Mësimi 10 Materiali i Mësuesit

Pendimi dhe Falja

Libri i Mormonit jep këndvështrime të pashoqe mbi doktrinën e pendimit dhe faljes. Përvojat e Enosit, popullit të mbretit Beniamin dhe Alma të Riut, ilustrojnë se Shpëtimtari është burimi përfundimtar për faljen tonë dhe paqen e ndërgjegjes. Në këtë mësim, studentët do të kenë mundësinë të diskutojnë për pyetjet rreth procesit të pendimit dhe të mësojnë që t’i dallojnë më mirë rastet kur Shpëtimtari i ka falur ata. Studentët do të marrin parasysh edhe se si ata mund të vazhdojnë të pendohen dhe të bëhen më shumë si Jezu Krishti.

Sugjerime për Mësimdhënien

Alma shpjegon se si ai e mori faljen e Shpëtimtarit.

Paraqitini tri pyetjet vijuese në vende të ndryshme të klasës. Vini pak karrige në rreth pranë çdo pyetjeje. Vini në dukje se këto pyetje janë të ngjashme me pyetjet në pjesën 1 të materialit të përgatitjes.

• Çfarë do të thotë vërtet të pendohesh? Çfarë këshille do t’i jepnit dikujt që i ka kaluar hapat e pendimit, por nuk ndien ndonjë ndryshim?

• Si mund ta gjejmë forcën për të ndryshuar vërtet? Çfarë do t’i thoshit dikujt që është i shkurajuar për shkak se është përpjekur vërtet fort për të vepruar më mirë, por thjesht vazhdon të bëjë të njëjtat gabime?

• Po nëse dikush ndihet sikur është një kauzë e humbur? Si mund ta ndihmonit dikë që ndien se nuk duhet të shqetësohet për pendimin sepse mëkatet e tij/saj janë aq të këqija saqë nuk mund të falen kurrë?

Ftojini studentët të përfytyrojnë sikur janë misionarë që po përgatiten t’i përgjigjen njërit prej grupeve të pyetjeve të lartpërmendura për kërkuesit e tyre ose sikur po përgatiten për të ndihmuar një njeri të dashur që po has vështirësi të pendohet. Më pas kërkojuni studentëve të ulen në një karrige pranë pyetjeve që do të dëshironin të diskutonin. Nxitini studentët që të mbështeten te rrëfimi i përvojës së Almës dhe fragmentet e tjera nga Libri i Mormonit që mund të ndihmojnë për t’iu përgjigjur pyetjeve të tyre.

Caktoni te secili grup një udhëheqës për diskutimin dhe jepini secilit udhëheqës një kopje të udhëzimeve që gjenden në fund të këtij materiali mësimor. Jepuni grupeve kohë të mjaftueshme për të bërë diskutime kuptimplota.

Pasi t’iu lini kohë studentëve për të diskutuar, ju mund të doni të ftoni një ose më shumë vullnetarë nga secili grup që të japin përmbledhje të shkurtra mbi atë që mësuan dhe ndien grupet gjatë diskutimeve të tyre.

Enosi, populli i mbretit Beniamin dhe Alma përjetuan gëzimin e faljes.

Kërkojuni studentëve që të marrin parasysh nëse ata, ose njerëzit që njohin, e kanë pyetur ndonjëherë veten se si ta dinë nëse Shpëtimtari i ka falur ata për mëkatet e tyre. Ftojini studentët të shqyrtojnë vargjet tek Enosi 1:4–8; Mosia 4:1–3 dhe Alma 36:19–21, duke kërkuar mënyra për të ditur që ne jemi falur.

Përmirësimi i Mësimdhënies dhe i të Mësuarit Tonë

Dallojeni fuqinë e mësimdhënies së përqendruar te Krishti. Çad H. Ueb, administratori i Seminareve dhe Instituteve të Fesë, u tha mësuesve: “Mënyra e vetme më e rëndësishme me anë të së cilës ne mund të ndihmojmë për rritjen e besimit të brezit të ri, është që ta vendosim më plotësisht Jezu Krishtin në qendër të mësimdhënies dhe të mësuarit tonë duke i ndihmuar studentët tanë ta njohin Atë, të mësojnë prej Tij dhe të përpiqen me vetëdije për t’u bërë si Ai” (“Ne Flasim për Krishtin, Ne Gëzohemi në Krishtin” [fjalim i dhënë në transmetimin e trajnimit vjetor për Seminaret dhe Institutet e Fesë, 12 qershor 2018], ChurchofJesusChrist.org). Teksa përgatiteni që të jepni mësim, pyeteni veten: Si mund t’i ndihmoj studentët që ta njohin, duan dhe ndjekin më plotësisht Shpëtimtarin, nëpërmjet kësaj përvoje të të mësuarit?

• Cilat fjalë ose fraza në këto vargje ju bënë përshtypje? Përse mendoni se ato fraza jua tërhoqën vëmendjen?

• Përse është e rëndësishme që të besoni e të pranoni se Jezu Krishti është i gatshëm, i aftë dhe i etur që të na i falë mëkatet dhe të na e heqë fajin? (Merrni parasysh t’i ftoni studentët të shqyrtojnë pjesën 3 të materialit të përgatitjes.)

