Lēsoni 15

Ko hono Maʻu Mai ʻo e Tohi ʻa Molomoná

Taumuʻá

Ke tokoniʻi ʻa e tamasiʻi mo e taʻahine taki taha ke mahino kiate ia ʻa e founga ʻo ʻetau maʻu ʻa e Tohi ʻa Molomoná.

Teuteú

1. Lau mo ako ʻi he faʻa lotu ʻa e Siosefa Sāmita 2:29–54, 59–60;Molomona 8:1, 4.

2. Ako ke ke ʻilo mo ke mateuteu ke hivaʻi pe lau ʻa e lea ʻo e “Ko e ʻÒ Peleti Koulá” (Children’s Songbook, p. 86).

3. Ngaahi nāunau ʻoku fie maʻú:

   1. Mataʻitofe Mahuʻinga; pea kapau ʻe lava pea ʻomi ha Tohi ʻa Molomona ke taki taha ʻa e fānaú.

   2. Fakatātā 3–32, Ko e Hā ʻa Molonai kia Siosefa Sāmita ʻi hono Lokí (62492 900; Ngaahi Fakatātā ʻo e Ongoongoleleí 404); fakatātā 3–33, Ko Hono Maʻu ʻe Siosefa ʻa e ʻŪ Peleti Koulá (62012 900; Ngaahi Fakatātā ʻo e Ongoongoleleí 406); fakatātā 3–34, Ko Hono Fakanounouʻi ʻe Molomona ʻa e ʻŪ Peletí (62520 900; Ngaahi Fakatātā ʻo e Ongoongoleleí 306); pea mo e fakatātā 3–35, Ko Hono Fufuuʻi ʻe Molonai ʻa e ʻŪ Lauʻi Tohí ʻi he Moʻunga ko Komolá (62462 900; Ngaahi Fakatātā ʻo e Ongoongoleleí 320); fakatātā 3–36, Ko e ʻŪ Lauʻi Peleti Koulá.

4. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke fakalotolahiʻi ʻa e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

Naʻe Tohi ʻa Molomona ʻi he ʻū Lauʻi Peleti Koulá

ʻEkitivitī ke takiakiʻi ʻaki e tokangá

Ngūngū he veesi ʻuluaki ʻo e “Ko e ʻū Peleti Koulá”.

ʻEkitivitī ke takiakiʻi ʻaki e tokangá

• Fakaʻaliʻali ʻa e fakatātā 3–36, Ko e ʻū Lauʻi Peleti Koulá. Fehuʻi ange: ʻE lava ʻe ha taha ʻo fakahā mai ʻa e foʻi hiva ʻoku ou ngūngū aí? (Ko e ʻū Peleti Koulá.)

Fakamatalaʻi ange ko e lēsoni ko ʻení ʻoku fekauʻaki ia mo e ʻū lauʻi peleti koulá.

Tala ange ki he kalasí naʻe tauhi ʻe ha ngaahi tamai ʻi he ngaahi taʻu lahi kuo hilí ʻa e hisitōlia ʻo honau ngaahi fāmilí. Naʻe angaʻaki ʻeni, ko e ʻamanaki pē ke pekia ha tamai ʻokú ne foaki leva ʻa e hisitōlia ʻo hono fāmilí ki hono fohá, pea hoko atu leva ʻe hono fohá ʻa hono hiki ʻo e hisitōliá. Pea naʻe tauhi ʻe he ngaahi fāmilí ʻa honau ngaahi hisitōliá ʻo laulau taʻu. Naʻe hiki foki ʻe he kau palōfitá ʻa e ngaahi meʻa naʻe hoko ki honau ngaahi fāmilí. Ka naʻa nau toe hiki foki ʻo fekauʻaki mo hono tokoniʻi kinautolu ʻe he Tamai Hēvaní pea mo kau ki he kakai naʻa nau nofo fakataha ʻi he taimi ko iá.

Fealēleaʻaki ʻi he fakatātaá

Fakaʻaliʻali ʻa e fakatātā 3–34, Ko Hono Hiki Fakanounou ʻe Molomona ʻa e ʻū Lauʻi Peleti Koulá.

