Lēsoni 36

Ko Hono Fakahā ʻo e ʻOfa kia Sīsū Kalaisí

Taumuʻá

Ke tokoniʻi e fānaú ke nau fakahā ʻenau ʻofa kia Sīsū Kalaisí ʻaki ʻenau fai ʻa hono finangaló.

Teuteú

1. Lau mo ako ʻi he faʻa lotu ʻa e Sione 14:15 pea teuteu mai ke lau ia.

2. Hiki ha taha ʻo e ngaahi fakamatala ko ʻení ʻi ha fanga kiʻi laʻi pepa iiki ʻe ono:

   1. Fakamatala 1: ʻOkú ne ʻofa ʻiate kitautolu.

   2. Fakamatala 2: Naʻe papitaiso ia ʻi he fakauku ʻo hangē pē ko e founga ʻoku papitaiso ai kitautolú.

   3. Fakamatala 3: Naʻá ne ako ke ngāue fakatufunga ʻi heʻene kei siʻí.

   4. Fakamatala 4: ʻOkú ne ʻofa mo tāpuakiʻi e fānau īkí.

   5. Fakamatala 5: Kuó ne akonekina kitautolu ke tau feʻofaʻaki.

   6. Fakamatala 6: Naʻá ne pekia maʻatautolu pea lava ai ke tau fakatomala.

   Fūfū takai ʻi he lokí ʻa e fanga kiʻi fakamatalá taki taha ki muʻa pea toki kamata ʻa e kalasí.

3. Teuteu mai ke hivaʻi ʻa e “Ke Mou Feʻofaʻaki” (Children’s Songbook, p. 136); ʻoku ʻoatu ʻa hono leá ʻi he tafaʻaki ki mui ʻo e tohi lēsoni ko ʻení.

4. Ngaahi nāunau ʻoku fie maʻú:

   1. Tohi Tapu.

   2. Peni mo ha pepa pe laʻi kaati ke taki taha ʻa e fānaú.

   3. Fakatātā 3–9, Ko Sīsū ko e Kalaisí (62572 900; Ngaahi Fakatātā ʻo e Ongoongoleleí 240); fakatātā 3–23, Ko ha Taʻahine ʻokú ne Lau ʻa e Folofolá; fakatātā 3–25, Ko e ʻAlu ki he Lotú; fakatātā 3–26, Ko ha Tamasiʻi ʻokú ne Totongi Vahehongofulu; fakatātā 3–27, Ko e Heka Taufetongi ʻi he Pasikala Veʻetolú (62317 900); fakatātā 3–59, Ko Hono Tufa ʻo e Sākalamēnití (62021 900); pea mo e fakatātā 3–60, Ko Ha Taʻahine ʻoku Fai ʻEne Lotu (62310 900).

   4. Sioka, palakipoe mo ha meʻa tāmate palakipoe.

5. Teuteu ʻa e ngaahi meʻa ʻe fie maʻu ki ha ngaahi ʻekitivitī fakatupulaki te ke fakaʻaongaʻi.

Fokotuʻu ki he Founga Fai ʻo e Lēsoní

Fakaafeʻi ha taha ʻo e fānaú ke ne fai ʻa e fua lotú.

Kapau naʻá ke poupouʻi e fānaú ke nau fai ha faʻahinga meʻa he lolotonga ʻo e uiké pea mou vakaiʻi ia.

ʻOku ʻOfa ʻa Sīsū Kalaisi ʻIate Kitautolu

ʻEkitivitī ke takiakiʻi ʻaki e tokangá

Fakamatalaʻi ange kuó ke ʻosi fufuuʻi ʻa e ngaahi fakamatala lahi ʻi he loki akó ʻa ia ʻoku fekauʻaki mo e lēsoní. Tuku ke kumi fakalongolongo kinautolu ʻe he fānaú. Ko hono maʻu kotoa pē ʻa e ngaahi fakamatalá peá ke fekau ʻa e fānaú pe ko hoʻo tokoni kiate kinautolu ke nau fokotuʻutuʻu fakaholoholo kinautolu mei he taha ki he ono. Mou lau fakataha kinautolu mo e fānaú. Ko ʻene ʻosi pē hoʻomou lau ʻa e fakamatala taki taha pea kole ange ke nau fakahā ʻenau fakakaukaú.

