Pagtuturo sa Ating mga Anak mula sa mga Banal na Kasulatan

Ni Cheryl C. LantNaglingkod mula Abril 2005 hanggang Abril 2010 bilang

Primary general president

Kahanga-hanga ang kakayahan ng mga bata na maunawaan ang mga alituntunin ng ebanghelyo.

Kailan lang ay may nakilala akong isang grupo ng mga tao mula sa ibang relihiyon na hangang-hanga sa kahandaan ng mga miyembro ng Simbahan na ibahagi ang ating panahon at mga talento sa pagtulong sa kapwa. Gusto nilang malaman kung paano natin tinuturuan ang ating mga anak na maging ganito.

Ipinaliwanag ko na ang pamilya ang sentro sa plano ng ating Ama sa Langit at pangunahing responsibilidad ng mga magulang na turuan at sanayin ang kanilang mga anak. Ang mga lider at mga guro ay sumusuporta lamang sa mga pagsisikap ng mga magulang.

Ang mithiin sa lahat ng ating pagtuturo, sabi ko sa kanila, ay gawin ang sinabi ni Propetang Joseph Smith na ginawa niya nang tanungin siya kung paano niya pinamumunuan ang Simbahan: “Tinuturuan ko sila ng mga wastong alituntunin, at pinamamahalaan nila ang kanilang sarili.”¹

“Ano naman ang mga alituntuning iyon?” tanong ng grupo. “Saan ninyo makikita ang mga ito?”

“Sa mga salita ni Cristo,” ang sagot ko.

Pagpapakabusog sa mga Salita ni Cristo

Hinikayat tayo ni Nephi na “magpakabusog kayo sa mga salita ni Cristo; sapagkat masdan, ang mga salita ni Cristo ang magsasabi sa inyo ng lahat ng bagay na dapat ninyong gawin” (2 Nephi 32:3).

Ang salita ng Diyos ay matatagpuan sa mga banal na kasulatan. Kung gusto nating espirituwal na mapalakas ang ating mga anak, tuturuan natin sila mula sa mga banal na kasulatan at tutulungan silang matutong magpakabusog mismo sa mga sagradong pahinang iyon.

Kahanga-hanga ang kakayahan ng mga bata na maunawaan ang mga alituntunin ng ebanghelyo. Ang mga nagbabasa ng mga banal na kasulatan sa kanilang pagkabata ay karaniwang gumagawa ng pangakong sundin ang mga alituntuning itinuro sa kanila. Kaya nga kailangang may sariling kopya ng mga banal na kasulatan ang mga bata. Kailangan nilang direktang matutuhan mula sa mga banal na kasulatan kung ano ang nais ng kanilang Ama sa Langit na malaman at gawin nila.

Pagtuturo sa mga Bata mula sa mga Banal na Kasulatan

May ilang maiinam na paraan ng pagtuturo sa mga bata mula sa mga banal na kasulatan. Nalaman kong epektibo ang huwarang ito pagkatapos basahin ang isang banal na kasulatan:

Malinaw na tukuyin ang doktrina.
Tulungan ang mga bata na maunawaan ang doktrina.
Tulungan silang ipamuhay ang doktrina.
Hikayatin silang manalangin na pagtibayin ng Espiritu na totoo ang kanilang natututuhan.

Gamitin natin ang Moroni 10:4 bilang halimbawa. Halimbawang nagbibigay ang isang ina ng lesson sa family home evening. Nagsimula siya sa pagpapabuklat sa mga miyembro ng pamilya ng kanilang mga kopya ng Aklat ni Mormon at pagpapabasa sa talata: “At kapag inyong matanggap ang mga bagay na ito, ipinapayo ko sa inyo na itanong ninyo sa Diyos, ang Amang Walang Hanggan, sa pangalan ni Cristo, kung ang mga bagay na ito ay hindi totoo; at kung kayo ay magtatanong nang may matapat na puso, na may tunay na layunin, na may pananampalataya kay Cristo, kanyang ipaaalam ang katotohanan nito sa inyo, sa pamamagitan ng kapangyarihan ng Espiritu Santo.”

Pagkatapos ay isinagawa niya sa pamilya ang apat na hakbang na nakasaad sa itaas.

Tukuyin ang Doktrina. Tanong niya: “Ano ang ipinagagawa sa atin ng Ama sa Langit sa talatang ito? At ano ang ipinangako Niyang pagpapala kung gagawin natin ang ipinagagawa Niya?” Tatalakayin ng pamilya ang mga tanong at malalaman na nais ng Ama sa Langit na basahin natin ang mga banal na kasulatan at pagkatapos ay manalangin nang may pananampalataya, nang may tapat na hangaring malaman ang katotohanan ng binasa natin. Nangangako ang Ama sa Langit na sasagutin ang ating panalangin sa pamamagitan ng pagbibigay sa atin ng katibayan ng katotohanan sa pamamagitan ng Espiritu Santo.