Fakamatalaʻi ange naʻe uiuiʻi ʻe he Tamai Hēvaní ha palōfita ko Molomona hono hingoá ke ne tānaki fakataha mai ʻa e ngaahi hisitōlia ʻo hono kakaí ʻo hiki ʻa e ngaahi meʻa ʻoku mahuʻingá, pea toki tohi kinautolu ʻi ha ngaahi lauʻi koula manifi ʻo hangē ko ha ngaahi laʻi peesi ʻo ha tohí. Naʻe ui kinautolu ko e ʻū lauʻi peleti koula.

Fealēleaʻaki ʻi he fakatātaá

• ʻOku mou pehē ko e hā hono ʻuhinga naʻe hiki ai ʻe Molomona ʻa e ngaahi lekōtí ʻi he ngaahi laʻi koula kae ʻikai ʻi ha pepa pē?

Tala ange ki he fānaú ko e koulá ko ha faʻahinga ukamea ia ʻoku tolonga ʻaupito. ʻOku ʻikai ke mahaehae ʻa e koulá ia ʻo hangē ko e pepá pe ʻumeʻumea ʻo hangē ko e ngaahi ukamea ʻe niʻihi.

Fakamatalaʻi ange naʻe fakaʻaongaʻi ʻe Molomona ʻa e ʻū laʻi peleti koulá koeʻuhí he ʻe tolonga ia ʻo fuoloa. Naʻe ʻosi ʻa e ngaahi taʻu lahi pea toki ʻosi hono hiki ʻe Molomona ʻa e ʻū laʻi peleti koulá. Pea ki muʻa pea mālōlō ʻa Molomoná, naʻá ne ʻoange ʻa e ʻū laʻi peletí ki hono foha ko Molonaí.

Fakatātā

Fakaʻaliʻali ʻa e fakatātā 3–35, Ko Hono Fufuuʻi ʻe Molonai ʻa e ʻū Laʻi Peletí ʻi he Moʻunga ko Komolá.

Fakamatalaʻi ange ko e taimi naʻe ʻosi ai hono hiki ʻe Molonai ʻa e ʻū laʻi peleti koulá, naʻe fekau ia ʻe he Tamai Hēvaní ke ne tanu e ʻū peletí ʻi ha kiʻi moʻunga. Naʻe ʻafioʻi ʻe he Tamai Hēvaní ʻe mahuʻinga ʻa e ʻū peleti koulá ki he kakai ʻe moʻui ʻi he ngaahi taʻu ki mui maí. Naʻe faʻu ʻe Molonai ha puha mei he maká ke faʻo ai ʻa e ʻū peletí ʻo tanu kae ʻoua kuó ne toki finangalo ke lau ia ʻe heʻene fānaú.

Naʻe Fakahinohinoʻi ʻe Molonai ʻa Siosefa Sāmita ʻo Fekauʻaki mo e ʻū Lauʻi Peleti Koulá

Hiva

Hivaʻi pe lau fakataha mo e kalasí ʻa e veesi ʻuluaki ʻo e “Ko e ʻū Peleti Koulá”.

Ko e peleti naʻe fufū,

Tanu he moʻungá.

ʻE hoko ia ko hotau monū,

He tui feʻungá.

Ko e lekooti ʻa Nīfai,

Nīfai talangofua.

Tohi Molomoná kuo ʻi ai,

Ke fakahā muʻa.

Hiva

• Ko e faʻahinga tangata fēfē ʻoku pehē ʻe he hivá ʻoku fie maʻu ʻe he Tamai Hēvaní ke ne ʻomi ʻa e ʻū peleti koulá? (Ko ha tangata anga-tonu.)

Fakamatalaʻi ange ko e tangata anga-tonú ʻoku faitotonu mo talangofua. Ko e tangata faitotonu naʻe fili ʻe he Tamai Hēvaní ke tokoni kiate iá, ko Siosefa Sāmita.

Fakatātaá mo e talanoá

Fai ki he fānaú ʻa e talanoa fekauʻaki mo e ʻaʻahi ʻa Molonai kia Siosefa Sāmitá (vakai,Siosefa Sāmita 2:29–54, 59–60).

ʻI ha efiafi ʻe taha, naʻe lotu ai ʻa Siosefa Sāmita. Naʻe ʻasi ha maama ʻi hono lokí. Ko e taimi poʻuli ʻeni ka naʻe maama ange ʻa e lokí ia ʻi he hoʻatā mālié. Fakafokifā pē, kuo hā mai ʻi he veʻe mohenga ʻo Siosefá ha talafekau fakalangi, ʻo tuʻu ʻi he ʻataá ʻo ʻikai aʻu ʻa hono vaʻé ki he falikí.

