Toko 5

Ny dia tany an-tany foana

Tian’ny Tompo ny hananan’ny zanakalahin’i Lehia vady izay hampianatra ny zanak’izy ireo ny filazantsara. Niteny tamin’i Lehia Izy mba haniraka ireo zanany lahy hiverina any Jerosalema haka ny ankohonan’i Isimaela.

1 Nefia 7:1–2

Niverina tany Jerosalema i Nefia sy ny rahalahiny. Notenenin’izy ireo tamin’i Isimaela ny zavatra izay tian’ny Tompo ho ataony. Nino azy ireo i Isimaela ary nanaraka ireo zanakalahin’i Lehia izy sy ny ankohonany.

1 Nefia 7:3–5

Nandritra ny dian’izy ireo tany an-tany foana, dia tezitra i Lamàna sy i Lemoela sy ny sasany tamin’ny ankohonan’i Isimaela. Te hiverina any Jerosalema izy ireo.

1 Nefia 7:6–7

Nampahatsiaro an’i Lamàna sy i Lemoela ny zavatra rehetra efa nataon’ny Tompo ho azy ireo i Nefia. Noteneniny izy ireo mba hanana finoana bebe kokoa. Tezitra tamin’i Nefia izy ireo saingy tsy niverina tany Jerosalema.

1 Nefia 7:8–13, 16, 21

Nanambady ny zanakavavin’i Isimaela i Nefia sy ny rahalahiny ary i Zôrama taorian’izany.

1 Nefia 16:7

Niteny tamin’i Lehia ny Tompo mba hanohy ny diany. Ny ampitson’iny dia nahita bola varahina nantsoina hoe Liahona tao ivelan’ny lainy i Lehia. Nanondro ny làlana tokony handehanana any an-tany foana ilay izy.

1 Nefia 16:9–10

Nanangona sakafo sy voa ary nangorona ny lain’izy ireo ny ankohonan’i Lehia. Nandeha namakivaky tany foana nandritra ny andro maro izy ireo, nanaraka ny torolàlan’ny Liahona.

1 Nefia 16:11–16

Nihaza tamin’ny tsipìka sy zanatsìpika i Nefia sy ny rahalahiny mba hahazoany sakafo mandritra ny dian’izy ireo.

1 Nefia 16:14–15

Tapaka ny tsipìkan’i Nefia vita amin’ny vy, ary godraka ny tsipìkan’ny rahalahiny. Tsy afaka namono biby ireo mpirahalahy, ka noana ny rehetra. Tezitra i Lamàna sy Lemoela.

1 Nefia 16:18–21

Nanamboatra tsipìka tamin’ny hazo i Nefia ary nanontany ny rainy hoe aiza no tokony handehanany hihaza. Nandray torolalana tamin’ny Liahona i Lehia. Nanaraka ny torolalana i Nefia ary nahita biby maro izy.

1 Nefia 16:23, 26, 30–31

Rehefa mahatoky sy mazoto ary rehefa mankato ihany ny ankohonan’i Lehia vao nandeha ny Liahona.

1 Nefia 16:28–29

Niverina niaraka tamin’ny biby azony i Nefia. Faly ny rehetra fa nahazo sakafo. Nanenina tamin’ny fahatezerany izy ireo ka nisaotra an’Andrimanitra noho ny fitahiany azy ireo.

1 Nefia 16:32

Tsy mora ny dia. Matetika no vizana, sy noana ary mangetaheta ny ankohonan’i Lehia. Nodimandry i Isimaela ary dia nalahelo azy ireo zanany vavy. Nimoimoy tamin’i Lehia izy ireo.

1 Nefia 16:34–35

Nimoimoy ihany koa i Lamàna sy i Lemoela. Tsy nino izy ireo hoe niresaka tamin’i Nefia ny Tompo. Naniry ny hamono an’i Lehia sy Nefia izy ireo, ary hiverina any Jerosalema.

1 Nefia 16:37–38

Niteny tamin’ i Lamàna sy i Lemoela ny feon’ny Tompo. Niteny tamin’izy ireo izany mba tsy ho tezitra amin’i Lehia sy Nefia. Nibebaka i Lamàna sy i Lemoela.

1 Nefia 16:39

Nanohy ny dian’izy ireo izay sarotra ny fianakavian’i Lehia. Nanampy sy nankahery azy ireo Andriamanitra. Nisy zaza teraka Nanan-janakalahy roa hafa i Lehia sy i Sarià, izay nantsoina hoe i Jakôba sy i Josefa.

1 Nefia 17:1–3; 18:7

Rehefa nandeha nandritry ny valo taona tany an-tany foana ny fianakavian’i Lehia, dia tonga teo amoron’ny ranomasina. Nahita voankazo sy tantely teo izy ireo. Nantsoin’izy ireo hoe Soafeno ilay toerana.

1 Nefia 17:4–6