Lēsoni 46

Naʻe Fakafaingofuaʻi ʻe Sīsū Kalaisi ke Tau Lava ʻo Moʻui ʻo Taʻe Ngata (Pekia)

Taumuʻá

Ke tokoniʻi e fānaú ke mahino kiate kinautolu naʻe tupu mei he ʻofa ʻa Sīsū Kalaisi ʻiate kitautolú ʻa ʻene fakafaingofuaʻi ke tau lava ʻo moʻui ʻo taʻe ngatá.

Teuteú

1. Lau mo ako ʻi he faʻa lotu ʻa e Maʻake 10:13–16, ʻa e ngaahi fakamatala kau ki he pekia mo e toetuʻu ʻa Sīsū Kalaisí ʻa ia ʻoku hā ʻi he Luke 23 mo e 24, pea mo e fakamatala ki he ʻaʻahi ʻa Sīsū Kalaisi ki he kakai Nīfaí ʻi he 3 Nīfai 11.

2. Teuteuʻi mai ha kaati foʻi lea ʻoku tohiʻi ai ʻa e Taʻe Faʻamaté.

3. Hiki fakamataʻitohi lalahi ʻa e hingoa ʻo e kiʻi tamasiʻi mo e taʻahine taki taha ʻi ha laʻi pepa mavahevahe.

4. Teuteu mai ke akoʻi ʻa e fānaú ke nau hivaʻi pe lau ʻa e lea ʻo e “Kuo Toetuʻu ʻa Sīsū” (Children’s Songbook, p. 70).

5. Ngaahi nāunau ʻoku fie maʻú:

   1. Tohi Tapu mo ha Tohi ʻa Molomona.

   2. Kiʻi foʻi pulu molū pe tangai piini.

   3. Tepi.

   4. Kofu-nima.

   5. Fakatātā 3–71, Ko Hono Kalusefai ʻo Sīsū Kalaisí (62505 900; Ngaahi Fakatātā ʻo e Ongoongoleleí 230); fakatātā 3–15; Ko Sīsū Kalaisi Kuo Toe Tuʻu (62187 900; Ngaahi Fakatātā ʻo e Ongoongoleleí 239); fakatātā 3–72, Ko e Hā ʻa Kalaisi ki he Kau Nīfaí (62047 900; Ngaahi Fakatātā ʻo e Ongoongoleleí 315); fakatātā 3–56, Ko Kalaisi mo e Fānaú (62467 900; Ngaahi Fakatātā ʻo e Ongoongoleleí 216); fakatātā 3–17, Ko e Ako ʻa Sīsū ʻi he Hemisifia Hihifó (62380 900; Ngaahi Fakatātā ʻo e Ongoongoleleí 316); fakatātā 3–73, Ko e Tangata Leimana ko Samuelá ʻi he Funga ʻAá (62370 900; Ngaahi Fakatātā ʻo e Ongoongoleleí 314); fakatātā 3–74, Ko e Telio ʻo Sīsuú (62180 900; Ngaahi Fakatātā ʻo e Ongoongoleleí 231); mo e fakatātā 3–75, Ko e Kau Fefine ʻi he Fonualotó.

6. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

ʻOku Tokoniʻi Kitautolu ʻe Sīsū Kalaisi Koeʻuhí ko ʻEne ʻOfa ʻIate Kitautolú

ʻEkitivitī ke takiakiʻi ʻaki e tokangá

Tala ange ki he kalasí ʻoku ʻofa ʻa Sīsū Kalaisi ʻi he fānau īkí. Fakahā ange ʻa ʻEne fiefia lahi ʻi heʻene ʻiloʻi ʻoku nau ʻi he Palaimelí he pongipongi Pekia ko ʻení.

Fakaʻaliʻali ʻa e fakatātā 3–15, Ko Sīsū Kalaisi Kuo Toe Tuʻu, ʻi he holisí, palakipoé pe ʻi ha toe feituʻu kehe pē.

