Lēsoni 21

ʻOku Tau Maʻu ha Ngaahi Tāpuaki Lahi ʻi Heʻetau Hoko ko e Kāingalotu ʻo e Siasi ʻo Sīsū Kalaisí

Taumuʻá

Ke tokoniʻi e fānaú ke mahino kiate kinautolu ʻoku maʻu ha ngaahi tāpuaki lahi mei heʻete kau ki he Siasí.

Teuteú

1. Lau mo ako ʻi he faʻa lotu ʻa e Mōsaia 18 mo e ʻĪnosi 1, pea teuteu ke fai ʻa e ngaahi talanoa ʻi he ongo vahe ko ʻení.

2. Teuteu ke tokoniʻi e fānaú ke nau hivaʻi pe lau ʻa e lea ʻo e “Ko e Laumālie Māʻoniʻoní” (Children’s Songbook, p. 105) pea mo e “Tokoni Mai ʻe Tamai” (Children’s Songbook, p. 99); ʻoku ʻoatu ʻa e leá ʻi he tafaʻaki ki mui ʻo e tohi lēsoni ko ʻení.

3. Ki muʻa pea toki fai ʻa e kalasí, hanga ʻo folahi ʻi he funga tēpilé pe ʻi he falikí ʻa e ngaahi meʻa naʻá ke haʻu mo iá kau ai ʻa e fakatātā fika 3–13, 3–48 mo e 3–39 (vakai, 4d ʻi laló)—ʻosi ko iá peá ke toki ʻufiʻufi hifo ʻaki ia ha konga tupenu.

4. Ngaahi nāunau ʻoku fie maʻú:

   1. Ngaahi kaati foʻi lea ko ʻení;

      “Ko e Ngaahi Tāpuaki ʻo e Papitaisó”

      “ʻOku Tau Kau ki he Siasi ʻo Sīsū Kalaisí.”

      Meʻa-foaki ʻo e Laumālie Māʻoniʻoní

      ʻOku fakamolemoleʻi kitautolu ʻe he Tamai Hēvaní

   2. Kapau ʻe lava pea tānaki mai ʻa e ngaahi meʻa ko ʻení: Tohi ʻa Molomona, Tohi Tapu, kiʻi fakatātā siʻisiʻi ʻo Sīsū Kalaisi, mo ha mama FKT.

   3. Konga tupenu lahi feʻunga ke ʻufiʻufiʻaki ʻa e ngaahi meʻa naʻá ke haʻu mo iá.

   4. Fakatātā fika 3–48, ʻOku Fai Papitaiso ʻa ʻAlamā ʻi he Vai ʻo Molomoná (62332 900; Ngaahi Fakatātā ʻo e Ongoongoleleí 309); fakatātā fika 3–13, Ko ha Tamasiʻi ʻoku Papitaiso (62018 900); fakatātā fika 3–14, Ko ha Taʻahine ʻoku Hilifakinima ki he Foaki ʻo e Laumālie Māʻoniʻoní (62020 900); mo e fakatātā fika 3–49, Ko e Lotu ʻa ʻĪnosí (62604 900; Ngaahi Fakatātā ʻo e Ongoongoleleí 305).

5. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi ʻa e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

ʻE Lava ke Tau Kau ki he Siasi ʻo Sīsū Kalaisí

ʻEkitivitī ke takiakiʻi ʻaki e tokangá

Tala ange ki he fānaú ʻoku ʻi ai ha ngaahi meʻa ʻoku ʻufiʻufiʻaki ʻa e konga tupenu ʻi he tēpilé. Fakamatalaʻi ange te ke toʻo ʻa e konga tupenú ʻi ha sekoni ʻe hongofulu. ʻE feinga ʻa e fānaú ke nau ʻiloʻi pea manatuʻi ʻa e ngaahi meʻa naʻa nau mamata ki aí ki he lahi taha te nau lavá.