Fakaʻaliʻali ʻa e fakatātā 3–32, Ko e Hā ʻa Molonai kia Siosefa Sāmita ʻi hono Lokí.

Naʻe fakahā ange ʻe he talafekau fakalangí kia Siosefa Sāmita ko hono hingoá ko Molonai peá ne pehē naʻe fekauʻi ia ke ne haʻu ʻo fakahā kia Siosefa Sāmita ʻoku ʻi ai ha ngāue mahuʻinga kuo teuteu ʻe he Tamai Hēvaní maʻana ke ne fai.

Naʻe fakahā ange ʻe Molonai kia Siosefa ʻoku ʻi ai ha tohi fakaʻofoʻofa, ko ha tohi hisitōlia ʻa ia kuo tanu ʻi ha ngaahi taʻu lahi. Naʻe hiki ʻa e tohí ni ʻi ha ʻū lauʻi tohi koula. Ko e Molonai tatau pē ʻeni naʻá ne tanu ʻa e ʻū laʻi peletí ʻi he taimi naʻá ne kei moʻui ai ʻi he māmaní.

Naʻe fakahā ange ʻe Molonai kia Siosefa ko ʻene hokosia pe ʻa e taimi totonu ke fakahoko ai ʻení, ʻe fakangofua leva ia ke ne ʻave ʻa e ʻū peleti koulá mei he feituʻu ʻoku fufuuʻi ai ʻi he Moʻunga ko Komolá. Naʻe toe fakahā foki ʻe Molonai mo ha ngaahi meʻa mahuʻinga kehe fekauʻaki mo e ʻū peleti koulá pea mo e ngāue makehe ko ia ʻe uiuiʻi ia ke ne fakahokó. ʻI he ʻosi ʻa e lea ʻa Molonaí, naʻe takatakaiʻi ia ʻe he māmá pea naʻá ne foki hake ki he langí.

ʻI he tokoto ʻa Siosefa ʻo fakakaukau ki he meʻa naʻe hokó, naʻe toe hā ʻa e māmá ʻi he lokí. Naʻe toe hā tuʻo ua mai ʻa Molonai ʻo fakahā kia Siosefa ʻa e meʻa tatau pē mo ia naʻá ne fakahā ʻi heʻene fuofua ʻaʻahi angé. ʻOsi ko iá, naʻe toe mavahe atu pē ʻa Molonai ʻi he founga tatau.

Naʻe toe tokoto pē ʻa Siosefa ʻi hono mohengá ʻo feinga ke mahino kiate ia ʻa e meʻa kotoa ko ia kuo hokó. Naʻe ʻohovale ʻa Siosefa ʻi he toe hā mai ʻa Molonai ʻi hono veʻe mohengá, ko hono tuʻo tolú ia, ʻo toe fakahā pē ʻa e fakamatala fekauʻaki mo e ʻū peleti koulá pea mo e ngāue makehe ko ia te ne fakahokó. Naʻe fakahā ange foki ʻe Molonai ʻe feinga ʻa Sētane ke ne ʻahiʻahiʻi ia ke ne fakatau atu ʻa e ʻū peletí ki ha paʻanga, ka te ne lava pē ke maʻu mai ʻa e ʻū peletí ke fakahoko ʻa e ngāue ʻa e Tamai Hēvaní.

Fakatātaá mo e talanoá

• ʻOku mou pehē ko e hā hono ʻuhinga naʻe hā tuʻo tolu mai ai ʻa e talafekau ko Molonaí kia Siosefa Sāmita ʻi he pō pē ko iá?

Fakamatalaʻi ange naʻe fakahā ʻe Molonai ʻa e ngaahi meʻa lahi naʻe fuʻu mahuʻinga kia Siosefa he pō ko iá. Naʻá ne fakahā tuʻo tolu ʻa e fekaú koeʻuhí ke ʻiloʻi lelei mo mahino kia Siosefa.

