Lēsoni 16

ʻE Lava ke Fakahaaʻi ʻetau Tuí ʻi Heʻetau Talangofuá

Taumuʻá

Ke tokoniʻi ʻa e fānaú ke mahino kiate kinautolu te nau lava ʻo fakahā ʻenau tui ki he Tamai Hēvaní pea mo Sīsū Kalaisí ʻaki haʻanau talangofua ki he ngaahi fekaú.

Teuteú

1. Lau mo ako ʻi he faʻa lotu ʻa e fakamatala kia Līhai mo hono fāmilí ʻi he 1 Nīfai 1–2.

2. Ngaahi meʻa pe ngaahi fakatātā ʻo ha ngaahi meʻa ʻoku nau fakafofongaʻi ha ngaahi koloa naʻe fili mei ai ʻa e fāmili ʻo Līhaí ʻi heʻenau teuteu fononga ki he toafá.

3. Teuteu ke hivaʻi pe lau ʻa e lea ʻo e “Ko e Tuí” (Children’s Songbook, p. 96).

4. Ngaahi nāunau ʻoku fie maʻú:

   1. Tohi ʻa Molomona.

   2. Fakatātā 3–39, Ko e Kikite ʻa Līhai ki he Kakai ʻo Selūsalemá (62517 900; Ngaahi Fakatātā ʻo e Ongoongoleleí 300); pea mo e fakatātā 3–40, Ko e Mavahe ʻa e Fāmili ʻo Līhaí mei Selūsalemá (62238 900; Ngaahi Fakatātā ʻo e Ongoongoleleí 301); pea mo e fakatātā ʻo e palōfita lolotongá.

   3. Fakaʻilonga mo e mama FKT.

5. Teuteu ʻa e ngaahi meʻa ʻe fie maʻu ki he ngaahi ʻekitivitī fakatupulaki te ke fakaʻaongaʻí.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke fakalotolahiʻi e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

Ko e Talangofuá ko ha Founga ia ʻoku Fakahā ai ʻa e Tuí

ʻEkitivitī ke takiakiʻi ʻaki e tokangá

Hivaʻi pe lau ʻa e lea ʻo e foʻi hiva “Ko e Tuí”. ʻE lava pē ke mou fakatātaaʻi mo e fānau ʻoku iiki angé ʻo hangē ko ia ʻoku hā atu ʻi laló.

Ko e tuí ʻa e ʻilo ʻe hopo e laʻaá (fepiki e ongo nimá pea hiki ki he funga ʻulú)

He ʻahó (tuku hifo māmālie e ongo nimá ke māʻolunga tatau mo e ongo umá)

Ko e tuí ʻa e ʻilo ko ʻeku lotú

ʻOkú ne fanongoá (ʻai e ongo nimá ke hangē ha ipú pea ʻai ki he tuʻa telingá)

Ko e tuí hangē ha ʻakau: (ʻai e nima toʻohemá ke hangē ha ipú pea ʻai ke

hangē ʻokú ke tō ha tengaʻi ʻakau ʻaki ho nima toʻomataʻú)

ʻE tupu ia kapau ʻe tō.

Ko e tuí ʻi heʻete faitotonú (hili e ongo nimá he funga mafú)

ʻOku ʻilo ia ʻe he lotó (ʻai e muʻa tuhu ʻuluakí ki he ʻulú).

Ko e taimi ko ia ʻoku kole mai ai ʻa e Tamai Hēvaní pea mo Sīsū ke tau fai ha faʻahinga meʻá, ʻoku ui ia ko e fekau. Pea ko e taimi ʻoku tau talangofua ai ki he ngaahi fekaú, ʻoku tau fakahā ai ki he Tamai Hēvaní pea mo Sīsū ʻa ʻetau falala kiate kinauá. ʻOku tau ʻiloʻi ʻokú na ʻofa ʻiate kitautolu pea he ʻikai ke na teitei kole mai ha faʻahinga meʻa te tau mamahi ai. ʻOku fakahā ʻetau tuí ʻi he taimi ʻoku tau talangofua aí.

