1 Eri met kedekedeo nein Alma pwutak ko kolahng nanpwungen aramas akan, kalohkihong irail mahseno. Oh pil pein Alma, sohte kak kommoal, oh e pil iang kohkohseli.

2 Met kitail sohlahr pahn koasoia duwen arail kalohk kan, ihte me irail kalohkier mahseno, oh me mehlelo, nin duwen ngehn en kokohp oh kaudiahl; oh irail kalohk nin duwen sapwellimen Koht koasoandi sarawio me irail malipilipiongehr.

3 Oh met I pwuralahng koasoiepen mahwen kan nanpwungen Mehn Nihpai kan oh Mehn Leimen kan, ni kaeisek waluhn sounpar en mwehin sounkopwung kan.

4 Pwe kilang, kedekedeo Mehn Soram ko iangala Mehn Leimen ko; eri, ni tepin kaeisek waluhn sounparo, Mehn Nihpai kan ahpw kilangada Mehn Leimen kan kohkohdohng irail; eri irail ahpw kaunopadahngehr mahwen; ei, irail kapokonepene neirail sounpei kan nan sahpw en Terson.

5 Kedekedeo Mehn Leimen ko iangahki kiden neirail sounpei kan kohkohdo; oh irail kohdo nan sahpw en Andeionum, me wia sahpw en Mehn Soram kan; oh ohl emen me kahdaniki Saraemna me wia arail kaun.

6 Eri met, pwehki Mehn Amelek kan ar inenen sekineken oh loallap suwed sang Mehn Lemen kan, eri, Saraemna idihada re en wia kaun en sounpei ong Mehn Lemen kan, oh irail koaros Mehn Amelek oh Mehn Soram kei.

7 Eri e wia met pwe re en kak kadakadaurete arail kailongki Mehn Nihpai kan, pwe en kak kolokol irail pahn eh manaman pwe eh koasoandi kan en kak pweida.

8 Pwe kilang, eh koasoandi kan iei en kamwakidada Mehn Lemen kan pwe irail en lingeringer oh uhwong Mehn Nihpai kan; e kin wia met pwe en kak ahneki manaman kehlail pohrail, oh pwe en pil kalowehdiong Mehn Nihpai kan pahn eh manaman sang ni eh pahn kaliduweirailla.

9 Oh met en Mehn Nihpai kan koasoandio iei re en apwalih sapwarail kan, oh imwarail kan, oh arail pwoud kan, oh neirail seri kan, pwe re en kak doareirailsang ar imwintihti kan; oh pwe re en pil kak kolokolete arail pwuhng kan oh arail kapai kan, ei, oh pil ar mour saledek, pwe re en kak kaudokiong Koht nin duwen nsenarail.

10 Pwe re eseier ma re pahn lohdiong pahn manaman en Mehn Lemen ko, a Mehn Leimen ko pahn kemehla mehmen me pahn kaudokiong Koht ni ngehn oh mehlel, iei Koht mehlel oh ieiaso.

11 Ei, oh irail pil ese duwen Mehn Leimen kan arail kailongki mehlel riarail ko, me iei aramas en Andai-Nihpai-Lihai kan, me kahdanikihla aramas en Amon—oh irail sohte men doadoahngki dipwisou en mahwen, ei, irail wiadahr inou ehu oh irail sohte kak kauwehla—eri, ma re pahn lohdiong pahn manaman en Mehn Leimen kan irail uhdahn pahn kamakamala.

12 Oh Mehn Nihpai kan sohte kak mweidohng irail en kamwomwmwomwla; eri re kihong irail sapw me re pahn sapwenikihla.

13 Oh nein Amon aramas akan kin kihong Mehn Nihpai kan pali laud en arail dipwisou kan pwe en sewese neirail sounpei kan; eri Mehn Nihpai kan idihdiong, re en kelehpwki pelian Mehn Leimen kan, me kapatapene kadaudok en Leimen oh Lemuel, oh nein Ismael pwutak kan, oh Mehn Nihpai kahngohdi kan koaros, me iei Mehn Amelek kan oh Mehn Soram kan, oh pil kadaudok en samworohn Noha ko.