• Si mund ta dimë që Shpëtimtari na ka falur për mëkatet tona? (Ndihmojini studentët të përcaktojnë një parim si ai që vijon: Kur ne pendohemi me sinqeritet dhe kemi besim te Jezu Krishti, Ai na fal dhe na bekon me gëzim dhe paqe të ndërgjegjes.)

• Kur e keni përjetuar gëzimin dhe paqen e faljes nga Zoti dhe si ndikoi kjo përvojë në jetën tuaj? (Nxitini studentët të flasin rreth ndjenjave të tyre për faljen dhe jo për veçoritë e mëkateve të tyre.) Cilat janë mendimet dhe ndjenjat tuaja rreth aftësisë dhe dëshirës së Shpëtimtarit për t’ju falur?

Gjatë diskutimit tuaj, mund t’ju duket e dobishme që të tregoni thënien vijuese nga Plaku Nil L. Andersen:

“Për ata që janë vërtet të penduar, por duken jo në gjendje që të ndiejnë lehtësim: vazhdoni të zbatoni urdhërimet. Ju premtoj, lehtësimi do të vijë në kohën e duhur të Zotit. Shërimi po ashtu kërkon kohë.” (“Pendohuni … Që të Mund t’Ju Shëroj”, Liahona, nëntor 2009, f. 42)

Shënim: Për studentët që mund të ndihen të shkurajuar rreth procesit të pendimit ngaqë përpjekjet e tyre nuk kanë sjellë ende lehtësim si rezultat, shprehni fjalë inkurajimi dhe ftojini ata të vazhdojnë t’i drejtohen Zotit dhe ndoshta t’ua tregojnë shqetësimet e tyre të posaçme peshkopit të tyre.

Jepuni kohë studentëve që t’i bëjnë një vlerësim jetës së tyre dhe të përcaktojnë çfarëdo gjëje për të cilën kanë nevojë të pendohen. Ftojini studentët të shënojnë çfarëdo mbrese që marrin.

Jepni dëshminë tuaj për doktrinën e pendimit dhe faljes. Merrni parasysh t’i ftoni studentët që të japin dëshmitë e tyre gjithashtu.

Për Herën Tjetër

Pyetini studentët se si besëlidhja e tyre e pagëzimit dhe besëlidhje të tjera e kanë bekuar jetën e tyre. Ftojini ata, ndërsa e studiojnë materialin e përgatitjes për orën tjetër mësimore, që të mendojnë rreth shtegut të tyre të besëlidhjeve dhe se si nderimi i besëlidhjeve i lidh ata me Shpëtimtarin dhe fuqinë e Tij.

Diskutime në Grupe të Vogla mbi Pendimin

Mësimet dhe Doktrina e Librit të Mormonit – Materiali i Mësuesit – Mësimi 10

Shënim drejtuar udhëheqësit të diskutimit: Ju lutemi, përdorini këto udhëzime që të ndërmjetësoni një diskutim me anëtarët e grupit tuaj. Nxitini të gjithë anëtarët e grupit tuaj që të marrin pjesë. Megjithatë, mos ngulmoni; askush nuk duhet të ndihet nën trysni për t’u shprehur.

Ftojini anëtarët e grupit që të marrin disa minuta për të shqyrtuar pjesën 1 të materialit të përgatitjes dhe fragmentet e shkrimeve të shenjta të lidhura me të (shih Mosia 27:35; Alma 36:12–13, 17–21, 24). Vërini studentët të kërkojnë parime që gjejnë zbatim për pyetjen e grupit tuaj. Ftoni gjithashtu anëtarë të grupit që të jenë të përgatitur të tregojnë çfarëdo fragmenti shtesë të shkrimit të shenjtë që mund të kenë gjetur, ndërsa u përgatitën për këtë orë mësimore.

Vendosni së bashku se cila nga pyetjet vijuese do të jetë më e rëndësishmja që ta diskutojë grupi juaj. Për t’i kuptuar këto ide më në thelb, mund të jetë më mirë që të diskutoni më thellësisht për një ose dy pyetje sesa të përpiqeni t’i trajtoni të gjitha pyetjet në mënyrë sipërfaqësore.

• Çfarë parimesh që ne mund të mësojmë nga përvoja e Almës, lidhen me pyetjen tonë? Në çfarë mënyrash jeni bekuar duke i ndjekur këto parime?

• Çfarë fragmentesh të tjera të shkrimeve ose mësimeve nga Libri i Mormonit mund të ndihmojnë në dhënien e përgjigjes së kësaj pyetjeje? Si ju kanë ndihmuar të vërtetat e dhëna mësim në këto fragmente, që ta përjetoni fuqinë e pendimit?

• Çfarë roli luan Jezu Krishti në pendimin tonë? Si ndiheni rreth gatishmërisë së Shpëtimtarit për t’jua falur mëkatet tuaja?

• Si lidhet me pyetjen tonë urdhërimi që t’i japim Shpëtimtarit “një zemër të thyer dhe një shpirt të penduar” (3 Nefi 9:20)? (Nëse e diskutoni këtë pyetje të pikës së fundit, mund t’ju duket e dobishme që të shqyrtoni vargjet te 3 Nefi 9:19–20 dhe thënien nga Plaku Brus D. Porter, te pjesa 2 e materialit të përgatitjes.)

© 2021 by Intellectual Reserve, Inc. All rights reserved.

Small-Group Discussion on Repentance