Ñanderekopotĩ jahupyty haĝua umi promesa oñeme’ẽva’ekue.
Linda S. Reeves rupive
Segunda Consejera Presidencia General Sociedad de Socorro gua
Pe visiõ jarekóva umi ojeguerovia’ỹva jehovasa ñande Ru oprometévagui, ha’eva’erã mba’eguasu ñamoĩva ára ha ára ñande resa renondépe
¿Napeñandúi piko mborayhu pe hermána oĩvare video-pe? Roikuaa heta pende apytépe ndorekóiva mitã imba’eteéva pe hasahague pende rekove pe hayhúvo, pe mbo’évo ha pe hovasávo mitãnguéra; ha péva rupi, ¡mba’eichaitépa penderayhu ñande Ru Yvagagua ha avei ore, pene hermanakuéra!
¿Ndajarekóiva piko ára opavave, jepe umi ñane hermanakuéra ojehayhuetéva Primaria ha Mujeres Jóvenes gua imitã véva, jahupívo peteĩ mitãra’y ñande jyva’ári ha toma’ẽ ñande resáre? Ñañandúpa temiandu sagrado ha santo ojeréva upe espíritu celestial-re, Ñande Ru Yvagagua ombouramõva pe hete’imi potĩ ha oje’aporamóvape? Mbovy ára arekóva temiandu he’ẽte, ikyrỹiete ha hi’espiritual’etéva.
Ñande rete ha’e don sagrado Ñande Ru Yvagagua mba’e. Umíva ha’e templo personal. Jarekóramo ky’a’ỹ ha potĩmbýpe, ñande rekopotĩta ñaipytyvõ hağua Ñande Ru Yvagaguápe jajapo hağua tete umi Ojehayhuetéva ta’ýra ha tajýra oĩva espíritu-pe ğuarã.
Presidente Boyd K. Packer discurso paha conferencia general-pe, ikatúvare pene mandu’a “peteĩ galleta ha peteĩ beso-icha”, ha’e otestifikákuri “pe tembiapoukapy ñamultiplika ha ñamyenyhẽ hağua ko yvy’ape…tekotevẽ…ha ha’eha yvypóra vy’apavẽ gueruha. Ojeporu porãramo ko poder [creativo], ikatu ñañemo’ağui Ñande Ru Yvágaguáre ha ñañandu peteĩ vy’apavẽ paha, divinidad jepe avei. Pe poder de procreación ndaha’éi peteĩ parte secundaria del plan; péva ha’e pe plan.”
Ombojoapyve:
“Mborayhu añetegua ojerure toñeñongatu ñemenda rire ğuarã upe mborayhu mbojoporuka, ojoráva umi poder sagrado… [ñamboykévo] umi situasiõ pe deseo físico ikatuhápe ipu’aka ñande rehe…
“Vy’a jarekóva vida yvy’ariguápe, ñande vy’apavẽ ha ñane exaltasiõ odepende mba’éichapa jaiporu umi deseo físico oĩ meme ha imbaretetéva”1.
Che hermana-kuéra ojehayhuetéva, pende pyahu ha kakuaapámava, arekókuri tuicha jepy’apy ajapo aja ko discurso. Alma ta’ýrava, he’i haguéicha: “… che aipota che korasõ mbytete guive…ta…pehenói héra marangatu, ha pemaña ha peñembo’e meme, ani hağua [pejepy’ara’ã]ve ikatúva pegueropu’akágui,… ára pahápe [peñemopu’ã] hağua.”2
Tenondeve, Mormón otestifikákuri avei Alma árape, Korihor, pe anticristo, “ombo’e chupekuéra, ombojerévo… heta kuña korasõ.”3.
