Lēsoni 7

Ko e Tui kia Sīsū Kalaisí

Taumuʻá

Ke tokoniʻi ʻa e tamasiʻi mo e taʻahine taki taha ke mahino kiate ia ko e ʻuluaki tefitoʻi moʻoni ʻo e ongoongoleleí ko hono fakatupulaki ʻo e tui kia Sīsū Kalaisí.

Teuteú

1. Lau mo ako ʻi he faʻa lotu ʻa e ngaahi potu folofola ko ʻení peá ke teuteu ke lau mo fakamatalaʻi ia ki he fānaú: Maʻake 10;46–52; Mātiu 3:13–17; 3 Nīfai 11:8–17; pea mo e Tokāteline mo e Ngaahi Fuakava 76:19–23.

2. Fakaafeʻi mai ki hoʻo kalasí ha taha ʻoku ʻi ai haʻane fakamoʻoni mālohi kia Sīsū Kalaisi ʻi he kamataʻanga ʻo e taimi kalasí ke ne vahevahe ʻa ʻene fakamoʻoní mo e ngaahi ongo ʻokú ne maʻu fekauʻaki mo e Fakamoʻuí. Hanga ʻo fakapapauʻi ʻokú ke tomuʻa fakahā ʻeni ke ʻilo mo loto ki ai ʻa e pīsopé pe palesiteni fakakoló, pea fakahā foki ke ʻilo ʻe he palesiteni ʻo e Palaimelí.

3. Muimui ki he ngaahi fakahinohino ʻoku ʻoatu ʻi laló ke faʻu ʻaki ha saati pea fakahingoa ko e “Ko ʻEte Hoko ko e Mēmipa ʻo e Siasi ʻo Sīsū Kalasí”. (ʻOku ʻoatu ʻi he ngataʻanga ʻo e lēsoní ha sīpinga ke muimui ki ai.) ʻE fakaʻaongaʻi ʻa e saati ko ʻení ʻi he ngaahi lēsoni ko ia ʻe fā hono hokó, ko ia ʻe lelei ke ke fakapipiki ia ʻi ha laʻi pepa fefeka pea valivali. ʻAi ke lahi feʻunga ʻa e sātí ke faingofua ʻa e mamata kotoa ki ai ʻa hoʻo kalasí. (Mahalo pē te ke toe fie maʻu ke fakaʻaongaʻi ʻa e saati ko ʻení ha taimi kehe ki he taimi feʻinasiʻakí.)

   1. Teuteu ʻa e ngaahi kaati foʻi lea ko ʻení:

      Foaki ʻo e Laumālie Māʻoniʻoní

      Papitaiso

      Tui kia Sīsū Kalaisi

      Fakatomala

   2. Fakapipiki ʻa e ngaahi kaati foʻi leá ʻi ha ngaahi sitepu ʻo hangē ko ia ʻoku hā atu ʻi he lēsoní. ʻOku fakaʻaongaʻi pē ʻa e sitepu ko e “Tui kia Sīsū Kalaisí” ʻi he lēsoni ko ʻení.

4. Hiki ʻi ha laʻi pepa siʻisiʻi ke taki taha ʻa e kalasí ʻa e ngaahi lea ko ʻení. “Fehuʻi mai kiate au ʻa e meʻa kuó u ako ʻo ʻiloʻi fekauʻaki mo ʻete hoko ko e mēmipa ʻo e Siasi ʻo Sīsū Kalaisí”.

5. Ki muʻa pea toki kamata ʻa e kalasí, hanga ʻo tuku ha tatau ʻo e ngaahi folofola ʻoku fakaʻaongaʻi ʻe he Siasí ʻi ha feituʻu ʻe lava ʻa e kalasí ʻo mamata ki aí.

6. Teuteu ke mou hivaʻi pe lau ʻa e lea ʻo e foʻi hiva ko ia ko e “Ongoʻi ʻEne ʻOfá” (Children’s Songbook, p. 74); ʻoku ʻoatu ʻa e leá ʻi he tafaʻaki ki mui ʻo e tohi lēsoní.

