1 Oh met kedekedeo mwurin Alma e kaimwsekalahr eh koasoakoasoiong aramas en mwomwohdiso, me wiahwihda nan kahnimw en Saraemla, e kasarawihla samworo kan oh silepe kan, sang ni pwilidieng pehkan nin duwen koasoandi en Koht, pwe en kaunda oh apwali mwomwohdiso.

2 Kedekedeo mehmen me sohte wia tohn mwomwohdiso ahpw koluhkihla diparail akan papidaisla sang ni ar koluhla, oh tohwehla mwomwohdiso.

3 Oh pil kedekedeo mehmen me iang towe mwomwohdiso ahpw sohte koluhkihla arail wiewia suwed kan oh karakarahkala mwohn Koht—I koasoia irail kan me pohnmwahsohla nan mohngiongarail kan—re kin sosoikla, oh adarail akan kohsang, pwe adarail kan de iang wadawadiong rehn me mwahu kan.

4 Oh met irail tepida koasonehdi koasondi en mwomwohdiso nan kahnihmw en Saraemla.

5 Met I men kumwail en wehwehki me mahsen en Koht e saledekiong koaros, pwehki sohte aramas emen me sohte ahneki pwuhng en patehng mehtei kan rong mahsen en Koht.

6 Ahpw sapwellimen Koht seri kan e wia kosonned ehu me irail en kin kapokonpene ahnsou koaros, oh ehukipene kaisihsol oh kapakap kehlailki ong palingenen irail akan me sohte ese Koht.

7 Oh met kedekedeo ahnsou me Alma wiadahr koasoandi pwukat e ahpw mweselsang rehrail, ei, sang ni mwomwohdiso me mih nan kahnihmw en Saraemla, oh kohla ni pali mese en pilap en Saidon, kohlahng nan wahu en Kidion, wasahu mie kahnihmw ehu wiawihda, me kahdaniki kahnihmw en Kidion, me mih nan wahu me kahdaniki Kidion, me adaniki eden ohl me Nior kemehkihla kedlahs.

8 Oh Alma kohla oh tepida kalohngki mahsen en Koht ong mwomwohdiso me wiawihda nan wahu en Kidion, nin duwen kaudiahl en mahseno eh mehlel me ah pahpau koasoiahier, oh nin duwen ngehn en kokohp me kin ieiang, nin duwen kadehde en Sises Krais, Sapwellimen Kohto, me pahn ketido kamourala sapwellime aramas akan sang diparail akan, oh nin duwen koasoandi sarawi me e malipilipiong. Oh iei met me ntingdier. Ahmen.