Lesson 19 Materyal sa Paghahanda para sa Klase

Pamumuhay nang Matwid sa Panahon ng Kasamaan

Itinuro ni Pangulong Ezra Taft Benson na ang Aklat ni Mormon ay “nagpapatatag sa mga mapagpakumbabang tagasunod ni Cristo laban sa masasamang plano, estratehiya, at doktrina ng diyablo sa ating panahon” (“The Book of Mormon Is the Word of God,” Ensign, Ene. 1988, 3). Sa unit na ito, magkakaroon ka ng pagkakataong malaman kung paano inilalantad ng Aklat ni Mormon ang mga panganib na ito upang mas maprotektahan mo ang iyong sarili. Habang pinag-aaralan mo ang lesson na ito, maghanap ng mga alituntunin na makatutulong sa iyo na mamuhay nang matwid sa panahon ng kasamaan.

Bahagi 1

Paano ako mananatiling tapat sa Panginoon kapag nakararanas ako ng pang-uusig dahil ipinamumuhay ko ang ebanghelyo?

Nang si Helaman, na anak ni Helaman, ay manungkulan sa hukumang-luklukan, nagkaroon ng panahon ng kapayapaan ang mga Nephita, at libu-libong tao ang sumapi sa Simbahan. Bagama’t umunlad ang Simbahan, ang ilang miyembro ay naging palalo at sinimulan nilang usigin ang mga mapagpakumbabang tagasunod ni Jesucristo. (Tingnan sa Helaman 3:20–34.)

Mag-aral upang Makapaghanda para sa Klase

Basahin ang Helaman 3:33–35, at alamin kung paano tumugon ang mga mapagpakumbabang tagasunod ni Cristo sa pang-uusig mula sa iba pang miyembro ng Simbahan.

Magnilay-nilay upang Makapaghanda para sa Klase

Mag-isip ng isang pagkakataon kung saan nakaranas o nakasaksi ka ng nakasasakit na gawain o hindi magagandang pananalita mula sa isang miyembro ng Simbahan. Paano ka tumugon? Ano ang maaari mong matutuhan mula sa mga mapagpakumbabang Banal na ito tungkol sa kung paano haharapin ang mga gayong uri ng pang-uusig?

Bahagi 2

Paano ako magiging matwid gayong napaliligiran ako ng kasamaan?

Nakaranas ang propetang si Mormon at ang kanyang anak na si Moroni ng panahon kung saan laganap ang kasamaan. Dahil sa kasalanan at kawalang-paniniwala, tumigil ang mga himala at ang Espiritu Santo ay hindi na kasama ng mga tao. Ang kapangyarihan ni Satanas ay nanaig sa lahat ng dako ng lupain. (Tingnan sa Mormon 1:13–19.) Sa isang liham sa kanyang anak na si Moroni, inilarawan ni Mormon ang kalagayan ng mga tao at sinabi niyang sa sobrang sama nila, sila ay “walang kabihasnan” (Moroni 9:11). Ang karahasan, digmaan, at pagkatay ay lumaganap sa lupain habang patuloy na naglalaban ang mga Lamanita at mga Nephita. Sa huli, nanaig ang mga Lamanita, at nasaksihan nina Mormon at Moroni ang ganap na pagkalipol ng mga Nephita (tingnan sa Mormon 2–6; 8:1–3, 7).

Mag-aral upang Makapaghanda para sa Klase

Basahin ang Mormon 1:1–2, 15 at Moroni 9:25–26, at alamin ang ilang dahilan kung bakit nagawa nina Mormon at Moroni na manatiling tapat bagama’t napaliligiran sila ng kasamaan.

Sa pagsasalita tungkol sa kapangyarihan ng pagtutuon sa Tagapagligtas sa mundong puno ng kasalanan, itinuro ni President Joy D. Jones, Primary General President:

Kung ang hatak ng mundo ay mas malakas kaysa sa pananampalataya at tiwala natin sa Tagapagligtas, mananaig ang hatak ng mundo sa tuwina. …

