1 Samwa, rong mwahu ei kaweid kan; pwe I ndaionguhk ni mehlel, me nin duwen ahmw pahn kapwaiada sapwellimen Koht kosonned akan ke pahn pweida nan sahpw.

2 I men ke en wia duwehte dahme I wiahier, ni ei tamataman mour en kalidu en atail pahpa kahlap ako; pwe irail mih nan lokolok en mour en kalidu, oh sohte me kak doareirailla ihte Koht en Eipraam, oh Koht en Aisek, oh Koht en Seikop; oh ni mehlel e ketin doareirailsang nan arail kahpwal akan.

3 Eri, nei pwutak Ilemen, kilang, ke pwulopwulte, eri, I peki rehmw me ke pahn rong ei koasoi kan oh esehla sang ie; pwe I ese me mehmen me pahn koapworopworki Koht pahn ale sawasepe nan arail apwal akan, oh nan arail kapwunod kan, oh nan arail kahpwal kan, oh pahn pwekpwekdahla ni imwilahn rahno.

4 A I sohte men ke en medewe me I pein esehla—kaidehn sang ni paliwar ahpw palingehn, kaidehn sang ni madamadau en ahnepen aramas ahpw sang rehn Koht.

5 Eri, kilang, I ndaiong uhk, ma I sohte ipwisang rehn Koht I sohte kak ese mepwukat; ahpw sang ni ewen sapwellime tohnleng sarawio, Koht ketin kasalehiong ie mepwukat, a kaidehn pwehki I warohng;

6 Pwe I iang nein Mosaia pwutak kan kohkohseli, songosong se en kauwehla mwomwohdiso en Koht; ahpw kilang, Koht ketin kadaredo sapwellime tohnleng sarawio en kauhkihtdi nan ahlo.

7 Oh kilang, e mahsen ong kiht, rasehngete ngihl en nansapwe, oh pwehlo pwon ahpw rerada pahn neht kan; oh kiht koaros pwupwudi nan pwehlo, pwehki aht lemmwikihda Kauno.

8 Ahpw kilang, ngihlo eri mahsanihong ie: Pwourda. I ahpw pwourda oh kesihnenda, oh kilang tohnlengo.

9 E ahpw mahsanihong ie: Ma ke sohte men iang kamwomwala, a ke dehr songosong en kauwehla mwomwohdiso en Koht.

10 Kedekedeo, ngehi eri pwupwudi nan pwehlo; oh erein rahn siluh oh pwohng silipwong me I sohte kak kihpeseng eweiet, de pil doadoahngki nehi oh pehi kan.

11 A tohnglengo mahsanihong ie soahng tohto, me riei ko me rong, ahpw I sohte kak rong; pwe ni ahnsou me I rong mahsen pwukat—Ma ke sohte men kamwomwmwomwala, a ke dehr songosong kauwehla mwomwohdiso en Koht—I pwonkihla ei masepwehk oh pwuriamwei pwe I en de kamwomwmwomwala, kahrehda ei pwupwudi nan pwehlo oh sohla kak rong wasa.

12 I ahpw toutoukihla lokolok soutuk, pwe palingeniet lokolongki nsensuwed kowahlap mehlel oh toutoukilahr dipei kan koaros.

13 Ei, I tamanda dipei oh ei wiewia suwed kan koaros, me kahrehda ei lokolongki medek en ehl; ei, I kilangada me I kahngohdiong ei Koht, oh me I sohte kapwaiada sapwellime kosonned sarawi kan.

14 Ei, oh I kemelahr tohtohn sapwellime seri kan, de kahrehiong irail nan elen kolahng mwomwala; ei, oh ni oaralap, ei wiewia suwed kan me laud mehlel, kahrehda madamadau en patodohte mwohn sihlangin Koht kamasepwehkiehda mehlel.

15 Oh I medewehiong, ma I kak pekeusla oh sohrala ni palingehn oh paliwar, pwe I en dehr wisikdohng mwohn silangin Koht, oh pakadeingkihda ei wiewia kan.