Fakamanatuʻi ki he fānaú ʻoku ʻuhinga ʻa e tui ki he Tamai Hēvaní pea mo Sīsuú ke tau tui mo falala kiate kinaua. Neongo kuo teʻeki ai ke tau mamata ʻiate kinaua he lolotonga ʻetau moʻui ʻi he māmaní, ka ʻoku tau tui ki he ngaahi fakamoʻoni ʻa e kakai kuo nau ʻosi mamata ʻiate kinauá. ʻOku tau tui foki ʻoku moʻoni ʻa e Laumālie Māʻoniʻoní pea ʻoku ʻikai ke ne maʻu ha sino ʻo e kakano mo e hui, ka ko ha toko taha ia ko e laumālie ʻi he fōtunga ʻo e tangatá.

Tefito ʻo e Tuí

Tokoni ki he fānau lalahi angé ke nau ako maʻu loto ʻa e tefito ʻo e tui ʻuluakí.ʻE angimui atu pē ʻa e fānau iiki angé pea mahalo pē naʻa nau lava ke ako maʻu loto hano konga.

Naʻe Fakahā ʻe Līhai ʻa ʻene Tuí ʻaki ʻene Talangofua

Talanoa mei he folofolá mo e fakatātaá

Fakamatalaʻi ange ko e fānau kitautolu ʻa e Tamai Hēvaní pea te tau lava ʻo fakahā ʻoku tau tui ki he Tamai Hēvaní pea mo Sīsū Kalaisi. ʻOku hā ʻi he Tohi ʻa Molomoná ha palōfita ko Līhai ʻa ia naʻá ne fakahā ʻene tui ki he Tamai Hēvaní pea mo Sīsuú ʻaki ʻene talangofuá.

Fai ʻa e talanoa ko ʻení ʻi hoʻo lea pē ʻaʻau:

ʻI he ngaahi taʻu lahi kuo hilí, ko e taʻu ia ʻe onongeau ki muʻa pea toki ʻaloʻi mai ʻa Sīsuú, naʻe nofo ai ha palōfita ko Līhai ʻi Selūsalema fakataha mo hano uaifi ko Sēlai. Naʻe toko fā ʻena fānau tangatá, ko Leimana, Lemiuela, Samu mo Nīfai.

Naʻe maʻu koloa ʻaupito ʻa Līhai mo hono fāmilí pea naʻa nau moʻui fiemālie. Naʻe ʻofa ʻa Līhai ʻi he Tamai Hēvaní pea mo Sīsū. Naʻá ne feinga ke akonekina ʻa hono fāmilí ke nau ʻofa ʻiate kinaua pea mo talangofua ki heʻena ngaahi fekaú.

Fakaʻaliʻali ʻa e fakatātā 3–39, Ko e Kikite ʻa Līhai ki he Kakai ʻo Selūsamelá.

Ko e taimi ko iá naʻe fuʻu faiangahala lahi ai ʻa e kakai naʻe nofo ʻi Selūsalemá. Naʻe feinga ʻa Līhai ke akoʻi kinautolu fekauʻaki mo e Tamai Hēvaní mo Sīsū pea mo e ngaahi fekaú, ka naʻe ʻikai ke nau fie fanongo kiate ia.

ʻI ha ʻaho ʻe taha, lolotonga ʻa e lotu ʻa Līhaí, naʻe hoko mai kiate ia ha vīsone pe ko ha meʻa hā mai. Naʻe lahi ʻa e ngaahi meʻa fakaofo naʻá ne mamata aí. Naʻá ne mamata foki ʻe fakaʻauha ʻa Selūsalema ʻo kapau ʻe ʻikai ke fakatomala ʻa e kakaí. Naʻe fakafetaʻi ʻa Līhai ki he Tamai Hēvaní koeʻuhí he naʻá ne ʻiloʻi naʻe fie maʻu ʻe he Tamai Hēvaní ke fakatokanga ki he kakai ʻo Selūsalemá. Naʻe fakahā ange ʻe he Tamai Hēvaní ke ne tala ki he kakaí ʻa e meʻa kuó ne mamata aí. Naʻe fai ʻe Līhai ʻa e fekau ko ʻení ʻo ne fakahā ki he kakaí kapau ʻe ʻikai te nau fakatomala, ʻe fakaʻauha ʻa Selūsalema.

