1 Oh met, nei pwutak, I men ndaionguhk soahng tohto sang uwen dahme I ndaiong riomw pwutako; pwe kilang, ke sohte kasawih mwahu duwen lelepek en riomw pwutako, eh loalopwoat, oh eh ngoangki kapwaiada sapwellimen Koht kosonned akan? Kilang, e sou kasalehiong uhk karasaras mwahu?

2 Pwe ke sohte rong mwahu ei kaweid kan duwehte riomw pwutako, nanpwungen aramas en Soram kan. Iet dahme I men ndaionguhk; ke kohla susuweiki ahmw kehlail oh ahmw erpit.

3 Oh kaidehn ihte met, samwa. Dahme ke wiadahro kansensuwed ih ie; pwe ke moanokehla doadoahk sarawio, oh kohla nan sahpw en Sairon ni irepen sahpw en Mehn Leimen ko, pwe en tuhwong Isapel, lihen netiki paliwar.

4 Ei, e pitihedi mohngiong en [ohl] tohto; ahpw sohte peikidpomw, samwa. E uhdahn pahn konehng me ke pahn loalopwoat nan doadoahk sarawio me kohienguhkhr ni likilik.

5 Samwa, ke sehse me mepwukat iei mwekid suwed mwohn silangin Kauno; ei, me keieu mwekid suwed sang dihp koaros likin kakerehdi nta mwakelekel de lahlahwe Ngehn Sarawi?

6 Pwe kilang, ma ke pahn kahmahmkihla Ngehn Sarawi mwurin eh ketier rehmw mwowe, oh ke ese me ke kahmahmki, kilang, met iei dihp me sohte mahkpe; ei, mehmen me pahn kamaramas ni eh marainkier oh wehwehki Koht, e pahn apwal ong ih en alehdi mahkpen dipe; ei, I ndaionguhk, samwa, me e sohte pahn mengei ong ih en alehdi mahkpen dipe.

7 Oh met, samwa, I mentehn me ke sohte wiahda dihp laud wet mwohn Koht. I sohte pahn kosokosoia dipomw kan pwe en panginda ngenomw, ma e sohte pahn mwahu ong uhk.

8 Ahpw kilang, ke sohte kak ekihsang Koht dipomw kan; oh ma ke sohte pahn koluhla, dipomw kan pahn wia kadeikpomw ni imwin rahno.

9 Eri samwa, I men ke en koluhla oh manokehla dipomw kan, oh dehr idawehn ineng suwed me tepsang dahme ke kilangki mesemwen, ahpw kadohwanewei sang uhk soangen suwed pwukat koaros; pwe ma ke sohte pahn wia met ke sohte pahn kak sohsohki wehin Koht. Menlau tamataman, oh pilohng pein uhk en kadohwanewei sang uhk mepwukat.

10 Oh I kaweidkin uhk ke en pilohng pein uhk en ale kaweid sang rehn riomw pwutak laud kan nan omw wiewia kan; pwe kilang, ke pwulpwulopwulte, oh ke anahne sawas en riomw pwutak kan. Oh rong mwahu ara kaweid kan.

11 Dehr mweidohng soahng kan me mwahl oh sohte katepe en kaunuhkada; dehr mweidohng tepilo en pwurehng kahrehiong ahmw mohngiong en lohdi pahn lihen netiki paliwere suwed kan. Kilang, samwa, kowe me kahrehda Mehn Soram kan wiahda dihp laud; pwe ni ahnsou me re kilangada ahmw wiewia kan irail sohte men kamehlele ei koasoi kan.

12 Oh met Ngehn en Kauno ketin mahsanih ong ie: Kaweidki noumw seri kan re en wia me mwahu, pwe irail de kahhrehiong mohngiong en aramas tohto en kamwomwomwala; eri I kaweidkin uhk, samwa, pwehki ei lemmwiki Koht, me ke anahne uhdihsang ahmw wiewia suwed kan;

13 Ke anahne sohpeiong Kauno sang ni ahmw madamadau unsek, ahmw kak unsek, oh ahmw kehl unsek; pwe ke en dehr kahrehiong mohngiong en aramas akan en wiahda me suwed; ahpw ke en pwurala rehrail, oh kasalehda omw sapwung kan oh sapwungo me ke wiadahr.

14 Dehr rapahki kepwe kan de soahng mwahl akan en sampah wet; pwe kilang, ke sohte pahn kak wahda.

15 Eri met, samwa, I pahn ndaiong uhk ekis duwen ketidohn Krais. Kilang, I ndaiong uhk, me iei ih me uhdahn pahn ketido pwehn lapwahsang dipen sampah; ei, e pahn ketido pwehn kalohki rongamwahu en komour ong sapwellime aramas akan.

16 Eri met, samwa, met iei doadoahk en papah me ke pwukoahkihdi, pwe ke en kalohki rongamwahu ong aramas pwukat, pwe en kaunopada arail lamalam kan; de komour en kak kowohngirail, pwe irail en kak kaunopada lamalam en neirail seri kan en rong mahseno ni ahnsou me e pahn ketido.

17 Oh met I pahn kameleileidi ahmw pwunod me pid duwen ire wet. Kilang, ke pwuriamweiki dahme kahrehda mepwukat anahne kasansalda mwohn e pahn wiawi. Kilang, I ndaiong uhk, ngehn en aramas ahnsou wet soh pil kesempwal ong Koht duwehte ngehn en aramas ni ahnsou me e pahn ketido?

18 E soh pahn konehng me koasoandi en poadoandoarlao anahne kasansalohng aramas pwukat pil duwehte ong neirail seri kan?

19 E soh pahn mengei ahnsou wet ong Kauno en ketin kadarodo sapwellime tohnleng en kalohngki rongamwahu ong kitail pil duwehte ong neitail seri kan, de mwurin e pahn ketido?