Fakamatalaʻi ange kuó ke hiki taki taha honau hingoá ʻi he ngaahi laʻi pepá, pea ʻokú ke fie maʻu ke nau haʻu tahataha ʻo fakapipiki honau hingoá ke ofi ki he fakatātā ʻo Sīsuú. Ko ʻene haʻu pē ʻa e toko taha peá ke pehē ange: “ʻOku ʻofa ʻa Sīsū Kalaisi ʻia (hingoa ʻo e tamasiʻí pe taʻahiné).”

Talanoa mei he folofolá

Fai ʻi hoʻo lea pē ʻaʻau ʻa e talanoa mei he tohi Maʻake 10:13–16:

ʻI he taimi naʻe kei ʻi māmani ai ʻa Sīsū Kalaisí, naʻe ʻomi ʻe ha ngaahi faʻē ʻa ʻenau fānau īkí kiate ia. Naʻa nau fakaʻamu ke ne foaki hanau tāpuaki taki taha. Naʻe fie maʻu ʻe he ngaahi kaungā-meʻa ʻo Sīsuú ke ne mālōlō, pea nau tala ange leva ki he ngaahi faʻeé ke nau ʻave ʻenau fānaú mei ai pea ʻoua te nau toe fakahohaʻasi ia.

ʻI he fanongo ʻa Sīsū ki he lea ʻa hono ngaahi kaungā-meʻá, naʻá ne pehē ange, “Tuku ke haʻu kiate au ʻa e tamaiki īkí, pea ʻoua naʻa taʻofi ʻa kinautolu.” Ko hono fakalea ʻe tahá, naʻá ne pehē ange, “Tuku ʻa e fānau īkí ke nau haʻu kiate au; ʻoua ʻe tuli kinautolu. ʻOku ou ʻofa au ʻi he fānau īkí.” Pea naʻá ne fua hake ʻa e fānaú ʻo ne tāpuakiʻi kinautolu.

Fealēleaʻakí

Pukepuke hake ʻa e fakatātā 3–56, Ko Kalaisi mo e Fānaú. Puke ke ofi atu ki he fānaú koeʻuhí ke nau lava ʻo sio lelei ki ai pea nau ongoʻi ʻa e laumālie ʻo e fakatātaá. Fai ʻa e faʻahinga fehuʻi hangē ko ʻení ke tokoni ki he fānaú ke nau ongoʻi ʻa e fuʻu ʻofa lahi ʻa Sīsū Kalaisi kiate kinautolú.

Fealēleaʻakí

• ʻOku mou pehē ko e hā ʻa e ongo naʻe maʻu ʻe he fānau ko ʻení?

• Kapau naʻá ke ʻi ai, ko e hā e meʻa naʻá ke mei fie maʻu ke folofola atu ʻaki ʻe Sīsū Kalaisi kiate koé?

• Kapau naʻe lava ke ke ʻi ai fakataha mo Sīsū ʻo hangē ko e fanau iiki ko ʻeni, ko e hā nai hoʻo lea naʻe mei fai kiate iá?

• Ko e hā ʻa e ongo te ke maʻu ʻi hoʻo ʻiloʻi ʻoku ʻofa tatau pē ʻa Sīsū ʻiate koe ʻo hangē ko ʻene ʻofa ʻi he fānau iiki ko ʻení?

Naʻe Pekia ʻa Sīsū Kalaisí Maʻatautolu

Talanoa mei he folofolá mo e ngaahi fakatātaá

Pukepuke hake ʻa e ongo folofolá, peá ke fakamatalaʻi ange ʻoku lava ke tau ako ai ʻo kau ki he meʻa kuo fai ʻe Sīsū Kalaisi ke tokoniʻi ai kitautolu ʻi heʻetau lau ʻa e Tohi Tapú mo e Tohi ʻa Molomoná. Fai ʻa e talanoa ko ʻení ʻi hoʻo lea pē ʻaʻau:

Naʻe moʻui ʻa Sīsū Kalaisi ʻi he taimi fuoloá. Naʻe fekauʻi mai ia ʻe he Tamai Hēvaní ki he māmaní ke tokoni ki he ngaahi tamai mo e ngaahi faʻē pea mo e fānau tangata mo e fefiné ke nau fai ʻa e ngaahi meʻa ʻoku totonú. Ko e taimi lahi, naʻá ne nofo pē ʻi he fonua ʻoku ui he taimí ni ko ʻIsileli.

