1 Kedekedeo mwurin aramas en Amon kan ar soandi nan sahpw en Terson, oh mwomwohdiso pil wiawihdahr nan sahpw en Terson, oh nein Mehn Nihpai sounpei kan silehdi sahpw en Terson, ei, oh pil ni irepen sahpw en Saraemla pwon; kilang nein Mehn Leimen sounpei kan pwakiedo riarail kan nan sapwtehno.

2 Lapalahn mahwen ehu ahpw wiawi; iei, mahwen ehu me sohte kin wiawi nanpwungen aramas akan nan sahpwo sangete ahnsou me Lihai mweselsang Serusalem; ei, oh nein Mehn Leimen kan sounpei nen kei kamakamala oh tangpeseng.

3 Ei, oh pil tohto me pil kamakamala nanpwungen aramas en Nihpai kan; ahpw, Mehn Leimen kan pakasarala oh tangpeseng, oh aramas en Nihpai kan pwurala nan sapwarail.

4 Oh ahnsou wet wia ansou ehu me aramas mwahmwahiei oh wie sengiseng nan sahpwo pwon, rehn aramas en Nihpai kan—

5 Ei, lihodi kan mwahieiki arail pwoud kan, oh pil pahpa kan mwahieiki neirail pwutak kan, oh neirail serepein kan sengisengki riarail pwutak kan, ei, pwutak kan sengisengki pahpa kan; oh ngihl en mwahiei wiawi rehrail koaros, mwamwahieiki arail peneinei kan me kamakamala.

6 Eri met iei rahn kapahtou ehu; ei, ahnsou en pahtou mehlel, oh ahnsou en kaisihsol oh kapakap laud.

7 Oh met kaimwisekalahr pahr eisek limau en mwehin sounkopwung kan ong aramas en Nihpai kan.

8 Eri met iei duwen Amon oh rie kan, arail seiseiloak nan sahpw en Nihpai, arail lokolok kan nan sahpwo, arail pahtou kan, oh arail kahpwal akan, oh arail peren laud me apwal en kawehwehda, oh duwen koasoamwoasoamw oh onopek mwahu en riarail akan nan sahpw en Terson. Oh met Kauno, Soundoar en aramas koaros, ketin kapaiada palingenerail kohkohlahte.

9 Oh met iei duwen mahwen kan oh uhpene kan nanpwungen Mehn Nihpai kan, oh pil mahwen kan nanpwungen Mehn Nihpai oh Mehn Leimen; oh pahr keisek limau en mwehin sounkopwung kan imwisekla.

10 Oh sang ni keieu en pahro lel ni keisek limau kamwomwalahn aramas kid kei wiawiher; ei, e wia ahnsou me kamaramas kamasepwehk wiawiher.

11 Oh paliwar kid kei seridier nan pwehl, ah paliwar kid kei mweremweredi wasa re koasokoasokpene nan pwehl; ei, oh kid kei wie mwahmwaieiki arail peneinei me mehla, pwehki irail salohki, nin duwen inou kan en Kauno, me irail pahn kohla nan mour paisuwed kokohlahte.

12 Mehndahte aramas kid kei ar mwahieiki mehlel arail peneinei kan me mehla, ahpw re pil peren oh kapingki ar koapworopwor, oh wehwehki, nin duwen sapwellimen Kauno inou kan, me re pahn iasadahng palimaun en limen Koht, nan mour peren poatopoat.

13 Oh met kitail kilang ia uwen sapahrek en aramas pwehki dihp oh wiewia sapwung, oh manaman en tepilo, me kohdo sang ni koasoandi widing me e wiahda pwe en lidipieki mohngiong en aramas akan.

14 Eri met kitail kilang malipilip lap en aramas pwersek en doadoahk nan sapwellimen Kauno mwahto; oh met kitail kilang kahrepen pahtou, oh pil pereperen—pahtou pwehki mehla oh kamwomwala kan rehn aramas akan, oh peren pwehki marain en Krais ong mour.