1 Oh Ia duwen ma ngehi tohnleng men, oh ma I kak alehdi ineng en nan kapehdiet, pwe I en kak kohwei oh lokaiaki ngilen sapwellimen Koht sowi, ni soangen ngihl me pahn itikada sampah, oh kalohki duwen koluhla ong aramas koaruhsie!

2 Ei, I pahn kalohkihong aramas koaros, ni ngihl laud, duwehte ngilen nansapwe, duwen koluhla oh koasoandi en poadoandoarlao, me irail anahne koluhla oh kohdo rehn arail Koht, pwe pahtou laud pohn sampah pwon en sohrala.

3 Ahpw kilang, ngehi aramas men, oh I dipkihda ineng wet; pwe I anahne itarikihla soahng kan me Kauno ketikihong ie.

4 E sohte mwahu ei pahn kasapwungehla sapwellimen Koht koasoandi pwung kan pwehki ei ineng kan, pwe I ese me e kin ketin mweidohng aramas nin duwen arail ineng, ma ong mehla de ong mour; ei, I ese me e kin ketin mweidohng aramas, ei, koasoanehiong irail koasoandi me sohte kak wekidek, nin duwen ar ineng kan, ma ong komourla de kamwomwala.

5 Ei, oh I ese me mwahu oh suwed kin lellohng aramas koaros; mehmen me sohte ese mwahu sang me suwed e saledeksang dihp; ahpw mehmen me ese mwahu oh suwed, ong ih e pahn ale nin duwen nsene, ma e pahn inangih mwahu de suwed, mour de mehla, peren de nan kapehd nsensuwed.

6 Eri, pwehki ei kilangehr oh wehwehki mepwukat, dahme I pahn pil inangihki mehkot laud sang wia doadoahk me I malipilipiongehr?

7 Dahme I pahn inangihki I en duwehla tohnleng men, pwe I en kak koasoi ong sampah pwon?

8 Pwe kilang, Kauno kin ketin mweidohng wehi koaros en padahngki sapwellime mahseno nan pein arail wehi oh lokaia, ei, sang ni erpit, soahng koaros me e ketin mwahngih me pahn konehng irail en alehdi; eri kitail kilang me Kauno ketin kaweid sang ni erpit, nin duwen dahme pwung oh mehlel.

9 I ese me dahme Kauno ketin poahngokihong ie, oh I kapingahki. I sohte kapinga pein ngehi, ahpw I kapingki dahme Kauno ketin poahngokihong ie; ei, oh met iei ei kaping, me I en kak wia mehn doadoahk nin limen Koht ong wahdo ekei aramas en koluhla; oh met iei ei peren.

10 Oh kilang, ahnsou me I kilang riei me tohto kohluhla mehlel, oh kohdo rehn Kauno arail Koht, eri palingeniet ahpw direkihla peren; ngehi ahpw tamanda dahme Kauno ketin wiahiong ie, iei, nin duwen eh ketin sapeng ei kapakap; ei, I ahpw tamanada kalahngan en nin lime kan me e ketikidohng ie.

11 Ei, oh I pil tamanda kaliduhlahn ei pahpa kahlahp ako; pwe I ese ni mehlel me Kauno me ketin doareirailla sang nan mouren kalidu, oh sang met e ketin kauwada sapwellime mwomwohdiso; ei, Kauno Koht, Koht en Eipram, Koht en Aisek, oh Koht en Seikop, me doareirailsang nan mour en kalidu.

12 Ei, I kin kalapw tamatamante kaliduhlahn ei pahpa kahlahp ko; oh Kohtohte me ketin doareirailla sang pahn manaman en Mehn Isip kan me pil doareirailla sang nan mour en kalidu.

13 Ei, oh ih Kohtohte me pil kauwada sapwellime mwomwohdiso rehrail; ei, oh ih Kohto me pil ketin malipe ie nan malipilip sarawi wet, pwe I en kalohki mahseno ong aramas pwukat, oh pil kupwure I en pweida mehlel, me kahrehda ei peren mehlel.

14 Ahpw I sohte perenkihte pein ei pweida, ahpw ei peren pil laudkihla mehlel pwehki pweidahn riei ohl akan, me kohdahla nan sahpw en Nihpai.

15 Kilang, irail pwerisek ong doadoahk mehlelo, oh irail dulung wah tohto; oh ia uwen ketingparail eh pahn laud mehlel!

16 Eri, ahnsou me I kin medewe pweidahn riei ohl pwukat palingeniet kin kohieisang ie, lao e kin tohrohsang paliwar, ni duwen eh kin wiawi, pwehki ei peren laud.

17 A met Koht en ketin mweidong riei ohl pwukat, pwe re en kak iang patohdi nan wehin Koht; ei, oh pil irail koaros me wia wahn arail doadoahk pwe irail en sohla pwurehng kohla liki, ahpw irail en kapinga ih kohkohlahte. Oh Koht en ketin mweidohng pwe e kak wiawi nin duwen ei koasoi kat, iei nin duwen ei koasoiahier. Ahmen.