Naʻe ʻofa ʻa Sīsū ʻi he kakai kotoa pē. Naʻe faiangahala ʻa e kakai ia ʻe niʻihi pea ʻikai ke nau saiʻia ʻiate ia. Naʻa nau hanga ʻo tutuki ia ki he ʻakaú.

Fakaʻaliʻali ʻa e fakatātā 3–71, Ko Hono Kalusefai ʻo Sīsū Kalaisí.

Naʻe mamahi ʻa Sīsū Kalaisi peá ne pekia. Naʻe loto mamahi ʻaupito ʻa e kakai naʻa nau ʻofa ʻiate iá. Naʻa nau ʻohifo hono sinó mei he kolosí ʻo takatakaiʻi ʻaki ʻa e tupenu hina fakaʻofoʻofa. Naʻa nau ʻave ʻa hono sinó ki ha fonualoto. ʻOku hangē pē ʻa e fonualotó ia ko ha fuʻu ʻana ʻa ia ʻoku tanu ai ʻa e kakaí. Naʻa nau fakatokoto fakalelei ia ai.

Fakaʻaliʻali ʻa e fakatātā 3–74, Ko Hono Telio ʻo Sīsuú.

Naʻe tāpuni leva ʻe he ngaahi kaungā-meʻa ʻo Sīsū Kalaisí ʻa e hūʻanga ki he fonualotó ʻaki ʻenau tekaʻi mai ha fuʻu maka lahi ʻo fokotuʻu ʻi he hūʻangá.

Naʻe ʻikai ke mahino ki he ngaahi kaungā-meʻa ʻo Sīsū Kalaisí ia te ne toe moʻui. Naʻe haʻu ha kau tangata leʻo ke leʻohi ʻa e fonualoto naʻe ʻi ai ʻa hono sinó. ʻI he ʻaho hono tolu hili ʻene pekiá, pea ʻi he teʻeki ai ke hopo hake ʻa e laʻaá, naʻe haʻu ha kau ʻāngelo ʻo tekaʻi ʻa e fuʻu maká mei he hūʻangá. Naʻe ʻikai ke ʻi ai hono sinó. Naʻe fuʻu manavahē ʻaupito ʻa e kau tangata leʻó ʻo ʻikai ke nau toe lava ʻo ngaue. Pea ko ʻenau lava pē ke ngāué, naʻa nau hola leva mei ai.

Fakaʻaliʻali ʻa e fakatātā 3–75, Ko e Kau Fefine ʻi he Fonualotó.

ʻI he pongipongi tatau pē, naʻe ʻalu atu ai ha kau fefine ki he fonualotó. Naʻa nau ʻofa ʻia Sīsū Kalaisi pea kuo nau haʻu ke takaiʻaki hono sinó ʻa e ngaahi meʻa fakanamulelei ʻo hangē ko ia naʻe faʻa fai ʻi he ngaahi ʻaho ko iá. Naʻa nau mamata atu kuo ʻosi tekaʻi ʻa e fuʻu maká mei he hūʻangá. Naʻa nau hū atu ki he fonualotó ʻo mamata ki ha ʻāngelo kuó ne teunga hinehina, pea naʻa nau manavahē. Naʻe lea ʻa e ʻāngeló ʻo ne pehē ange, “ʻOua ʻe manavahē. ʻOku ʻikai ke ne ʻi heni, ke kuó ne toetuʻu ia.”