7. Tokoniʻi ʻa e fānaú ke nau lava ʻo ako maʻu loto ki he lahi taha te nau ʻiló ʻa e tefito ʻo e tui hono faá.

8. Nāunau ʻoku fie maʻú:

   1. Tohi Tapu, Tohi ʻa Molomona, Tokāteline mo e Ngaahi Fuakava, pea mo e Mataʻitofe Mahuʻingá.

   2. Fakatātā 3–9, Ko Sīsū ko e Kalaisí (62572 900; Ngaahi Fakatātā ʻo e Ongoongoleleí 240); fakatātā 3–16, Ko Hono Fakaʻā ʻe Sīsū ʻa e Kuí (62145 900; Ngaahi Fakatātā ʻo e Ongoongoleleí 213); fakatātā 3–1, Ko Hono Papitaiso ʻa Sīsū ʻe Sione Papitaisó (62133 900; Ngaahi Fakatātā ʻo e Ongoongoleleí 208); fakatātā 3–17, Ko e Ako ʻa Sīsū ʻi he Hemisifia Hihifó (62380 900; Ngaahi Fakatātā ʻo e Ongoongoleleí 316); fakatātā 3–10, Ko e Fuofua Meʻa Hā Maí (62470 900; Ngaahi Fakatātā ʻo e Ongoongoleleí 403); pea mo e fakatātā 3–18, Ko Palesiteni Lolenisō Sinou.

9. Teuteu ʻa e ngaahi meʻa ko ia ʻe fie maʻu ki ha ngaahi ʻekitivitī fakatupulaki te ke fakaʻaongaʻí.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi e fānaú ke nau fai ha faʻahinga meʻa ʻi he lolotonga ʻa e uiké pea mou vakaiʻi ia.

Ko hono Maʻu ʻo ha Mahino Fekauʻaki mo e Tuí

ʻEkitivitī ke takiakiʻi ʻaki e tokangá

Fakaʻaliʻali ʻa e fakatātā 3–9, Ko Sīsū ko e Kalaisí. Fakaʻaliʻali ʻa e fakatātaá ʻi he kotoa ʻo e taimi lēsoní.

ʻEkitivitī ke takiakiʻi ʻaki e tokangá

• Ko hai ʻeni?

Fakamoʻoni ʻa e toko taha ʻaʻahí

Hanga ʻo fakafeʻiloaki hoʻo toko taha ʻaʻahí peá ke fakahā ange ki he fānaú kuó ke fakaafeʻi mai ʻa e toko tahá ni ke ne kiʻi lave nounou pē ki he anga ʻo ʻene ongoʻi fekauʻaki mo Sīsū Kalaisí. Fakamatalaʻi ange ʻoku kau ʻi he konga ʻo e fakamoʻoni ʻa e toko taha kotoa pē ʻa ʻene ongo fekauʻaki mo Sīsuú. Ko ʻene ʻosi pē ʻa ʻene fakamoʻoní pea fakamālō ange leva mo fakaafeʻi ia ke ne mavahe atu. Ko ʻene ʻalú pē peá ke fai leva ʻa e ngaahi fehuʻi ko ʻení:

Fakamoʻoni ʻa e toko taha ʻaʻahí

• Ko hai ʻa ʻetau ʻaʻahi he ʻaho ní?

• ʻOku mou ʻiloʻi fēfē naʻe ʻi heni ʻa ʻetau toko taha ʻaʻahí?

Fakakaukau ki ha taha ʻo e fānaú pe ko ha taha pē ʻoku ʻikai ke ʻi he kalasí he ʻahó ni peá ke fai ʻa e ongo fehuʻi ko ʻení ʻo fakaʻaongaʻi ʻa e hingoa ʻo e toko taha ko iá ʻi he feituʻu ʻoku fakaava atú:

Fakamoʻoni ʻa e toko taha ʻaʻahí

• Naʻe mamata nai ʻa ki heʻetau toko taha ʻaʻahi ʻo e ʻaho ní?

• ʻE ʻilo fēfē nai ʻe naʻe ʻi ai ha toko taha naʻe ʻaʻahi mai ki he kalasí he ʻahó ni?

Fakamatala ʻa e faiakó

Tokoniʻi ʻa e fānaú ke mahino kiate kinautolu naʻe ʻikai ke mamata ʻa e toko taha ia naʻe liʻaki kalasi he ʻaho ní ki he toko taha ʻaʻahí.