Fekau ʻa e kalasí ke nau haʻu ʻo tuʻu takatakai ʻi he veʻe tēpilé. Toʻo e ʻufiʻufí ʻi ha sekoni pē ʻe hongofulu. ʻOsi ko iá, pea toe ʻufiʻufiʻi. Fekau e fānaú ke nau foki atu ki honau ngaahi tangutuʻangá.

Tala ange leva ki he fānaú ke nau feinga taha taha ke tala atu ʻa e ngaahi meʻa ko ia naʻe ʻi he funga tēpilé. Ko ʻene ʻosi pē ʻenau feingá peá ke toʻo ʻa e konga tupenú ke mou sio pe naʻe fēfē ʻenau ngaahi talí. Fakamatalaʻi ange ʻoku lava ke fakamanatu mai ʻe he ngaahi meʻa taki taha ko ʻení ʻa e ngaahi tāpuaki ʻoku tau maʻu mei he Tamai Hēvaní ʻi he taimi ʻoku papitaiso ai kitautolú.

Kaati foʻi leá

Fekau ha taha ʻo e fānaú ke ne fakapipiki hake ʻa e “Ko e Ngaahi Tāpuaki ʻo e Papitaisó” ki he palakipoé.

Fakatātā mo e talanoa mei he folofolá

Fakaʻaliʻali ʻa e fakatātā 3–38, Ko e Fai Papitaiso ʻa ʻAlamā ʻi he Vai ʻo Molomoná.

Mou fakamanatu nounou pē ʻa e talanoa kia ʻAlamaá mei he lēsoni 20. Fakamanatuʻi ange ki he fānaú naʻe toitoi ʻa ʻAlamā ʻi he toafá ʻi he hili ʻene hola mei he kau taulaʻeiki ʻa e tuʻi anga-kovi ko Noá. Naʻá ne toitoi pē ʻi he maʻomaʻonganoá pea naʻá ne tohi foki ʻa e ngaahi akonaki ʻa e palōfita ko ʻApinetaí.

Hili ha ngaahi ʻaho mei ai, naʻe ʻalu holo ʻa ʻAlamā ʻi he kakaí ʻo malanga fakafufū kiate kinautolu fekauʻaki mo Sīsū Kalaisi. Naʻe fanongo honau toko lahi kia ʻAlamā pea nau tui kiate ia. Naʻe ʻalu atu ʻa e faʻahinga ko ʻeni naʻe tuí ki he feituʻu naʻe ui ko Molomona. Naʻe ʻi he feituʻu ko ʻení ha vai maʻa pea mo ha ʻuluʻakau ʻa ia naʻe toitoi ai ʻa ʻAlamā ʻi he taimi ʻahó mei he kau tangata ʻa e tuʻí ʻa ē ne nau fekumi kiate iá.

Naʻe toko lahi ʻa e kakai naʻa nau haʻu ke fanongo kia ʻAlamaá. Naʻá ne akonekina kinautolu ʻi he tuí mo e fakatomalá. Naʻá ne papitaiso ʻa kinautolu naʻe loto ke papitaisó, pea naʻa nau kau ki he siasi moʻoni ʻo Sīsū Kalaisí.

Kaati foʻi leá

Fekau ha taha ke ne fakapipiki hake ʻa e “ʻOku Tau Kau ki he Siasi ʻo Sīsū Kalaisí.”

ʻOku Lava ke Tau Maʻu ʻa e Meʻa-foaki ʻo e Laumālie Māʻoniʻoní

Kaati foʻi leá mo e fealēleaʻakí

Kaati foʻi leá mo e fealēleaʻakí

• Ko e hā ʻa e meʻa-foaki ʻoku tau maʻu hili hotau papitaisó? (Ko e meʻa-foakifakaʻofoʻofa foki ia mei he Tamai Hēvaní. Kapau te tau fai ʻa ia ʻoku totonú, ʻe ʻiatekitautolu maʻu ai pē ʻa e Laumālie Māʻoniʻoní ʻo ne fekau mai ʻa e ngaahi meʻaʻoku totonu ke tau faí.)