Taimi siʻi pē mei he mavahe atu ʻa e talafekau fakalangi ko Molonaí, ko hono tuʻo tolú ia, naʻe ʻuʻua ha moa pea naʻe ʻiloʻi leva ʻe Siosefa kuo ofi ʻa e ʻahó. Naʻe fakahoko ʻa e ʻaʻahi tuʻo tolu ko ʻeni ʻa Molonaí ʻi hono kotoa ʻo e pō ko iá. Naʻe tuʻu hake ʻa Siosefa mei hono mohengá ka naʻe ʻikai ke ne fakahā ki ha taha ʻa e meʻa naʻe hokó. Hili ʻene maʻu meʻatokoni pongipongí, naʻá ne ʻalu mo ʻene tamaí ke ngāue ʻi heʻenau ngoueʻangá. Naʻe fuʻu helaʻia ʻa Siosefa tupu mei he meʻa naʻe hokó mo e ʻikai ha taimi feʻunga ke ne mohe aí. Naʻe fakakaukau ʻa ʻene tamaí ʻokú ne puke peá ne fekau ia ke foki ki honau ʻapí.

Naʻe kamata ke lue atu ʻa Siosefa ki honau ʻapí, ka ʻi heʻene feinga ke kaka hake ʻi he ʻaá, naʻá ne tō ki he kelekelé koeʻuhí he naʻe ʻosi ʻaupito pē hono mālohí. Fuofuoloa siʻi pē mei ai, naʻá ne ongoʻi ha leʻo naʻe ui hono hingoá. Tā ko e talafekau ko Molonaí.

Naʻe toe fakahā ange pē ʻe he talafekaú kia Siosefa ʻa e meʻa naʻá ne fakahā he pō kuo ʻosí. Naʻe fekau leva ʻe he talafekaú ke ne foki ki heʻene tamaí ʻo fakahā kiate ia ʻa e meʻa kotoa pē kuó ne fanongo mo mamata ki aí.

Naʻe fakafanongo ʻa e tamai ʻa Siosefá ki he meʻa kotoa pē naʻe fakahā ange ʻe hono fohá pea naʻá ne ʻiloʻi naʻe moʻoni kotoa ʻa e ngaahi meʻa naʻá ne fakamatalá. Naʻá ne tala ange leva kia Siosefa ke ne fai ki he meʻa kotoa pē kuo fakahā ange ʻe he talafekaú he ko e fekau ia mei he Tamai Hēvaní. ʻI he ʻaho pē ko iá, naʻe ʻalu ʻa Siosefa ki he Moʻunga ko Komolá ke kumi ʻa e ʻū peleti koula kuo tanú. ʻI heʻene aʻu atu ki he moʻungá, naʻá ne hangatonu pē ki he feituʻu naʻe tanu ai ʻa e ʻū peletí.

Folofolá

Lau pe te ke fakamatalaʻi ʻi hoʻo lea pē ʻaʻaú ʻa e meʻa naʻe pehē ʻe Siosefa naʻá ne maʻu aí (vakai, Siosefa Sāmita 2:52).

Tala ange ki he fānaú naʻe hā ʻa e talafekau ko Molonaí kia Siosefa ʻi he lolotonga ʻene mamata ki he loto puha maká. Naʻá ne fakahā kia Siosefa ke ʻoua naʻá ne toʻo ʻa e peletí he kuo teʻeki ai hokosia ʻa e taimi ke toʻo aí.

Naʻe fakahā ange ʻe Molonai kia Siosefa Sāmita ke ne foki ki he Moʻunga ko Komolá ʻi he taʻu kotoa pē ʻi ha taʻu hokohoko ʻe fā. Naʻe fai ʻeni ʻe Siosefa, pea ko e taimi kotoa pē naʻá ne ʻalu ai ki ai, ne talitali pē mei ai ʻa Molonai ke fakahinohino ia ʻi he meʻa naʻe finangalo ʻa e Tamai Hēvaní pea mo Sīsū Kalaisi ke ne ʻiló.

Fakatātaá

Fakaʻaliʻali ʻa e fakatātā 3–33, Ko Hono Maʻu ʻe Siosefa ʻa e ʻū Lauʻi Peleti Koulá.

ʻI he ʻosi ʻa e taʻu ʻe faá, naʻe hokosia leva ʻa e taimi ke toʻo ai ʻa e ʻū peletí mei he puhá. Naʻe toʻo ʻa e tāpuní mei he puhá, pea naʻe ala ʻa Siosefa ki he ngaahi lauʻi peleti koulá. Naʻe fakahā ʻe Molonai kia Siosefa ke ne fuʻu tokangaʻi lelei ʻa e ʻū peletí pea ke ne maluʻi ʻaki ia ʻa ʻene moʻuí.