Unawain ang Doktrina. Susunod ay ibabahagi ng ina ang kuwento ni Joseph Smith, na sa pagbabasa ng Biblia nalaman niyang maaari siyang “humingi sa Dios” (Santiago 1:5), ipinagdasal kung aling simbahan ang sasalihan. Nanampalataya siya na sasagutin ang kanyang panalangin. Habang nagdarasal siya, nagpakita sa kanya ang Ama at ang Anak. Ipapaalala ng ina sa pamilya na, siyempre, ang Ama sa Langit at si Jesucristo ay hindi nagpapakita sa lahat ng nagdarasal, ngunit sasagutin ng Ama sa Langit ang taimtim na mga panalangin sa paraang itinuturing Niyang pinakamainam.

Ipamuhay ang Doktrina. Magtatanong ang isang anak, “Ibig sabihin po ba nito sasagutin ng Ama sa Langit ang mga dasal ko?” Sasagot ang ina ng, “Oo. Nakasaad sa Moroni 10:4 na sa pamamagitan ng pag-aaral at panalangin ay malalaman natin ang katotohanan ng lahat ng bagay.” At magpapasiya ang pamilya kung paano susubukan ang pangako ni Moroni.

Humingi ng Katibayan. Ibibigay ng ina ang kanyang patotoo at sasabihin kung paano niya nalaman na totoo ang banal na kasulatang ito. Tatapusin niya ang lesson sa pagtiyak sa pamilya na kapag ginawa nila ang sinabi ni Moroni—pag-aralan ang isang alituntunin ng ebanghelyo na may layuning malaman kung totoo ito—magkakaroon sila ng kalugud-lugod na katiyakan ng katotohanan sa pamamagitan ng pagpapatotoo ng Espiritu.

Ang mga Bata ay Tuturuan ng Panginoon

Habang tinuturuan natin ang ating mga anak na mahalin ang mga banal na kasulatan at matuto mula sa mga ito, ilalagay natin sa kanilang mga puso at kamay ang isang kagila-gilalas na pinagmumulan ng lakas at patnubay habang sila ay nabubuhay. Makikita natin ang katuparan ng pangakong ibinigay sa 3 Nephi 22:13: “At lahat ng iyong mga anak ay tuturuan ng Panginoon; at malaki ang magiging kapayapaan ng iyong mga anak.”

Dingding para sa mga Banal na Kasulatan

Mga ABC at 1-2-3. Gustung-gusto ng mga anak ko na matuto kahit noong maliliit pa sila. Dahil dito, palagi kong sinisikap na matuto sila sa tahanan. Nagsabit ako ng mga poster at mga salita, nagbasa ng maraming aklat, at naghanap ng mga pagkakataon na makapagturo. Isang araw natanto ko na hindi ko masyadong nabibigyang-pansin ang pagtuturo ng ebanghelyo sa kanila.

Yamang ginagamit ko na ang mga dingding ng aking tahanan sa pag-aaral ng mga bata, nagpasiya akong lalo pang gamitin ang mga ito. Ang isang dingding sa lugar na pinaglalaruan ng mga bata ang tila tamang lugar na pagdispleyan ng sining ng ebanghelyo—ng sarili nilang mga drowing o mga larawang gamit sa Simbahan. Idinikit ko ang mga larawan sa mga may kulay na construction paper bago ito inilagay sa dingding. Sa ibaba ng bawat isa, naglagay ako ng simpleng buod ng kuwento na angkop sa kanilang edad. Ang aming “dingding para sa mga banal na kasulatan,” gaya ng tawag dito ng mga anak ko, ay agad naging paboritong lugar sa bahay. Pumili ako ng 14 na bantog na mga kuwento mula sa Aklat ni Mormon at magkakasunod na idinispley ang mga ito. Dahil dito ay mas madaling naintindihan ng mga anak ko ang mahahalagang pangyayari at konsepto kapag nagtatanong sila, at pinag-uusapan namin ang nagaganap sa mga larawan. Alam kong nakaimpluwensya ang aming dingding para sa mga banal na kasulatan nang marinig ko ang tumpak na pagpapaliwanag ng anak ko tungkol sa isa sa mga larawan sa kanyang kalaro.

Bilang mga magulang, nag-uukol tayo ng napakaraming oras sa pagtulong sa ating mga anak na matutuhan ang kailangan nilang malaman upang magtagumpay sa paaralan. Ang mas mahalaga, dapat nating alalahaning tulungan ang ating mga anak na matuto at madagdagan ang kaalaman sa ebanghelyo.