Saati

Ka neongo ia, mahalo pē te ne tui kapau ʻe tala ange ʻe he kalasí naʻe ʻi ai ha toko taha ʻaʻahi. Ko e tuí ko ha tui ki ha meʻa ʻoku moʻoni neongo ʻoku teʻeki ai ke tau sio ai.

Fakamatalaʻi ange ko e fuofua sitepu ʻi heʻete hoko ko e mēmipa ʻo e Siasi ʻo Sīsū Kalaisí ko ʻete maʻu ha tui kia Sīsū Kalaisi. Hanga ʻo fakapipiki ʻa e laʻi pepa ʻoku hiki ai ʻa e “Tui kia Sīsū Kalaisi,” ʻi he funga sitepu ʻuluaki ʻi he sātí. (Mahalo pē te ke fie maʻu ke ʻalu fakataha ʻeni mo ha fakatātā ʻo Sīsū ke lava ʻo fakamanatu ai ki he fānau iiki angé ʻa e meʻa ʻoku tala mai ʻe he kaati foʻi leá.) Tuku ke mou lau fakataha ʻa e ngaahi leá pea mo e fānau lalahi angé. Fakahā ange ki he fānaú, te nau ako ʻo kau ki he tui kia Sīsū Kalaisí ʻi he lolotonga hono fai ʻo e lēsoni ko ʻení.

ʻOku Fakamoʻoni ʻa e Tohi Tapú pea mo e Tohi ʻa Molomoná kia Sīsū Kalaisi

Fakamatala ʻa e faiakó

Fakamatala ʻa e faiakó

• ʻOku teʻeki ai ke tau mamata kia Sīsū, ka te tau lava fēfē nai ke tui ʻokú ne moʻui pea ʻokú ne ʻofa ʻiate kitautolu? (Kuo ʻosi mamata ha kakai kehe ia kia Sīsū pea te nau lava ke fakamatalaʻi mai kiate kitautolu.)

Tuhu ki he ngaahi tohi ʻi he funga tēpilé pea tala ange ʻoku ui ʻa e ngaahi tohi ko ʻení ko e folofola. ʻOku fakamatala ʻa e folofolá ki ha kakai toko lahi kuo nau ʻosi mamata pe fefolofolai mo Sīsū.

Pukepuke hake ʻa e Tohi Tapú ki ʻolunga. Tala ange ʻoku fakamatala ʻa e konga ʻo e Tohi Tapú ʻo kau ki he taimi naʻe moʻui ai ʻa Sīsū ʻi he māmaní, foaki ʻene ngaahi akonakí ki he kakaí, pea mo e fokotuʻu hono siasí. ʻOku fakamatala ʻa e Tohi Tapú ki ha kakai naʻa nau mamata mo talanoa mo Sīsū pea mo haʻane tokoniʻi honau toko lahi.

Fakatātaá mo e talanoa mei he folofolá

Fakaʻaliʻali ʻa e fakatātā 3–16, Ko Hono Fakaʻā ʻe Sīsū ʻa e Kuí. Fai ki he fānaú ʻa e talanoa kia Patimiusi, ʻa ia ko ha tangata kui ia naʻá ne moʻui lolotonga ʻa e taimi ʻo Sīsuú (vakai, Maʻake 10:46–52).

Fakamatalaʻi ange ko e taimi ko ia naʻe fanongo ai ʻa Patimiusi ʻoku ʻalu ange ʻa Sīsuú, naʻá ne tangi kia Sīsū ke fakamoʻui ia. Naʻe tala ange ʻe he toko lahi ke ne fakalongolongo pea ʻoua te ne fakahohaʻasi ʻa Sīsū. Ka naʻe fanongo ʻa Sīsū ki he tangi ʻa Patimiusi peá ne fekau ke ʻoange ia. Naʻe kole ange ʻa Patimiusi kia Sīsū ke ne fakaʻā ia ke toe lava ʻo mamata.

Kole ki he fānaú ke nau fakafanongo atu ka ke lau ʻa e Maʻake 10:52 ke nau ʻiloʻi mei ai ʻa e meʻa naʻe hoko kia Patimiusi.