Fakatātaá

• Ko e hā nai hono ʻuhinga naʻe mahuʻinga ai ke maluʻi ʻe Siosefa ʻa e ʻū laʻi peletí? (Koeʻuhí he ʻe feinga ha kau tangata kovi ke ʻave ʻa e ʻū peletí meiate ia pea ʻe ʻikai lava ke fakahoko ʻa e meʻa naʻe finangalo ʻa e Tamai Hēvaní ke fai ki he ʻū peletí.)

Naʻe Liliu ʻe Siosefa ʻa e ʻū Lauʻi Peletí

Fakamatalaʻi ange naʻe hiki ʻa e ngaahi meʻa ʻi he ʻū peletí, ʻi ha faʻahinga lea naʻe ʻikai ke lava ʻe Siosefa ʻo lau. Naʻe maʻu ʻe Siosefa ha meʻangāue makehe ke tokoni kiate ia ʻi hono liliu ʻo e ngaahi meʻa naʻe tohi ʻi he ʻū peletí.

• ʻOku ʻilo ʻe ha taha ʻiate kimoutolu pe ko e hā ʻa e ʻūlimi mo e Tūmemi?

Fakamatalaʻi kiate kinautolu ʻoku hangē ʻa e ʻūlimí mo e Tūmemí ko ha ongo sioʻata makehe naʻe lava ke sio ai ʻa Siosefa ke tokoni kiate ia ʻi hono liliu ʻo e ngaahi mataʻitohi ʻi he ʻū lauʻi peletí. ʻI hono fakatahaʻi ʻo e tokoni ʻa e Tamai Hēvaní pea mo hono fakaʻaongaʻi ʻo e ʻūlimí mo e Tūmemí, naʻe lava ai ʻe Siosefa ke liliu ʻa e ngaahi foʻi lea ʻi he ʻū lauʻi peleti koulá ki ha ngaahi foʻi lea ʻoku lava ke mahino kiate kitautolu. ʻI he ʻosi ko ia hono liliu ʻo e ʻū lauʻi peletí ki he lea faka-Pilitāniá, naʻe paaki leva ʻa e tohí. Naʻe ui ʻa e tohi ko ʻení ko e Tohi ʻa Molomoná.

Pukepuke hake ki ʻolunga ha Tohi ʻa Molomona. Fakamahinoʻi ange ko e tohi ʻeni naʻe liliu ʻe Siosefa mei he ʻū lauʻi peleti koulá.

ʻI he ʻosi pē hono liliu ʻe Siosefa Sāmita ʻa e Tohi ʻa Molomoná, naʻá ne fakafoki leva ʻa e ʻū peletí kia Molonai.

ʻEkitivitī fakafolofolá

Tufa ʻa e ʻū Tohi ʻa Molomoná ki he fānau ʻoku ʻikai haʻanau tohí.

Fakamahinoʻi ange ʻoku lahi ʻa e ngaahi tohi mavahevahe ʻoku ʻi he Tohi ʻa Molomoná. ʻOku fakahingoa pē ʻa e ngaahi tohi ʻi he Tohi ʻa Molomoná ki he kau palōfita naʻa nau tohi ʻi he ʻū peletí. Fakaʻaliʻali ki he fānaú ʻa e anga hono vahevahe ʻo e tohi ʻa Molonaí ki he ngaahi vahé mo e ngaahi vēsí.

Tokoni ki he fānau lalahi angé ke nau kumi hake ʻa e Molomona vahe 8. Mou lau mo e kalasí ʻa e Molomona vahe 8, veesi 1 mo e 4 ʻo ngata mei he foʻi lea ko ia ko e kelekele.

Fakamatalaʻi ange ʻoku tau ui ʻa e tohi ko ʻení ko e Tohi ʻa Molomoná koeʻuhí he ko e konga lahi ʻo e ngaahi lea ʻi he ʻū peleti koulá naʻe hiki ia ʻe Molomona. Naʻe fakaʻosi hono hiki ʻo e lekōtí ʻe he foha ko ia ʻo Molomona ko Molonaí.

Fakamatala Fakanounoú

Fealēleaʻaki ke fakamanatu e lēsoní

Fakaʻaliʻali kotoa ʻa e ngaahi fakatātā naʻe fakaʻaongaʻi ki he lēsoní pe ko hano folahi pe kinautolu ʻi he falikí. Tuku ke tautaufetongi ʻa e fānaú ʻi he tuhu ki he fakatātā totonú ʻi he lolotonga hoʻo fai ʻa e ngaahi fehuʻí.

