1 Eri met Alma kilangehr me en Amulek koasoi kan katokehdier Sihesrom, pwe e kilang me Amulek kalowedier ih nan eh likamw oh widing pwe en kauwehla ih, oh ni ahnsou me e kilang me e masepwehkada ni eh wehwehkidahr dipe kan, e ahpw tepida lokaiaiong ih, oh kalipwelipwe mahsen en Amulek kan, oh ekis kawehwehda laud soahng kei, de kawehwe iren pwuhk sarawi kan ni oaretik sang dahme Amulek wiahier.

2 Eri met aramas koaros me kapilpene wasao rong en Alma eh koasoi kan ong Sihesrom; pwe pokono me tohto mehlel, oh iet duwen eh koasoi:

3 Eri met Sihesrom, ke kilang omw dierekdahr nan ahmw likamw oh widing kan, pwe kaidehn ke wiahda likamw ongete aramas pwukat ahpw ke pil likamw ong Koht; pwe kilang, e ketin mwahngih omw madamadau kan, oh ke kilang me sapwellime Ngehno ketin kasalehiong kiht omw madamadau kan;

4 Oh ke kilang me se ese me omw koasoandi iei koasoandi en widing, duwehte widing en tepilo, pwe e kin likamw oh e kin pitih aramas pwukat pwe en kak wiahda re en uhwong kiht, lahlahwe kiht oh kasareikitala—

5 Met iei koasoandi en omw imwintihtio, oh e doahdoahngkier eh manaman rehmw. Met I men ke en tamataman me dahme I pahn ndaionguhk I ndaiong koaruhsie.

6 Oh kilang I ndaiong kumwail koaros me met mwekid en nsar en me suwedo, me e koasoanehdi pwe en lidipiheki aramas pwukat, pwe en kak kaloweikumwaildi pahn eh manaman, pwe en kak kapilkinkumwailpene nah selmete kan, pwe en kak salihkumwaildi kohlahng mehla soutuk, nin duwen eh manaman en kaliduwihla aramas.

7 Eri met, ni en Alma koasoiahier mahsen pwukat, Sihesrom tepida rerrer kowalahpie, pwe e tepier kamehlelehda manaman en Koht; oh e pil kamehlelehda me Alma oh Amulek ese duwen ih, pwe e kamehlelehda me ira wehwehki eh madamadau kan oh ineng kan en nan eh mohngiong; pwe manaman kohieng ira pwe re en kak ese duwen mepwukat nin duwen ngehn en kokohp.

8 Oh Sihesrom ahpw peki rehra ni ngidingid, pwe en kak esehla laud duwen wehin Koht. Ahpw idek rehn Alma: Ia wehwehn met me Amulek koasoia duwen iasadahn me mehla, me koaros pahn iasadahsang mehla, koaros me mwahu oh sohte mwahu, oh kesihnenda mwohn Koht pwe en ale kadeikpen arail doadoahng kan?

9 Oh met Alma tepida kawehwehiong ih mepwukat, koaskoasoia: E kin kohieng me tohto re en ese soahng rir kan en Koht; ahpw re kin mih pahn kehkehlik kehlail me re sohte pahn kasalehda ihte sang nin duwen sapwellime mahsen me e pahn ketin mweidohng aramas akan, sang ni ar pahn rongorong oh loalopwoatohng ih.

10 Eri, mehmen me pahn mohngiong keptakai, e pahn alehdi pali tikitik en mahseno; oh mehmen me sohte pahn mohngiong keptakai, ong ih e pahn alehdi pali laud en mahseno, lao e pahn mweimweiong ih en esehla me rir kan en Koht lao e esehla koaros ni unsek.

11 Oh irail akan me pahn kakeptakaila mohngiongirail akan, re pahn ale pali tikitik en mahseno lao irail sohte ese duwen sapwellime me rir kan; oh tepilo pahn kaloweiraildi oh kaluwahkinirail nsene kohdilahng mehla. Met iei wehwehn selmetehn ehl.

12 Oh Amulek koasoiahda ni sansal duwen mehla, oh iasada sang nan mour wet kohlahng mour poatapoat, oh wisikdo mwohn mwoalen Koht, pwe en pakadeida nin duwen atail wiewia kan.

13 Eri ma mohngiongitail kan pahn keptakai, ei, ma kitail pahn kakeptakaila mohngiongitail kan ong mahseno, eri e pahn sohla mih loaletail, atail mour pahn sakanakanla, pwe kitail pahn lekdekla.

