1 Sikilizeni, Enyi wazee wa kanisa langu, ambao mmekusanyika pamoja katika jina langu, hata Yesu Kristo Mwana wa Mungu aliye hai, Mwokozi wa ulimwengu; kwa sababu mnaliamini jina langu na kushika amri zangu.

2 Tena ninawaambia, sikilizeni na mkasikie na kuitii sheria ambayo nitawapa.

3 Kwani amini ninasema, kama vile wenyewe mlivyokusanyika pamoja kulingana na amri ambayo niliwaamuru, na kukubaliana juu ya jambo hili moja, na mmemwomba Baba katika jina langu, hata hivyo nanyi mtapokea.

4 Tazama, amini ninawaambia, ninawapa amri hii ya kwanza, kwamba mtakwenda katika jina langu, kila mmoja wenu, isipokuwa watumishi wangu Joseph Smith, Mdogo, na Sidney Rigdon.

5 Na ninawapatia wao amri kwamba waende kwa muda mfupi, na itatolewa kwa uwezo wa Roho lini wao warudi.

6 Nanyi mtaenenda katika nguvu ya Roho wangu, mkihubiri injili yangu, wawili wawili, katika jina langu, mkipaza sauti zenu kama kwa sauti ya tarumbeta, mkilitangaza neno langu kama vile malaika wa Mungu.

7 Na mtaenda kubatiza kwa maji, mkisema: Tubuni ninyi, tubuni ninyi, kwa maana ufalme wa mbinguni umekaribia.

8 Na toka mahali hapa mtaenda katika maeneo ya magharibi; na kadiri mtakavyowapata watakaowapokea ninyi mtajenga kanisa langu katika kila eneo—

9 Hadi wakati utakapokuja itakapofunuliwa kwenu kutoka juu, wakati ambao mji wa Yerusalemu Mpya utatayarishwa, ili muweze kukusanyika mahali pamoja, ili muweze kuwa watu wangu na Mimi nitakuwa Mungu wenu.

10 Na tena, ninawaambia, kwamba mtumishi wangu Edward Partridge atasimama katika ofisi ambayo nimemteua. Na itakuwa, kwamba kama atavunja sheria mwingine atateuliwa katika mahali pake. Hivyo ndivyo. Amina.

11 Tena ninawaambia, kwamba haitatolewa kwa yeyote kwenda kuhubiri injili yangu, au kulijenga kanisa langu, isipokuwa ametawazwa na mtu fulani aliye na mamlaka, na ijulikane kwa kanisa kwamba anayo mamlaka na ametawazwa kwa utaratibu na viongozi wa kanisa.

12 Na tena, wazee, makuhani na waalimu wa kanisa hili watafundisha kanuni za injili yangu, ambayo imo katika Biblia na Kitabu cha Mormoni, ambamo umo utimilifu wa injili.

13 Na watayashika maagano na kanuni za kanisa na kuzitenda, na haya yatakuwa mafundisho yao, kama watakavyoelekezwa na Roho.

14 Na Roho atatolewa kwenu kwa sala ya imani; na msipompokea Roho msifundishe.

15 Na hii yote mtaendelea kutenda kama nilivyowaamuru juu ya kufundisha kwenu, hadi utimilifu wa maandiko yangu matakatifu yamejulikana.

16 Na wakati mtakapopaza sauti zenu mkiongozwa na Mfariji, mtanena na kutoa unabii kama nionavyo kuwa vyema;

17 Kwa maana, tazama, Mfariji ajua mambo yote, na humshuhudia Baba na Mwana.

18 Na sasa, tazama, nasema kwa kanisa. Usiue; na yule anayeua hatapata msamaha katika ulimwengu huu, wala katika ulimwengu ujao.

