Jajeprováta ha ñañetentáta, ha katu jarresivíta ñeipytyvõ
Élder Hugo Montoya rupive
Setenta-gua
Ikatu ñañopytyvõ ojupe Ñande Ru Yvagagua ra’ykuéraicha ñande prueba ha tentación-pe.
Ñande rekove pukukue, jajeproba ha ñañetenta. Avei, jareko oportunidad ñamomba’a`póvo pe albedrío ha ñañopytyvõ. Ko’ã añetegua niko oĩ pe plan maravilloso ha iporãitéva ryepýpe Ñande Ru Yvagagua mba’éva.
Presidente John Taylor he’i: “Ahendu Profeta José he’i, oñe’ẽvo umi Doce-pe peteĩ jey: ‘Pehasava’erã opáichagua prueba-re. Ha tekotevẽ pejeproba, Abraham ha ambuekuéra Tupã kuimba’éicha, ha (he’ive) Tupã penderekáta ha pende’apyhýta ha oipokáta pene korasõ fibra jepeve’”.1
Ñaǧuahẽvo edad de responsabilidad-pe, umi prueba ha tentación iñuniversalma. Sapy’ánte umíva ikatu ipohyieterei, ha katu avei ome’ẽ ñandéve mbarete ha ñemongakuaa jargueropu’akávo jahávo éxito reheve.
Iporãvéva niko, umi kárga natekotevẽi jaraha ñane’año. Alma ombo’e: “… ha peikesére Tupã redil-pe ha peñehenói ipueblo, ha peĩ dispuesto perahávo ojupe pene mba’e pohyikuéra ivevyive haǧua”2. Ko’ã ñe’ẽ ohechauka jarekoha responsabilidad ñañopytyvõvo ojupe. Pe responsabilidad oǧuahẽkuaa peteĩ llamamiento rupi tupaópe, peteĩ asignación-gui, peteĩ amistad, térã ñande deber divino tuvakuéra ramo, cónyuge, térã miembro-kuéra familia-gua, térã ñaime haguérente jepe Tupã familia ryepýpe.
Ahechaukáta irundy manera ikatutahápe ñande kárga oñembovevyive ñañopytyvõnguévo ojupe.
1. Salvador he’i: “… ha oimeraẽva ndejopývape reraha haǧua peteĩ kárga peteĩ míllare, eraha hendie mokõi”.3 Ejemplo-rõ, ojejerure ñandéve tajaha meme templo-pe ikatuháicha. Pe templo-pe jeho o’implika sacrificio de tiempo ha recurso, especialmente umi ouva’erã mombyrýguipe ĝuarã. Ha katu, ko sacrificio ikatúnte oñekonsidera primera míllaicha.
Ñañepyrũ jaguata segunda milla ña’entendévo umi ñe’ẽ “jejuhu, jegueraha ha mbo’e”4, jahekávo ha ñambosako’ívo umi ñande antepasado-kuéra réra ordenanzas del templo pe ǧuarã, ñaipytyvõramo indexación: ñame’ẽvo servicio obrero ramo templo-pe; ha jahekakuévo mba’eichaitépa japoroipytyvõta ambuekuéra oreko haǧua avei umi experiencias significativa templo-pe.
Asupervisa aja Setenta de Área ramo, peteĩva umi estáka che consejo de coordinación-pegua oho peteĩ excursión templo-pe heta hénte aty reheve. Pe templo ohohápe hikuái niko michĩ, ha ñembyasyrã, oĩ heta miembro, oviaha ramo jepe 12 hora, ndaikatúiva’ekue oike templo-pe ohasárema pe ikapacida.
Ára rire, avisita pe estaka ha oporandu presidente-pe ikatúnepa añemongetami umi miembro-kuéra ndaikatuiva’ekue oike ndive templo-pe upe ára. Peteĩva umi ermáno avisitáva he’i chéve: “Élder, ani rejepy’apy. Che aimékuri Ñandejára rógape. Aguapy peteĩ banco-pe yvotytýpe ha ajepy’amongeta umi ordenanza-kuérare. Upéi ome’ẽ chéve hikuái oportunidad aike haǧua, ha upéa rãngue aheja ojagarra che renda ambue ermáno, oho ramóva hína templo-pe ojesella haǧua hembirekóndi oreko haǧua oportunidad oikévo mokõi sesión-pe upe ára. Ñandejára niko chekuaa, ha Ha’e cherovasa, ha roime porã”.