Talanoa mei he folofolá mo e fakatātaá

• Ko e hā e meʻa naʻe mamata ki ai ʻa Līhai ʻi heʻene mata meʻa hā maí? (Ko ha ngaahi meʻa lahi kau ai ʻa hono fakaʻauha ʻo Selūsalemá; vakai, 1 Nīfai 1:13.)

• Ko e hā e ongo naʻe maʻu ʻe Līhai ʻi he hili ʻene mata meʻa hā maí? (Naʻá ne fakafetaʻi ki he Tamai Hēvaní; naʻá ne fiefia; vakai, 1 Nīfai 1:14–15.)

ʻOku fie maʻu ha loto-toʻa lahi ia kae toki lava ha taha ʻo tala ange ki he kakaí ke nau fakatomala mei heʻenau faiangahalá. Ka neongo ia, naʻe tui ʻa Līhai ʻe maluʻi ia ʻe he Tamai Hēvaní, ko ia naʻá ne fai ʻa e meʻa naʻe fekauʻi ia ke ne faí. Naʻe ʻikai ke fie fanongo ʻa e kakaí kiate ia ʻo nau fakakataʻaki ia mo feinga ke fakapoongi ia he naʻe ʻikai ke nau saiʻia ʻi hono fakahā ange ʻoku nau faiangahalá.

Talanoa mei he folofolá mo e fakatātaá

• Ko e hā e meʻa naʻe fai ʻe Līhai ke fakahā ʻaki ʻene tui ki he Tamai Hēvaní? (Naʻá ne talangofua peá ne fekau ʻa e kakaí ke nau fakatomala; vakai, 1 Nīfai 1:4, 18.)

• Ko e hā e meʻa naʻe fai ʻe he kakaí hili hono fakahā ange ʻe Līhai ke nau fakatomalá? (Naʻa nau fakakataʻaki ia mo feinga ke fakapoongi; vakai, 1 Nīfai 1:19–20.)

• ʻOku mou pehē ko e hā e ongo ʻa Līhai ʻi he ʻikai ke fie fanongo ange ʻa e kakaí?

Fealēleaʻaki ʻi he folofolá

Ne ʻosi mei ai ha taimi siʻi pea folofola ʻa e Tamai Hēvaní kia Līhai ke ne fekau e fānaú ke nau fakafanongo ki he meʻa naʻá ne fekau ʻa Līhai ke ne faí. Lau ʻa e 1 Nīfai 2:1–2.

Fealēleaʻaki ʻi he folofolá

• Ko e hā e meʻa naʻe fekau ʻe he Tamai Hēvaní ke fai ʻe Līhaí? (Ke ʻalu mei Selūsalema ki he toafá.)

Fakamatalaʻi ange ko e toafá ko ha feituʻu ia ʻoku ʻikai faʻa nofo ai ha taha pea ʻikai ke ʻi ai ha ʻū fale pe ngaahi hala. Naʻe fekau ʻe he Tamai Hēvaní ke tuku ʻe Līhai mo hono fāmilí ʻa e toko taha kotoa pē ʻi Selūsalema ka nau ō ki ha feituʻu ʻo nofo mavahe pē ai.

Fealēleaʻaki ʻi he folofolá

• Ko e hā hono ʻuhinga naʻe fekau ai ʻa Līhai ke ne ʻave ʻa hono fāmilí mei Selūsalemá? (He naʻe faʻufaʻu ha kau tangata kovi ke nau fakapoongi ʻa Līhai, pea ʻe fakaʻauha foki mo e koló.)

Kole ki he fānaú ke nau fakafanongo ki he meʻa naʻe fai ʻe Līhaí, ʻosi ko iá peá ke lau ʻa e 1 Nīfai 2:3–4.

Fealēleaʻaki ʻi he folofolá

• Ko e hā e meʻa naʻe fai ʻe Līhaí? (Naʻá ne fakamāʻopoʻopo ʻa e ngaahi meʻa ʻe fie maʻu ʻi he toafá peá ne ʻave leva hono fāmilí ʻo nau mavahe mei Selūsalema.)