… Bagama’t madalas ay mas madaling walang gawin sa espirituwal kaysa sikaping alalahanin at yakapin ang ating banal na pagkatao, hindi natin kakayaning magpalayaw nang gayon sa mga huling araw na ito. Tayo nawa, … ay “maging matapat kay Cristo; … nawa ay dakilain [tayo] ni Cristo, at nawa ang kanyang pagdurusa at kamatayan, … at ang kanyang awa at mahabang pagtitiis, at ang pag-asa ng kanyang kaluwalhatian at ng buhay na walang hanggan, ay mamalagi sa [ating] isipan magpakailanman” [Moroni 9:25]. Habang inaangat tayo ng Tagapagligtas sa mas mataas na lugar, mas malinaw nating makikita hindi lamang kung sino tayo kundi na tayo ay mas malapit sa Kanya kaysa inakala natin. (“Halagang Hindi Masusukat,” Liahona, Nob. 2017, 15)

Ibinigay ni Elder Neil L. Andersen ng Korum ng Labindalawang Apostol ang sumusunod na patotoo kung paano tutulungan ng Panginoon ang matatapat na harapin ang mundong puno ng kasamaan:

Ang mga sitwasyong nararanasan natin ay nakita na ng Panginoon, at naglaan Siya para sa ating espirituwal na kaligtasan. … Habang tumitindi ang kasamaan sa mundo, may katumbas na kapangyarihan ng paghahayag at mga espirituwal na kaloob na ibinibigay sa mabubuti. Binibigyan tayo ng Panginoon ng karagdagang lakas kapag handa tayong manatiling matwid sa mundong puno ng kasamaan. (“A Classroom of Faith, Hope, and Charity” [gabi kasama ang isang General Authority, Peb. 28, 2014], ChurchofJesusChrist.org)

Isulat ang Iyong mga Naisip

Tumukoy ng isang tao o grupo ng mga tao sa Aklat ni Mormon na, tulad nina Mormon o Moroni, naharap sa kasamaan ngunit nanatiling tapat sa Panginoon. Habang iniisip mo ang halimbawang ito, maghanap ng isang scripture passage na makapagbibigay ng karagdagang kaalaman tungkol sa tao (o grupo ng mga tao) na ito. Pagkatapos ay isulat ang iyong mga naisip tungkol sa mga sumusunod na tanong:

• Paano mo ilalarawan ang kasamaang kinaharap ng tao (o grupo ng mga tao) na ito?

• Ano ang ginawa ng tao (o grupo ng mga tao) na ito na maaari mong gawin upang manatiling tapat sa Panginoon habang hinaharap mo ang kasamaan at mga tukso ng mundo?

Dumating sa klase na handang ibahagi ang iyong halimbawa. Maaari ka ring maghanda na ibahagi ang halimbawa ng isang taong personal mong kakilala na naharap sa kasamaan ngunit nanatiling tapat sa Panginoon.

Gusto Mo Bang Matuto Pa? (Opsiyonal)

Sa anong mga paraan ako maaaring mapagpala kapag ipinasakop ko ang aking puso sa Diyos?

Basahin ang mga buod ng kabanata para sa Helaman 7–9. Pagkatapos ay basahin ang Helaman 10:1–5, at alamin kung paano napagpala si Nephi, na anak ni Helaman, dahil sa pagiging masunurin sa kalooban ng Panginoon.

Sa kanyang mensaheng “Pagpapasakop ng Ating Puso sa Diyos” (Liahona, Nob. 2015, 30–32), itinuro ni Sister Neill F. Marriott, dating tagapayo sa Young Women General Presidency, kung paano natin mapalalakas ang ating kapangyarihan na mamuhay nang matwid kapag ipinasakop natin ang ating puso sa Diyos (tingnan din sa Helaman 3:35).

Bakit mahalagang magkaroon ng lakas ng loob kapag nahaharap sa mga sitwasyong hindi naaayon sa mga turo ni Jesucristo?

Sa kanyang mensaheng “Nang sa Tuwina ay Mapasaatin ang Kanyang Espiritu” (Liahona, Mayo 2006, 28–31), nagbabala si Elder David A. Bednar ng Korum ng Labindalawang Apostol tungkol sa mga bagay na makapaghihiwalay sa atin sa Banal na Espiritu.

Saan ko malalaman ang iba pa tungkol sa kung paano magkaroon ng masayang buhay sa mundong puno ng kasamaan?

Sa kanyang mensaheng “Paano Mamuhay nang Maayos sa Gitna ng Tumitinding Kasamaan” (Liahona, Mayo 2004, 100–102), tinalakay ni Elder Richard G. Scott ng Korum ng Labindalawang Apostol kung paanong ang pagtutuon kay Jesucristo ay nagtutulot sa Tagapagligtas na bigyan ka ng “[masagana at makabuluhang buhay] anuman ang mangyari sa [iyong] paligid” (101).