1 Eri met, nei pwutak Ileman, I kehkehlingkionguhk me ke pahn ale poadopoad kan me kohieng ie sang ni likilik;

2 Oh I pil kehkehlingkionguhk me ke pahn wiwiahda poadopoad en aramas pwukat, nin duwen ei wiahier, nan pileit en Nihpai kan, oh kolokol mepwukat koaros sarawi me I wie kolokol, duwehte ei kin wiewia; pwe re kin wie nekidohng kahrepe kesempwal ehu.

3 Oh pileit pirahs pwukat, me audaudkihda nting pwukat, me kololokol poadopoad en pwuhk sarawi kan, me kolokol poadopoad en kadaudok en atail pahpa kahlap ako, iei sangete ni tapio—

4 Kilang, atail pahpa kahlap ako kohpadahr, me prahs pileit puwkat pahn kin wie nekinek oh kadakadaur sang ehu dih kohlahng ehu, oh nin limen Kauno pahn nekinekid oh kolokol lao e pahn kohieng wehi koaros, keinek koaros, lokaia koaros, oh aramas koaros, pwe irail en kak esehda me rir kan koaros en audepe.

5 A met kilang, ma pileit pwukat pahn wie nekinek re uhdahn pahn wie maramarainte; ei, oh re pahn wie maramarainte; ei, oh pil pileit koaros me audaudiki nting sarawi kan.

6 A met mweinele ke pahn medewehda me mwekid pweipwei met me I wia; ahpw kilang I ndaionguhk, me sang ni soahng kan me tikitik oh mengei, soahng kan me lapala kin pweida; oh pak tohto wiepe tikitik kan kin katokihedi me loalokong kan.

7 Oh Kauno Koht kin ketin wia doadoahk sang ni wiepe kan pwe en ketin kupwurehda pweidahn sapwellime koasoandi lap oh poatopoat kan; oh sang ni wiepe tikitik kan Kauno kin ketin katokihedi me loalokong kan oh ketikihdo komour ong aramas tohto.

8 A met, sangete mahs kohdo mepwukat kin nekinek ni keneinei nin duwen sapwellimen Koht erpit; pwe kilang, re katehlapahla madamadau en aramas pwukat, ei, kapwungalahn aramas tohto arail wiewia sapwung kan, oh kahrehiong irail en marainkihla arail Koht pwehn ale komourpen ngenarail kan.

9 Ei, I ndaiong uhk, ma sohte mepwukat me poadopoad pwukat audaudki, me ntingdi pohn pileit pwukat, Amon oh rie kan sohte kak kapwungala kiden Mehn Leimen nan tiahk sapwung kan en arail pahpa kahlap ako; ei, poadopoad pwukat oh arail koasoi kan elehiong irail en koluhla; iei me, re kahrehiong irail en marainkihda Kauno arail Koht, oh perenkihda Sises Krais arail Soundoar.

10 A ihs me ese, ahpw mweinele irail pahn kak wia ehu ahl me pahn wahdo kiden aramas, ei, oh pil kiden riatail Mehn Nihpai kan me keptakailahr, me ahnsou wet arail mohngiong kan kekeluwaklahr nan dihp oh wiewia suwed kan, pwe irail en marainikihla arail Soundoaro?

11 Met me rir pwukat saikinte kasansalohng ie ni unsek; eri I pahn uhdi wasaht.

12 Eri, e pahn itar ma I pahn ndahte me e kin nekinekla ni keneinei ong kahrepe kesempwal ehu, oh kahrepe wet Koht me ketin mwahngih; pwe e kin ketin kaweid sapwellime doadoahk koaros sang ni erpit, oh sapwellime ahl akan me inen, oh sapwellime ahlo kin duweduwehte kohkohlahte.

13 O tamataman, tamataman, nei pwutak Ilemen, ia uwen inen en sapwellimen Koht kosonned akan. Pwe e ketin mahsanih: Ma kumwail pahn kapwaiada ei kosonned akan kumwail pahn pweida nan sahpwo—ahpw ma ke pahn sohte kapwaiada sapwellime kosonned akan kumwail pahn lekidekla sang mwohn silangi.