14 Eri kadaudok pwuko kereniong duwehte uwen tohtohn Mehn Nihpai ko; eri ih me Mehn Nihpai kan kin itoitkiheng re en peiong riarail kan oh mehnda ma pil kakerehdi nta.

15 Kedekedeo ni ahnsou me sounpei en Leimen kan kohpenehr nan sahpw en Andeionum, kilang, sounpei en Nihpai kan onopadahr re en tuhwong irail nan sahpw en Terson.

16 Eri, kaun en Mehn Nihpai kan, de ohl me idihdida pwe en wia kaun lapalap en sounpei ong Mehn Nihpai kan—eri kaun lapalap en sounpei menet uhd pwukoahki sounpei en Mehn Nihpai koaruhsie—oh ede Moronai;

17 Oh Moronai uhd pwukoahkier manaman unsek, oh wiepen doadoahk en arail mahwen kan. A e sounparte rieisek limau ahnsou me e idihdahr en wia kaun lapalap en sounpei en Mehn Nihpai kan.

18 Kedekedeo e ahpw tuhwongidi Mehn Leimen kan ni irepen sahpw en Terson, oh nah aramas akan weuwa neirail kedlahs, oh naipokos kan, oh soangsoangen dipwisou en mahwen kan koaros.

19 Oh ahnsou me nein mehn Leimen sounpei kan kilangadahr me aramas en Nihpai kan, de Moronai, kalikawihkihda nah aramas akan likou mete mehn pere nan mwaramwararail akan oh pil mehn sansar, ei, oh pil lisoarop en perehla moangerail kan, oh irail pil likauwih likou mosul kan—

20 Eri nein Saraemna sounpei kan sohte kaunopada soangen dipwisou pwuko; irail weuwahte neirail kedlahs kan oh neirail naipokos kan, neirail kesik ketieu kan oh arep kan, neirail takai kan oh pahi kan; oh irail sohte likou, ihte irail pirehkipene lukeparail kan kateng me wiawihkihda kilin mahn; ei, irail koaros kilisou, ihte Mehn Soram kan oh Mehn Amelek kan me soh;

21 Ahpw re sohte likawih mehn perehpen nan mwaremwararail kan, de mehn sansar kan—eri, irail masakada mehlel sounpei en Mehn Nihpai ko pwehki arail tehtehn mahwen kan, mehndahte arail inenen tohto sang Mehn Nihpai kan.

22 Kilang, kedekedeo irail sohte men kohdo peiong Mehn Nihpai ko ni irepen sahpw en Terson; eri irail mweselsang sahpw en Andeionum kolahng nan sapwtehno, oh irail pidekla palio nan sapwtehno ni tepin pillap en Saidon, pwe irail en kak kohlahng nan sahpw en Mandai oh kalowehdi sahpwo; pwehki irail sohte medewe me nein Moronai sounpei ko pahn ese wasa me re kohla ie.

23 Ahpw kedekedeo, ni ahnsowohte me irail mwesellahngehr nan sapwtehno, Moronai kadaralahng nan sapwtehno lipoahrok kei pwe re en mwasahn ar kahnimwpwalo; oh Moronai, pwehki e pil ese duwen kokohp en Alma kan, e ahpw kadarala ohl ekei reh, oh peki reh en kalelapak rehn Kauno duwen wasa me sounpei en Mehn Nihpai ko pahn kohla ie pwe re en doare pein irail sang Mehn Leimen ko.

24 Kedekedeo mahsen en Kauno ahpw leledohng rehn Alma, oh Alma ahpw pakairkihong nein Moronai meninkeder ko, me sounpei en Mehn Leimen ko karikaris pidek kohla nan sapwtehno, pwe irail en kak kohla nan sahpw en Mandai, pwe re en kak tepida mahweniong wasao me aramas ako mwomwen luwet. Oh meninkeder ko ahpw pwurala oh patohwanohng Moronai pakairo.

25 Eri mwurin Moronai eh pwilikihdi ekei nah sounpei ko nan sahpw en Terson, pwe ekei sounpei en Mehn Leimen ko de kohdo nan sahpwo oh kalowehdi kahnihmwo, e ahpw wahda luhwen nah sounpei kan oh karis kohla nan sahpw en Mandai.