ʻEkitivitī ke takiakiʻi ʻaki e tokangá

• Ko e ngaahi fakamatala ʻeni kau kia hai? (Kia Sīsū Kalaisi.)

Fakatātaá mo e fealēleaʻakí

Fakaʻaliʻali ʻa e fakatātā 3–9, Ko Sīsū ko e Kalaisí.

Tala ange ki he kalasí ʻoku tau ʻiloʻi ʻoku ʻofa ʻa Sīsū Kalaisi ʻiate kitautolu koeʻuhí he kuo lahi ʻa e ngaahi meʻa kuó ne fai maʻatautolú.

Fakatātaá mo e fealēleaʻakí

• Ko e hā e meʻa kuo fai ʻe Sīsū Kalaisi maʻatautolú? (Tokoni ki he fānaú ke mahino kiate kinautolu naʻe foaki mai ʻe Sīsū Kalaisi ʻa e ngaahi fekaú, kau palōfitá, hono Siasí, pea mo e ngaahi ouau ʻo e lakanga fakataulaʻeikí. Naʻe fakafou ʻi he fakalelei naʻá ne fakahokó ʻa e lava ke tau fakatomala mei heʻetau fehālākí koeʻuhí ke ʻi ai ha ʻaho te tau foki hake ai ʻo nofo fakataha mo ia pea mo e Tamai Hēvaní.)

Fakamatalaʻi ange kuo fakahā mai ʻe Sīsū Kalaisi ʻa ʻene ʻofa kiate kitautolú ʻaki ʻene foaki mai ʻa e ngaahi tāpuaki fakaʻofoʻofa ko ʻení. Ko e toko taha makehe ʻa kitautolu fakafoʻituitui kiate ia pea mo e Tamai Hēvaní.

Fealēleaʻaki ʻi he palakipoé

Fakamatalaʻi ange kuo ʻosi fakahā mai ʻe Sīsū Kalaisi ʻa ʻene ʻofa kiate kitautolú pea te tau lava foki ke fakahā ʻa ʻetau ʻofa kiate iá. Hiki ʻi he palakipoé pe ʻi ha laʻi pepa ʻa e foʻi sētesi ko ʻení, “Te u lava ʻo fakahā ʻa ʻeku ʻofa kia Sīsū Kalaisí ʻaki—” pea lau leʻo-lahi leva ia. ʻOsi ko iá pea fakahā ange ki he fānaú te mou aleaʻi he ʻahó ni ʻa e ngaahi founga ʻoku tau lava ʻo fakahāʻaki ʻa ʻetau ʻofa kia Sīsū Kalaisí. Hanga ʻo hiki ʻi he palakipoé ʻa e ngaahi foungá ʻi he lolotonga hoʻomou lāuela ki ai mo e tamaiki lalahi ʻoku lava ʻo laukongá. Pea ki he fānau iiki angé, hanga ʻo tā ha fanga kiʻi fakatātā faingofua pē ke fakatātaaʻi ʻaki ʻa e meʻa ʻoku mou aleaʻí.

ʻOku Tau Fakahā ʻEtau ʻOfa kia Sīsū Kalaisí ʻaki ʻEtau Talangofua ki he Ngaahi Fekaú

Folofolá mo e fealēleaʻaki ʻi he palakipoé

Kole ki he kalasí ke nau fakafanongo ki ha toe founga ʻe taha ʻoku fakahāʻaki ʻa e ʻofa kia Sīsū Kalaisí ka ke lau ʻa e Sione 14:15.

Naʻe fakahā mai ʻe Sīsū Kalaisi ʻoku tau fakahā ʻetau ʻofa kiate iá ʻaki ʻetau tauhi ʻene ngaahi fekaú. ʻOku tau fai ha palōmesi ʻi he taimi ʻoku papitaiso ai kitautolú te tau talangofua ki heʻene ngaahi fekaú. Ko e taimi ʻoku tau talangofua ai ki heʻene ngaahi fekaú, ko ʻetau fakahā ia ʻoku tau ʻofa kiate iá. Hiki ʻi he lisi he palakipoé pe laʻi pepá ʻa e “Ko hono tauhi ʻo e ngaahi fekaú” pe ko haʻo tā ha mata malimali.