Talanoa mei he folofolá mo e fakatātaá

Fakaʻaliʻali ʻa e fakatātā 3–40, Ko e Mavahe ʻa e Fāmili ʻo Līhaí mei Selūsalemá.

Neongo naʻe fuoloa ʻa e nofo ʻa Līhai ʻi Selūsalemá, ka naʻá ne vave ke talangofua ki he fekau ke ne ʻalu mei hono ʻapí. Naʻe ʻalu ʻa Līhai mo hono fāmilí kae tuku honau ʻapí, kelekelé, konga lahi ʻo honau valá, koulá mo e silivá pea mo ha ngaahi koloa kehe pē. Ko e meʻa pē naʻa nau ʻavé ko ʻenau meʻakai, vala feʻunga, ngaahi fale fehikitaki (pe ngaahi tēniti) pea mo e ngaahi meʻa ʻaonga ʻe lava ke uta ʻi heʻenau fanga kāmelí pea mo e ʻasí. ʻOsi pē ko iá naʻa nau fononga atu leva ki he toafá.

Fakamahinoʻi ange naʻe ʻikai ko ha meʻa faingofua kia Līhai ke ne ʻalu mei ai, ka naʻá ne loto fiemālie pē ke ne talangofua ki he fekau naʻe fai angé.

Talanoa mei he folofolá mo e fakatātaá

• Ko e hā e meʻa naʻe fai ʻe Līhai ke fakahā ʻaki ʻene tui ki he Tamai Hēvaní pea mo Sīsū Kalaisí? (Naʻá ne talangofua. Naʻá ne fakatokanga ki he kakai naʻe faiangahalá, pea naʻá ne liʻaki hono ʻapí mo ʻene koloá ka ne ʻalu ki he toafá he naʻe fekauʻi ia ke fai pehē.)

Fealēleaʻakí

Kole ki he fānaú ke nau pehē pē ko ha niʻihi kinautolu ʻo e fāmili ʻo Līhaí.

Fekau ke nau fakakaukau ki he meʻa te nau ʻalu mo iá kapau naʻa nau ʻalu ki he toafá. Tuku ke nau fakahā atu ʻa e meʻa te nau fie ō mo iá pea mo e meʻa te nau tukú. ʻE lava pē ke ke fakaʻaliʻali kiate kinautolu ha ngaahi meʻa kehekehe pe ko ha ngaahi fakatātā pē ʻo ha ngaahi meʻa hangē ko e ngaahi meʻa naʻe fili mei ai ʻa Līhai mo hono fāmilí; hangē ko ʻení, ʻe fakafofongaʻi pē ʻe ha foʻi mama ia ʻa e ngaahi meʻa teuteú, sēniti ʻa e paʻangá, foʻi ʻāpele ʻa e meʻakaí. Tuku ke fili ʻe he fānaú ʻa e ngaahi meʻa naʻe fie maʻu ʻe he fāmili ʻo Līhaí. Fakamanatuʻi ange foki ko e meʻa feʻunga pē te nau ʻavé.

ʻEkitivitií

Fekau e fānaú ke nau fili ʻa e meʻa te nau ʻalu mo iá kapau naʻe ʻai ke nau ʻalu mo Līhai ki he toafá. ʻE pehē leva ʻa e tamasiʻi pe taʻahine ʻuluakí, “Kapau te u ʻalu mo Līhai ki he toafá, te u ʻave ha ” (ʻE fakafonu ʻaki leva ʻe he tamasiʻi pe taʻahine ko ʻení ʻa e faʻahinga meʻa kuó ne fili ke ʻalu mo iá.) ʻE leaʻaki ʻe he toko taha hono hokó ʻa e meʻa tatau pē mo e ʻuluakí peá ne toki tānaki atu ʻa e meʻa kuó ne filí. ʻE fai pehē atu pē, ʻo leaʻaki ʻe he kiʻi tamasiʻi pe taʻahine taki taha ʻa e ngaahi meʻa naʻe leaʻaki ʻe kinautolu ʻi muʻá pea toki tānaki atu ki ai ʻene fili ʻaʻaná, ʻo fai pehē ai pē kae ʻoua kuo nau kakato ʻi hono fai ʻo e foʻi ʻekitivitií (kau foki ai mo e faiakó).