14 Eri, tamataman, nei pwutak, me Koht ketin likihong uhk mepwukat, me sarawi, me e ketin nekinekid ni wahu oh sarawi, oh me e pahn pil ketin kolokol oh nekinekid ong kahrepe kesempwal ehu ong ih, pwe en kak kasalehwei sapwellime manaman ong dih en mwuhr akan.

15 Pwe kilang, I pahn ndaionguhk sang ni ngehn en kokohp, ma ke pahn kasapwungehla sapwellimen Koht kosonned akan, kilang, mepwukat me sarawi pahn kohsanguhk sang ni manaman en Koht, oh ke pahn wisiklahng rehn Sehdan, pwe en koakoahsang uhk duwehte dihpw meng me kisinieng kin ipirseli.

16 Ahpw ma ke pahn kapwaiada sapwellimen Koht kosonned akan, oh apwalih mepwukat me sarawi nin duwen dahme Kauno ketin mahsanihong uhk, (pwe ke pahn anahne peki rehn Kauno soahng koaros me ke pahn wiahiong mepwukat) kilang, sohte manaman pohn sampah de ehl kak kihsang uhk, pwe Koht sapwellimanki manaman en kapwaiada sapwellime mahsen kan koaros.

17 Pwe e pahn ketin kapwaiada sapwellime inou kan koaros me e pahn ketin inoukihong uhk, pwe e ketin kapwaiadahr sapwellime inou kan me e ketin inoukihongehr atail pahpa kahlap ako.

18 Pwe e ketin inoukihong irail me e pahn ketin nekidala mepwukat ong kahrepe kesempwal ehu ong ih, pwe en ketin kasalehda sapwellime manaman ong dih en mwuhr akan.

19 Eri met kilang, e ketin kapwaiadahr ehu kahrepe, iei kopwurupwurdohn Mehn Leimen kid kei me kahrehiong ar marainkihda mehlelo; oh e ketin kasalehda sapwellime manaman rehrail, oh e pahn pil ketin kasalehdahte sapwellime manaman rehrail ong dih en mwuhr akan; eri re pahn nekinekla ni keneinei.

20 Eri I kehkehlingkihong uhk, nei pwutak Ilemen, me ke en loalopwoat ong omw pahn idawehn ei koasoi kan, oh me ke en loalopwoat ong omw pahn kapwaiada sapwellimen Koht kosonned akan nin duwen e ntingdi.

21 Eri, met I pahn koasoi ong uhk duwen pileit rieisek pahieu, me ke pahn kolokol, pwe me rir kan oh wiewiahn rotorot akan, oh arail wiewia rir kan, de en aramas me kamwomwalahr ko arail wiewia rir kan, en kak sansalohng aramas pwukat; iei, ar kin kamaramas koaros, oh pirap, oh arail kin kulih aramas akan, oh arail wiewia suwed kan oh tiahk suwed kan koaros, en kak sansalohng aramas pwukat; ei, oh me ke pahn nekidala mehn kawehwe pwukat.

22 Pwe kilang, Kauno ketin mahsanihada sapwellime aramas akan ar tepidahr wiewia rotorot kan, ei, kamaramas oh tiahk suwed kan me wiawi ni rir; eri Kauno ketin mahsanih, ma re sohte pahn koluhla re pahn kamwomwasang pohn sampah.

23 Kauno ahpw ketin mahsanih: I pahn kaunopadahng nei laduo Keislem, takai ehu, me pahn kamarainihada wasa rotorot en marainda, pwe I en kak kadierekada ong nei aramas ihs me kin papah ie, pwe I en kak kasalehiong irail wiewiahn riarail kan, ei, arail wiewia rir kan, arail wiewiahn rotorot kan, oh arail wiewia suwed kan oh tiahk suwed kan.

