1 Kilang riei kesempwaloko, pwehki ei mweimweiongehr en kohdo rehmwail, eri I pahn song kaweid kumwail sang pein ei lokaia; ei, sang pein eweiet, oh pwehki ehdin ei pahn koasoikihong kumwail koasoi me sang ni pein eweiet, pwehki ei kin kedikediropkihte pwukoahn sehr en sounkopwung, oh pwehki ei kin wiewia pwukoa me kahreda I sohte kak kohdo rehmwail.

2 Oh I sohte pahn pil kak kohdo ahnsou wet ma sehr en sounkopwungo sohte kohieng emen aramas tohrohr, me welianiehdi uhd kakaun; oh Kauno sang ni sapwellime kalahngan me ketin mweidohng ie I en kak kohdo rehmwail.

3 Oh kilang, I kohdo ni ei ahneki koapworopwor laud oh inangih me I pahn diar me kumwail karakarahk mwohn Koht, oh me kumwail kin kalapw wie pekipeki sapwellime kalahngan, oh me kumwail mwakelekel mwowe, me kumwail sohte mih nan irair sakanakan me riomwail akan nan Saraemla mih loalle.

4 Ahpw meid pai mwaren Koht, pwe e ketin mwedehngehr I en ese, ei, e ketikihongie peren laud kowahlap en ese me re pwurehngehr koasoneiraildi ni wiepen sapwellime ieias en mour pwung.

5 Oh I koapworopworiki, nin duwen Ngehn en Koht me kin ketiket rehi, me I pahn pil ahneki peren rehmwail; ahpw I sohte men ei peren rehmwail en sang ni kahpwal oh pahtou laud me I ahneki rehn rietail akan nan Saraemla, pwe kilang, ei perenkinirail mwurin ei wiahier doadoahk me wia kahpwal laud oh pahtou laud.

6 Ahpw kilang, I koapworopworiki me kumwail sohte mih nan kahpwal en soupwoson duwehte riomwailko; I koapworopworiki me kumwail sohte pohnmwahsohla nan mohngiongimwail kan; ei, I koapworopworiki me kumwail sohte katengehdi nan mohngiongamwail kan dipwisou kan oh mehkot mwahl en sampah; ei, I koapworopworiki me kumwail sohte kin pwongih dikedik en eni kan, ahpw kumwail kin pwongih Koht mehlel oh ieiaso, oh me kumwail kasikasik kamwakelpen dipamwail akan, sang ni pwoson poatoapoat, me pahn kohdo.

7 Pwe kilang, I ndaiong kumwail me soahng tohto pahn kohdo; oh kilang, mie ehu me keieu kesempwalasang koaros—pwe kilang, ahnsou kerendohr me Soundoaro ieias oh e pahn ketido rehn sapwellime aramas akan.

8 Kilang, I sohte nda me e pahn ketido rehtail ni ahnsou me e pahn ketiket nan paliwar en mour wet; pwe kilang, Ngehno sohte mahsanihong ie me ih met me pahn wiawi. Met I sohte wehwehki soahng wet; ahpw I uwen me I wehwehki me, me Kauno Koht sapwellimaniki manaman en wia soahng koaros nin duwen sapwellime mahsen.

9 Ahpw kilang, iet uwen me Ngehno ketin mahsanihong ie, ketihtihki: Kalohngkihong aramas pwukat, oh ndindahiong irail—Kumwail koluhla, oh kaunopada ahl en Kauno, oh weid nan sapwellime ahl kan, me inen; pwe kilang, wehin nanleng kerendohr, oh Sapwellimen Kohto pahn ketido pohn sampah.

10 Oh kilang, e pahn ipwidisang rehn Mery, nan Serusalem me wia sahpw en atail pahpa kahlapoko, liho wia meipwon men, e rasehng dahl kesempwal oh pilipida ehu, me manaman en Ngehn Sarawi pahn kipehdi oh kaliseianda, oh kaipwiedi pwutak, iei, Sapwellimen Kohto.

11 Oh e pahn ketiwei, oh ketin lokolongki medek kan oh kahpwal akan oh kasongosong kan koaros; oh met pwehki mahseno en kak pweida me ketihtihki me e pahn ketin alehdamedek koaros oh soumwahu koaros me sapwellime aramas akan pahn tungoalenki.

12 Oh e pahn pwoula, pwe en kak sapwadada selin mehla me saliedi sapwellime aramas akan; oh e pahn ketin alehda arail luwet akan, pwe nan kapehde en ketin audaudiki kupwur kalahngan, nin duwen paliwar, pwe en mwahngi nin duwen paliwar mwomwen eh pahn ketin sowese sapwellime aramas akan nin duwen arail luwet akan.

13 Met Ngehno mwahngi soahng koaros; ahpw Sapwellimen Kohto ketin lokolok nan paliwar pwe en kak ketikihda dihp en sapwellime aramas akan, pwe en kak ketikihsang arail dihp akan sang ni sapwellime manaman en kapitala; oh met kilang, iei kadehde wet me mih rehi.