Fekau ha taha ke ne fakapipiki hake ʻa e “Meʻa-foaki ʻo e Laumālie Māʻoniʻoní” ʻi lalo ʻi he kaati foʻi lea ki muʻá.

Fakamatalaʻi ange ʻoku lava ke tau maʻu ʻa e meʻa-foaki ʻo e Laumālie Māʻoniʻoní ʻi he hilifakinima hili hono papitaiso kitautolú. Ko ha meʻa-foaki fakaʻofoʻofa foki ia mei he Tamai Hēvaní. Kapau te tau fai ʻa ia ʻoku totonú, ʻe ʻiate kitautolu maʻu ai pē ʻa e Laumālie Māʻoniʻoní ʻo ne fakahā mai ʻa e ngaahi meʻa ʻoku totonu ke tau faí.

Hiva

Hivaʻi pe lau fakataha mo e fānaú ʻa e lea ʻo e “Ko e Laumālie Māʻoniʻoní.”

Tefito ʻo e Tuí

Mou toe fakamanatu mo e fānaú ʻa e tefito ʻo e tui hono faá. Fakamatalaʻi ange ʻe hoko ʻa e meʻa-foaki ʻo e Laumālie Māʻoniʻoní ko ha tāpuaki ia maʻatautolu ʻi hono kotoa ʻo ʻetau moʻuí ʻo kapau te tau moʻui taau.

Talanoa

Fai ʻi hoʻo lea pē ʻaʻau ʻa e talanoa ko ʻení ʻa ia ko hono tokoniʻi ʻo Timi ʻe he Laumālie Māʻoniʻoní:

Naʻe lava pē ke ʻiloʻi ʻe Timi ʻoku loto-moʻua ʻene fineʻeikí ki ha faʻahinga meʻa. Naʻe mata mamahi mo ongoongosia ʻene tangataʻeikí. Kuo fuofuoloa mai ʻeni mo e ʻikai maʻu mai haʻanau tohi mei hono taʻokete ko Uilí ʻa ia naʻá ne lolotonga ngāue fakafaifekau.

Naʻe tangutu hifo ʻa Timi ʻi he sea ʻi honau loto-falé, ʻo ne lava pē ke ne fanongo atu ki he pōtalanoa ʻene ongo mātuʻá mei honau peitó.

Naʻe pehē ʻe he tangataʻeikí, “Meʻa fakatuʻutāmaki moʻoni ko e mofuiké pea ʻai aí mo ʻene hoko ofi atu ki he feituʻu ʻoku ngāue ai ʻa Uilí. ʻOku ou fakaʻamu ange pē ke vavé ni mai haʻata ʻilo pe ʻokú ne siʻi fēfē.”

Naʻe fakafanongo fakalelei atu pē ʻa Timi. Naʻe tuʻu ʻi he fakakaukau ʻa Timí ʻa e meʻá ni, “Mofuiké … Uili?” Naʻá ne ongoʻi ʻoku mamahi hono fatafatá. Naʻá ne sio loto atu ki ha lavea pe tanumia ʻa hono taʻoketé ʻi ha ngaahi maka mamafá. Naʻá ne hila atu ki he tā ʻo Uili he funga tēpilé pea naʻá ne fakatē loʻimata. Naʻá ne hū fakavave leva ki hono lokí ʻo tāpuniʻi mai ʻa e matapaá. ʻI he pō kotoa ko iá mo e ʻaho hono hokó naʻe ʻikai ke toe ha faʻahinga meʻa he haʻu ki heʻene fakakaukaú pea mo ʻene loto hohaʻá. Ko e taimi kotoa pē naʻe ʻai ke ne talanoa ai ki heʻene ongo mātuʻá, kuo hangē ka mapuní ʻene mānavá pea ʻikai ke toe lava ia ʻo lea.