Fealēleaʻaki ʻi he fakatātaá

Fealēleaʻaki ʻi he fakatātaá

• Ko e hā ʻa e ngaahi fekau? (Ko e ngaahi lao ia mei he Tamai Hēvaní pea moSīsū Kalaisi ke tokoni kiate kitautolu ke tau fiefia.)

• Ko e hā nai ha niʻihi ʻo e ngaahi fekau te tau lava ʻo tauhi ke fakahāʻaki ʻetau ʻofa kia Sīsū Kalaisí?

Hanga ʻo fekau ʻa e fānaú ke nau tuʻu kotoa hake; pea ko ʻene fakahā atu pē ʻe ha tamasiʻi pe taʻahine ha fekau, te ne nofo hifo leva ia ki lalo. (Teuteu ke ke tokoniʻi ʻa e fānau he ʻikai ke nau lava ʻo ʻilo ha fekaú.)

Fakaʻaliʻali ʻa e ngaahi fakatātaá ʻi honau taimi totonu he lolotonga hono fokotuʻu atu ʻe he fānaú ʻa e ngaahi fakakaukau hangē ko e ʻalu ki he ngaahi fakatahaʻanga ʻa e Siasí, fakakaukau kia Sīsū he lolotonga hono fai ʻo e sākalamēnití, totongi vahehongofulú, lea moʻoní, lotú, lau mo ako mei he folofolá, tokoni ʻi ʻapi ki hotau ngaahi fāmilí, mo e hā fua.

ʻOku Tau Fakahā ʻEtau ʻOfa kia Sīsū Kalaisí ʻaki ʻEtau Tokangaʻi ʻa e Ngaahi Koloa ʻa e Siasí

Talanoá

Tala ange ki he fānaú te ke fie maʻu kinautolu ke nau fanongo ki ha foʻi talanoa ʻoku fekauʻaki mo hono fakahā ʻe Kimi ʻa ʻene ʻofa kia Sīsū Kalaisí:

Naʻe toki ʻosi atu ʻeni ha fuʻu matangi mālohi naʻe fou mai ʻi he feituʻu naʻe nofo ai ʻa Kimí. Naʻe nofo ofi atu pē ʻa e fāmili ʻo Kimí ki honau fale lotu foʻoú, ko ia naʻe telefoni hake ai ʻa e pīsopé ki heʻene tangataʻeikí ke ne vakaiʻi atu muʻa ʻa e fale lotú ʻi he ʻosi ʻa e matangí. Naʻe luelue fakataha atu ʻa Kimi mo ʻene tangataʻeikí, ʻo na manga holo pē he ngaahi vaʻakau naʻe fesi hifo mo puhi holo ʻe he matangí. Naʻe mafahifahi ʻa e matapā sioʻata ia ʻo e ngaahi ʻapi ʻe niʻihi, peá na fakalaka atu ʻi ha ngaahi meʻalele kuo maumau. Naʻe hohaʻa ʻa e loto ʻo Kimí na kuo maumau mo e fale lotú.

ʻI heʻena ofi atu ki he fale lotú, naʻe lava pē ke na ʻiloʻi atu kuo mafahi ʻa e matapā sioʻata ʻe taha ʻi he matangí. Pea hū ki loto ʻa e vaí fakataha mo e pelepelá, laʻi ʻakaú, vevé, mo e ʻū vaʻakau lalahi mo iiki. Naʻe fekau ʻe he tangataʻeiki ʻa Kimí ke ne talitali pē mei tuʻa kae hū ʻo vakaiʻi pe naʻe malu feʻunga pē ʻa e falé ke na hū ki loto. Taimi siʻi pē kuó ne hū mai ʻo ne tala ange ʻoku hao pē ʻa e toenga ia ʻo e falé. Naʻá na hū atu leva ki loto. ʻI he takai holo ʻa e tangataʻeikí ke vakaiʻi fakalelei ʻa e maumau kuo hokó, naʻe kamata ke ngāue ʻa Kimi ia. Naʻe ʻikai ke ne toe tatali ke toki tala ange ʻa e meʻa ke ne faí, ka naʻe kamata ke ne hiko ʻa e vevé mo e ngaahi vaʻakaú mo e laʻi ʻakau naʻe puhi mai ki loto fale lotu ʻe he matangí.