Fakatātaá mo e talanoa mei he folofolá

• Ko e hā e meʻa naʻe hoko kia Patimiusi? (Naʻe fakamoʻui ia ʻe Sīsū. Naʻe toe lava ke mamata ʻa Patimiusi.)

Naʻe pehē ʻe Sīsū ʻoku fakamoʻui ʻa Patimiusi koeʻuhí pē ko ʻene tuí. Naʻe tui ʻa Patimiusi ʻe lava ʻe Sīsū ʻo fakamoʻui ia.

Fakatātaá mo e talanoa mei he folofolá

• Ko e hā e tokoni ʻa e talanoa kia Patimiusi ke tau ʻilo ʻo kau kia Sīsuú? (ʻOku ʻofa ʻa Sīsū ʻiate kitautolu pea te ne tokoniʻi kitautolu ʻo kapau te tau tui kiate ia.)

Fakatātaá mo e fealēleaʻaki ʻi he folofolá

Fokotuʻu ʻa e fakatātā 3–1, Ko Hono Papitaiso ʻa Sīsū ʻe Sione Papitaisó, ʻi he funga fakatātā ʻo Patimiusi.

Fakatātaá mo e fealēleaʻaki ʻi he folofolá

• Ko e hā e meʻa ʻoku hoko ʻi he fakatātā ko ʻení? (ʻOku papitaiso ʻa Sīsū ʻe Sione Papitaiso.)

Lau ʻa e Mātiu 3:17.

Fakatātaá mo e fealēleaʻaki ʻi he folofolá

• ʻI he taimi ko ē naʻe papitaiso ai ʻa Sīsuú, ko hai naʻe lea mei he langí ʻo pehē, “Ko hoku ʻalo ʻofaʻangá ʻeni ʻa ia ʻoku ou fiemālie lahi aí”? (Ko e Tamai Hēvaní.)

• Ko e hā e meʻa ʻoku tau ʻilo ʻo kau kia Sīsū mei he meʻa naʻe folofolaʻaki ʻe he Tamai Hēvaní? (Ko hono ʻAló ʻa Sīsū.)

Fakamatalaʻi ange ko e fakamoʻoniʻi ʻeni ʻe he Tamai Hēvaní ko hono ʻAló ʻa Sīsū.

Pukepuke hake ʻa e Tohi ʻa Molomoná. Tala ange ʻoku ui ʻa e folofola ko ʻení ko e Tohi ʻa Molomoná, pea ʻoku tau lava ke lau ai ʻo kau ki ha kakai Nīfai toko lahi ʻi ʻAmelika ʻa ia naʻe mamata kia Sīsū mo fanongo ki heʻene folofolá, hili ʻa ʻene toetuʻu mei he maté.

Lau ʻa e 3 Nīfai 11:8. Fokotuʻu ʻa e fakatātā 3–17, Ko e Ako ʻa Sīsū ʻi he Hemisifia Hihifó, ʻi ʻolunga he fakatātā ʻo hono papitaiso ʻo Sīsuú. Lau ʻa e 3 Nīfai 11:9–10. Fakamatalaʻi ange naʻe fakahā ʻe Sīsū ki he kakaí ko Sīsū ia ko e Kalaisí, ʻa e Fakamoʻui naʻe pehē ʻe he kau palōfitá ʻe haʻú.

Tokoni ki he fānaú ke mahino kiate kinautolu ʻa e fuʻu fiefia lahi ko ia naʻe maʻu ʻe he kakai Nīfaí ʻi heʻenau ʻiloʻi kuo hāʻele mai ʻa Sīsū ʻo hangē ko ʻene folofolá. Naʻe fekau ʻe Sīsū ki he kakaí ke nau ala ki hono ongo nimá mo hono ongo vaʻé koeʻuhí ke nau ʻiloʻi naʻá ne pekia pea kuó ne toetuʻu.

Fakatātaá mo e fealēleaʻaki ʻi he folofolá

• Ko e hā e meʻa ʻoku tau lava ke ʻilo fekauʻaki mo Sīsū ʻi heʻene hā ki he kakai Nīfaí? (Naʻá ne pekia peá ne toetuʻu. ʻOkú ne moʻui.)