19 Na tena, ninasema, usiue, lakini yule anayeua atakufa.

20 Usiibe; kwani na yule aibaye asipotubu atatupwa nje.

21 Usiseme uongo; yule asemaye uongo na asipotubu atatupwa nje.

22 Mpende mke wako kwa moyo wako wote, na utaambatana na yeye tu na siyo mwingine.

23 Na yule amwangaliaye mwanamke kwa kumtamani anaikana imani, na hatakuwa na Roho; na kama hatatubu atatupwa nje.

24 Usizini; na yule afanyaye uzinzi, na hatubu, atatupwa nje;

25 Bali yule ambaye amezini na kutubu kwa moyo wake wote, na kusahau, na asitende tena, mtamsamehe;

26 Lakini akirudia tena, hatasamehewa, bali atatupwa nje.

27 Usimseme jirani yako uovu, wala usimdhuru.

28 Mnajua sheria zangu juu ya mambo haya zimetolewa katika maandiko yangu; yule atendaye dhambi na hatubu atatupwa nje.

29 Kama wanipenda utanitumikia na kushika amri zangu zote.

30 Na tazama, nanyi mtawakumbuka maskini, na kuweka wakfu baadhi ya mali zenu kwa ajili ya kuwasaidia wao, kile mlichonacho kwa kuwasaidia wao, kwa agano na mkataba ambao hauwezi kuvunjwa.

31 Na kadiri mtakavyotoa sehemu ya mali yenu kwa maskini, mmenitendea Mimi; na mtaiweka mbele ya askofu wa kanisa langu na washauri wake, wawili kati ya wazee, au makuhani wakuu, kama vile atakavyowateua na kuwaweka rasmi kwa madhumuni hayo.

32 Na itakuja kutokea, kwamba baada ya kuwa imewekwa mbele ya askofu wa kanisa langu, na baada ya kuwa amepokea shuhuda hizi juu ya kuwekwa wakfu kwa mali ya kanisa langu, kwamba haiwezi kuchukuliwa kutoka kanisani, kulingana na amri zangu, kila mtu atafanywa awajibike kwangu, mtumishi juu ya mali yake mwenyewe, au ile ambayo ameipokea kwa kuweka wakfu, ilimradi ni ya kutosha kwake mwenyewe na kwa familia yake.

33 Na tena, kama kutakuwa na mali katika mikono ya kanisa, au mmoja wa watu wake, zaidi kuliko mahitaji yao baada ya uwekaji wakfu huu wa kwanza, ambayo ni mabaki yatawekwa wakfu kwa askofu, nayo yatatunzwa kwa kuwahudumia wale wasionacho, mara kwa mara, kusudi kila mtu mwenye shida aweze kupewa vya kutosha na kupokea kulingana na mahitaji yake.

34 Kwa hivyo, mabaki yatatunzwa ghala ni mwangu, kwa kuwahudumia maskini na wenye shida, kama itakavyoamriwa na baraza kuu la kanisa, na askofu na baraza lake;

35 Na kwa madhumuni ya ununuzi wa ardhi kwa manufaa ya jumuia ya kanisa langu, na ujenzi wa nyumba za kuabudu, na ujenzi wa Yerusalemu Mpya ambayo itafunuliwa hapo baadaye—

36 Ili watu wangu wa agano waweze kukusanywa mahali pamoja katika siku ile wakati nitakapokuja kwenye hekalu langu. Na hii nitafanya kwa ajili ya wokovu wa watu wangu.

37 Na itakuwa, kwamba yule ambaye hutenda dhambi na hatubu atatupwa nje ya kanisa, na hatapokea tena kile ambacho alikiweka wakfu kwa maskini na wenye shida wa kanisa langu, au kwa maneno mengine, kwangu Mimi—

38 Kwani kadiri mlivyomtendea mmojawapo wa hawa, mmenitendea Mimi.

39 Kwani itakuwa, kwamba kile nilichokinena kwa vinywa vya manabii wangu kitatimizwa; kwa kuwa nitaweka wakfu utajiri wa wale ambao huikumbatia injili yangu miongoni mwa Wayunani kwa maskini wa watu wangu ambao ni wa nyumba ya Israeli.

40 Na tena, nawe usiwe na majivuno katika moyo wako; mavazi yako yawe ya kawaida, na uzuri wao uwe uzuri wa kazi za mikono yako;

41 Na mambo yote yafanyike katika usafi mbele yangu.

42 Usiwe mvivu; kwani yule aliye mvivu hatakula mkate wala kuvaa mavazi ya mfanya kazi.

43 Na yeyote miongoni mwenu aliye mgonjwa, na hana imani ya kuponywa, lakini anaamini, alishwe mboga na chakula laini, na kwamba siyo kwa mkono wa adui.