Tuhu ki he fakatātā ʻo Kalaisi ʻa ia kuó ne toetuʻú.

Talanoa mei he folofolá mo e ngaahi fakatātaá

• ʻOku mou pehē naʻe ongoʻi fēfē ʻe he ngaahi kaungā-meʻa ʻo Sīsū Kalaisí ʻi heʻenau ʻilo ia kuó ne toetuʻú?

Fealēleaʻaki ʻi he palakipoé

Fakamatalaʻi ange ko e taimi ko ia naʻe toetuʻu ai ʻa Sīsuú, naʻá ne toe maʻu pē ʻa hono sinó ke fakataha mo hono laumālié, ka naʻe liliu ʻa hono sinó.

Fakapipiki hake ʻa e kaati foʻi lea ko e Taʻefaʻamaté.

Fealēleaʻaki ʻi he palakipoé

• Ko e hā hono ʻuhinga ʻo e taʻefaʻamaté?

Fakamatalaʻi ange ko e taimi ko ē naʻe hoko ai ʻa e sino ʻo e Fakamoʻuí ʻo taʻefaʻamaté, naʻe liliu ia ʻo ʻikai pē ke toe mate kae moʻui ʻo taʻe ngata.

Tala ange ki he fānaú ko e taimi ko ia naʻe toetuʻu ai ʻa Sīsuú, naʻe taʻefaʻamate ia, pea naʻá ne fakahoko ʻeni ke tau lava mo kitautolu ʻo toetuʻu pea tau hoko ʻo taʻefaʻamate. ʻOku ʻuhinga ʻeni ko ʻetau toetuʻú pē, pea he ʻikai ke tau toe mate. Te tau lava ke nofo fakataha mo hotau ngaahi fāmilí ʻo taʻe ngata.

Ko e fakaʻaliʻalí mo e fealēleaʻakí

Fakaʻaliʻali ki he fānaú ʻa ho nima ʻoku ʻikai ke tui ai ha kofu-nimá, peá ke tala ange ko e taimi ko ē naʻa tau nofo fakataha ai mo e Tamai Hēvaní ki muʻa pea toki fanauʻi mai kitautolú, naʻe ui pē kitautolu ko e ngaahi laumālie. Naʻa tau lava pē ke ngaue holo (ueueʻi ʻa e ngaahi louhiʻinima ʻi ho nima ʻoku ʻikai ke tui ai ha kofu-nimá) mo fakakaukau mo ako.

Pea ʻi he haʻu ʻa hotau laumālié ke nofo ʻi he māmaní, naʻe foaki mai kiate kitautolu ha ngaahi sino fakamatelie. (Tui ʻa e kofu-nimá.) Naʻa tau kei lava pē ke ngaue holo (ueueʻi ʻa e ngaahi louhiʻinima ʻi he loto kofu-nimá) mo fakakaukau pea mo ako, ka kuo foaki mai ʻe he Tamai Hēvaní ha ngaahi sino fakaʻofoʻofa ke tau maʻu mo tokangaʻi.

Ko ʻetau maté pē, kuo pau leva ke mavahe ʻa e sinó mei he laumālié (toʻo ʻa e kofu-nimá). ʻE ʻikai ke toe lava ʻa e sinó ia ke ngaue ʻiate ia pē (tuhu ki he kofu-nimá) ka ʻoku kei moʻui pē ʻa e laumālié.

Ko e taimi ko ē ʻoku toetuʻu aí, ʻoku hoko ʻa e sinó ʻo haohaoa pea ʻokú ne toe fakataha leva mo e laumālié (toe tui ʻa e kofu-nimá). Hili ʻetau toetuʻú, he ʻikai pē ke tau toe mate. ʻOku ʻuhinga ʻeni he ʻikai pē ke toe māvahevahe ʻa e sinó ia mo e laumālié.

