1 Kilang, kedekedeo nanmwarki en Mehn Leimen kan kadarpeseng kalohk ehu rehn sapwellime aramas akan koaros, me irail sohte pahn koledi Amon, de Aron, de Omner, de Himnai, de emen riarail akan me pahn kohwei kalokalohngki mahsen en Koht, nan wasa koaros me re pahn kohla ie nan sapwarail kan.

2 Ei, e kadarohng irail kalohk wet, pwe irail en dehr koliraildi oh salihiraildi, de keseirailong nan imweteng; de pil kandipi irail, de pohr irail, de kausirail sang nan arail sinakoke kan, de kaloke irail, de kostakai irail, ahpw me irail en mweidohng irail nan imwarail akan, oh pil nan arail tehnpas sarawi kan, oh ihmw sarawi kan.

3 A met pwe irail en kak kohwei oh kalohki mahseno nin duwen nsenarail kan, pwe nanmwarkio wiliakapwalahr ong Kauno, oh tohn tehnpese koaros; eri e kadarpeseng sapwellime kalohko nan sahpwo ong sapwellime aramas akan, pwe en dehr kapweiekdi mahsen en Koht, ahpw en kak kohwei nan sahpwo pwon, pwe sapwellime aramas kan en kak esehda duwen tiahk suwed kan en arail pahpa kahlap ako, oh pwe re en kak esehda me irail koaros pirien, oh pwe re en dehr kam aramas, de kulih aramas, de pirap, de kamwahl, de wia soahngen wiewia suwed kan.

4 Kedekedeo ahnsou me nanmwarkio kadaralahr kalohk wet, Aron oh rie kan kohlahng ehu kahnihmw uhd kohlahng ehu kahnihmw, oh sang nan ehu wasahn kaudok kohla nan ehu, kauwada mwomwohdiso kan, oh kaskasarawihla samworo kan oh sounpadahk kan nan sahpwo rehn Mehn Leimen kan, pwe re en kalohk oh padahngki mahsen en Koht rehn aramas akan; oh met kahredahr arail tepida pweida mehlel.

5 Oh aramas kid kei esehla duwen Kauno, ei, aramas kid kei kamehlelehda tiahk kan en Mehn Nihpai kan; oh irail esehda duwen poadopoad kan oh kokohp akan me kadakadaur kohdo lel ansou wet.

6 Eri, nin duwen Kauno e ketin ieias, oh nin duwen tohtohn irail me kamehlelehda, de tohto me wehwehkihda me mehlelo, sang ni en Amon oh rie kan ar padahk, nin duwen ngehn en kaudiahl oh kokohp, oh sapwellimen Koht manaman wiwiahda doadoahk kapwuriamwei kan rehrail—ei, I ndaiong kumwail, nin duwen Kauno e ketin ieias, tohto mehn Leimen kan kamehlelehda arail padahk kan, oh wiliakapwalahng Kauno, sohla pwurehng pwupwula.

7 Pwe irail wiahla aramas pwung kei; irail pwilikihdi neirail dipwisoun mahwen en arail kahngohdi, kahrehda irail sohla pwurehng pelianda Koht, de pil uhwong riarail akan.

8 A iet irail akan me wiliakapwala ong Kauno:

9 Mehn Leimen kan me mih nan sahpw en Ismael;

10 Oh pil Mehn Leimen kan me mih nan sahpw en Midonai;

11 Oh pil Mehn Leimen kan me mih nan kahnimw en Nihpai;

12 Oh pil Mehn Leimen kan me mih nan sahpw en Sailom, oh me mih nan sahpw en Semlon, oh pil nan kahnimw en Lemuel, oh nan kahnihmw en Simnilom.

13 A iet eden kahnimw kan en Mehn Leimen kan me weliakapwala ong Kauno; oh ih irail pwukat me pwilikihdi neirail dipwisou en mahwin en arail kahngohdi, ei, neirail dipwisou en mahwen kan koaros; oh irail koaros Mehn Leimen kei.

14 Eri, Mehn Amelek kan sohte wiliakapwala, ihte mehmen; de pil irail Mehn Amulon kan; ahpw arail mohgniong kan keptakaila, oh pil mohngiong en Mehn Leimen kan me mih nan sahpw teikan wasa re kin kousoan, ie, oh nan arail kousapw kan oh arail kahnimw kan.

15 Eri, se kasaledahr eden kahnihmw kan en Mehn Leimen kan me irail koluhla oh marainkihda mehlelo, oh wiliakapwala.

16 Oh met kedekedeo nanmwarkio oh irail akan me wiliakapwala mwahuki me irail en wiahda ehu adarail, pwe irail en kak sansal me re tohrohrsang riarail kan; eri nanmwarkio ahpw wiekupwur rehn Aron oh neirail samworo tohto kan, pid duwen adarail me irail konehng kadahnekihla, pwe irail en kak sansal me re tohrohrsang irail.

17 Kedekedeo irail kahdanikin irail Andai-Nihpai-Lihai; oh irail kin adaniki ahd wet oh solahr kahdaniki Mehn Leimen kan.

18 Oh irail tepida wia aramas koahiek en doadoahk; ei, irail kin kadek ong Mehn Nihpai kan; eri, irail tapiada wehwehiong irail, oh sapwellimen Koht keriao sohla mih pohrail.