Hemana-kuéra, Sataná omopu’ã ko ñande árape peteĩ estandarte Korihor ojapo haguéigua, ha ohoporã porãvénte chupe. Mba’épa ha’e umi hembiporukuéra? Umi novela romántica seductora, telenovela, kuña omendáva oñe’ẽ ichikokue ndive umi red social-pe, ha pe pornografía. ¡Ñañangareko porãva’erã, queridas hermanas! Ndaikatúi ñañembojaru Sataná arma hendypáva reheve ha ndajakáiri. Ndaikuaái mba’eve ñande kalifikaporã véva pe tekopotĩgui jareko hağua opa ára Espíritu Santo ñanendive.
Heta oĩ ko’ára yvy’ariguápe ohekáva vy’a ha kuaapy pya’e Internet-pe. Peicha’ỹrõ katu, tuicha jajehovasáta ñamomba’apóramo fe ha paciencia, ha jaha, umi ñande py’apýva reheve, Ñande Ru Yvágape, oĩháme opa añetegua. Oĩ hetaite mbohovái ha kuaapyporã ikatúva jahupyty ñahesa’ỹijo ha jastudiávo ára ha ára umi Escritura ha ñembo’e añetegua ha jerure’asýva rupi; ha katu, ndaipóri umíchagua promesa Internet-pe. Profeta Jacob otestifika, “… pe Espíritu oñe’ẽgui añetegua, ha ndaijapúi. Upévare, oñe’ẽ umi mba’e ha’e háicha añetépe, ha umi mba’e ha’éta háicha añetépe”4.
Jahecha, ñamoñe’ẽ térã jajapóramo oimeháichagua mba’e ñande Ru Yvagagua oguerohory’ỹva, péva ñanemokãngy. Taha’e ha’e ñande edá, pe jahecha, ñamoñe’ẽ, ñahendu térã jaiporavóva jajapo noĩporãirõ Ñandejára norma ndive, oĩva Para la Fortaleza de la Juventud-pe, pembogue, pembyai, pemombo, ani pepoko hese ha pemboty pe okẽ.
Ndaipóri ñande apytépe iperfectava, hermanakuéra ahayhuetéva, ha katu japekáramo, presidente Packer ñanemomandu’ákuri:
“Pe promesa ha’e: ‘He aquí, quien se ha arrepentido de sus pecados es perdonado; y yo, el Señor, no los recuerdo más’ (D. y C. 58:42)…
“Pe Expiasiõ, maymavépe ñande rreskatakuaáva, ndohejái kuare. Péva he’ise taha’e ha’e mba’e jajapoakue, moõpa ñaime ra’e ha mba’éichapa oiko ra’e, añetehápe ñañe’arrepentíramo, Ha’e oprometékuri o’expiataha; ha ojapóvo, oñemoĩ porãmba. Oĩ heta ñandekuéra jajekastigáva jaikóvo…ñañandúgui kulpa, jaikuaa’ỹre mba’éicha ñasẽkuaa. Oñesẽ upégui oje’aceptá vove Cristo expiasiõ, ha opa mba’e hasývagui oikokuaa mba’eporã, mborayhu ha eternidad.”5.
Pe arrepetimiento reheve, ¿mba’éichagua pytyvõ ha tembiporu oñeme’ẽkuri ñandéve ñane pytyvõtava ñaime hağua ky’a’ỹ ha tekopotĩme? Opavave ñane mitãnguéra Primaria ha Mujeres Jóvenes gua oikuaa ha opurahéi pe canción “El Poder de las Escrituras”6. Ikatúpa ñambopukuve ja’évo “El poder de la Oración” “El poder del Templo” “El poder de los convénios”, “El poder del día de reposo”, “El poder del profeta” ha “El poder de la virtud”?