Naʻe fakaʻau pē ke lahi ange ʻa e manavasiʻi ko ʻeni ʻa Timí. Naʻá ne ongoʻi ke ne ʻalu ʻo talanoa mo ha taha. Naʻá ne ʻiloʻi ʻoku ngāue ʻene tangataʻeikí ʻi he tafaʻaki ki lalo ʻo honau falé, ko ia naʻá ne hifo ki ai.

Naʻe fakaava ʻe Timi hono ngutú ke ne leaʻaki ʻa e meʻa naʻá ne ʻosi palani ke ne leaʻakí. Ka naʻe ʻikai ko ha meʻa faingofua ke ne lea kau kia Uili. Naʻá ne punou pē pea kamata ke fakatē loʻimata.

Naʻe fehuʻi ange ʻe he tangataʻeikí, “Timi, ʻokú ke hohaʻa kia Uili, ʻikai ko ia? Naʻá ma hohaʻa ʻi he taimi naʻá ma fanongo ai ki he mofuiké. Kuó ma ʻosi lotu mo e fineʻeikí ke fakahaofi ʻa Uili. Pea kuo fakafiemālieʻi kimaua ʻe he Laumālie Māʻoniʻoní ʻoku lelei e meʻa hono kotoa pē peá ke ʻoua te ma hohaʻa. ʻE lava pē ke ke maʻu ha fakafiemālie tatau Timi.”

Naʻe fehuʻi ange ʻe Timi, “ʻO maʻu fēfē?”

“Lotu ki he Tamai Hēvaní ʻo fakahā kiate ia ʻa e ngaahi manavasiʻi ʻoku ʻi ho lotó. Kole kiate ia ke ne tokoniʻi koe ke ke ʻiloʻi pe ʻoku hao pē ʻa Uili. ʻOku ou ʻilo fakapapau te ke maʻu ha fakafiemālie.”

Naʻe fai ʻe Timi ʻa e meʻa naʻe tala ange ʻe heʻene tangataʻeikí. Naʻá ne lotu ke fakahaofi muʻa ʻa Uili. Naʻá ne kole ki he Tamai Hēvaní ke tokoniʻi ia ke ne ʻiloʻi ʻoku moʻui lelei pē ʻa Uili. ʻI he ʻosi pē ʻa e lotu ʻa Timí, naʻá ne ongoʻi ʻoku ʻalu hake ʻiate ia ha nonga mo ha fiemālie. Naʻe ʻikai ke ne toe hohaʻa ia kia Uili. Naʻá ne ʻiloʻi ʻoku lelei ʻa e meʻa hono kotoa.

Fāifai, naʻe maʻu mai ha tohi ʻo fakahā ki he fāmilí ʻoku moʻui lelei pē ʻa Uili. Naʻe ʻikai ofo ai ʻa Timi ia. Naʻá ne ʻosi ʻiloʻi ʻoku sai pē ʻa Uili. Naʻe fakafiemālieʻi ʻa Timi ʻe he Laumālie Māʻoniʻoní.

Talanoa

• Naʻe tokoniʻi fēfē ʻe he Laumālie Māʻoniʻoní ʻa Timí? (Naʻá ne ʻoange kiate ia ha ongoʻi nonga ʻo ne ongoʻi ʻoku sai pē ʻa Uili ia.)

Tala ange ki he fānaú ko ha tāpuaki mahuʻinga moʻoni ia kia Timi mo hono fāmilí ʻa e Laumālie Māʻoniʻoní. ʻE lava pē foki ke hoko ia ko ha tāpuaki mahuʻinga kiate kitautolu.

ʻE Fakamolemoleʻi Kitautolu ʻe he Tamai Hēvaní Hili Hotau Papitaisó

Kaati foʻi leá

Fekau ha taha ke ne fakapipiki hake ʻa e kaati foʻi lea ko e “ʻOku Fakamolemoleʻi Kitautolu ʻe he Tamai Hēvaní” ʻi he palakipoé.

