1 Kedekedeo Mehn Amelek kan oh Mehn Amulon kan oh Mehn Leimen kan me mihmi nan sahpw en Amulon, oh pil nan sahpw en Ihlem, oh me mihmi nan sahpw en Serusalem, oh ni oaralap, koaros me kapilpene sahpwo pwon, me saikinte wiliakapwala oh alehda ahd en Adai-Nihpai-Lihai, ahpw lingeringerida pahn riarail akan pwehki Mehn Amelek kan oh Mehn Amulon kan me kamwakidada irail en lingeringer.

2 Oh arail kailokong irail doarala kowahlap, lao irail tepida pelianda arail nanmwarkio, lao irail sohla men en wia arail nanmwarki; eri, irail ale neirail dipwisou en mahwen pwe re en peiong aramas en Andai-Nihpai-Lihai.

3 A met nanmwarkio ketkihong manaman en kaunda wehio sapwellime pwutak, oh kihong ede Andai-Nihpai-Lihai.

4 Oh nanmwarkio pwoula nan pahrohte me Mehn Leimen kan tepida kaunop ong mahweniong aramas en Koht.

5 A ni ahnsou me Amon oh rie kan oh irail koaros me iang ih kohdahdo kilangadahr en Mehn Leimen kan ar kaukaunopong kamwomwala riarail akan, irail kohdo nan sahpw en Midian, Amon ahpw tuhwongidi rie kan wasao; oh sang mwo irail kohlahng sahpw en Ismael pwe irail en kak wielamalam rehn Lemonai oh pil rieo Andai-Nihpai-Lihai, dahme irail pahn wia pwe irail en doarehsang Mehn Leimen kan.

6 A met sohte emen irail nan pwungen aramas akan koaros me weliakapwala ong Kauno me men ale neirail dipwisou en mahwen oh peiong riarail akan; soh, irail sohte mwahn wia kaunop ong mahwen; ei, oh pil arail nanmwarkio mahsanihong irail me irail sohte pahn wia.

7 Eri, iet mahsen akan me e ketin mahsenihong aramas akan nin duwen irair wet: I kapingkihong ei Koht, nei aramas kesempwal akan, me sang ni sapwellimen atail Koht kalahngan me e ketin kadarikihdo riatail pwukat, Mehn Nihpai kan, pwe re en padahk ong kitail, oh en kamehlelehiong kitail tiahk en atail pahpa kahlap suwed ko.

8 Oh kilang, I kapingkalahngankihong ei Koht lapalap pwehki e ketikihdo ekis sapwellime Ngehno pwe en kameleileidi atail mohngiong kan, pwe kitail en kak tepida wehwehiong riatail, Mehn Nihpai kan.

9 Oh kilang, I pil kapingkalahngankihong ei Koht, me sang ni wehwehpene wet dipatail akan, oh pil kam aramas tohto me kitail wiahier sansaldahr.

10 Oh I pil kapingkalahngankihong ei Koht, iei, ei Koht lapalap, pwehki e ketin mweidong kitail en kak koluhkihla mepwukat, oh pil ketin kupwurelahr dipatail tohto kan oh kam aramas akan me kitail wiahier, oh ketikihsang lokolok en dihp nanmohngiongitail kan, sang ni kapai kan me kohsang wiewia pwung kan en Sapwellimeo.

11 Eri met kilang, rieiko, pwehki ih, mehkoaros me kitail kak wia (ni atail wia aramas keieu salongala) en koluhkihla dipatail kan koaros oh kam aramas tohto me kitail wiahier, oh patowanong Koht en ketin ketikihsang irailehr nan atail mohngiong kan, pwe iei ih mepwukat koaros me kitail kak wia pwe en kak itarohng koluhla mwohn silangin Koht pwe en kak ketikihsang mwahi en dipatail akan—

12 Eri met, riei kesempwal akan, pwehki Koht eh ketikihsangehr atail mwahi en dipatail kan, oh neitail kedlahs kan mwakelekeldahr, eri ieremen kitail pwurehng kasaminehkihla neitail kedlahs kan ntahn riatail akan.

13 Kilang, I ndaiong kumwail, Soh, kitail koledi neitail kedlahs kan pwe en sohte saminkihla ntahn riatail kan; pwe kilang, ma kitail pahn pwurehng kasaminehla neitail kedlahs kan re pahn sohla kak pwurehng kamwakelda sang ni ntahn Sapwellimen Koht lapalapo, me pahn kapwilpwilkihdi tomwpen dihp kan.

14 Oh Koht lapalap ketikihong kitailehr sapwellime kalahngan, oh ketin kasalehiong kitail mepwukat pwe kitail en dehr mehla; ei, oh e ketin kasalehiong kitail mepwukat mwowe, pwehki e sapwellimaniki limpoak ong kitail oh pil limpoak ong neitail seri kan; eri, nin duwen sapwellime kalahngan e ketin kadaredohng kitail sapwellime tohnleng kan, pwe koasoandi en komouro en kak sansal ong kitail on pil ong dih en mwuhr akan.