Fakamamafaʻi ange naʻe pekia ʻa Sīsū Kalaisi maʻatautolu he ʻokú ne ʻofa lahi ʻiate kitautolu taki taha. Ko Sīsū ʻa e ʻuluaki toko taha ke ne toetuʻú. Pea koeʻuhí ko e meʻa kuó ne fai maʻatautolú, te tau toetuʻu pea lava ke tau toe nofo fakataha mo e Tamai Hēvaní. Ko e taimi ʻoku tau fakakaukau atu ai ki he Pekiá, ʻoku totonu ke tau fakakaukau ki he fuofua Pekiá pea tau manatuʻi ʻa e ʻofa ʻoku maʻu ʻe Sīsū Kalaisi maʻatautolú. Naʻá ne foaki ʻa ʻene moʻuí maʻatautolu. Naʻá ne toetuʻu. Pea ʻokú ne nofo fakataha ia he taimí ni mo ʻene Tamai Hēvaní ʻi he langí.

Fakamahino ange ko e meʻa fakaofo ʻa e toetuʻu ko ʻeni ʻa Sīsū Kalaisí, ko ia ʻoku tau fakamanatu ai ʻa e Pekiá ʻi he taʻu kotoa pē ke fakahā kiate ia ʻa e hounga kiate kitautolu ʻa e meʻa kuó ne fai maʻatautolú.

ʻEkitivitií

Lī ki he fānaú ha kiʻi foʻi pulu molū pe kiʻi tangai piini, ʻo nau tautaufetongi ʻi hono fakamatalaʻi ha meʻa ʻoku nau manatuʻi ʻo kau ki he talanoa ko ʻeni ki he pekiá mo e toetuʻú.

Naʻe ʻAʻahi ʻa Sīsū Kalaisi ki he Kakai Nīfaí Hili ʻEne Pekiá

Talanoa mei he folofolá mo e ngaahi fakatātaá

Tala ange ki he fānaú ʻoku tau ʻiloʻi naʻe toetuʻu ʻa Sīsū Kalaisi koeʻuhí ʻoku fakahā mai ʻe he folofolá naʻe mamata ki ai ʻa e toko lahi ʻo ʻene kau ākongá mo hono kau muimuí hili ʻene toetuʻú.

Fakamatalaʻi ange naʻe mamata ʻa e kakai Nīfai mo e kau Leimana anga-tonu ʻa ia naʻe nofo ʻi ʻAmeliká kia Sīsū Kalaisi, pea ʻoku fakamatala ʻa e Tohi ʻa Molomoná ki heʻene ʻaʻahi kiate kinautolú. Hili ʻene toetuʻu ʻi Selūsalemá, naʻá ne ʻaʻahi ki he kakai ko ʻení. Naʻa nau maʻu ʻa e faingamālie ke nau mamata, fanongo pea mo ala kiate ia.

Fakamatalaʻi ange naʻe fakahā ʻe he kau palōfitá ki he kakai Nīfaí ʻi he ngaahi taʻu lahi ki muʻá ʻe ʻaʻahi mai ʻa Sīsū Kalaisi kiate kinautolu ʻi ha ʻaho.

Fakaʻaliʻali ʻa e fakatātā 3–73, Ko Samuela ko e Tangata Leimaná ʻi he Funga ʻAá.

Fakamatalaʻi ange naʻe ʻi ai ha palōfita ko Samuela ʻa ia ko ha tangata Leimana, naʻá ne moʻui ʻi ha ngaahi taʻu siʻi pē pea ʻaloʻi mai ʻa Sīsū Kalaisí, pea naʻá ne fakahā ki he kakaí ʻa e meʻa te nau ʻiloʻi ai ʻa e taimi ʻo hono tutuki mo e toetuʻu ʻa Sīsū ʻi Selūsalemá. Naʻá ne fakamatala ange ko e taimi ʻe pekia aí, ʻe ʻufiʻufi ʻa e funga ʻo e fonuá ʻe he fakapoʻulí; pea ʻe feʻunga ʻeni mo e ʻaho ʻe tolu kae ʻoua kuó ne toetuʻu.