Fakamatalaʻi ange ko e tāpuaki mahuʻinga ʻe taha hono papitaiso kitautolú ko e lava ko ia ke fakamolemoleʻi kitautolu ʻi he taimi ʻoku tau fai ai ha ngaahi fehalākí. Naʻe ʻosi ʻafioʻi pē ʻe he Tamai Hēvaní ʻe ʻi ai ʻa e ngaahi fehālaaki ʻa ʻene fānaú. Naʻá ne fekau ke fakatomala ʻa e toko taha kotoa pē mei heʻenau ngaahi fehalākí. Naʻá ne talaʻofa mai kapau te tau fakatomala, te ne fakamolemoleʻi kitautolu peá ne foaki mai mo ha ngaahi tāpuaki kehe. Fakamanatuʻi ange ki he fānaú ko e konga ʻo e fakatomalá ʻa e tui kia Sīsū Kalaisí. Ko e konga ʻe tahá ko e moʻui ʻo hangē ko ia ʻoku finangalo mai ki ai ʻa Sīsuú, ʻa ia ko ʻetau toe talangofua ange ki heʻene ngaahi fekaú. ʻE lava ke tau ako ʻo toe lahi ange ʻo kau kia Sīsū pea mo ʻene ngaahi fekaú ʻi heʻetau lau mo ako ʻa e folofolá.

Fakatātā mo e talanoa mei he folofolá

Fakaʻaliʻali ʻa e fakatātā 3–49, Ko e Lotu ʻa ʻĪnosí.

Fakamatalaʻi ange ko ʻĪnosí ko ha palōfita ia ʻoku lava ke tau lau ki ai ʻi he Tohi ʻa Molomoná. Naʻe kole kiate ia ʻe heʻene tamaí ke ne tokangaʻi ʻa e ngaahi lekooti ʻa ia naʻe ʻi ai ʻa e ngaahi folofolá mo e hisitōlia ʻo hono kakaí. Naʻe hiki ʻa e hisitōlia ko ʻení ʻi he ngaahi peleti koulá. Naʻe akonekina ʻa ʻĪnosi ʻe heʻene tangataʻeikí ki he ongoongoleleí ʻo fakatatau ki he ngaahi lekooti ko ʻení, ko ia naʻe ʻosi ʻiloʻi ʻe ʻĪnosi ia ʻa e founga ke ne moʻuiʻakí. ʻI ha ʻaho ʻe taha, naʻe ʻalu ai ʻa ʻĪnosi ki he vaoʻakaú ʻo lotu. Naʻá ne kole ke fakamolemoleʻi ia ʻi heʻene ngaahi faiangahalá. Pea naʻe ʻi ai ʻa e meʻa fakaofo naʻe hoko.

Fakamatalaʻi ange naʻe fakamolemoleʻi ʻe he Tamai Hēvaní ʻa ʻĪnosi peá ne talaʻofa te ne tāpuakiʻi ia. Naʻe ongo mai ha leʻo kiate ia ʻo pehē, “ʻE ʻĪnosi, kuo fakamolemoleʻi hoʻo ngaahi angahalá, pea te ke monūʻia” (ʻĪnosi 1:5). Naʻe fakamolemoleʻi ʻa ʻĪnosi koeʻuhí ko ʻene tui kia Sīsū Kalaisí ʻa ia naʻá ne lau ʻo kau ki ai ʻi he ngaahi lekōtí. Naʻe fakamolemoleʻi ia koeʻuhí he naʻá ne tui ki he feilaulau fakalelei ʻa Sīsū Kalaisí. Naʻe toe talaʻofa ange foki ʻa e Tamai Hēvaní kia ʻĪnosi ʻe tauhi malu ʻa e ngaahi lekōtí pea ʻe ʻi ai ʻa e ʻaho ʻe lau mei ai ʻa e kau Leimaná. ʻE tokoniʻi kinautolu ʻe he ngaahi lekōtí ke nau ʻiloʻi ʻa Sīsū, tauhi ʻa e ngaahi fekaú, pea mo maʻu ha fakamolemole ʻi he taimi ʻoku nau fai hala aí.