Oĩ avei tuicha jehovasa ha promesa ñanemo’ãva jaiporúramo hekopete ñane gármen templo gua. Añandúva jepi amondeha rreikuéra ao che Ru Yvagagua ome’ẽva’ekue chéve. Atestifika, hermanakuéra, ñañeha’ãramo jaiporu hekopete pe gármen, ha’eha ñande Rúpe ğuarã tuicha techaukaha pe mborayhu ha tory jarekóvare Hese. Ha’e peteĩ señal umi konvénio jajapova’ekue Hendive, ha Ha’e oprometeakue: “Yo, el Señor, estoy obligado cuando hacéis lo que os digo, mas cuando no hacéis lo que os digo, ninguna promesa tenéis”7.
Nda’aréi, añe’ẽkuri peteĩ che rapicha ndive, mokõi árama ojopoíva umi iména adicción ha infidelidad rupi. Ha’e ha umi mbohapy imemby tuicha ohasa’asýkuri. Ha’e he’i’asy: “Añeha’ãmbaitékuri aiko hağua tekopotĩme, mba’érepa hetaite prueba areko?, mba’épa ajapo vaí raka’e?, mba’épa che Ru Yvagagua oipota ajapo? Añembo’e ha omoñe’ẽ che Escritura-kuéra, aipytyvõ che membykuéra ha py’ỹi aha témplope”.
Ahendúvo upe hermana, asapukaisékuri: “¡Ejapo hína! ¡Ejapo hína opa mba’e Ñande Ru Yvagagua oipota ha oha’arõva rejapo!”
Ñantendekuaa, heta oĩ he’íva umi jehovasa ñande Ru oprometéva “mombyryete” oĩha, ha péichave ko vida henyhẽvo hína mba’e hasývagui. Ha katu Amulek ombo’eakue “ko tekove [ha’e pe ára]… ñañembosako’iva’erãha ñañemoĩ hağua Tupã renondépe”8 ndaha’éi oñeme’ẽmba hağua ñandéve opa umi jehovasa. Presidente Packer omyesakãakue pe he’íva “… ‘y vivieron felices para siempre’ araka’eve ndojehaíri hague segundo acto-pe ğuarã. Upe fráse ha’e tercer acto-gua, umi oñakýva ojekuaapa ha opa mba’e oñemoĩ porãmba”9. Upévare, pe visiõ jarekóva umi ojeguerovia’ỹva jehovasa ñande Ru oprometévagui, ha’eva’erã mba’eguasu ñamoĩva ára ha ára ñande resa renondépe, ha péicha avei jahechakuaava’erã “umi hetaite iporiahuvereko porã”10 ñañandúva ára ha ára.
Ndaikuaái mba’érepa jareko hetaite prueba jarekóva, ha katu che añandu pe rrekompensa tuichaiteha, hi’eternoite ha ndopamo’ãiha, ñane mbovy’aite ha mombyryve pe ikatúvagui ñantende, ha upe rrekompensa árape, ikatu ja’ese ñande Ru iporiahuvereko ha ñande rayhuetévape, “Pévante piko ha’e opa ojejerureva’ekue?”. Che arovia ikatúrire ñane mandu’a ha jahechakuaa ára ha ára tuichaha mborayhu orekóva ñanderehe Ñande Ru Yvagagua ha ñande Salvador, ñaiméta jajapo hağuáicha oimerãe mba’e jaha jey hağua Hendápe, ojerévo ñande rehe imborayhu eternamente. Mba’e piko oimportáta, hermanakuéra ahayhuetéva, ko’ápe jahasa’asýva, amó ipahápe, umi prueba ha’éramo pe ñanembosako’ítava vida eterna ha exaltasiõrã Tupã Rréinope Hendivekuéra?
Atestifika umi ñande rete ha’eha don sagrado Ñande Ru Yvagagua mba’éva, ha jarekóramo ñande rekove ky’a’ỹ ha potĩme ñande Salvador sacrificio expiatório rupive, ha ñamoĩramo ñande resa nondépe ára ha ára peteĩ perspectiva umi rrecompensa ñande Ru oprometévagui, peteĩ ára oñeme’ẽta ñandéve “todo lo que [nuestro] Padre tiene”11. Jesucristo réra marangatúpe. Amén