44 Na wazee wa kanisa, wawili au zaidi, wataitwa, na watamwombea kwa kuweka mikono yao juu yao katika jina langu; na kama watakufa, watakufa kwangu, na kama wataishi, wataishi kwangu.

45 Nawe utaishi pamoja katika upendo, kwa kiasi kwamba utalia kwa upotevu wa wale wanaokufa, na hasa kwa wale ambao hawana tumaini la ufufuko mtukufu.

46 Na itakuwa kwamba wale wanaokufa kwangu hawataonja mauti, kwani itakuwa vyema kwao;

47 Na wale wasiokufa kwangu, ole wao, kwani kifo chao ni kichungu.

48 Na tena, itakuwa kwamba yule aliye na imani kwangu ya kuponywa, na hakuteuliwa kufa, ataponywa.

49 Yule aliye na imani ya kuona ataona.

50 Yule aliye na imani ya kusikia atasikia.

51 Kiwete aliye na imani ya kuruka ataruka.

52 Na wale ambao hawana imani ya kufanya mambo haya, lakini wanayo imani na Mimi, wanao uwezo wa kuwa wana wangu; ilimradi hawavunji sheria zangu wewe utaubeba udhaifu wao.

53 Utasimama katika mahali pa usimamizi wako.

54 Usichukue vazi la ndugu yako; nawe utalipa kwa kile utakachokipokea kutoka kwa ndugu yako.

55 Na kama utapata zaidi kuliko mahitaji yako, utaitoa katika ghala yangu, kwamba yote yaweze kufanyika kulingana na kile nilichosema.

56 Nanyi mtaniomba, na maandiko yangu yatatolewa kama nilivyonena, nayo yatatunzwa katika usalama;

57 Na ni vyema kwamba yawapasa kunyamaza juu yake, na msiyafundishe hadi mtakapoyapokea katika ukamilifu.

58 Na ninatoa kwenu ninyi amri kwamba ndipo mtayafundisha kwa watu wote; kwani yatafundishwa kwa mataifa yote, makabila, lugha na watu.

59 Utayachukua mambo ambayo umeyapokea, ambayo yametolewa kwako katika maandiko yangu kuwa sheria, kuwa sheria ya kulitawala kanisa langu;

60 Na yule ambaye huyatenda kulingana na mambo haya ataokolewa, na yule ambaye hayatendi atahukumiwa kama ataendelea hivyo.

61 Ikiwa utaomba, nawe utapokea ufunuo juu ya ufunuo, maarifa juu ya maarifa, ili uweze kujua siri na mambo ya amani—yale ambayo huleta shangwe, yale ambayo huleta uzima wa milele.

62 Nawe utaomba, na itafunuliwa kwako kwa wakati wangu mahali ambapo Yerusalemu Mpya itajengwa.

63 Na tazama, itakuwa kwamba watumishi wangu watatumwa mashariki na magharibi, kaskazini na kusini.

64 Na hata sasa, na yule aendaye mashariki awafundishe wale watakaoongoka kukimbilia magharibi, na hii ni katika matokeo ya kile ambacho chaja juu ya ulimwengu, na makundi maovu ya siri.

65 Tazama, nawe utatii mambo haya yote, na thawabu yako itakuwa kubwa; kwani kwako imetolewa kujua siri za ufalme, bali kwa walimwengu haikutolewa kujua.

66 Nanyi mtatii sheria ambazo mmezipokea na kuwa waaminifu.

67 Na hapo baadaye mtapokea maagano ya kanisa, kiasi cha kuwatosha ninyi kuendelea, kote hapa na katika Yerusalemu Mpya.

68 Kwa hivyo, yule ambaye amepungukiwa hekima, na aniombe mimi, na nitampa yeye kwa ukarimu na sitamkemea.

69 Inueni mioyo yenu na mfurahi, kwani kwenu ufalme, au kwa maneno mengine, funguo za kanisa zimetolewa. Hivyo ndivyo. Amina.

