Toko 50
Mandao an’i Babela ny vahoaka Jaredita
Lehilahy marina i Jareda sy ny rahalahiny. Nipetraka tao amin’ny tanàna nantsoina hoe Babela izy ireo. Niaina an-jato taona maro talohan’ny Nefita izy ireo.
Olon-dratsy ny ankabeazan’ireo olona tao Babela. Nanangana tilikambo izy ireo mba hanatrarana ny lanitra. Tezitra ny Tompo ary novainy ny fitenin’izy ireo.
Nasain’i Jareda nivavaka ny rahalahiny ka hangataka amin’ny Tompo mba tsy hanovany ny fitenin’ny fianakavian’izy ireo sy ny an’ny naman’izy ireo.
Nivavaka ny rahalahin’i Jareda ary namaly ny vavaka nataony ny Tompo. Mbola afaka mifankahazo teny i Jareda sy ny rahalahiny ary ny fianakavian’izy ireo sy ny naman’izy ireo.
Nilaza tamin’ny rahalahin’i Jareda ny Tompo mba hanangona ny fianakaviany sy ireo namany ka hiala teo amin’ny tany. Nentin’izy ireo nanaraka azy ny bibiny sy voa isan-karany rehetra.
Nilaza ny Tompo fa Izy dia hitondra azy ireo ho any amin’ny tany nampanantenaina iray.
Nisambotra vorona sy trondro ireo Jaredita mba ho entiny miaraka amin’izy ireo.
Nitondra andiana renintantely izy ireo.
Nandeha tany an-tany foana ireo Jaredita. Tao amin’ny rahona no niresahan’ny Tompo tamin’izy ireo sy nanoroany ny lalana tokony halehan’izy ireo.
Nilaza ny Tompo fa ireo olona izay mipetraka eo amin’ny tany nampanantenaina dia tsy maintsy manompo an’ Andriamanitra raha tsy izany izy ireo dia hofongorana.
Namelatra ny lain’izy ireo ny Jaredita rehefa tonga teo amoron-dranomasina izy ireo. Nipetraka nandritra ny efa-taona teo akaikin’ny ranomasina izy ireo.