Naʻe ʻalu ʻa e tangataʻeiki ʻa Kimí ʻo ʻomi mo e toko taha pē ʻi he uōtí ke tokoni ange ʻo na tāpuni ʻa e matapā sioʻata naʻe mafahí. Lolotonga ʻa e ngāue ko ʻeni ʻa e ongo tangatá, naʻe femoʻuekina pē ʻa Kimi ia hono fakamaʻa e fale lotú. Naʻe ʻikai ke fuoloa kuo ʻosi ʻa e ʻū vakaʻakaú ʻi hono fetuku ki tuʻa. Naʻe tala ange ʻe heʻene tangataʻeikí ke na ō ʻo ʻave ia ki honau ʻapí ke mālōlō, ka naʻe loto pē ʻa Kimi ke ne tokoni ki hono fakamaʻa ʻo e fale lotú. Naʻá ne nofo ʻo tokoni ki hono fakamaʻa e pelepelá pea fufulu mo e falikí.

Talanoá

• Naʻe anga fēfē hono fakahā ʻe Kimi ʻa ʻene ʻofa kia Sīsū Kalaisí? (Naʻá ne tokoni ki hono fakamaʻa ʻo e fale lotú.)

• ʻOku mou pehē ko e hā e ongo naʻe maʻu ʻe Kimi ʻi he ʻosi ʻenau ngāué?

Fakamatalaʻi ange ʻoku lahi ʻa e ngaahi founga te tau lava ʻo tokoni ai ki hono tokangaʻi ʻo e falelotú pea mo hono ngaahi nāunaú. Te tau lava ʻo tokoni ki hono tokangaʻi ʻo hotau falelotú pea fai mo hotau lelei tahá ke tauhi ai ke maʻa mo fakaʻofoʻofa. Te tau lava ke tufi ʻa e ʻū laʻi pepa aí pea fakamāʻopoʻopo ke maau. ʻE lava ke tau tokangaʻi lelei ʻa e ʻū tohi himí pea mo e ʻū tohi tapú. ʻOku tau lava ke tokoni ʻi he taimi ʻe niʻihi ki he ngaahi ngāue-ʻofa makehé ki hono fakamaʻa ʻo e loto falelotú pe ko tuʻa. ʻOku ʻi ai pē ʻa e meʻa ʻe lava ke tokoni ai ʻa e toko taha kotoa ʻi hono tokangaʻi ʻo e ngaahi koloa ʻa e Siasí.

Tohiʻi ʻa e “Ko hono tokangaʻi ʻo e ngaahi koloa ʻa e Siasí” pe ko haʻo tā pē ha kiʻi fale lotu ʻi he palakipoé pe laʻi pepa ʻi lalo ʻi he “Te u lava ʻo fakahā ʻa ʻeku ʻofa kia Sīsū Kalaisí ʻaki—.”

ʻOku Tau Fakahā ʻEtau ʻOfa Kia Sīsū Kalaisí ʻi he Taimi ʻoku Tau ʻOfa ai ki he Niʻihi Kehé

Hiva

Kole ange ki he fānaú ke nau fakafanongo fakalelei ke nau ʻiloʻi ha foʻi fekau mahuʻinga ʻaupito.

Hivaʻi pe lau fakataha mo e fānaú ʻa e lea ʻo e “Ke Mou Feʻofaʻaki.”

Fealēleaʻakí

Fealēleaʻakí

• Ko e hā e meʻa ʻoku fakahā mai ʻe he hivá ʻoku finangalo ʻa Sīsū Kalaisi ke tau faí? (Ke tau feʻofaʻaki ʻo hangē ko ia ʻoku fai ʻe Sīsuú.)

• Ko e hā ʻa e fekau foʻoú? (Ke tau feʻofaʻaki.)

• Ko e hā hono ʻuhinga ʻo e foʻi lea ko e ākongá? (Ko ha toko taha ʻokú ne muimui pea tui kia Sīsū Kalaisi.)

• ʻE ʻilo fēfē ʻe he kakaí ʻokú ke muimui mo tui kia Sīsū Kalaisí? (Kapau te ke fakahā ʻa e ʻofa ki he niʻihi kehé mo feinga ke fai ʻa ia ʻoku totonú ʻi he meʻa kotoa pē ʻokú ke faí.)