14 Pwe atail koasoi kan me pahn kedipei kitail, ei, atail wiewia kan koaros pahn kedipei kitail; kitail sohte pahn dierek mwakelekel; oh pil atail madmadau kan pahn kedipei kitail; oh nan mour sakanakano kitail pahn sohte men kilangdahng atail Koht; oh kitail pahn men ma kitail kak, ruwese takai kan oh nahna kan en pwupwudiong pohtail oh karukih kitail sang mwohn silangi.

15 Ahpw met sohte kak; kitail anahne kohdo oh kesihnenda mwohn silangin sapwellime lingan, oh sapwellime manaman, oh sapwellime roson, wahu, oh mweimwei en kaun, oh pohnese atail saroh poatoapoat me sapwellime kopwung koaros pwung; me e pwung nan sapwellime doadoahk koaros, oh me sapwellime kalahngan ong aramas koaros, oh me e ketin sapwellimaniki manaman en kamourala aramas koaros me kamehlele mware oh wiahier soang kan me kesempwal ong koluhla.

16 Oh met kilang, I ndaiong kumwail eri mehla ahpw pahn wiawi, iei mehla keriau, me iei mehlahn palingehn; eri ahnsouo ahpw pahn lel me irail akan me mehla nan dihperail kan, ni mehlahn paliwar, pahn pil mehkihla mehlahn palingehn; ei, e pahn mehla nin duwen soahng kan me pid mour pwung.

17 Eri ahnsouo irail me arail lokolok pahn duwehte lehn kisiniei oh suwepel, me kin sekehkun wie lulul kohkohlahte; oh iei ansouo me re pahn pirapirdkihdi sel mete nan mehla soutuk, nin duwen manaman oh kalidu en Sehdan, pwehki e koliraildier nin duwen nsene.

18 Eri, met I ndaiong kumwail, ong irail e pahn duwehte me poadoandoarla sohte wiawihong irail; pwe re sohte kak komourla nin duwen spawellimen Koht pwuhng; oh re sohte kak mehla, pwehki re solahr kak mwerpeseng.

19 Eri kedekedeo mwurin en Alma eh mahsenier mepwukat, aramas ako tepida pwuripwuriamweila;

20 Ahpw mie emen me adaniki Andaiona, me keieu lapalap rehrail, kohdo oh ndaiong ih: Dahkot met me ke nda, me aramas pahn iasada sang mehla oh soangen mour en ahnsou wet pahn kieweklahng mour poatopoat, me ngehno sohla pahn kak mehla?

21 Ia wehwehn pwuhk sarawio, me mahsanih me Koht ketkiong serepim oh kedilahs lulul ni palimese en mwetuwel en Ihden, pwe tepin atail pahpa oh nohno ko de pedilong oh tungoale wahn tuhkehn komouro, oh momour kohkohlahte? Oh nan eh sansalehr me ira sohte kak en momour kohkohlahte.

22 Alma ahpw sapengki: Ih met me I pahn apwtehn kawehwehda. Met kitail kilang me Adam pwupwudi pwehki eh tungoalehda wahn tuhke me sohte mweimweio, nin duwen mahsen en Koht; oh met kitail kilang, me sang ni eh pwupwula, aramas koaros wiahla aramas salongala oh pwupwulahkei.

23 Oh met kilang, I ndaiong kumwail me ma Adam kak en tungoale wahn tuhkehn komouro nan ahnsouo, e sohte pahn mie mehla, oh mahseno pahn sohla katepe, e pahn kahrehkihong Koht eh likamw, ni eh mahsaniher: Ma kumwa pahn tungoalehda kumwa uhdahn pahn mehla.

24 Oh kitail kilang me mehla kohiengehr aramas koaros, ei, mehla me Amulek koasoiadahr, me iei mehlahn mour wet; ahpw met mie ahnsou mweimweidahr ong aramas pwe re en kak koluhla; eri mour wet wialahr ahnsou en kaukaunop; ahnsou en kaunopada en tuhwong Koht; ahnsou en kounopadahng mour sohte imwio me se koasoiadahr; me iei mwurin iasadahn me mehlahr akan.

25 Met, ma e sohte pahn mie koasoandi en poadoandoaralao, me wiawihda sang ni tepin sampah eh wiawihda, e sohte pahn mie iasadahn me mehla; ahpw mie koasoandi en poadoandoarala wiawihda, me pahn kahrehda iasadahn me mehla, me se koasoiadahr.