24 A met, samwa, mehn kawehwe pwukat kaunopda pwe mahsen en Koht en kak pweida, me e ketin mahsanih:

25 I pahn kapwarehda arail wiewia rir kan oh arail tiahk suwed kan koaros sang nan rotorot ong nan marain; oh ma re sohte pahn koluhla I pahn kamwomwirailla sang nin sampah; oh I pahn kasalehda nan marain arail tiahk rir oh suwed kan koaros, ong wehi koaros me pahn sapwaniki sahpw wet mwuhr.

26 Oh met, samwa, kitail kilang me re sohte koluhla; eri re kamwomwomwlahr, oh iei mahsen en Koht pweidahr; ei, arail tiahk suwed rir kan pwarada sang nan rotoroto oh kasansalohng kitailehr.

27 Oh met, samwa, I kehkehlingkihong uhk me ke pahn ekihla arail kahula kan, oh arail inou kan, oh arail koasondi en inou rir suwed kan; ei, oh arail sain kan oh mwekid kapwuriamwei kan ke pahn sohte kasalehiong aramas pwukat, pwe irail de esehda, pwe irail de pil iang pwupwudi oh kamwomwala.

28 Pwe kilang, mie keria ehu pohn sahpwet, me kamwomwomwla pahn lelohng aramas koaros me kin iang wiewiahn rotorot akan, nin duwen manaman en Koht, ni ahnsou me irail suwedlahr; eri I mentehn aramas pwukat en dehr kamwomwala.

29 Eri ke sohte pahn kasalehiong aramas pwukat arail kauhla kan oh inou kan en arail koasoandi rir kan, ahpw ihte me ke pahn kasalehiong irail iei arail wiewia suwed oh arail kamaramas oh arail tiahk suwed kan; oh ke pahn padahkihong irail en kailongki soangen wiewia suwed oh tiahk suwed kan oh kamaramas kan; oh kumwail pahn pil padahkihong irail me aramas pwukat kamwomwomwla pwehki arail wiewia suwed oh tiahk suwed kan oh arail kamaramas kan.

30 Pwe kilang, irail kemehla sapwellimen Kauno soukohp kan koaros me kohdo nanpwungarail pwe re en padahkihong irail duwen ar wiewia suwed kan; oh ntahn irail me re kemehla kan pahn kedipa irail rehn Kauno pwe en dupukiong me kamaramas akan; oh met sapwellimen Koht kadeik lellohngehr irail me wiewia tiahk en rotorot oh pwihn mwersuwed rir pwukat.

31 Ei, oh sahpwo pahn riahla kohkohlahte oh pil irail me wiewia tiahk en rotorot oh pwihn suwed rir kan, iei re lao kamwomwomwla, ihte ma re pahn kohluhla mwohn arail pahn suwedla.

32 Oh met, samwa, tamataman koasoi kan me I ndaionguhkehr; dehr likihong aramas pwukat koasoandi rir kan, ahpw padahkihong irail re en kailongki douluhl dihp oh wiewia suwed.

33 Kalohkiong irail koluhla, oh pwoson Kauno Sises Krais; padahkihong irail en pein karakarahkala oh mpai oh aktikitikla; padahkihong irail en powehdi kasongosong en tepilo, sang ni arail pwoson Kauno Sises Krais.

34 Padahkihong irail re en dehr pwangahki wiewia mwahu kan, ahpw re en mpai oh aktikitikla; pwe irail en kak diar kommoalpen ngenirail kan.

35 Eri, tamataman samwa, oh nantihong esehla erpit ni ahmw pwulopwul; ei, nantihong esehla kapwaiada sapwellimen Koht kosonned akan ni ahmw pwulopwul.

36 Ei, oh peki rehn Koht en ketin seweseiuk nan mehkoaros; ei, mweidohng Kauno ahmw wiewia kan koaros, oh sohte lipilipil wasa ke pahn kohla ie, ke pahn tengeteng rehn Kauno; ei, mweidohng ahmw madmadau kan en uhlahng rehn Kauno; ei, mweidohng audepen mohngiongamwail en tengeteng rehn Kauno kohkohlahte.