Fakamatalaʻi ange ʻoku tau ʻiloʻi naʻe tauhi ʻe he Tamai Hēvaní ʻa ʻene talaʻofa kia ʻĪnosí koeʻuhí he ʻoku lava ke tau lau ʻi he Tohi ʻa Molomoná ʻo kau ki he ngaahi meʻa naʻe hiki ʻi he ʻū laʻi peletí.

Fakatātā mo e talanoa mei he folofolá

• Ko e hā e tāpuaki naʻe maʻu ʻe ʻĪnosi ʻi heʻene fakatomalá? (Hanga ʻo tali lelei ha tali pē ʻoku tonu ka ke fakamamafaʻi ange naʻe fakamolemoleʻi ia ʻe he Tamai Hēvaní.)

Fakahā ʻa hoʻo fakamālō ʻi hoʻo ʻiloʻi ko ia ʻe fakamolemoleʻi ʻa kinautolu kotoa pē ʻoku fakatomala moʻoní. Fakamamafaʻi ange ko ha tāpuaki lahi ʻaupito ʻa e folofolá ʻi heʻene tokoniʻi kitautolu ke fakatupulaki ʻa ʻetau tui kia Sīsū Kalaisí pea mo ʻetau ako ʻa ʻene ngaahi akonakí.

Hiva

Tokoni ki he fānaú ke mou hivaʻi pe lau ʻa e lea ʻo e “Tokoni Mai ʻe Tamai.”

Fakamatala Fakanounoú

Mou fakamanatu ʻa e ngaahi tāpuaki ʻoku maʻu mei heʻetau kau ki he Siasí ʻo hangē ko ia ʻoku hiki ʻi he ngaahi kaati foʻi leá. Fakamanatuʻi ange ki he fānaú kuo ʻosi talaʻofa ʻa e Tamai Hēvaní te ne foaki mai ha ngaahi tāpuaki mahuʻinga kiate kitautolu ʻo kapau te tau papitaiso pea tauhi ʻa e ngaahi fekaú.

Fakaafeʻi ʻa e fānaú ke nau fakakaukau ʻi he taimi sākalamēniti ka hokó ki he ngaahi tāpuaki ko ia kuo foaki mai ʻe he Tamai Hēvaní maʻanautolú. Fakaʻaiʻai kinautolu ke nau tokanga ki he ngaahi lea ʻo e lotu tāpuaki ʻo e sākalamēnití pea nau fakakaukau ki he ngaahi palōmesi te nau fai ʻi he taimi ʻe papitaiso ai kinautolú. Pea ko kinautolu ko ē kuo ʻosi papitaisó ke nau fakakaukau ki he taimi naʻe papitaiso ai kinautolú.

Fakamoʻoní

Fai hoʻo fakamoʻoní ʻoku tauhi maʻu pē ʻe he Tamai Hēvaní ʻa ʻene ngaahi talaʻofa kiate kitautolú ʻo kapau te tau talangofua kiate ia. ʻE lava pē ke ke fakamatalaʻi ki he fānaú ha meʻa naʻá ke aʻusia ʻo ke ongoʻi ai naʻe tāpuekina koe koeʻuhí pē ko hoʻo kau ki hono siasí.

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Teuteuʻi mai ha saati kuo hiki ai ʻa e ngaahi lea ʻi he 3 Nīfai 11:33. Toe ʻomai pē ha laʻi pepa lahi tatau mo e sātí ʻo tohiʻi ai ʻeni “Ko e Ngaahi Tāpuaki ʻo e Papitaisó.” Kosikosi ʻa e laʻi pepa ko ʻení ke kongokonga hangē ha pāsoló. Fakapipikiʻaki ha tepi ʻa e kiʻi konga taki taha ki he sātí ke pulia kotoa ʻa e veesi folofola ʻoku hiki aí. Tokanga ʻaupito ke faingofua pē hono toʻo ʻo e ngaahi laʻi pepa taki taha ko ʻení kae ʻikai ke maumauʻi ʻa e potu folofola he sātí.