Fakamatalaʻi ange ko Sīsū Kalaisí ko e toko taha ʻofa taha ia mo faʻa fakaʻatuʻi kuo moʻui ʻi he māmaní. Kapau ʻoku tau fie maʻu ke tau ʻofa ʻo hangē ko iá, kuo pau ke tau ʻofa lahi ki he niʻihi kehé. ʻOku moʻoni ʻa e ngaahi lea ʻo e hiva ko ʻení pea ko e toʻo pē ia mei he Tohi Tapú. Naʻe folofola ʻa Sīsū ʻo pehē, “Hangē ko ʻeku ʻofa kiate kimoutolú, … ke mou feʻofaʻaki foki kiate kimoutolu” (vakai, Sione 13:34; vakai foki, Sione 15:12, 17). ʻOku tau ʻiloʻi ʻokú ne ʻofa lahi ʻiate kitautolu. ʻOku fie maʻu ke tau ʻofa ki he kakai kehé ʻaki ʻa e ʻofa tatau pē mo ia. ʻI heʻetau ʻofa ki he kakai kehé, ʻoku tau fakahā ai kia Sīsū ʻoku tau ʻofa foki kiate ia.

Tohiʻi ʻa e “ʻOfa ki he kakai kehé,” pe ko haʻo tā ha foʻi haati ʻi he tafaʻaki ki lalo ʻo hoʻo lisí.

Fakamatala Fakanounoú

Fakamatalaʻi ange ʻoku tau fakahā ʻetau ʻofa kia Sīsū Kalaisí ʻi he taimi ʻoku tau tokoni ai ki hono tokangaʻi ʻa e koloa ʻa e Siasí, tauhi ʻa e ngaahi fekaú, pea ʻofa ki he niʻihi kehé. ʻOku tau fakahā ʻetau ʻofa kia Sīsuú ʻi he meʻa ʻoku tau faí.

ʻEkitivitií

ʻOange ke taki taha ʻa e fānaú ha peni vahevahe mo ha pepa pe laʻi kaati. Fekau ʻa e fānau ʻoku nau lava ʻo tohí ke nau tohiʻi ʻi heʻenau laʻi pepá ʻa e “Te u lava ʻo fakahā ʻeku ʻofa kia Sīsū Kalaisí ʻaki—.” Mahalo pē ʻe fie maʻu ke ke hanga ʻo tohiʻi ʻeni ʻi he ʻū laʻi pepa ʻa e fānau iiki angé. Tala ange ki he fānaú ke nau tohiʻi pe tā ha meʻa ʻe taha te nau fai ʻi he uiké ni ke fakahāʻaki ʻenau ʻofa kia Sīsū Kalaisí. Tala ange te ke fie fanongo he uike hoko maí pe naʻe fēfē ʻenau fakahoko ʻa e ngāue ko ʻení. Poupouʻi e fānaú ke nau ʻalu mo ʻenau ʻū laʻi pepá ki honau ʻapí ʻo tuku kinautolu ʻi ha feituʻu te nau lava ke mamata ki ai ʻi he lolotonga ʻo e uiké mo ne fakamanatuʻi kiate kinautolu ʻa e ngāue ke nau faí.

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī Fakatupulakí

Fili mei he ngaahi ʻekitivitī ko ʻení ʻa e ngaahi ʻekitivitī ʻe ʻaonga taha ki hoʻo kalasí. ʻE lava pē ke ke fakaʻaongaʻi kinautolu ʻi he loto lēsoní, pe ko hano fakamanatu pe fakamatala fakanounou ʻo e lēsoní. Vakai, “Taimi Kalasí” ʻi he “Ko e Ngaahi Tokoni maʻá e Faiakó” ke maʻu mei ai ha ngaahi fakahinohino kehe.

1. Haʻu mo ha kiʻi tangai piini pe ha faʻahinga meʻa molū pē ke lī mo hapo ʻe he fānaú. Fekau e fānaú ke nau nofo fakafuopotopoto ʻi he falikí. Fehuʻi ange kiate kinautolu:

   ʻOku mou ʻofa ʻia Sīsū? Te ne ʻilo fēfē?

   Fili ki he totonú pea te ne ʻilo ai pē.