Kathleen Parrish Smith, Utah, USA

Pang-Araw-Araw na mga Kaisipan mula sa mga Banal na Kasulatan para sa Maliliit na Anak

Bilang ina ng maliliit na bata, nagsimula akong manalangin araw-araw upang malaman kung ano ang kailangang matutuhan ng aking mga anak. Kadalasan ang sagot ay ganito: ang mga pinakamahalagang bagay na ituturo ay ang mga pangunahing katotohanan ng ebanghelyo at ang kakayahang magtrabaho o gumawa. Tuwing umaga ibinabahagi naming mag-asawa ang isang espirituwal na kaisipan at aming patotoo sa maliliit naming mga anak. Sa loob ng 30 minutong paghahanda tuwing Linggo, natitipon namin ang mga materyal na pang-isang linggo. Ang mga larawan ng sining ng ebanghelyo, mga kanta sa Primary, Mga Kuwento sa Lumang Tipan, at mga ideya mula sa mga magasin ng Simbahan ay nakatutulong nang malaki.

Sining ng Ebanghelyo. Yamang epektibo ang pagtuturo gamit ang mga larawan, natuklasan kong malaking tulong ang mag-print ng mga kopya nito mula sa gospelart.lds.org. Sa ganyang paraan mabibigyan namin ng larawan ang aming mga anak, at matitingnan nila ito at mahahawakan habang pinag-uusapan ang nakikita namin.
Mga Kanta sa Primary. Kung minsan sinisikap naming pag-aralan ang isang bagong kanta sa Primary nang magkakasama, lalo na ang mga kantang may galaw o aksiyon.
Mga Kuwento sa Lumang Tipan. Isang pahina lang ang binabasa namin sa isang araw. Bago magbasa, karaniwang mayroon kaming visual aid o object lesson upang muling bigyang-diin ang mga kuwentong natalakay na namin. Halimbawa, nilagyan ko ng pulang food coloring ang tubig isang araw at nagtanong kung may naaalala ba silang panahon sa mga banal na kasulatan na ang tubig ay ginawang mapula ng Panginoon.
Mga Magasin ng Simbahan. Kung minsan nagbabahagi kami ng isang mensahe sa pamamagitan ng aktibidad na nauugnay sa ebanghelyo. Halimbawa, minsan nag-print kami ng ilang kopya ng isang larawan na nagpapakita na nagbibigay ng munting regalo ang mga bata sa matatanda. Magkakasama naming tinalakay ang kahalagahan ng pagmamahal at paglilingkod sa mga “lolo at lola.” Ang isang-taong gulang na anak namin noon ay nagguhit-guhit sa larawan habang hinahanap naman ng aming preschooler ang nakatagong mga bagay na nakapaloob dito.

Ilang saglit lang ang kailangan sa pagbabahagi ng espirituwal na kaisipan, ngunit mas matagal ang epekto nito. Kung minsan hahablutin ng aming preschooler ang magasin at nagugulat ako na naibubuod niya ang ilan sa mga kuwento at mga alituntunin ng ebanghelyo na aming napag-aralan. Sa paglaki ng aming mga anak, ipinagpatuloy namin ang aming mga debosyonal sa oras ng almusal—kahit sa mga umagang abala, kung saan madalas kaming magbahagi ng maikling mensahe habang tinatapos nila ang pag-aalmusal.

Nagpapasalamat ako sa maraming napakagagandang materyal na inilalaan ng Simbahan upang tulungan tayong mapanatiling malapit ang ating mga anak sa Espiritu. Sa paghahanda namin sa bawat linggo, malugod naming tinatanggap ang mga personal na paghahayag sa pagtuturo sa aming mga anak. At mas napapalapit kami sa Ama sa Langit sa paghahanap namin ng pinakamaiinam na paraan upang mas mapalapit sa Kanya ang aming mga anak.

Alejandra Adams, Virginia, USA

Retrato ni Sister Lant © Busath.com; paglalarawan ni John Luke; mula kaliwa: Dumating si Lehi at ang Kanyang mga Tao sa Lupang Pangako, ni Arnold Friberg, © 1951 IRI; Si Noe at ang Arka na may mga Hayop, ni Clark Kelley Price, sa kagandahang-loob ng Church History Museum; Naghanap si Joseph Smith ng Karunungan mula sa Biblia, ni Dale Kilbourn, © 1975 IRI; Ang Mabuting Samaritano, ni Walter Rane, sa kagandahang-loob ng Church History Museum; At Nagutom ang Aking Kaluluwa—Enos, ni Al R. Young; Nagpakita si Elijah sa Kirtland Temple, ni Daniel Lewis

Mula kaliwa sa itaas: Pinagsabihan ni Nephi ang Kanyang Rebeldeng mga Kapatid, ni Arnold Friberg, © 1951 IRI; Nagbinyag si Alma sa mga Tubig ng Mormon, ni Arnold Friberg, © 1951 IRI; Ang Pagbabalik-loob ni Alma, ni Gary Kapp, © 1996 IRI; Dalawang Libong Kabataang Mandirigma, ni Arnold Friberg, © 1951 IRI; Ibinaon ni Moroni ang mga Lamina, ni Tom Lovell, © IRI; Si Rebecca sa Tabi ng Balon, ni Michael Deas, © 1995 IRI; paglalarawan ni Phyllis Luch, © 1987 IRI