2. Pepukavy. Ko tembiapo’imínte ikatu oipytyvõ umi oĩvape abrumado térã ikárgavape. Sesión Sacerdocio aja Conferencia General paha ramo abril-peguare, aguapy hína estradope cinco Autoridades Generales oñehenói ramóvandi. Roguapy oguapyhápe umi hermana-kuéra organizaciones auxiliares-pegua. Che niko che nervioso ha aĩ abrumado che llamamiento pyahúre.
Ñañembo’ývo japurahéi haǧua himno intermedio, añandu impresión hatã oĩva omañáva cherehe. Apensa chemba’erã: “20.000 àri niko oĩko edificio-pe ha opavave nunga omaña ágotyo, añete niko oĩne katuete omañáva cherehe”.
Apurahéi aja, añandu jey impresión mbarete oĩha omañáva cherehe. Amaña pe fila oguapyhápe hína umi Doce Apóstoles ha ahecha presidente Russell M. Nelson ojereha isíllape, oma’ẽvo roguapyhápe. Romaña ojupe, ha opukavy chéve. Pe pukavy ogueru py’aguapy che korasõ abrumado-pe.
Irresurrección rire, Jesucristo ovisita ambue Ijovechakuérape. Ohenói ha o’ordena doce discípulo-pe, ha autoridad reheve, oministra hikuái héntekuérape. Ñandejára Jesucristo-ite oñemoĩ imbytépe. Ñandejára ojerure chupekuéra toñesũ ha toñembo’e. Ndaikuaái niko umi discípulo oñehenói ramóva ha oñe’ordenávapa oĩ avei abrumados illamamientore, ha katu pe escritura he’i: “Ha ojehu Jesús ohovasa chupekuéra odirigi aja iñembo’e; ha pe ipukavy hovágui oho hi’arikuéra, ha ohesape chupekuéra hova resape”5 Conferencia general paha aja, peteĩ pukavy ombovevýi che kárga-kuéra sapy’aitépe ha extraordinariamente.
3. Pehechauka peñanduha poriahuvereko opavavére. Perekórõ sacerdocio, peipurumi pende poder Tupã ra’ykuéra rérape, peme’ẽnguévo chupekuéra tovasapy. Peje konsuélo ha py’aguapy rehegua ñe’ẽ umi oñembyasývape ha ohasáva hínape aflicción.
4. Pe piedra de coronación Tupã plan-pe niko ha’e Ñandejára Jesucristo expiación. Peteĩ jeýnte por semana ñameditava’erã ojapoháicha’akue presidente Joseph F. Smith pe “ tuicha ha maravilloso mborayhu ohechaukáva Túva ha Ta’ýra Redentor del mundo jejúvo”.6 Pe ñe’invita ambue hentekuérape ou haǧua tupaópe ha oparticipa haǧua dignamente Santa Cena-pe oguerúta hetave umi ñande Ru Yvagagua ra’ykuéra torreflexiona Expiación-re; ha ndaha’éiramo ñande digno, ikatu ñañearrepenti. Penemandu’áke pe Altísimo Ra’y oguejyha opa mba’e guýpe ha ojagarra hi’ári ñane faltas, pekádo, transgresiones, mba’asy, mba’ehasýva, aflicciones ha soledakuéra. Escritura ñanembo’e Cristo “… oguejyha yvatégui, oguejyháicha opa mba’e guýpe, upévare okomprende opa mba’e”7.
Noñeimportái mávapa umi ñane situación desesperante, taha’e peteĩ mba’asy térã ha’eño ipukúva, terã jahasávo tentación-kuéra ha umi pruebas adversario-gui; pe Buen Pastor oĩ upépe. Ha’e ñanerenói ñande réra rupi ha he’i: “Peju cherendápe opa pemba’apóva ha pejekargáva, ha che pombopytu’úta”.8
Amombykysemi umi irundy puntokuéra:
Peteĩha: segunda milla jeguata
Mokõiha: Pepukavýkena, pende pukavy oipytyvõta ambuekuérape.
Mbohapyha: pehechauka poriahuvereko
Irundyha: pe’invita ambuekuérape ou haǧua tupaópe.
Ame’ẽ che testimonio Ñandejáragui, Jesús ha’eha pe Cristo, Tupã oikovéva Ra’y. Ha’e oikove. Aikuaa Ha’e o’apojaha, opa Imbarete ha Ipoder reheve, pe Itúva plan. Aikuaa presidente Thomas S. Monson ha’eha peteĩ proféta oikovéva. Ha’e orekopa umi lláve ojapo porãmba haǧua Tupã rembiapo yvy ári. Aikuaa ikatuha ñañopytyvõ ojupe Túva Yvagagua ra’ykuéra ramo, umi ñande prueba ha tentacion-kuérape. Jesucristo rérape. Amén.