Tala ange ki he fānaú naʻe hoko kotoa ʻa e ngaahi meʻa naʻe kikiteʻi ʻe he tangata Leimana ko Samuelá. ʻI he taimi naʻe pekia ai ʻa Sīsū ʻi Selūsalemá, naʻe ʻufiʻufi ʻa e funga ʻo e fonua ko ʻAmeliká ʻe ha fuʻu fakapoʻuli lahi. Naʻe fakaʻauha ʻa e kakai naʻe faiangahalá, pea naʻe fakataha mai ʻa e toko lahi ʻo e kakai māʻoniʻoní ke nau talanoa ki he meʻa kuo hokó pea mo e meʻa naʻe totonu ke nau faí. Lolotonga ʻenau pōtalanoá, naʻe fakafokifā pē ʻa ʻenau ongoʻi ha leʻo naʻe hangē ʻoku haʻu mei he langí. Ko ha leʻo vaivai ʻeni mo ʻofa. Kole ki he fānaú ke nau fakafanongo angé ki he meʻa naʻe lea maiʻaki ʻe he leʻó. Tokoni ki ha taha ʻo e fānaú ke ne lau ʻa e 3 Nīfai 11:7, pe ko hoʻo lau pē ʻe koe.

Talanoa mei he folofolá mo e ngaahi fakatātaá

• Ko hai naʻe lea ko ʻení? (Tamai Hēvaní.)

Fakamatalaʻi ange naʻe sio hake ʻa e kakaí ʻo nau mamata ki ha tangata naʻe teunga hinehina ʻokú ne ʻalu hifo mei he langí. Naʻa nau pehē ko e ʻāngelo naʻa nau mamata ki aí.

Fakaʻaliʻali ʻa e fakatātā 3–72, Ko e Hā ʻa Kalaisi ki he Kau Nīfaí.

Talanoa mei he folofolá mo e ngaahi fakatātaá

• Ko hai ʻa e toko taha naʻe ʻalu hifo mei he langí? (Ko Sīsū.)

Lau ʻa e 3 Nīfai 11:9–10. Fakamatalaʻi ange ko e taimi naʻe hā ai ʻa Sīsū ki he kakaí, naʻa nau manatuʻi naʻe pehē ʻe he kau palōfitá te ne ʻaʻahi ange kiate kinautolu. Naʻa nau fiefia. Naʻá ne fekau ʻa e kakaí ke nau haʻu ʻo ala ki he ngaahi mataʻi kafo ʻi hono ongo nimá pea mo hono ongo vaʻé pea mo e lavea ʻi hono vakavaká. Naʻá ne fai ʻeni koeʻuhí he naʻá ne fie maʻu ke mahino kiate kinautolu ko Sīsū tatau pē ia naʻe tutuki ki he ʻakaú kuó ne toetuʻu.

Fakaʻaliʻali ʻa e fakatātā 3–17, Ko e Ako ʻa Sīsū ʻi he Hemisifia Hihifó.

Talanoa mei he folofolá mo e ngaahi fakatātaá

• ʻOku mou pehē ko e hā ʻa e ongo naʻe maʻu ʻe he kakaí ʻi heʻenau fakataha mo Sīsū Kalaisí?

Fakamatalaʻi ange naʻe fonu ʻa e kakaí ʻi he fakafetaʻi mo e ʻofa ki he Fakamoʻuí ʻo nau kalanga ai ʻo pehē, “Fakafetaʻi! ʻOku monūʻia ʻa e huafa ʻo e ʻOtua Fungani Māʻolungá!” (3 Nīfai 11:17). Pea naʻa nau fakatōmapeʻe ki lalo ʻo hū kiate ia.