ʻEkitivitií

• ʻOku mou pehē ko e hā haʻamou ongo ʻi hoʻomou ʻiloʻi ko ia he ʻikai te mou toe mamata ki homou ngaahi kaumeʻá mo hoʻomou koloá?

• ʻOku mou pehē ko e hā e ongo naʻe maʻu ʻe he fāmili ʻo Līhaí?

Ko e tui lahi ia naʻe fie maʻu kae toki lava ke talangofua ki he Tamai Hēvaní ʻo nau mavahe mei Selūsalema. Naʻe maʻu ʻe Līhai mo hono fāmilí ha ngaahi tāpuaki lahi koeʻuhí pē ko ʻenau talangofuá.

ʻOku Tau Talangofua ʻi he Taimi ʻoku tau Fili ai ki he Totonú

ʻEkitivitī fakatātaaʻi ʻo e ngaahi talanoá

Fakaʻaliʻali ʻa e fakaʻilonga mo e mama FKT.

ʻEkitivitī fakatātaaʻi ʻo e ngaahi talanoá

• ʻOku ʻuhinga ki he hā ʻa e F K T? (Fili Ki he Totonu.)

Tala ange ki he fānaú ʻoku ʻuhinga ʻa e fili ki he totonú ki hono fai ʻo e meʻa ʻoku finangalo ʻa e Tamai Hēvaní pea mo Sīsū Kalaisi ke tau faí.

Fai ʻa e ngaahi talanoa ko ʻení ʻi hoʻo lea pē ʻaʻau, pea fekau ʻa e fānaú ke nau fakatātaaʻi ʻa e ngaahi meʻa ko ia ʻoku hoko ʻi he ngaahi talanoá.

ʻEkitivitī fakatātaaʻi ʻo e ngaahi talanoá

1. ʻI hoʻomou foki mai ki ʻapi mo ho ngaahi kaungā-meʻá, naʻa mou fakalaka mai ʻi homou kaungāʻapí. ʻOku tuʻu ʻi honau lotoʻapí ha fuʻu ʻakau kai ʻoku fua mo momoho. ʻOku fie maʻu ʻe ho kaungā-meʻá ke mou ō ʻo toli ha ngaahi foʻi fuaʻi ʻakau mei ai ke mou kai. ʻOku nau tala atu ʻoku fuʻu lahi e fua ia ʻo e fuʻu ʻakaú pea he ʻikai ke ʻilo ʻe he ʻapí ia naʻe toli ʻe ha taha.

   • Ko e hā nai e meʻa ʻe finangalo ʻa e Tamai Hēvaní pea mo Sīsū ke ke faí?

   Fakahā ange ki he fānaú ko e taimi ko ia ʻoku nau fili ai ki he totonú ʻoku nau talangofua ai mo fakahā ʻenau tui ki he Tamai Hēvaní pea mo Sīsū Kalaisi.

2. ʻOkú ke fie vaʻinga ʻaki hoʻo kiʻi meʻa-vaʻinga ko ia ʻokú ke saiʻia taha aí ka ʻoku lolotonga vaʻinga ʻaki ia ʻe ho tuongaʻané.

   • Ko e hā nai e meʻa ʻe finangalo ʻa e Tamai Hēvaní pea mo Sīsū ke ke faí?

   Fakamatalaʻi ange ko e taimi ko ia ʻoku tau fai ai ʻa e meʻa ʻoku finangalo ʻa e Tamai Hēvaní pea mo Sīsū ke tau faí, ko ʻetau fili ia ki he totonú.

   Kapau ʻe toe ʻa e taimí peá ke fakaʻaliʻali ʻa e fakatātā ʻo e palōfitá peá ke fehuʻi ange ki he fānaú ke nau fakahā atu ha niʻihi ʻo e ngaahi meʻa kuó ne kole mai ke tau faí. Mou aleaʻi ʻa e ngaahi tāpuaki ʻoku lava ke maʻu mei he talangofua ki he ngaahi fekau ko ʻení.