70 Makuhani na walimu watapewa usimamizi, hata kama waumini.

71 Na wazee au makuhani wakuu ambao wameteuliwa kumsaidia askofu kama washauri katika mambo yote, familia zao zita saidiwa kwa mali iliyowekwa wakfu kwa askofu, kwa ajili ya maskini, na kwa madhumuni mengineyo, kama ilivyotajwa hapo awali;

72 Au watapokea ujira kwa huduma zao zote, iwe kwa usimamizi au vinginevyo, kama itakavyoonekana vema au kuamuliwa na washauri na askofu.

73 Na askofu pia, atapokea msaada wake, au malipo ya haki kwa huduma zake zote katika kanisa.

74 Tazama, amini ninawaambia, kwamba mtu yeyote miongoni mwenu, atakayemwacha mwenzi wake kwa sababu ya uasherati, au kwa maneno mengine, kama watathibitisha mbele yenu kwa unyenyekevu wote wa moyo kwamba hiyo ndiyo sababu, msiwatupe nje kutoka miongoni mwenu;

75 Lakini kama mtapata mtu yeyote amemwacha mwenzi wake kwa ajili ya uzinzi, naye ndiye mkosaji, na wenzi hao wanaishi, watupwe nje kutoka miongoni mwenu.

76 Na tena, ninawaambia, kwamba mtakuwa waangalifu, kwa kuwahoji, ili msimpokee yeyote wa aina hiyo miongoni mwenu kama wameoa au kuolewa;

77 Na kama hawajaoa au kuolewa, watubu dhambi zao zote, au msiwapokee.

78 Na tena, mtu yeyote aliye wa kanisa hili la Kristo, atazishika na kutii amri zote na maagano ya kanisa.

79 Na itakuwa, kwamba kama mtu yeyote miongoni mwenu ataua atolewe na kushughulikiwa kulingana na sheria za nchi; kwani kumbukeni kwamba yeye hana msamaha; na itathibitika kulingana na sheria za nchi.

80 Na kama mwanaume yeyote au mwanamke atazini, ashtakiwe mbele ya wazee wawili wa kanisa, au zaidi, na kila neno litathibitika dhidi yake kwa mashahidi wawili wa kanisa, na si kwa adui; lakini kama kuna zaidi ya wawili ni bora zaidi.

81 Lakini yeye atahukumiwa kwa vinywa vya mashahidi wawili; na wazee wataliweka shauri mbele ya kanisa, na kanisa litanyosha mkono dhidi yake, ili kwamba waweze kushughulikiwa kulingana na sheria ya Mungu.

82 Na kama yawezekana, askofu ni muhimu awepo pia.

83 Na hivi ndivyo mtakavyofanya katika kila shauri litakalokuja mbele yenu.

84 Na kama mwanaume au mwanamke atapora, huyo atolewe kwa sheria ya nchi.

85 Na kama mwanaume au mwanamke ataiba, hivyo atolewe kwa sheria ya nchi.

86 Na kama mwanaume au mwanamke atadanganya, atolewe kwa sheria za nchi.

87 Na mwanaume au mwanamke atafanya aina yoyote ya uovu, huyo atatolewa kwa sheria, hata ile ya Mungu.

88 Na kama kaka au dada yako amekukosea, utamchukua yeye na kati yenu ninyi peke yenu; na kama atakiri mtapaswa kupatana.

89 Na kama hakiri mtoe kwa kanisa, siyo kwa waumini, bali kwa wazee. Na itafanyika katika mkutano, na kwamba siyo mbele ya ulimwengu.

90 Na kama kaka au dada yako amewakosea wengi, na akavipiwe mbele ya wengi.

91 Na kama mtu yeyote anakosea wazi, na akemewe wazi, ili aweze kuaibika. Na kama hakiri, atolewe kwa sheria ya Mungu.

92 Kama mtu yeyote anakosea kwa siri, akanywe kwa siri, ili aweze kupata nafasi ya kukiri kwa siri kwake yeye aliyemkosea, na kwa Mungu, ili kanisa lisiweze kumfedhehesha.

93 Na hivyo ndivyo mtakavyojiendesha katika mambo yote.