Toko 43
Niseho tamin’ireo Nefita i Jesoa Kristy
Nefita maro no nivory teo amin’ny tempoly tao Soafeno. Talanjona tamin’ireo fiovana lehibe teo amin’ny tany izy ireo.
Niresaka momba an’i Jesoa Kristy sy ny fambara amin’ny fahafatesany ny olona.
Raha mbola niresaka izy ireo dia nandre feo malefaka avy any an-danitra. Nampamaivay ny fon’izy ireo ilay izy.
Tamin’ny voalohany dia tsy azon’izy ireo ilay feo fa rehefa niteny fanintelony kosa dia azon’izy ireo.
An’ny Ray any An-danitra ilay feo. Nampahafantatra an’i Jesoa Kristy ilay izy ary nilaza ny vahoaka mba hihaino azy.
Nidina avy tany an-danitra i Jesoa Kristy ary nijoro teo anivon’ny olona. Natahotra ny hiteny izy ireo satria tsy fantatr’izy ireo ny zava-mitranga. Noheverin’izy ireo fa anjely i Jesoa.
Nolazainy azy ireo fa izy ilay Jesoa Kristy nambaran’ireo mpaminany fa ho avy.
Nasain’i Jesoa nanatona azy ny olona ka nitsapa ireo holatra teny amin’ny lanivoany sy teny amin’ny tanany sy ny tongony izay namantsihana azy teo amin’ny hazofijaliana.
Tian’i Jesoa ho fantatry ny olona fa izy no Andriamanitr’izy ireo; fa izy dia maty ho an’ny fahotan’izy ireo.
Ny olona tsirairay dia nitsapa ireo holatra teny amin’ny lanivoany, sy ny tanany ary ny tongony. Fantatry ny vahoaka fa izy no Mpamonjy.
Avy eo dia nidera an’i Jesoa ny vahoaka sy nianjera teo an-tongony ary nitsaoka azy.
Niantso an’i Nefia sy lehilahy 11 hafa i Jesoa hanatona azy. Nomeny ny herin’ny fisoronana izy ireo ary nampianariny ny tena fomba fanaovana batisa.
Nasainy ny Nefita mba hino azy, sy hibebaka ary hitandrina ny didiny. Raha tsy manao izany izy ireo dia tsy afaka miditra ny fanjakany.
Nampianariny ny Nefita ny fomba fivavahana amin’ny Ray any An-danitra. Nampianariny azy ireo ihany koa momba ny fifadian-kanina ary nilaza izy fa ho voavela ny helok’izy ireo raha mifamela heloka izy ireo.
Rehefa avy nampianatra zavatra maro ny vahoaka i Jesoa, dia nasainy nody any an-tranony izy ireo sy hivavaka momba ny zavatra nambarany.
Nanomboka nitomany ny Nefita. Tsy mbola tian’izy ireo handeha i Jesoa.
Tian’i Jesoa ny Nefita. Nasainy nentin’izy ireo teny aminy ireo izay marary na maratra mba hositraniny.
Nositranin’i Jesoa ireo vahoaka ireo. Niankohoka teo ananatrehany ny rehetra ary nitsaoka azy.