Fealēleaʻaki ke fakamanatu e lēsoní

• Ko e fē ʻa e fakatātā ʻoku fakahā ai ʻa e ʻū peleti koulá?

• Ko e fē ʻa e fakatātā ʻoku hā ai ʻa Molonai ʻi heʻene tohi ʻi he ʻū laʻi peleti koulá?

• Ko e fē ʻa e fakatātā ʻoku hā ai ʻa Molonai ʻi heʻene tanu ʻa e ʻū lauʻi peleti koulá?

• Ko e fē ʻa e fakatātā ʻoku hā ai ʻa e talafekau fakalangi ko Molonaí ʻi heʻene talanoa mo Siosefa Sāmita?

• Ko e fē ʻa e fakatātā ʻoku hā ai ʻa Molonai ʻi heʻene foaki ʻa e ʻū lauʻi peleti koulá kia Siosefa Sāmitá?

Hiva

Hivaʻi pe lau fakataha mo e kalasí ʻa e lea ʻo e ongo veesi ʻo e “The Golden Plates”.

Kole ange ki he toko taha te ne fai ʻa e lotu tukú ke ne fakamālō ki he Tamai Hēvaní koeʻuhí ko e Tohi ʻa Molomoná.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, fakamanatu pe fakamatala fakanounou ʻo e lēsoní. Vakai,“Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Fakaʻaongaʻi ha ngaahi fakatātā ʻe feʻunga ke mou fakamanatuʻaki ha niʻihi ʻo e ngaahi talanoa mei he Tohi ʻa Molomoná ʻa ia ʻe ako ki ai ʻa e fānaú ʻi he taʻu ní. Hangē ko ʻení:

   1. Fakaʻaliʻali ʻa e fakatātā 3–37, Ko Hono Taʻofi ʻe Nīfai hono Ongo Taʻokete Angatuʻú (62044 900; Ngaahi Fakatātā ʻo e Ongoongolelei 303). Tala ange ki he fānaú te nau ako ʻo kau ki hono tokoniʻi ʻe he Tamai Hēvaní ʻa Nīfai ke ne faʻu ha vaka neongo ʻa e ʻulungāanga kovi ʻa hono ongo taʻoketé kiate iá.

   2. Fakaʻaliʻali ʻa e fakatātā 3–38, Ko e kau Tau Talavou ʻe Toko Ua Afé (62050; Ngaahi Fakatātā ʻo e Ongoongoleleí 313). Tala ange ki he fānaú te nau ako ʻo kau ki he tau ʻa ha kau talavou ʻe toko ua afe tupu ke fakatauʻatāinaʻi ʻa honau ngaahi fāmilí.

   3. Fakaʻaliʻali ʻa e fakatātā 3–17, Ko e Ako ʻa Sīsū ʻi he Hemisifia Hihifó (62380 900; Ngaahi Fakatātā ʻo e Ongoongoleleí 316). Tala ange ki he fānaú te nau ako ʻo kau ki he ʻaʻahi ʻa Sīsū ki he kakai Nīfaí.

2. Fekau e fānaú ke nau tā ha fakatātā ʻo e ʻū lauʻi peleti koulá pea mo e Tohi ʻa Molomoná. Tohiʻi ai ʻa e ʻ ū Peleti Koulá pea mo e Tohi ʻa Molomoná.

3. Fakaafeʻi ʻa e kiʻi tamasiʻi mo e taʻahine taki taha ke ne ʻahiʻahi tohiʻi ʻaki angé ha foʻi faʻo ʻa e mataʻitohi ʻuluaki ʻo hono hingoá ʻi he tafaʻaki ki lalo ʻo ha ngeʻesi kapa, ke lava ʻo mahino ki he fānaú ʻa e anga ʻo e tohi ʻa e kau palōfita fuoloá ʻi he ʻū peleti naʻe ngaohiʻaki e ukameá. ʻOku totonu ke ʻuluaki fakatātaaʻi ʻeni ia ʻe he faiakó.

4. Mou toe fakamanatu mo e fānaú ʻa e tefito ʻo e tui hono valú. Tokoniʻi kinautolu ke nau lava ʻo ako maʻu loto ha konga ʻo e tefito ʻo e tuí pe ko hono kotoa.