37 Ale kaweid rehn Kauno nan mehkoaros me ke pahn kin wia, oh e pahn ketin kahluwaiuk ong me mwahu; ei, ahnsou me ke pahn meirla, ke pahn wendi rehn Kauno, pwe en ketin sinsileiuhk nan ahmw meir; oh ahnsou me ke pahn pwourda ni menseng mweidohng ahmw mohngiong en diren kaping kalahngan ong Koht; oh ma ke pahn wia mepwukat, ke pahn pwekpwekdahla ni imwin rahno.

38 Eri met, nei pwutak, I men ekis koasoia duwen dipwisou me atail pahpa kahlap ako kahdaniki impweio, de mehn kaweido—de atail pahpa kahlap ako kahdaniki Liaona, me wehwehki, kampos; oh Kauno me ketin kaunopada.

39 Kilang, sohte aramas emen kak wiahda dipwisou en doadoahk ni soangen mwomw en doadoahk lingan wet. Oh kilang, dipwisou wet kaunopadahr pwe en kahluwahki atail pahpa kahlap ko ahl me irail pahn keid loale nan sapwtehno.

40 Oh e kin doadoahk ong irail nin duwen arail pwoson Koht; eri, ma irail kin pwoson sang ni arail kamehlele me Koht kak ketin kamwakid arep ko en idih wasa me re pahn kohla ie, kilang, e kin wiawi; eri irail kilang manaman kapwuriamwei wet, oh pil manaman kapwuriamwei tohto wiawi sang ni manaman en Koht, rahn koaros.

41 Ahpw, pwehki manaman kapwuriamwei pwukat kin pweida sang ni wiepe tikitik kan e kin kasalehiong irail doadoahk kapwuriamwei. Irail kin pohnkahke oh manokehla doadoahngki arail pwoson oh loalopwoat eri doadoahk kapwuriamwei kan kin uhdi, oh irail sohte kin doula nan arail seiloak;

42 Eri, irail mihmihte nan sapwtehno, de re sohte kin seiloak nan ahl inen, oh re lokolongki ar men mwenge oh men nimpil, pwehki arail wiewia sapwung kan.

43 A met, samwa, I men ke en wehwehki me mepwukat kin kasalehda dahme pahn wiawi; pwe ahnsou me atail pahpa kahlap ako kin pohnkahkehnn idawehn kampos wet (eri mepwukat me pid paliwar) irail sohte kin pweida; iei pil duwehte soahng kan me pid palingehn.

44 Pwe kilang, e mengei ke en rong mahsen en Krais, me pahn ketin idihong uhk ahl inen kolahng peren soutuk, duwehte atail pahpa kahlap ako arail pahn idawehn kampos wet, me pahn idihong irail ahl inen kolahng sapwen inouo.

45 A met I kalelapak, ma mie karasaras nan soahng wet? Pwe ni mehlel nin duwen mehn kaweido eh kahluwahdo atail pahpa kahlap ako, sang ni ar idawehn eh kaweid, kolahng nan sahpw en inou, e pil pahn duwehte mahsen kan en Krais, ma kitail pahn idawehn kaweidpe, e pahn ketin kahluwa kitail daulih mour en pahtou wet kolahng nan sahpw en inou ehu me ienen mwahusang met.

46 Eri samwa, kitail en dehr pohnkahke pwehki ahlo e mengei; pwehki ih mwomwen atail pahpa kahlap ako; pwe e pil kaunopadahng irail, ma irail pahn kilang irail pahn mourla; iei pil duwehte kitail. Ahlo kaunopadahr, oh ma kitail pahn kilang kitail pahn mour kohkohlahte.

47 Samwa, kilang me ke pahn apwalih mwahu dipwisou sarawi pwukat, ei, tehk me ke kilenglahng Koht oh mourla. Kohwei rehn aramas pwukat oh kalohkihong irail mahseno, oh ke en wia aramas maledek men. Ei rahnmwahu ong uhk samwa.