Toko 3
Mandao an’i Jerosalema i Lehia
Faly tamin’i Lehia ny Tompo ary indray alina dia niteny taminy tao anaty nofy Izy. Niteny tamin’i Lehia Izy mba hitondra ny fianakaviany ary handao an’i Jerosalema. Nankato ny Tompo i Lehia.
Nanangona sakafo sy trano lay ny fianakavian’i Lehia. Nilaozan’izy ireo ny tranony sy ny volamenany sy ny volafotsiny ary dia nandeha tany an-tany foana izy ireo.
Nanan-janakalahy efatra i Lehia sy i Sarià vadiny. Lamàna, Lemoela, sy Samy, ary Nefia no anaran’izy ireo.
Rehefa avy nandeha nandritry ny telo andro izy ireo, dia nilasy teo an-dohasaha akaikina renirano ny fianakavian’i Lehia.
Nanangana alitara vita amin’ny vato sy nanao fanatitra ho an’ Andriamanitra i Lehia. Nisaotra an’ Andriamanitra izy noho ny famonjena ny fianakaviany tamin’ny fandravana.
Nomen’i Lehia anarana hoe Lamàna ny ony ary Lemoela ny lohasaha. Naniry ny zanakalahiny ho tahaka ny ony sy ny lohasaha i Lehia, mba hikoriana mandrakariva mankany amin’ Andriamanitra sy tsy miovaova amin’ny fitandremana ny didy.
Noheverin’i Lamàna sy i Lemoela fa adala ny rainy raha nandao an’i Jerosalema sy ny harenan’izy ireo. Tsy nino izy ireo fa ho ravana i Jerosalema.
Naniry ny hahatakatra ny zavatra hitan’i Lehia i Nefia. Nivavaka izy mba hahafantatra raha mety ny nandaozan’ny rainy an’ i Jerosalema.
Nitsidika an’i Nefia i Jesoa Kristy ary niteny taminy fa marina ireo tenin’i Lehia. Nino ary tsy nikomy tahaka an’i Lamàna sy Lemoela i Nefia.
Nolazain’i Nefia tamin’ireo rahalahiny ny tenin’i Jesoa taminy. Nino an’i Nefia i Samy, fa i Lamàna sy i Lemoela kosa tsy nety nino.
Nanome toky an’i Nefia ny Tompo fa hotahiany izy noho ny finoany. Ho lasa mpifehy ny rahalahiny izy.