ʻOku Fakamoʻoni ʻe he Kau Palōfita ʻo e ʻAho ní kia Sīsū Kalaisi

Fakatātaá mo e fealēleaʻakí

Pukepuke hake ha tatau ʻo e Mataʻitofe Mahuʻingá. Fakamatalaʻi ange ʻoku hiki ʻi he tohi ko ʻení ʻa e fakamatala ki he ʻuluaki mata meʻa hā mai ʻa Siosefa Sāmitá. Kole ki he fānaú ke nau fakahā atu ki he lahi taha te nau lavá ʻa e meʻa ʻoku nau ʻiloʻi fekauʻaki mo e ʻuluaki mamata meʻa hā mai ʻa Siosefá. (Mateuteu mai ke ke fakamatalaʻi ʻa e talanoa ki he ʻUluaki Mamata Meʻa Hā Maí kapau ʻoku teʻeki ai ke ʻiloʻi ʻe he fānaú; vakai, Siosefa Sāmita 2:7–19.) Fakamamafaʻi ange naʻe mamata ʻa Siosefa Sāmita kia Sīsū ʻi he hili ia ha taʻu ʻe lau ngeau mei heʻene toetuʻú.

Fakatātaá mo e talanoá

Fakaʻaliʻali ʻa e fakatātā 3–18, Ko Palesiteni Lolenisō Sinou. Fakamatalaʻi ange ki he kalasí naʻe ʻaʻahi mai ʻa Sīsū Kalaisi kiate ia ʻi he Temipale Sōleki Sití ʻi he taimi naʻá ne kei hoko ai ko e Palesiteni ʻo e Siasí.

ʻI ha ʻaho ʻe taha, naʻe ʻeveʻeva atu ai ʻa Palesiteni Sinou mo hono mokopuna fefiné ʻi he temipalé, peá ne fakamatala ange kiate ia ʻa e meʻa naʻe hokó. Ko e fakamatala ʻeni ʻa hono mokopuná fekauʻaki mo ʻena pōtalanoa mo Palesiteni Sinoú:

“Hili ʻema mavahe mei hono lokí ne ma kei ʻi he foʻi hala ko ia ʻoku ʻalu atu ʻo aʻu ki he Loki Selesitialé, naʻá ku lue ʻi muʻa ʻi heʻeku kuí mo ʻene taʻofi au ʻo pehē mai, “Tatali siʻi mai ʻEli. ʻOku ou fie fakahā atu ha meʻa kiate koe. Ko e meʻa tonu ʻeni naʻe hā mai ai ʻa e ʻEiki ko Sīsū Kalaisí kiate au ʻi he pekia ʻa Palesiteni Utalafí…. ‘

“ʻOsi ko iá, naʻá ne kiʻi laka siʻi mai ʻo ne hiki hake hono nima toʻohemá mo ne pehē mai, ‘Naʻá ne tuʻu tonu pē heni, meimei ʻi he fute ʻe tolu mei he falikí. Hangē naʻá ne tuʻu mai ia ʻi ha peleti naʻe ngaohi mei ha koula moʻoni.’

“Naʻe fakahā mai ʻe heʻeku kuí ko ha toki toko taha nāunauʻia moʻoni ʻa e Fakamoʻuí peá ne fakamatala ki hono ongo nimá, ongo vaʻé, ki hono kofu hina maʻa ekiakí, pea naʻe pehē hono fuʻu hinehina mo ngingila ʻa e nāunauʻia ʻa hono teungá naʻe ʻikai ke ne mei lava ke sio kiate Ia.

“ʻOsi ko iá, naʻe toe laka mai ʻeku kuí ʻo ofi mai kiate au peá ne hili hono nima toʻomataʻú ki hoku ʻulú mo ne pehē mai, ‘ʻE hoku mokopuna, ʻoku ou fie maʻu ke ke manatuʻi ko e fakamoʻoni ʻeni ʻa hoʻo kuí, ʻa ia naʻá ne fakahā atu kiate koe ʻaki hono ngutu ʻoʻoná naʻá ne mamata ki he Fakamoʻuí heni ʻi he loto Temipalé, peá na talanoa mo Ia, ko e mata ki he mata,’” (Allie Young Pond, quoted by Ivan J. Barrett, in “He Lives! For We Saw Him.” Ensign, ʻo ʻAokosi 1975, p. 20; pea ʻi he Le Roi C. Snow’s “Remarkable Manifestation to Lorenzo Snow”, ʻi he Church News, 2 ʻEpeleli 1838, p. 8).

