mo honau fāmilí, pe ko ha taimi pē ʻoku nau palōpalemaʻia ai pe fie maʻu ha tokoni makehe.)

• Ko e hā ʻa e ngaahi lea makehe ʻoku tau fakaʻaongaʻi ʻi he taimi ʻoku tau talanoa ai ki he Tamai Hēvaní?

Fekau ʻa e fānaú ke nau toe leaʻaki ʻa e “ʻOku ou fakafetaʻi ki he ʻafioná,” pea mo e “ʻOku ou kole atu ki he ʻafiona.” Poupouʻi e fānaú ke nau fakaʻaongaʻi mo e ngaahi lea kehe ʻoku totonu ke fakaʻaongaʻi ki he lotú. ʻE lelei ke nau ako hono ngāueʻaki ʻo e “ʻafioná” mo e “hoʻo ʻafió.”

Fakamatala Fakanounoú

ʻEkitivitií

ʻOange ki he fānaú ʻa e ʻū laʻi pepa kuó ke ʻosi teuteú mo ha ʻū peni vahevahe pe kala. Kole ange ke nau taki taha tā ha fakatātā ʻi he ongo tafaʻaki taki taha ʻo fakahaaʻi ai ʻa e meʻa ʻokú ne fakamālō ai pea mo e meʻa ʻokú ne lotu ʻo kolé.

Fakamoʻoni ʻa e faiakó

Vahevahe mo e fānaú ʻa hoʻo fakamoʻoni ki he meʻa ko e lotu. Fakamamafaʻi ange ko ha tāpuaki lahi moʻoni ia ke te lava ʻo lotu ki he Tamai Hēvaní ʻo fakamālō pea kole ha tokoni meiate ia. Fakamanatuʻi ange ʻe lava pē ke nau lotu ʻi ha faʻahinga taimi pē pea mo ha feituʻu pē ʻoku nau loto ki aí.

ʻI hoʻomou teuteu ki hoʻomou lotu tukú, fekau e fānaú ke nau fokotuʻu atu ha ngaahi meʻa ʻe lava ke fakamālō ai ʻa e toko taha ʻe lotu tukú ki he Tamai Hēvaní. Fekau foki ke nau toe fokotuʻu mai ʻa e ngaahi meʻa te nau kole ʻi he lotú.

Hanga ʻo fai ʻa e lotu tukú, peá ke manatuʻi ke ke fakaʻaongaʻi ʻa e ngaahi fakakaukau ko ia kuo fokotuʻu atu ʻe he kalasí.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai mo ha ngaahi fakahinohino kehe.

1. Lau ʻa e foʻi maau ko ʻení pea fakatātaaʻi. ʻOsi ko iá pea mou lau fakataha ia mo e fānaú ka nau fakatātaaʻi.

   Fakamālō ʻe ʻOtua he maama ʻo e laʻaá (hiki e ongo nimá ki ʻolunga pea ʻai ke fetaulaki ʻa e ngaahi louhiʻi nimá ke hoko ko e laʻā)

   ʻA e manupuná ʻoku hiva he mafoa ʻa e atá, (fakamafao e ongo nimá ki tafaʻaki ke hangē ha manupuna ʻoku puná)

   ʻA e fānau fiefia ʻi he feituʻu hono kotoa, (malimali)

   Mo e Tamai Hēvaní ʻi heʻene ʻofa mo e tokangá (punou e ʻulú, kūnima hangē ko ia ʻoku fai ʻi he lotú)

2. Fai ʻi hoʻo lea pē ʻaʻau ʻa e talanoa ko ʻeni ki ha tamasiʻi naʻe tali ʻa ʻene lotú:

   Naʻe lolotonga tokoto ha kiʻi tamasiʻi taʻu valu ʻi he funga tēpile faiʻanga tafá ʻi ha falemahaki ʻe taha. Kuo mālōlō ʻene ongo mātuʻá, ka naʻe ʻosi ako ʻa e tamasiʻí ke lotu. Naʻá ne ʻiloʻi ko e tafa lahi ʻe faí. Ko ia naʻá ne kole ange ai ki he toketā naʻe te u ke ne fai hono tafá. “ʻE toketā, fai ange muʻa ha lotu maʻaku peá ke toki kamata hoʻo tafá?” Naʻe ofo ʻa e toketaá ʻi heʻene vakai atu ki he tamasiʻí peá ne pehē ange, “He ʻikai ke u lava ʻo fai ha lotu maʻau.”

   Naʻe toe kole ʻa e kiʻi tamasiʻí ki he kau toketā kehe naʻe tokoni ki he fai tafá pea naʻe tatau pē ʻa ʻenau talí. Naʻe pehē ange leva ʻe he kiʻi tamasiʻí, “Kapau he ʻikai ke mou lotu maʻaku, fēfē ke mou kiʻi tatali kau fai pē ʻe au ʻa ʻeku lotú?” Naʻá ne tūʻulutui pē ʻi he funga tēpile tafá, kūnima peá ne lea ʻo pehē, “ʻE Tamai Hēvani, ko ha kiʻi tamasiʻi paea au, ka ʻoku ou fuʻu puke lahi pea ʻoku te u ke tafa au ʻe he kau toketā ko ʻení. Fakamolemole muʻa ka ke tokoniʻi kinautolu ke nau fai ia ki hono totonú. Pea kapau te ke fakamoʻui au Tamai Hēvani, te u hoko ko ha tamasiʻi lelei. Mālō hoʻo fakamoʻui aú.”

   Ko ʻene ʻosi pē ʻa ʻene lotú kuo fakatē loʻimata kotoa ʻa e kau toketaá mo e kau nēsí. Naʻe tokoto hifo leva ʻa e kiʻi tamasiʻí ni ʻi he funga tēpilé mo ne pehē ange, “Kuó u maau” (Toʻo meia George Albert Smith, Sharing the Gospel with Others, sel. Preston Nibley [Salt Lake City: Deseret Book Co. 1948], pp. 144–45).

3. ʻOmai ha laʻi pepa ʻo vaeua mālie, pea ʻi he tafaʻaki ʻe tahá, hanga ʻo ʻai ai ha saati lotu feʻunga mo e uike ʻe taha ke ne fakaʻilongaʻi ia ʻi he pongipongi mo e efiafi ʻi he taimi ʻoku fai ai ʻene lotú. ʻI he tafaʻaki ʻe tahá fekau ki he tamasiʻí pe taʻahiné ke ne tā ai ʻoku fai ʻene lotu. Fakaafeʻi ʻa e fānaú ke nau taki taha fokotuʻu ʻa ʻene saati lotu ʻi honau ʻapí ʻi ha feituʻu ʻe lava ke ne sio ki ai pea fakaʻilongaʻi ia ʻi he pongipongi mo e efiafi.

4. Mou toe fakamanatu mo e fānaú ʻa e tefito ʻo e tui ʻuluakí.