Fakamatala Fakanounoú

Toe fakaʻaliʻali ʻa e fakaʻilonga mo e mama FKT pea fakamanatu ange ki he fānaú ke nau fili maʻu pē ki he totonú. Ko e taimi ʻoku nau fili ai ki he totonú, ʻoku nau talangofua. Pea ko e taimi ʻoku nau talangofua aí, ʻoku nau fakahā ai ki he Tamai Hēvaní pea mo Sīsū Kalaisi ʻoku nau tui kiate kinaua.

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. ʻAi ha taha pē mei homou uōtí pe koló ke ne fakamatala ki hono tokoniʻi ia ʻe heʻene talangofuá. ʻE lelei ʻaupito kapau te ke fili ha taha naʻe ʻosi ngāue fakafaifekau, ha taha naʻe toki papi ului mai, pe ko ha taha naʻe toki hū ʻi he temipalé. Ki muʻa peá ke kole ʻa e toko taha ko ʻení ke haʻu ki hoʻo kalasí, tomuʻa maʻu ha ngofua mei hoʻo palesiteni Palaimelí pea mo e pīsopé pe palesiteni fakakoló.

2. Tānaki mai ha ngaahi meʻa kehekehe ʻokú ne lava ke maluʻi kitautolu, hangē ko e sū, tatā, fakamalu, mo e hā fua. ʻOmi ke lahi ke lava ʻo kau kotoa ʻa e fānau ʻi hoʻo kalasí ki he ʻekitivitií. Kole ki he fānaú ke nau haʻu tahataha ʻo fili ha taha ʻo e ngaahi meʻa ko ʻení peá ne fakahā pe ko e hā ʻa e faʻahinga maluʻi ʻoku ʻomi ʻe he meʻa ko iá (ʻoku maluʻi ʻe he suú ʻa e vaʻé, mo e hā fua). Tala ange ki he fānaú ʻoku maluʻi foki kitautolu ʻi he taimi ʻoku tau talangofua ai ki heʻetau mātuʻá pea mo e kau takí. Mou lau ki he ngaahi lao pea mo e founga ʻoku lava ke nau hoko ai ko ha maluʻi.

3. Hiki hake ho ongo nimá pea ʻai ke sio ʻa e fānaú ki he founga ʻokú ke lava ke ueueʻi ai ho louhiʻi nimá. Tala ange ʻokú ke lava pē ke ueʻi ho nimá mo ho louhiʻi nimá ka he ʻikai te ke lava ʻo ueʻi honau louhiʻi nimá. Kole ange ke nau hiki hake honau nimá, ueʻi honau louhiʻi nimá pea folahi mo kuku honau nimá. Tokoni ke mahino kiate kinautolu ko e taimi ko ē ʻoku nau tala ai ki honau fanga kiʻi nimá ke nau fili ki he totonú, ko ʻenau talangofuá ia.

4. Hivaʻi pe lau ʻa e veesi ua ʻo e “Ko Hoku kiʻi Nima ʻe Ua”.

   ʻE Tamai ʻoku mau kole atu

   Ke ke fakapotoʻi kimautolu

   Ke mau fiefia ha ʻahó ni maʻu pē

   ʻO talangofua ʻi he anga taau

   (Children’s Songbook, p. 272)

5. Kumi kotoa ʻa e ngaahi founga ʻoku hā ʻi he tefito ʻo e tui hono hongofulu mā tolú,ʻa ia te tau lava ai ʻo fili ki he totonú. Fakakau ʻa e fānaú ki hono fai ʻo e meʻa ko ʻení. Tuku ke nau lau pe ko e ngaahi founga ʻe fiha, tuhu ki he ngaahi foungá, pe te nau angimui atu. Fakaʻaiʻai ʻa e fānau te nau lavá ke nau ako maʻu loto ha sētesi ʻe taha pe ua ʻoku mahuʻinga kiate kinautolú.