14 Met I ndaiong kumwail me kumwail anahne koluhla, oh ipwsapahl; pwe Ngehno ketin mahsanih ma kumwail sohte pahn ipwsapahl kumwail sohte kak sohsohki wehin nanleng; eri, kohdo oh papidaisla sang koluhla, pwe dipamwail akan en kak kamwakelsang, pwe kumwail en kak pwosonla Sihmpwul en Kohto, me ketikihsang dihp akan en sampah, me sapwellimanki kehl en kamaurala oh kamwakelehsang mour en wiewia suwed kan.

15 Ei, I ndaiong kumwail kohdo oh dehr masak, oh pwilikihdi dihp koaros, me kin mengei en kaluwetehla kumwail, me saliehdi kumwail ong kamwomwomwla, ei, kohdo oh kohwei, oh kasalehiong amwail Koht me kumwail inengieng koluhkihla dipamwail akan oh inoukihong me kumwail pahn kapwaiada sapwellime kosonned akan, oh kadehdehiong ih rahnwet ni amwail pahn kohdihla nan pihl en papidais.

16 Oh mehmen me pahn wia met, oh kolokol kosonned en Koht akan sang ahnsou wet kohla, aramas pahn tamataman me I ndaiong ih, ei, e pahn tamataman me I ndaiong ih, me e pahn ahneki mour soutuk, nin duwen kadehde en Ngehn Sarawi, me kadehdehiong ie.

17 Oh met riei kesempwaloko, kumwail kamehlele mepwukat? Kilang, I ndaiong kumwail, ei, I ese me kumwail kamehlele; oh mwomwen ei ese me kumwail kamehlele iei sang ni kadehde en Ngehno me ketiket rehi. Oh met pwehki amwail pwoson kehlail met, ei, duwen soahng kan me I koasoiahier, I ahneki peren laud.

18 Pwe nin duwen ei ndaiong kumwail nin tapio, me I ahneki kapwoaroapwoar laud me kumwail sohte mihmi nan irair en apwal me riomwail akan mih loale, eri I diaradahr me ei koapworopwor pweidahr.

19 Pwe I kasawiadahr me kumwail mih nan ahl mwahu kan; I kasawiadahr me kumwail mih nan ahl me kohla nan wehin Koht; ei, I kasawiadahr me kumwail kakainenehla sapwellime ahl akan.

20 I kasawiadahr me e sansalehng kumwailehr, sang ni kadehde en sapwellime mahsen, me e sohte kak keid nan ahl pirek kan; de pil wekid dahme e mahsaniher; de pil mwomwen men wetsang pali meing kohla pali maun, de sang dahme mwahu kohlahng dahme sapwung; eri, sapwellime ahl kin wie pidipidek kohkohlahte.

21 Oh e sohte kin ketiket nan tehnpas me sohte sarawi kan; oh pil sohte mehkot samin de soahng kan me sohte mwakelekel alahldi nan wehin Koht; eri I ndaiong kumwail me ahnsou pahn kohdo, ei, oh e pahn wiawi ni imwin rahno, me mehmen me samin pahn pil samsaminte.

22 Oh met riei kesempwal akan, I ndaiong kumwailehr mepwukat pwe I en kak kapirkumwailda ong amwail pwukoa ong Koht, pwe kumwail en kak alialu ni mwakelekel mwowe, pwe kumwail en kak weweid nan ahl en koasoandi sarawi en Kohto, nin duwen me kumwail malipilipiongehr.

23 Oh met I men kumwail en karakarahk, oh mpai oh kadek; mengei en alehda kaweid; diren kanengamah oh nannati nan apwal; kin kaunda nsenemwail kan nan soahng koaros; kin loalloapwoat kolokol kosonned en Koht akan ahnsou koaros; kin kapakapki soahng koaros me kumwail anahne, nan pali ngehn oh paliwar; kin kapikapingkihong Koht ahnsou koaros soahng kan koaros me kumwail alehdi.

24 Oh tehk mwahu me kumwail ahneki pwoson, koapworopwor, oh limpoak unsek, oh kumwail ahpw pahn kin kalapw wiewia doadoahk mwahu kan.

25 Oh Kauno en ketin kapai kumwail, oh kolokol mwakelekel en amwail karmend kan, pwe kumwail en kak iang mwohndi rehn Eipram, Aisek, oh Seikop, oh soukohp sarawi kan me kohdohier sangete ni tepin sampah, ni amwail karment kan pahn mwakelekel duwehte arail karmend kan, nan wehin nanleng oh sohte pahn pwurehng pidohi.

26 Oh met riei kesempwal akan, I koasoiahiong kumwail mahsen pwukat nin duwen Ngehno en ketin kadehdeh ong ie; oh palingeniet perenda kowahlap, pwehki ahmwail loalloapwoat mehlel oh amwail kin rongorong ei kaweid.

27 Oh met, popohl en Koht en ieiang kumwail, oh nan imwamwail akan oh sapwemwail akan, rehn noumwail pelin sihpw oh kou kan, oh soahng koaros me kumwail ahneki, amwail pwoud kan oh noumwail seri kan, nin duwen amwail pwoson oh doadoahk mwahu kan, sang met oh kohkohla. Oh iei met me I koasoiahier. Ahmen.