16 Eri, erein rahn siluh oh pwohng silipwohng I wie lokolongki, iei lokolongki medek en ngehn lekdekla.

17 Kedekedeo, ni ahnsou me I wie kalokolongki lokolok wet, sang ni ei medemedengki ei medemedewe dipei kan, kilang, I pil tamanda rong en ei pahpa kohpada ong aramas akan duwen ketidohn Sises Krais, Sapwellimen Koht Iehros, pwe en tomwkihla dipen sampah.

18 Eri met, ni ei medewedahr madamadau wet, sang nan mohngiongi I patohwan: Maing Sises, komwi Sapwellimen Koht, komw ketin kupwure ie, ngehi me mih nan nsensuwed mwuledek, oh sahl mete en mehla kapiliepenehr.

19 A met, kilang, ni ahnsou me I medewe met, I sohla kak taman ei medek kan; ei, sohla lokolongki madamadau en dipei kan.

20 Oh ia uwen peren, oh uwen marain kapwuriamwei me I kilangada; ei, palingeniet direkihla peren kowahlap duwehte ei medeko!

21 Ei, I ndaiong uhk, samwa, sohte mehkot idipek oh kamedek duwehte ei medeko. Ei, oh I pil ndaiong uhk, samwa, ahpw sohte mehkot idipek oh kaperen duwehte ei pereno.

22 Ei, I medewe me I kilangada, dahme atail pahpa Lihai kilangada, Koht ketiket nan mwoale, oh karis en tohnlengkei kapilpene, oh mwomwen wie kokoul oh kapikapinga arail Koht; ei, oh palingeneiet men iang mih mwo.

23 Ahpw kilang, nehikat oh pehikat pwurehng kehlailda, I ahpw kesihnenda, oh kasalehiong aramas akan me I ipwisang rehn Koht.

24 Ei, oh sang ahnsouo kohdo lel met, I wiewia doadoahk sohte uhdi, pwe I en kak sowese aramas en koluhla; pwe I en kak sowese irail en iang song peren kowahlap me I songehr; pwe irail en kak iang ipwisang rehn Koht, oh audaudkihda Ngehn Sarawi.

25 Ei, oh met kilang, samwa, Kauno ketikiong ie peren mehlel nan pweidahn wahn ei doadoahk kan;

26 Pwehki mahseno me e ketikiong ie, kilang, tohto me pil ipwisang rehn Koht, oh songehr duwehte dahme I songehr, oh pil kilangki masarail duwehte dahme I kilangehr; eri irail ese duwen mepwukat me I wie kosokosoia, duwehte ei ese; oh marain me I ahneki pwilisang rehn Koht.

27 Oh Koht kin ketin sewese ie nan ei kasongosong kan oh soangen kerempw koaros, ei, oh nan soangsoangen kahpwal koaros; ei, Koht ketin doareiehsang nan imweteng, oh sang nan selipei, oh sang mehla; ei, oh I kin koapworopworiki ih, oh e pahn ketin doareiehla.

28 Oh I ese me e pahn pwekiehda ni imwin rahno, pwe I en iang patohla reh ni lingan; ei, oh I pahn kapinga ih kohkohlahte, pwe e ketin kahluwahsang atail pahpa kahlap ko nan Isip, oh e ketin kakihrirailla Mehn Isip ko nan Sehd Weitahtao; oh e ketin kahluwa irail kohla nan sapwen inou sang ni sapwellime manaman; ei, oh e kin ketin doareirailsang nan mour en kalidu oh ar kalipilipala ekei ahnsou.

29 Ei, oh e pil ketin kahluwahsang atail pahpa kahlap ko nan sahpw en Serusalem; oh sang ni sapwellime manaman poatopoat, e pil kin ketin doare irail sang nan ar kalidu oh nan ar kalipilipala, nan ekei ahnsou lao lel met; oh I kin kalapw tamataman arail kalipilipalao; ei, oh ke pil anahne tamatamante arail kalipilipalao duwehte ei wiahier.

30 Ahpw kilang, nei pwutak, kaidehn ihte met; pwe ke pahn anahne ese duwehte ei ese, me nin duwen ahmw pahn kapwaiada sapwellimen Koht kosonned akan ke pahn pweida nan sahpwo; oh ke pil pahn anahne ese, me nin duwen omw sohte pahn kapwaiada sapwellimen Koht kosonned akan ke pahn kalipsang mwohn silangi. Met iei duwen sapwellime mahsen.