26 Oh e ahpw kapokonepene aramas koaros me mih nan sahpwo pwe irail en mahweniong Mehn Leimen ko, pwe re en doare sapwarail kan oh arail wehi, arail pwuhng kan oh arail mour saledek; eri irail onopadahr ong ahnsou me Mehn Leimen kan pahn kohdohng irail.

27 Kedekedeo Moronai ahpw kupwurehda nah sounpei ko re en rukula nan wahu me mi ni keilen pillap Saidon, me mi palikapi en pillap Saidon nan sapwtehno.

28 Oh Moronai kadarala lipoahrok kei nan sahpwo, pwe en kak ese ahnsou me karis en Mehn Leimen kan pahn kohdo.

29 Oh met, pwehki Moronai eh wehwehkier koasoandi en Mehn Leimen kan, oh ar koasoandi me iei en kamwomwala riarail kan, de kaloweiraildi pahn ar manaman oh kaliduwihirailla pwe re en kak wiakihla sahpwo pwon arail wehi.

30 Oh e pil wehwehki me ihte me Mehn Nihpai kan kin inengieng wia iei en doandoarete sapwarail kan, oh arail mour saledek, oh arail mwomwohdiso, eri e medewe me e sohte pahn wia dihp ma e pahn doadoahngki koasoandi en lidip kan pwe en doare irail; eri, e diarada sang nah lipoahrok kan wasa me Mehn Leimen ko pahn keid ie.

31 Eri, e ahpw katohrepeseng nah sounpei kan oh kahrehla ekei irail nan wahuo, oh karukihirailla ni palimese, oh palieir en dohl en Ripla;

32 Oh me luhwe ko e karukihala ni palikapi en wahuo, ni palikapi en pillap Saidon, oh kohdihla ni irepen sahpw en Mandai kan.

33 Oh pwehki e koasoanehdier nah sounpei kan nin duwen dahme e mwahuki, e onopadahr en tuhwong irail.

34 Kedekedeo Mehn Lemein ko ahpw kohdahdo ni paliepeng en dohlo, wasa me ekei nein Moronai sounpei ko wie rukuruk ie.

35 Oh ni ahnsou me Mehn Leimen ko daulihdo dohl en Ripla, oh leledo nan wahuo, oh ni ar kotehdo pillap en Saidon, wasa me sounpei ko wie rukuruk ni palieir en dohlo, iei ohl me kaun pwihn wet mware Lihai. E kahluwahla nah sounpei kan oh kapilpene Mehn Leimen kan ni palimese sang ni tihnsewerail.

36 Kedekedeo ahnsou me Mehn Leimen ko kilangada Mehn Nihpai ko ar wie kohkohdohng irail sang ni tihnsewerail, irail pirekek oh tepida peiong nein Lihai sounpei ko.

37 Oh aramas tepida kamakamala pali koaros, ahpw mehlahn Mehn Leimen kan doar mehlel, pwehki arail kilisou a sohte perehparail sang nein Mehn Nihpai kedlahs kan oh naipokos kan, me kin kahrehda ar kamakamkihla ni kereniong pal koaros.

38 A ekei pak mie me kin pwupwudi rehn Mehn Nihpai kan, sang ni ar palkihdi kedlahs oh keredi en nta laud, pwehki arail perehla wasa kesempwal ni paliwararail kan, de wasa me kesempwal ni paliwarerail kan re perehsang ehn Mehn Leimen ko arail pahn peleiraildi, sang ni arail mehn perehpen nan mwaremwararail kan, oh neirail mehn sansar kan, oh arail lisoarop mete kan; oh met kahrehda Mehn Nihpai kan kemehla Mehn Leimen kan.

39 Kedekedeo Mehn Leimen kan masepwehkada, pwehki kamwomwala me wiawihong irail, lao re tepida sopohlahng ni pillap en Saidon.

40 Oh Lihai oh nah ohl akan pwakih irail; oh Lihai pwakihirailla nan pillap en Saidon, oh irail kotehla pillap en Saidon. Oh Lihai oh nah sounpei kan mihmihte ni keilen pillap Saidon pwe re en dehr kotehla.

41 Kedekedeo Moronai oh nah sounpei kan tuhwong Mehn Leimen ko nan wahuo, apali pillap en Saidon, oh tepida mahweniong irail oh kemeirailla.