   Fakaʻaliʻali ki he fānaú ʻa e pāsoló “Ko e Ngaahi Tāpuaki ʻo e Papitaisó” pea fekau ke nau lau ia. Fakamatalaʻi ange te ke lau ha ngaahi fehuʻi fekauʻaki mo e lēsoní. Ko ia pē te ne tali ha fehuʻi ʻo tonú, te ne toʻo leva ha konga laʻi pepa mei he pāsolo ʻoku fakapipiki hifo ʻi he veesi folofolá. Te nau fai pē ʻeni ʻo hoko mo e ʻasi hake ʻa e potu folofola ʻi laló. Ko ha ngaahi fehuʻi ʻeni ʻe niʻihi ʻoku fokotuʻu atu ke ke fai:

   • Ko e hā e ngaahi fuakava ʻoku tau fai ʻi he taimi ʻoku papitaiso ai kitautolú? (Te tau manatu maʻu pē kia Sīsū Kalaisi, te tau toʻo kiate kitautolu ʻa hono huafá, pea ke tau tauhi ʻene ngaahi fekaú.)

   • Ko e hā e meʻa naʻe fai ʻe ʻAlamā ʻi he Vai ʻo Molomoná? (Naʻá ne papitaiso ʻa e kakai naʻa nau fie papitaisó.)

   • Naʻe kau ʻa ʻAlamā mo hono kau muimuí ki he siasi fē? (Ki he siasi ʻo Sīsū Kalaisí.)

   • Naʻe tali fēfē mai ʻa e lotu ʻa Timí? (Naʻe tokoniʻi ia ʻe he Laumālie Māʻoniʻoní ke ne ʻiloʻi naʻe moʻui lelei pē ʻa Uili.)

   • Ko e hā nai hono ʻuhinga naʻe lotu ai ʻa ʻĪnosí? (Naʻá ne fie maʻu ke fakamolemoleʻi ʻene ngaahi angahalá.)

   • Ko e hā ʻa e tohi naʻe liliu mei he ʻū laʻi peleti koulá? (Ko e Tohi ʻa Molomoná.)

   • Te ke taʻu fiha pea toki papitaiso ai koé? (ʻI hoku taʻu valú.)

   Ko ʻene ʻosi kotoa ʻa e ʻū kongokonga pāsoló ʻi hono toʻó pea fekau leva ʻa e kalasí ke mou lau fakataha ʻa e potu folofolá. Fakamatalaʻi ange ʻoku ʻuhinga ʻa e “maʻu ʻa e puleʻanga ʻo e ʻOtuá” ki he nofo fakataha mo e Tamai Hēvaní ʻo taʻe ngata.

2. Hivaʻi pe lau ʻa e lea ʻo e himi ko e “Tānaki ho Ngaahi Tāpuakí” (Ngaahi Himi, fika 148).

   ʻO ka ke ka fononga he faingataʻá,

   ʻOua naʻá ke manavasiʻi,

   ʻO mahalo kuo mole ia kotoa,

   Ka ʻe maʻu ho ngaahi tāpuakí.

   Tānaki ho ngaahi tāpuakí,

   Tānaki ʻo lau taki taha,

   Tānaki atu ʻa e tāpuaki

   Sio ki he ʻofa ʻa e ʻOtua.

3. ʻOmi ha kala mo ha laʻi pepa kuo tohiʻi ai ʻa e “Ko e Ngaahi Tāpuaki ʻo ʻEte Kau ki he Siasí” ke taki taha ʻa e fānaú. Fekau ki he fānaú ke nau taki taha tā mo valivali ha fakatātā ʻo ha tāpuaki kuo nau maʻu hili honau papitaisó mo fakamaʻu kinautolu ke nau hoko ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Ki Muí Ni.