Fakatātaá mo e talanoá

• Ko e hā e meʻa ʻoku tokoniʻi koe ʻe he fakamoʻoni ʻa Palesiteni Sinoú ke ke ʻiloʻi ʻo kau kia Sīsuú? (ʻOkú ne moʻui, ʻoku ʻi ai hono sino, pea ʻokú ne folofola ki he kakai ʻi hotau taimí.)

Te tau Lava pē ke Tui kia Sīsū Kalaisi

Fealēleaʻakí

Fai ki ha tokolahi ʻo e fānaú ʻa e ongo fehuʻi ko ʻení:

Fealēleaʻakí

• Kuó ke ʻosi mamata kia Sīsū?

• ʻOkú ke ʻilo fēfē ʻoku moʻoni mo moʻui ʻa Sīsū?

Tuku ke fakahā atu ʻe he fānaú ʻa ʻenau tui kia Sīsuú ne tupu ia mei he ngaahi akonaki ʻa e ngaahi mātuʻá, ʻa ʻenau kau taki ʻi he Palaimelí pea mo e folofolá.

Tokoniʻi e fānaú ke mahino kiate kinautolu te nau lava pē ke maʻu ha tui ʻoku moʻui ʻa Sīsū pea ʻokú ne ʻofa ʻiate kitautolu, tuʻunga ʻi he ngaahi folofolá pea mo e ngaahi fakamoʻoni ʻa ha niʻihi kehe, ʻo tau ʻiloʻi ai—

Fealēleaʻakí

1. Ko Sīsuú ko e ʻAlo ia ʻo e ʻOtuá.

2. ʻOku ʻofa ʻa Sīsū ʻiate kitautolu pea ʻokú ne fie tokoniʻi kitautolu.

3. ʻOku fie maʻu ʻe Sīsū ke tau tui ange kiate ia.

4. Naʻe toetuʻu ʻa Sīsū pea ʻokú ne toe moʻui.

5. ʻOku maʻu ʻe Sīsū ha sino pea ʻokú ne folofola ki he kakaí.

Fakamanatu ki he fānaú ko e tui kia Sīsū Kalaisí, ko e ʻuluaki sitepu ia ki heʻete hoko ko e mēmipa ʻo e Siasi moʻoní.

Hiva

Mou hivaʻi pe lau ʻa e lea ʻo e “Ongoʻi ʻEne ʻOfá.”

Fakamatala Fakanounou

Fakamoʻoni ʻa e faiakó

Mahalo pē te ke fie maʻu ke ke fili ha fakatātā mei he ngaahi fakatātā ko ia naʻe fakaʻaongaʻi ʻi he lēsoní peá ke fakamatala nounou ʻo kau ki hoʻo tui kia Sīsuú koeʻuhí pē ko e fakamoʻoni pe ko e meʻa ko ia ʻoku fekauʻaki mo e fakatātaá.

Hangē ko ʻení, fakaʻaliʻali ʻa e fakatātā 3–17, Ko e Ako ʻa Sīsū ʻi he Hemisifia Hihifó. Fakamatalaʻi ki he fānaú ʻokú ke ʻilo ʻokú ne ʻofa ʻi he kakai kotoa pē koeʻuhí he naʻá ne hā ki he kakai Nīfaí hili ʻene toetuʻú peá ne tuku ke nau ala ki hono ongo nimá pea mo hono ongo vaʻé.

ʻAve ki ʻapi

ʻOange ki he tamasiʻi mo e taʻahine taki taha ha kiʻi laʻi pepa ʻoku tohiʻi ai ʻeni, “Fehuʻi mai kiate au ʻa e meʻa kuó u ako ʻo ʻiloʻi ʻo kau ki heʻete hoko ko e mēmipa ʻo e Siasi ʻo Sīsū Kalaisí.” Poupouʻi kinautolu ke nau ʻave ʻa e laʻi pepa ko ʻení ki heʻenau mātuʻá pea nau talanoa mo honau fāmilí ʻa e meʻa ʻoku nau ʻiloʻi fekauʻaki mo e tui kia Sīsū Kalaisí.