Fakamatalaʻi ange naʻe fuʻu ʻofa ʻa Sīsū Kalaisi ki he kakaí ni ʻo ne nofo ai mo kinautolu ʻo fakamoʻui ʻa ʻenau kakai mahakí, tāpuakiʻi ʻenau fānau īkí, pea akoʻi kinautolu. ʻOku fakahā mai ʻe he Tohi ʻa Molomoná kuo teʻeki ai ha kakai ʻi he funga ʻo e māmaní naʻe fiefia ʻo toe lahi ange ka ko e kakai ko ʻení.

Hiva

Tokoniʻi e fānaú ke nau hivaʻi pe lau ʻa e lea ʻo e “Kuo Toetuʻu ʻa Sīsū.”

Kuó ne toetuʻú,

Hotau kaumeʻá.

Fonu fiefia,

Heʻene moʻuí.

Hosana kiate ia,

He taimí ni.

Kuó ne toetuʻu,

Fakamoʻuí.

Kuó ne toetuʻu,

Fakamoʻuí.

Fakamatala Fakanounoú

Fakamoʻoni ʻa e faiakó

Fai hoʻo fakamoʻoní peá ke fakahā ʻa hoʻo ʻofa mo hoʻo houngaʻia kia Sīsū Kalaisi koeʻuhí ko ʻene ʻofa ʻiate kitautolu ʻo lahi feʻunga ke ne fakafaingofuaʻi ai ke tau toetuʻu ʻo maʻu hotau ngaahi sino ki he taʻe ngatá.

Fakaafeʻi ʻa e fānaú ke nau ʻalu ki honau ʻapí ʻo fakahā ki honau ngaahi fāmilí ʻa e meʻa ko ia kuo fakahoko ʻe he Fakamoʻuí ke tau toe lava ai ʻo maʻu ʻa hotau sinó ʻa aʻu ki he taʻe ngatá.

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Teuteuʻi mai ke taki taha ʻe he fānaú ha tatau ʻo e laʻi peesi tufa ko e “Siakale ʻo e ʻOfa ʻa Sīsū Kalaisí” ʻa ia ʻoku ʻi he ngataʻanga ʻo e lēsoní.

   Tufa ha tatau ʻo e laʻi peesi tufá mo ha peni vahevahe pea mo ha ngaahi foʻi kala ke taki taha ʻa e fānaú. Fekau ke nau tohiʻi honau hingoá ʻi heʻenau ʻū laʻi pepá ʻi he tafaʻaki toʻomataʻu ki ʻolungá, pe ko hoʻo tokoniʻi kinautolu ke nau fai ia.

   Lau fakataha mo e fānaú ʻa e ngaahi foʻi lea takatakai ʻi he loto siakalé. Fekau ke nau tā ha ngaahi fakatātā ʻonautolu pē ʻi he loto siakalé. Tohi matalalahi ʻa e “ʻOku ʻofa ʻa Sīsū ʻIate Au” ʻi he palakipoé, pea fekau leva ʻa e fānaú ke hiki ia ʻi heʻenau ngaahi laʻi pepá ʻi he tafaʻaki ki lalo ʻo e foʻi siakalé.

2. Fekau ʻa e fānaú ke nau tuʻu ʻo fai ʻa e foʻi ʻekitivitī ko ʻení mo koe.

   Naʻe tokoto heni ʻa Sīsū ia. (tuhu ki ai)

   Vakai, kuo tekeʻi e maká! (toe tuhu pē ki ai)

   Punou hifo. (punou)

   Sio ki loto. (ʻai e nimá he funga kemó ko e fakasio)

   ʻIkai ʻi heni ʻa hono sinó! (Tuʻu hangatonu hake)

   Sīsū kuó ne toetuʻu!

   Mou fiefia kimoutolu! (pasipasi leʻo-siʻi pē)

Koeʻuhi naʻe t oe t uʻ u ʻ a Sīsū Kalaisi,

Te u maʻu ʻa hoku sino ʻo taʻe ngata