Toko 14
I Abinadia sy i Noà Mpanjaka
Mpanjaka mendrika teo amin’ny vondrona Nefita iray i Zenifa. Rehefa niha-antitra izy dia lasa mpanjaka i Noà zanany lahy.
Tsy mpanjaka tsara tahaka ny rainy i Noà. Ratsy fanahy izy ary tsy nety nankato ny didin’ Andriamanitra.
Notereny ny vahoakany hanome azy ampahany amin’ny voan’izy ireo, ny biby fiompin’izy ireo, sy ny volamenan’izy ireo ary ny volafotsin’izy ireo izy.
Ny hakamoan’i Noà mpanjaka no nahatonga azy hanao izany. Notendreny ny Nefita hanome azy izay rehetra ilainy amin’ny mba hivelomany.
Nosoloiny mpisorona ratsy fanahy ireo mpisorona tsara fanahy voantson-drainy. Nampianatra ny vahoaka hanota ireo mpisorona ratsy fanahy ireo.
Nampanamboatra trano tsara tarehy maro i Noà mpanjaka ao anatin’izany ny lapa malalaka be nisy seza fiandrianana. Voaravaka tamin’ny volamena sy volafotsy ary hazo lafo vidy ireo trano ireo.
Tian’i Noà mpanjaka ny harena nalainy tamin’ny vahoakany. Nandany ny fotoany tamin’ny fisotroana divay sy ny fanaovana ny ratsy izy sy ny mpisorony.
Naniraka mpaminany antsoina hoe Abinadia Andriamanitra hankany amin’ny vahoakan’i Noà. Nampitandrina azy ireo i Abinadia fa raha tsy mibebaka izy ireo dia ho lasa andevon’ny Lamanita.
Rehefa naheno izay nolazain’i Abinadia i Noà mpanjaka, dia tezitra izy. Naniraka ny lehilahiny hitondra an’i Abinadia any amin’ny lapa mba hahafahany mamono azy izy.
Nentina tany amin’ny mpanjaka i Abinadia. Nametraka fanontaniana maro taminy i Noà mpanjaka sy ny mpisorony. Nitady ny hamitaka azy mba hilaza zavatra diso izy ireo.
Tsy natahotra ny hamaly ny fanontanian’izy ireo i Abinadia. Fantany fa hanampy azy Andriamanitra. Talanjona tamin’ireo valin-tenin’i Abinadia ireo mpisorona.
Tezitra i Noà mpanjaka ary nandidy ny mpisorony mba hamono an’i Abinadia. Niteny i Abinadia fa raha mikasik’azy izy ireo dia hovonoin’ Andriamanitra.
Niaro an’i Abinadia ny Fanahy Masina mba hahafahany mamarana ny teny izay nampitenenan’ny Tompo azy. Namiratra ny tavan’i Abinadia. Natahotra ny hikasik’azy ireo mpisorona.
Raha niteny tamin’ny herin’ Andriamanitra i Abinadia dia niteny tamin’ny vahoaka momba ny faharatsian’izy ireo izy. Novakiny tamin’izy ireo ny didin’ Andriamanitra.
Nambarany azy ireo fa ho teraka eto an-tany i Jesoa Kristy. Jesoa no hahatonga ny vahoaka ho afaka hibebaka, sy hitsangana amin’ny maty ary hiaina miaraka amin’ Andriamanitra.
Nasain’i Abinadia nibebaka sy nino an’i Jesoa Kristy ny vahoaka raha tsy izany dia tsy ho voavonjy izy ireo.
Tsy nety nino an’i Abinadia i Noàmpanjaka sy ny mpisorony rehetra afa-tsy anankiray. Nasain’i Noà novonoin’ireo mpisorony i Abinadia. Nofatoran’izy ireo sy natsipin’izy ireo tany am-ponja izy.
Almà no anaran’ilay mpisorona iray izay hany mba nino an’i Abinadia. Niangavy an’i Noà mpanjaka izy mba hanafahany an’i Abinadia.
Tezitra tamin’i Almà ny mpanjaka ka nanasainy noroasina hivoaka. Avy eo dia naniraka ny mpanompony izy hamono azy. Nandositra sy niafina i Almà ary tsy nahita azy intsony ireo mpanompo.
Rehefa naharitra telo andro tao am-ponja dia nentina indray teo anoloan’i Noà mpanjaka i Abinadia. Niteny tamin’i Abinadia ny mpanjaka mba hanatsoaka ny teniny momba azy sy ny vahoakany.
Niteny tamin’i Abinadia i Noà mpanjaka fa raha tsy mandà ny teny rehetra izay nolazainy izy dia hovonoina.
Fantatr’i Abinadia fa niteny ny marina izy. Nanaiky ny ho faty izy fa tsy hanatsoaka izay nanirahan’ Andriamanitra azy ho lazaina.
Nandidy ny mpisorony hamono an’i Abinadia i Noà mpanjaka. Nofatoran’izy ireo , sy nokapohany izy ary nodoran’izy ireo ho faty. Talohan’ny nahafatesany dia nolazain’i Abinadia fa ho faty amin’ny afo ihany koa i Noà mpanjaka.
Nisy Nefita sasantsasany nanohitra an’i Noà mpanjaka ary nitady ny hamono azy. Tonga ihany koa ny tafika Lamanita hiady amin’ny mpanjaka sy ny mpanara-dia azy.
Nandositra ny Lamanita ny mpanjaka sy ny mpanara-dia azy nefa tratran’ny ny Lamanita izy ireo ary nanomboka namono azy ireo. Niteny tamin’ireo lehilahiny ny mpanjaka mba handao ny fianakaviany ary hanohy handositra ihany.
Maro tamin’ireo lehilahy no tsy nety nandeha. Voasambotry ny Lamanita izy ireo.
Nalahelo ny ankabeazan’ny lehilahy izay nandositra niaraka tamin’i Noà Mpanjaka. Te hiverina sy hanampy ny vady aman-janany sy ny vahoakany izy ireo.
Tsy tian’i Noà Mpanjaka ny hiverenan’ireo lehilahy any amin’ny fianakavian’izy ireo. Nandidy azy ireo hijanona miaraka aminy izy.
Tezitra tamin’i Noà Mpanjaka ireo lehilahy. Nandoro azy ho faty izy ireo, araka ny faminanian’i Abinadia. Avy eo dia niverina tany amin’ireo fianakaviany avy izy ireo.