Fekau e fānaú ke nau toe leaʻaki ʻa e ngaahi meʻa ko ʻení. “ʻOku mau tui ki he ʻOtua ko e Tamai Taʻengatá, pea mo Hono ʻAlo ko Sīsū Kalaisí” (Tefito ʻo e Tui 1). ʻOsi ko iá peá ke tokoniʻi kinautolu ʻoku nau lavá, ke nau ako maʻu loto ki he lahi taha te nau lavá ʻa e tefito ʻo e tui hono faá.

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Pukepuke hake ki ʻolunga ʻa e Tokāteline mo e Ngaahi Fuakavá. Tala ange ʻoku fakamatala ʻa e tohí ni ki ha taimi ʻe taha naʻe mamata ai ʻa Siosefa Sāmita kia Sīsū. Naʻe hā ʻa Sīsū kia Siosefa pea mo Sitenei Likitoni ʻi he taimi naʻá na ako ai mo fakakaukau kia Sīsū, pea mo ʻene ngaahi akonakí.

   Fekau e fānaú ke nau fanongo ka ke lau kiate kinautolu ʻa e fakamoʻoni ʻa Siosefa Sāmitá. Lau ʻa e Tokāteline mo e Ngaahi Fuakava 76:22, ʻo kamata mei he veesi 23 ʻi he ngaahi lea “He ne ma mamata kiate ia.”

   • Ko e hā e meʻa te ke lava ʻo ako mei he fakamoʻoni ʻa Siosefa Sāmita ʻo kaukia Sīsuú? (ʻOku moʻui ʻa Sīsū.)

   Hanga ʻo fakamatalaʻi ange ʻoku tokoniʻi kitautolu ʻe heʻetau lau ʻa e folofolá pea mo ʻetau ako ʻo kau ki he kakai naʻa nau mamata kia Sīsuú ke tau maʻu ha tui kiate ia. Neongo naʻe teʻeki ai ke tau mamata tonu kiate ia ʻaki hotau matá, ka ʻe lava pē ke tau tui ʻokú ne moʻui pea ʻokú ne ʻofa ʻiate kitautolu koeʻuhí ko e ngaahi fakamoʻoni ʻa kinautolu kuo nau ʻosi mamata kiate iá pea nau fakamatala ʻo kau kiate ia ʻi he folofolá. ʻE lava pē ke tau ʻiloʻi ʻi hotau lotó ko Sīsuú ko hotau Fakamoʻuí ia ʻi he taimi ʻoku tau lotu ai ʻo fehuʻi ki heʻetau Tamai Hēvaní.

2. Fehuʻi ange pē ʻe ʻi ai ha niʻihi he fānaú te nau fie fakamatala ʻo kau ki he anga ʻo ʻenau ongo kia Sīsuú. ʻE lava pē ke nau fili ha fakatātā pea nau fakamatala leva ki he founga ʻoku hanga ai ʻe he fakatātaá ʻo fakamālohia ʻa ʻenau tuí. ʻE lava pē ke toutou fakaʻaongaʻi ʻa e fakatātā tatau pē.

   Hili ʻa e maʻu ʻe he toko taha kotoa pē ha faingamālie ke ne vahevahe ai ʻa ʻene ongo ʻo kau kia Sīsuú, tala ange kuo nau fai ʻeni ha sitepu mahuʻinga ʻe taha ʻi heʻenau teuteu ke nau papitaisó.

   • Ko e hā ʻa e sitepu ko ʻení? (Ko e fakatupulaki ʻo e tui kia Sīsū Kalaisí.)

   Tuhu ki he sātí pea fekau ʻa e fānaú ke nau lau pe angimui fakataha kia koe ki he ngaahi foʻi lea ko ʻení “Tui kia Sīsū Kalaisi.”

3. Fekau e fānaú ke nau tā ha fakatātā ʻo ha taha ʻo e ngaahi talanoa mei he folofolá kuo nau ako ki ai he ʻahó ni.

Ko ʻete Hoko ko e Memipa

ʻo e Siasi

ʻo Sīsū Kalaisí

Foaki ‘o e Laumālie Mā‘oni‘oní

Tui kia Sīsū Kalaisi

Papitaiso

Fakatomala