   Mou lau mo e fānaú ʻa e kiʻi foʻi maau ko ʻení; ʻosi ko iá peá ke ui ha hingoa ʻo ha taha pea ke lī atu ki ai ʻa e kiʻi tangai pīní. Kuo pau leva ke tala atu ʻe he tamasiʻi pe taʻahine ko iá ha meʻa ʻe taha te ne lava ʻo fai ke fakahāʻaki kia Sīsū Kalaisi ʻokú ne ʻofa ʻiate ia. Ko ʻene ʻosi pē ʻene talí peá ne toe lī fakafoki atu ʻa e kiʻi tangai pīní kiate koe. Hokohoko pehē atu ai pē kae ʻoua kuo kau ʻa e toko taha kotoa pē.

2. Hivaʻi ʻa e foʻi hiva ko ia ko e “Kuo Pehē ʻe Sīsū ke Mou Feʻofoʻofani.” Fakamatalaʻi ki he fānaú ko ʻene ʻai pē ke nau hivaʻi ʻa e foʻi lea ko e ʻofá, pea nau fakalongolongo ka nau kuku honau nimá ʻo fakafehauaki ʻi muʻa ʻi honau fatafatá. ʻOku ʻuhinga ʻeni ki he ʻofá ʻi he talanoa fakanoá. Te tau lava pē ke fakahā ʻa e ʻofa mo e loto mahino ki hono kotoa ʻo e fānau ʻa e Tamai Hēvaní. Akoʻi e fānaú ke nau poto ʻi hono fakatātaaʻi ʻa e “ʻOku ou ʻofa ʻiate koé!” ʻi he talanoa fakanoá pea nau tuhu leva ki ha taha kehe. Fokotuʻu ange ke nau fakahā ʻeni ki he kau mēmipa ʻo e fāmilí ʻi he taimi te nau aʻu atu ai ki honau ʻapí. Fakamanatuʻi ange ki he fānaú ko e founga lelei taha ʻo hono fakahā ʻo e ʻofá ko e anga-ʻofa ʻo hangē ko Sīsuú.

3. Hivaʻi pe lau fakataha mo e fānaú ʻa e “Kuo Pehē ʻe Sīsū ke Mou Feʻofoʻofani” (Children’s Songbook, p. 61) pea fakatātaaʻi:

   Kuo pehē ʻe Sīsū, (fakamafao atu ʻa e ongo nimá ki muʻa)

   Ke mou feʻofoʻofani (tafoki ki he toko taha he tafaʻakí, malimali pea lulululu)

   Ka ke fonu he ʻofá (fakafehauaki e ongo nimá ʻi he fatafatá)

   ʻE ʻofa ʻa e kakai (fakamafao e ongo nimá ki muʻa ʻo fakafoʻohake pea toki ʻomai ia ʻo hilifaki mai ki he fatafatá).

4. Kosikosi ha fanga foʻi haati ke taki tolu pe lahi ange ʻa e fānaú. Tala ange kiate kinautolu te nau fakaʻaongaʻi ʻa e ngaahi foʻi haati ko ʻení he uiké ni ke fakahāʻaki ʻenau ʻofá. ʻOku totonu ke nau fai ha meʻa lelei maʻaha taha peá ne tuku atu ai ha foʻi haati. Ko e tokoni ki he niʻihi kehé ko ha meʻa ia ʻoku finangalo ʻa Sīsū ke tau fai. Fakahā ange kiate kinautolu ha ngaahi fakatātā pe sīpinga ʻo e ngaahi meʻa ko ia te nau lava ke faí. ʻE lelei pē kapau te mou fakatātaaʻi mo e kalasí ha niʻihi ʻo e fanga kiʻi ngāue lelei ko ʻení.

5. Kapau ʻoku ʻi ai ha ngaahi tohi himi ʻa homou uōtí ʻa ia ʻoku ʻikai ke tauhi pe ngaohi fakaleleiʻi, hanga ʻo fakaʻaliʻali kinautolu ki he fānaú pea mou aleaʻi ʻa e founga naʻe totonu ke tokangaʻi ʻaki ʻa e ngaahi tohi himi ko ʻení pea mo hono ʻuhinga naʻe totonu ke tokangaʻi fakalelei aí.