យុវមជ្ឈិមវ័យ
ផែនការដ៏ល្អឥតខ្ចោះ
តើនៅពេលណាជាលើកចុងក្រោយគេ ដែលផែនការរបស់អ្នកបានបរាជ័យ ? សប្ដាហ៍មុនឬ ? ផែនការខ្ញុំបានបរាជ័យកាលពីសប្តាហ៍មុន ។ មិនថាផែនការយើងល្អឥតខ្ចោះប៉ុណ្ណានោះទេ ភាពពុំបានរំពឹងទុកបានផ្លាស់ប្តូរនៅក្នុងជីវិតយើង ទំនងជាកើតមានដល់មនុស្សគ្រប់គ្នា ។ ខ្ញុំពុំធ្លាប់បានគ្រោងផែនការដើម្បីរលូតកូនចំនួនបួនដងនៅចន្លោះនៃការមានកូនទាំងពីររបស់ខ្ញុំឡើយ ប៉ុន្តែខ្ញុំបានរលូតកូនបួនដង ។ ពេលផែនការដែលយើងបានដាក់ប្រកបដោយការអធិស្ឋានបានប្រែទៅជាអ្វីដែលយើងពុំបានរំពឹងទុក—ឬពុំដំណើរការសោះ—តើយើងធ្វើដូចម្តេច ? នៅក្នុងបញ្ហានេះ យុវមជ្ឈិមវ័យដែលមានស្ថានភាពផ្សេងៗគ្នាចែកចាយចម្លើយដែលពួកគេមានចំពោះសំណួរនេះ ពេលផែនការគ្រួសាររបស់ពួកគេពុំដំណើរការតាមការគ្រោងទុក ។
សម្រាប់ខ្ញុំ និងស្វាមីខ្ញុំ ការរលូតកូនបានធ្វើឲ្យយើងប្តូរផែនការរបស់យើង ហើយធ្វើឲ្យយើងខូចចិត្ត ( សូមមើលទំព័រ ៤៤ ) ។ សម្រាប់ខាធើរីន និងស្វាមីគាត់ ការមើលទៅគំនិតរបស់សង្គមដើម្បីរកឃើញសំឡេងនៃព្រះអម្ចាស់ បានក្លាយជាការលំបាកមួយនៅលើផ្លូវរបស់ពួកគេ ( សូមមើលទំព័រ ៤៨ ) ។
ក្រៅពីអត្ថបទដែលមានតែជាឌីជីថល គ្រីស្ទីណាចែកចាយការភ័យខ្លាច និងការរុញរារបស់គាត់អំពីការក្លាយជាម្តាយមួយរូប ហើយប្រៃអិនបានប្រាប់លម្អិតពីការចេញទៅបម្រើកងទ័ព ស្ទើរតែបញ្ចប់ផែនការគ្រួសាររបស់គាត់ និងប្រពន្ធគាត់ ។ ខាធីយុវមជ្ឈិមវ័យនៅលីវម្នាក់ផ្តល់ការយល់ដឹង អំពីលក្ខណៈអស់កល្បនៃអត្តសញ្ញាណរបស់យើងក្នុងនាមជាឪពុកម្តាយ ។
ទោះបីអ្នកកំពុងរង់ចាំមានកូនដើម្បីផ្តល់ពរដល់ផ្ទះរបស់អ្នកក្តី ការមានកូនច្រើនជាងគម្រោងដើមរបស់អ្នក ឬការរង់ចាំការរៀបអាពាហ៍ពិពាហ៍ មានអ្វីមួយដែលពិតប្រាកដ ៖ ព្រះវរបិតាសួគ៌មានផែនការល្អឥតខ្ចោះ ហើយទ្រង់ដឹកនាំ និងគាំទ្រយើងតាមរបៀបមួយដោយផ្ទាល់ ដោយរៀងៗខ្លួន ពេលយើងព្យាយាមសម្របឆន្ទៈយើងទៅនឹងព្រះទ័យរបស់ទ្រង់ ។
ដោយមិនគិតពីលទ្ធផល ចំណង់ដើម្បីមានកូនមកកាន់ពិភពលោកនេះ នឹងផ្តល់ពរដល់យើងជាមួយនឹងការមានទស្សនវិស័យកាន់តែប្រសើរឡើង អំពីផែនការនៃសុភមង្គលដ៏មហិមារបស់ព្រះវរបិតាសួគ៌ ។ ទោះបីនៅក្នុងដំណាក់កាលណាក៏ដោយនៃការចិញ្ចឹមបីបាច់គ្រួសាររបស់អ្នកក្នុងពេលនេះ ពេលអ្នកអានរឿងរបស់យើង នោះខ្ញុំសង្ឃឹមដោយស្មោះសរថា ព្រះវិញ្ញាណបរិសុទ្ធនឹងដឹកនាំអ្នកទៅរកការយល់ដឹង ឬចម្លើយដែលអាចជួយអ្នកនៅតាមដំណើររបស់អ្នកបាន ។
សូមរីករាយនឹងការអាន !
ម៉ារីអាន វ៉ុន ប្រាច