42 Oh Mehn Leimen kan pwurehng tepida tangasang irail, kohlahng nan sahpw en Mandai; oh re pil tuhwong nein Moronai sounpei kan.

43 A met mehn Leimen ko peiki uwen ar kehlail koaros; ei, soangen pei kehlail oh kommwad mehlel wet sohte kin wiawi sang mahs kohdo, sangete ni tapio rehn Mehn Leimen ko.

44 Oh Mehn Soram kan oh Mehn Amelek kan me kamwakidada irail, Mehn Soram oh Amelek kan me wia arail sounkaweid oh kaunen sounpeikan, oh Saraemna, me wia arail kaunen sounpei, de arail kaun lapalap me kin katanga mwekid en sounpei; ei, re pei duwehte drahken kei, oh Mehn Nihpai tohto kamakamala pahrail, ei, pwe re pelepeseng arail lisoarop mete kan, oh re koapwoare ar mehn perehpen nan mwarmwararail kan, oh re pelehsang pehrail tohto; oh met Mehn Leimen ko peiki ar lingeringer mehlel.

45 Ahpw, dahme kin kamwakidada Mehn Nihpai kan me siksang mehlel dahme kin kamwakidada Mehn Leimen ko, pwe irail sohte pepeiki wehin nanmwariki de pil manaman ahpw irail pepeiki imwarail kan oh arail mour saledek, arail pwoud kan oh neirail seri kan, oh soahng koaros me arail, ei, arail pwuhng en kaudok oh arail mwomwohdiso.

46 Oh re kapwaiada dahme re wiahki me ar pwukoa me re anahne wia ong arail Koht; pwe Kauno ketin mahsanih ong irail oh pil ong arail pahpa kahlap ako, ketihtihki: Nin duwen amwail sohte pahn tapiada keieu en pingiping, de pil keriauo, kumwail sohte pahn mweidohng kumwail en kamakamala pahn amwail imwintihti kan.

47 Oh Kauno pil pwurehng mahsanih: Kumwail pahn doarehla amwail peneinei kan lao lel kakerehdi nta. Eri iei kahrepe wet me Mehn Nihpai kan kin pelianki Mehn Leimen kan, pwe re en doarehsang pein irail, oh arail peneinei kan, oh sapwarail kan, arail wehi, oh arail pwuhng kan, oh arail pelien lamalam.

48 Kedekedeo ahnsou me nein Moronai ohl akan kilangada en Mehn Leimen kan ar loallap oh lingeringer, irail masepwehkada kerenion oh tangasang irail. Oh Moronai, kasawiada arail pepehm, e ahpw kadarala kaweid pwukat oh kakehlakahki mohngiongarail kan—ei, re en medewe sapwarail akan, arail mour saledek, ei, arail saledek sang mour en lidu.

49 Kedekedeo irail ahpw pirekekiong Mehn Leimen ko, oh re wiahkiteieu lukwerkihong Kauno arail Koht, pwehki arail mour saledek oh arail saledek sang mour en lidu.

50 Oh sang ni manaman re ahpw tepida pelianki Mehn Leimen kan; oh ni ahnsowohte me irail lukwerkihong Kauno ong arail saledek, Mehn Leimen kan tepida tangasang mwohrail; oh irail tangdoaui ni pillap en Saidon.

51 Eri, Mehn Leimen ko tohtohsang irail, ei, pahn pak riau re tohtohkihsang Mehn Nihpai ko; ahpw, re pakahrla lao re kohpene wiahda pokon ehu nan wahuo, ni keilen pillap en Saidon.

52 Eri, nein Moronai sounpei kan kapilirailpene, ei, pali koaros en pillapo, pwe kilang, nein Lihai ohl akan mi palimese.

53 Eri ahnsou me Saraemna kilangada me nein Lihai ohl akan mi palimese en pillap Saidon, oh nein Moronai sounpei kan mi palikapi en pillap Saidon, me Mehn Nihpai kan kapilirailpenehr, irail pwonkilahr ar masepwehk.

54 Eri Moronai, ni e kilangadahr ar masepwehkada kowahlap, e ahpw ruwese nah ohl akan re en tokedihsang kakerehdi nta.