26 Oh met kilang, ma tepin atail nohno oh pahpa kak kohla oh tungoalehda wahn tuhkehn komouro ira pahn pahtou kohkohlahte, ni ara sohte pahn ahneki ahnsou en kounopada; oh koasoandi en poadoandoaralao pahn sohte pweida, oh mahsen en Koht pahn sohla katepe.

27 Ahpw kilang, kaidehn ih mwomweo mwo; ahpw e koasoandi me aramas akan uhdahn pahn mehla; oh mwurin ar mehla, re pahn ale kadeik, iei kadeikohte me se koasoiadahr, me iei me pahn ni imwilao.

28 Oh mwurin Koht eh ketin koasoanehdi me mepwukat pahn kohieng aramas, kilang, eri e ketin mwahngih me e pahn konehng aramas en ese duwen soahng kan me e ketin koasonehdi ong irail;

29 Eri e ketin kadaralahng irail tohnleng kan pwe re en mahseniong irail, me kahrehda aramas akan kilangada sapwellime lingan.

30 Oh irail tepida sang ahnsouo kohla, kapakap ong ni mware; eri Koht ketin mahseniong aramas akan, oh ketin kasalehiong irail koasoandi en poadoandoaralao, me kaunopadahr sang ni tepin sampah eh wiawihda; oh met e kin ketin kasalehiong irail nin duwen arail pwoson oh koluhla oh arail doadoahk sarawi kan.

31 Eri, e ketikihong aramas akan kosonned akan, pwehki arail kauwehla tepin kosonned akan nin duwen soahng kan me kin mie ahnsou kis, oh re duwehla koht kei, duwen ar esehla me mwahu sang me suwed, kihong pein irail nan irair en pein mwekid, de mihla nan mour en kak pein mwekid sang ni pein nsenerail oh pein arail ineng kan, ong ma wia me suwed de wia me mwahu—

32 Eri Koht ketikihong irail kosonned akan mwurin eh ketin kasalehiong irail koasoandi en poadoandoaralao, me re sohte pahn wia me suwed, a kalokepe iei mehla keriauo, me iei mehla poatoapoat nin duwen soahng kan me doke mour pwung; pwe ong soahng wet koasoandi en poadoandoarlao sohte ahneki manaman powe, pwe doadoahk en pwuhng sohte kak en ohla, nin duwen sapwellimen Koht kupwur kadek.

33 Ahpw Koht ketin mahsanih ong aramas akan, ni mwaren Sapwellime Iehroso, (met iei koasoandi en poadoandoarala me wiawidahro) ketihtihki: Ma kumwail pahn koluhla, oh sohte ahneki mohngiong keptakai, eri I pahn mahkehng kumwail, sang rehn nei Iehroso;

34 Eri, mehmen me pahn koluhla, oh sohte ahneki mohngiong keptakai, e pahn alehdi mahk sang rehn nei Iehroso, ong kamwakelpen dipeh kan; oh irail me pahn pidelong wasahn ei kommoal.

35 Oh mehmen me pahn keptakaila eh mohngiong oh wiewia me suwed, kilang, I kahukihla nan ei lingeringer me e sohte pahn pedilong nan wasahn ei kommoal.

36 Oh met, riei ko, kilang I ndaiong kumwail, ma kumwail pahn kakeptakaila mohngiongimwail kan kumwail sohte pahn kak pedilong nan sapwellimen Kauno wasahn kommoal; eri amwail wiewia suwed kan pahn kahrehda eh pahn ketin kadaredo sapwellime engieng pohmwail duwehte ni tepin sapeiko, ei, nin duwen sapwellime mahsen ni imwiseklahn sapeiko, ei, duwehte ni tapio, ong kamwomwomwla poatopoat en amwail mour; eri, nin duwen sapwellime mahsen, ong mehla me pahn kaimwiseko, oh pil me pahn tapi.

37 Oh met, riei ko, pwehki atail ese mepwukat, oh eh mehlel, kitail koluhla, oh dehr kakeptakaila mohngiongitail kan, pwe kitail en dehr kahreda Kauno atail Koht en kadaredo sapwellime engieng pohtail nan sapwellime kosonned keriau akan me ketikiheng kitailehr; ahpw kitail pedilong nan sapwellimen Koht wasahn kommoal, me kaunopadahr nin duwen sapwellime mahsen.