15 Eri, ia uwen kalahngan en atail Koht! Oh met kilang, pwehki ih uwen met me kitail kak wia pwe atail mwahi en dihp kan en kohsang kitail, oh neitail kedlahs kan mwakelekeldahr, kitail ekihla pwe en kak wie mwakmwakelekelte, pwe en wia mehn kadehdeh ong atail Koht ni imwin rahno, de ni rahno me kitail pahn patowanda mwowe pwe en ale kadeik, me kitail sohte kasaminehkihla neitail kedlahs kan ntahn riatail kan pwehki sang ni e ketikidohr sapwellime mahseno rehtail oh kamwakelehkin kitaildahr.

16 A met, riei kan, ma riatail kan pahn kohdohng kemeikitailla, kilang, kitail pahn ekihla neitail kedlahs kan, iei, kitail pahn sarepedi wasa loal nan pwehl, pwe re en kak wie mwakmwakelekelte, oh wia kadehdehpen atail sohte pwurehng doadoahngki, ni imwin rahno; oh ma riatail kan kemeikitailla, kilang, kitail pahn pwurala rehn atail Koht oh pahn komourla.

17 Eri met kedekedeo ahnsou me nanmwarkio kaimwisekalahr mahsen pwukat, oh aramas akan koaros pokonpenehier, irail ale neirail kedlahs kan, oh dipwisou en mahwen koaros me re kin doadoahngkihong kam aramas, oh irail sarepidi wasa loal nan pwehl.

18 A met me irail wia, pwe en wia arail kadehde ong Koht, oh pil aramas akan, me irail sohte pwurehng doadoahngki dipwisou en mahwen ong kam aramas; oh met irail wia, kehkehlingki oh inoukihong Koht, me re sohte pahn kemehla riarail akan ahpw re pahn mweidala pein arail mour kan; oh sohte kihsang riarail ahpw re pahn kihong; oh re sohte pahn momourki mour ponkahke ahpw irail pahn pwerisek en nan doadoahk.

19 Eri, met kitail kilang me ahnsou me Mehn Leimen pwukat kamehlelehdahr oh esehdahr me mehlelo, irail poadidiong, oh pahn mweidala re en mehla sang arail pahn wiahda dihp; oh kitail kilangehr me irail sarepidi neirail dipwisoun mahwen en kameleileidi wasa, de irail sarepidi neirail dipwisou en mahwin ong kameleileidi nanpwungen aramas.

20 Kedekedeo riarail Mehn Leimen kan, kaunopadahng mahwen, oh kohdahdo nan sahpw en Nihpai pwe re en kemehla nanmwarkio, oh kasapwilada emen nan dewe, oh pil kamwomwala aramas en Andai-Nihpai-Lihai kan sang nan sahpwo.

21 A ni ahnsou me aramas ako kilangada arail kohkohdo irail kohieila pwe re en tuhwong irail, oh poaridi mwohrail nanpwehlo, oh tepida kapakapong Kauno; oh met ih mwohmw me irail wiewia ahnsou me Mehn Leimen kan tepida peiong irail oh tepida kemehkinirailla neirail kedlahs kan.

22 Eri, ni eh sohte me pelian irail, re kemehla meh kid limen; oh se ese me meid pai irail, pwe re samwalahr patopato rehn arail Koht.

23 A met, ni ahnsou me Mehn Leimen kan kilangadahr me riarail akan sohte pahn tangasang kedlahso, de pil sohpeila ni palimaun de palimeing, ahpw irail kin poaridi oh mehla, oh kin kepinga Koht ni arail kin wie kamakamkihla kedlahs—

24 Eri, ni ahnsou me Mehn Leimen kan kilangadahr met irail uhdihsang kemehirailla; oh irail tohto me arail mohngiong kan pahtoukihla riarail akan me mehkihla kedlahs, pwe irail koluhkihla soahng kan me irail wiahda.

25 Kedekedeo irail kesehdi neirail dipwisou en mahwin kan, oh irail sohte men pwurehng pwokada, pwe irail nsensuwedki kam aramas me irail wiadahro; oh irail poaridi duwehte riarail akan, oh wie koapwoaroapwoariki kalahngan en irail kan me wie kemekemeirailla.

26 Kedekedeo aramas me iangala aramas en Koht rahno tohtohsang aramas akan me kamakamala; oh irail akan me kamakamala wia aramas me mour pwung kei, eri sohte kahrepehieu me kitail pahn peikasalki ahpw kitail kamehlele me re komourla.

27 Oh sohte aramas suwed men me iang irail kamakamala; ahpw aramas tohtohsang kid me marainkihda mehlelo; eri kitail kilang me Kauno kin doadoahk ni soang ahl tohto ong komourlahn sapwellime aramas akan.

28 A met palilaud en Mehn Leimen kan me kemehla tohtohn riarail akan, irail wia Mehn Amelek kan oh Mehn Amulon kan, palilaud en irail kin idawehn koasoandi en Neor kan.

29 Eri, irail akan me iangala aramas akan en Kauno, sohte emen irail me wia Mehn Amelek de Mehn Amulon, de me kin idawehn koasoandi en Neor, ahpw irail uhdahn kadaudoken Leimen oh Lemuel.

30 A met kitail kak kasawih ni sansal, me mwurin aramas akan arail kin kamarainkidahr Ngehn en Koht, oh marainkihda laud soahng kan me pid duwen mour pwung, oh pwupwudiong nan dihp oh wiewia sapwung, irail kin keptakaila, oh arail mour kin suwedlahsang ma irail sohte ese mepwukat.